Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 12 2014

Tudisuikayi pamue bua kupita bimpe ne nshikidilu wa ndongoluelu eu

Tudisuikayi pamue bua kupita bimpe ne nshikidilu wa ndongoluelu eu

“Tudi bitupa bia mubidi umue.EF. 4:25.

1, 2. Nzambi mmusue tshinyi bua batendeledi bende bansonga ne bakulumpe?

UDI nsonga anyi? Bikalabi nanku, ikala mujadike ne: bu muudi mu tshisumbu tshia Yehowa tshia pa buloba bujima, tudi bakunange bikole. Mu matunga a bungi, bantu ba bungi badi batambula mbansonga. Bidi bikolesha bua kumona mudi bansonga ba bungi balua pabu munkatshi mua bantu badi bangate dipangadika dia kuenzela Yehowa mudimu.

2 Bu muudi nsonga, utuku usanka bua kuikala ne bansonga bakuabu anyi? Pamuapa bidi nanku. Kupitshisha tshikondo kampanda tshimpe ne bantu ba mulongo wetu kutu kupetesha disanka. Kadi, nansha tuetu bansonga anyi bakulumpe, nansha tuetu bakolele muaba kayi, Nzambi mmusue bua tudisangishe bua kumutendelela. Mupostolo Paulo wakafunda ne: Nzambi mmusue bua “bantu ba mishindu yonso basungidibue ne bafike ku dimanya dijalame dia bulelela.” (1 Tim. 2:3, 4) Mu Buakabuluibua 7:9 badi baleja mudi batendeledi ba Nzambi “bafumina mu matunga onso ne mu bisamba bionso ne mu bantu bonso ne mu miakulu yonso.”

3, 4. a) Ndungenyi kayi ludi lutangalake mu bansonga ba bungi lelu? b) Nngelelu wa meji kayi udi upetangana ne Efeso 4:25?

 3 Kudi dishilangana pankatshi pa bansonga badi benzela Yehowa mudimu ne bansonga ba mu bulongolodi ebu. Ba bungi badi kabayi benzela Nzambi mudimu badi ne nsombelu wa budinangi, bimanyine anu pa malu adibu basue. Bamue bakebuludi badi bababikila ne: “Bena mu tshipungu tshia meme kumpala kua bionso.” Mushindu udibu bakula ne udibu baluata udi uleja ne: badi bapepeja bakulumpe, babamona bu badi benza malu a “tshiena kale.”

4 Lungenyi elu ndutunyunguluke. Nunku, bansonga badi benzela Yehowa mudimu badi bamona ne: bidi bikengela kudienzeja bua kuluepuka ne kuikala ne mmuenenu wa buena wa Nzambi. Nansha mu bidimu lukama bia kumpala, Paulo uvua mumone ne: bivua ne mushinga bua kukankamija bena Kristo nende bua kuepuka “nyuma udi wenza malu mu bantu badi babenga kutumikila” muvuabu ‘bendela kumpala.’ (Bala Efeso 2:1-3.) Bansonga badi bamona ne: mbimpe kuepuka lungenyi elu ne badi benza mudimu mu buobumue ne bena Kristo nabu mba kuela kalumbandi. Ngelelu wa meji eu udi upetangana ne mêyi a Paulo a ne: “Tudi bitupa bia mubidi umue.” (Ef. 4:25) Bu mutudi tuenda tusemena ku nshikidilu wa ndongoluelu eu, kuenza malu pamue mu buobumue nekuikale ne mushinga wa bungi. Tukonkononayi bimue bilejilu bia mu Bible biatuambuluisha bua kumona mushinga wa kushala balamatangane ne kuikala mu buobumue.

BAVUA BASHALE KABA KAMUE

5, 6. Muyuki wa Lota ne bana bende ba bakaji bavua badisuike bua kushala pamue, udi utulongesha tshinyi bua kushala pamue?

5 Ku kale, Yehowa uvua musue kukuba bantu bende pavuabu bambuluishangana mu buobumue bua kutantamena bikondo bia ntatu. Lelu, bilejilu bia mu Bible bidi mua kuambuluisha batendeledi ba Nzambi bakole ne bana. Tshimue tshia ku bilejilu ebi ntshia Lota.

6 Lota ne dîku diende bavua mu njiwu bualu bakavua pa kubutula tshimenga tshia Sodoma muvuabu basombele. Banjelu ba Nzambi bakadimuija Lota bua kumbuka mu tshimenga ne kuya kusombela mu mikuna bamba ne: ‘Nyema lubilu bua kupandisha muoyo webe.’ (Gen. 19:12-22) Lota wakatumikila ne bana bende ba bakaji babidi bakeleshangana nende diboko bua kumbuka mu tshimenga atshi. Bia dibungama balela bende bakuabu bakabenga. Bua bansongalume bavua babangile bana bende ba bakaji, Lota uvua bu “muena biakulakula.” Bakajimija muoyo wabu. (Gen. 19:14) Anu Lota ne bana bende ba bakaji bavua badisangishe nende ke bakapanda.

7. Mmunyi muvua Yehowa muambuluishe bena Isalele bavua baleje lungenyi lua buobumue pavuabu bumbuke mu Ejipitu?

7 Tuangate tshilejilu tshikuabu. Pavua bena Isalele bumbuke mu Ejipitu, kabavua bumbuke mu bisumbu bishilashilangane, tshisumbu tshionso tshiya watshi njila to. Pavua Mose ‘molole tshianza tshiende pa mâyi,’ ne Yehowa muapandulule, Mose kavua musambuke nkayende peshi ne kasumbu anu kakese ka bena Isalele to. Kadi, ku diambuluisha dia bukubi bua Yehowa, tshisumbu tshijima tshiakasambuka. (Ekes. 14:21, 22, 29, 30) Bakaleja lungenyi lua buobumue ne bakaya ne ‘tshisumbu tshinene tshia bantu bakuabu’ bavua kabayi bena Isalele bavua badisangishe nabu. (Ekes. 12:38) Katuena mua kuela meji ne: bantu bakese, pamuapa kasumbu ka bansonga bavua baye luabu luseke, balonde njila uvuabu bobu basue to. Bivuaku bia meji bua kuenza nanku ne kupangila bukubi bua Yehowa anyi?—1 Kol. 10:1.

8. Mu matuku a Yehoshafata, mmunyi muvua bantu ba Nzambi baleje muvuabu mu buobumue?

8 Mu matuku a mukalenge Yehoshafata, bantu ba Nzambi bakatuilangana ne buluishi bunene, mmumue ne: “tshisumbu tshia bantu tshinene” ba mu bisamba bivua bibanyunguluke. (2 Kul. 20:1, 2) Bia disanka, bantu ba Nzambi kabakakeba bua kutshimuna muluishi ne bukole buabu nkayabu to. Kadi bakeyemena Yehowa. (Bala 2 Kulondolola 20:3, 4.) Kabavua benza malu  muntu pa nkayende ne muntu yonso wenza tshivuaye mumone tshikumbane peshi tshivua muoyo wende umusaka bua kuenza to. Bible udi utuambila ne: ‘Bena Yuda bonso bakadi bimane kumpala kua Yehowa ne bana babu bakese ne bakaji babu ne bana babu ba balume.’ (2 Kul. 20:13) Bansonga ne bakulumpe bavua badisuike mu ditabuja bua kulonda bulombodi bua Yehowa ne Yehowa wakabakuba kudi muluishi wabu. (2 Kul. 20:20-27) Ki ntshilejilu tshimpe tshia mudi bantu ba Nzambi mua kupita ne ntatu anyi?

9. Malu avua bena Kristo ba kumpala benze ne lungenyi luabu bidi bitulongesha tshinyi bua dikala mu buobumue?

9 Bena Kristo ba kumpala bavua pabu bamanyike bua muvuabu benza mudimu pamue. Tshilejilu, panyima pa bena Yuda ne bantu ba bisamba bia bende bamane kulua bena Kristo, bakadifila mu “malongesha a bapostolo, ne mu diambuluishangana ne bakuabu, ne mu didia ne mu disambila pamue.” (Bien. 2:42) Buobumue buabu buvua nangananga bumueneke mu bikondo bivuabu babakengesha pavuabu dijinga dikole ne diambuluisha dia umue ne mukuabu. (Bien. 4:23, 24) Kuenaku witaba ne: mu bikondo bikole, mbimpe tuenze mudimu pamue anyi?

TUIKALAYI MU BUOBUMUE BU MUDI DITUKU DIA YEHOWA DISEMENA

10. Buobumue nebuikale ne mushinga nangananga dîba kayi?

10 Tshikondo tshia mîdima mikole bua bukua bantu tshikadi pa kufika. Muprofete Yoele wakamba mudi dituku edi dikale “dituku dia mîdima ne dia mufitu.” (Yoe. 2:1, 2; Sef. 1:14) Bua bantu ba Nzambi, netshikale tshikondo tshia kuikalabu mu buobumue. Vuluka mêyi a Yezu a ne: “Bukalenge buonso budi bupanduluke budi bubutuka.”—Mat. 12:25.

11. Ndifuanyikija kayi didi mu Musambu wa 122:3, 4 didi mua kukumbanyina bantu ba Nzambi lelu? (Tangila tshimfuanyi tshia ntuadijilu.)

11 Mu tshikondo tshia kayumbayumba tshia ndongoluelu eu tshidi tshilua kumpala, nebitulombe bua kuikala mu buobumue. Buobumue bua mu nyuma butuikala nabu dijinga munkatshi muetu nebuikale bu mpunga uvua pankatshi pa nzubu ya mu Yelushalema wa kale. Nzubu ayi ivua mibaka pamue, ne mufundi wa Misambu wakamba muvua Yelushalema muikale ‘musoko udi ne nzubu yawu mituangane bilengele.’ Bualu ebu buvua buenza bua bena mu tshimenga bambuluishangane ne bakubangane umue ne mukuabu. Kabidi, dikala diayi pabuipi divua dileja bimpe menemene muvua tshisamba tshijima mu buobumue bua mu nyuma pavua “bisamba bia Yehowa” bidisangisha bua kumutendelela. (Bala Musambu wa 122:3, 4.) Lelu ne mu matuku makole adi alua, tudi petu dijinga ne kushala ‘batuangane’ anyi balamakane kaba kamue.

12. Ntshinyi tshiatuambuluisha bua kupanduka mu mvita yelabu bantu ba Nzambi?

12 Bua tshinyi dikala dietu ‘batuangane’ peshi balamakane kaba kamue nedikale ne mushinga wa bungi tshikondo atshi? Yehezekele nshapita wa 38 udi wakula mu mêyi a tshiprofete bua mvita yelabu bantu ba Nzambi kudi “Gogo wa buloba bua Magoga.” Katshiakuikala tshikondo tshia kulekela tshintu nansha tshimue tshitutapulula to. Katuakuikala dijinga ne kuya kudi bena panu bua batuambuluishe to, kadi netuikale dijinga ne kushala balamate bana betu. Bushuwa katuakupanduka anu bualu tudi mu tshisumbu to. Yehowa ne Muanende nebapandishe bantu badi babikila dîna dia Yehowa mu tshikondo tshikole atshi. (Yoe. 2:32; Mat. 28:20) Nansha nanku, bidiku bimpe kuela meji ne: aba badi kabayi bashale mu buobumue mu tshisumbu tshia Nzambi, mbuena kuamba ne: badi baye mu wabu njila nebapanduke anyi?—Mika 2:12.

13. Mmalongesha kayi adi bansonga mua kupetela mu bitukadi bakonkonone too ne muaba eu?

13 Kabienaku bimueneka patoke ne: mbibi bua kulonda njila ya bansonga badi batapuluke balonde wabu njila mu ndongoluelu wa malu eu anyi? Tudi tuenda tusemena ku tshikondo tshituikala ne dijinga dia umue ne mukuabu. Ke tshitudi tuetu bonso bansonga ne bakulumpe ne bua kuenza. Eyowa, mpindieu ke tshikondo tshia kulonga  mua kuenza mudimu pamue ne kuikala mu buobumue buatuambuluisha mu matuku adi alua kumpala bua kupanduka.

“TUDI BITUPA BIA MUBIDI UMUE”

14, 15. a) Yehowa udi ulongesha bansonga ne bakulumpe lelu ne tshipatshila kayi? b) Yehowa udi utupesha mubelu kayi bua kutukankamija bua kuikala mu buobumue?

14 Yehowa udi utuambuluisha bua tuetu ‘kumukuatshila mudimu ne diapa dionso muinshi mua bujitu.’ (Sef. 3:8, 9) Udi utulongesha bua tuetu kukumbanyina tshipatshila tshiende tshia kashidi. Mu tshipatshila etshi mudi tshinyi? Mmulongolole bua “kusangisha kabidi bintu bionso pamue mu Kristo.” (Bala Efeso 1:9, 10.) Eyowa mmusue bua kusangisha pamue bifukibua bionso bidi ne meji bidi mu diulu ne pa buloba, ne neakumbaje bualu ebu. Bualu ebu budiku bukuambuluisha wewe nsonga bua kumona ne: mbimpe kuenza mudimu pamue ne bulongolodi bua Yehowa anyi?

15 Yehowa udi utulongesha bua tuikale mu buobumue mpindieu, muikale ne tshipatshila tshia ne: tuikale mu buobumue kashidi. Misangu ne misangu, Bible udi utuambila bua ‘tuambuluishangane,’ ‘tunangangane bikole,’ ‘tusambangane’ ne ‘tukoleshangane.’ (1 Kol. 12:25; Lomo 12:10; 1 Tes. 4:18; 5:11) Yehowa mmumanye ne: bena Kristo mbapange bupuangane ne bidi mua kuikala bikole bua kuikala mu buobumue, nanku tudi ne bua kudienzeja bua ‘kufuilangana luse ne muoyo mujima.’—Ef. 4:32.

16, 17. a) Bisangilu bietu bitu ne tshipatshila kayi? b) Patshivua Yezu nsonga ntshilejilu kayi tshivuaye mushile bansonga?

16 Yehowa mmutulongoluele kabidi bisangilu bia bena Kristo bua kutuambuluisha bua kushala pamue. Tukadi babale misangu ne misangu dikankamija didi mu Ebelu 10:24, 25. Tshimue tshia ku bipatshila bia bisangilu ebi ntshia ‘kutabalelangana muntu ne muntu bua kusakangana ku dinanga ne ku bienzedi bimpe.’ Ke bua tshinyi bisangilu bietu mbienza bua tuikale ‘tukankamijangana, tutamba kuenza nunku nangananga bu mutudi tumona dituku dienda disemena pabuipi.’

17 Pavua Yezu nsonga, wakashiya tshilejilu tshimpe bua bidi bitangila kunanga bisangilu. Pavuaye ne bidimu 12, uvua ne baledi bende mu disangisha dinene dia malu a Nzambi. Umue musangu, kabavua bamumone to, kadi ki mbualu uvua muye mu lunyanya ne bansonga bakuabu to. Kadi Jozefe ne Mariya bakamupeta uyukila ne balongeshi malu a Nzambi mu ntempelo.—Luka 2:45-47.

18. Mmunyi mudi masambila etu mua kuenza bua tuikale mu buobumue?

18 Pa kumbusha kunangangana ne kubuela  mu bisangilu bia bena Kristo bua kukolesha buobumue buetu, tudi mua kusambila bua bena Kristo netu. Tuetu tulomba Yehowa malu masunguluke bua bena Kristo netu, bidi bituvuluija mutudi tutabalela bakuabu. Ki nganu bena Kristo bakulumpe badi ne bua kuenza nunku to. Biwikala nsonga, utuku wenza bua malu aa akuambuluishe bua kukolesha bulunda buebe ne bena mu dîku dienu dia mu nyuma anyi? Kuenza nunku nekukuambuluishe bua kuikala mujadike ne: kuena mudibueje mu ndongoluelu eu mubi udi wenda upunga ne lufu to.

Yonso wa kutudi udi mua kusambila bua bena Kristo netu (Tangila tshikoso tshia 18)

TULEJAYI NE: “TUDI BITUPA BIA MUBIDI BIDI BILAMAKANANGANE TSHIMUE NE TSHIKUABU”

19-21. a) Mmushindu kayi munene ututu tuleja ne: tudi “bitupa bia mubidi bidi bilamakanangane tshimue ne tshikuabu”? Fila bilejilu. b) Ndilongesha kayi ditudi tupetela ku mushindu uvua bana betu benzelangane malu tshikondo tshia bipupu?

19 Bantu ba Yehowa badi benza malu mu diumvuangana ne dîyi dinene didi mu Lomo 12:5 edi: tudi “bitupa bia mubidi bidi bilamakanangane tshimue ne tshikuabu.” Tudi tumona mudi bualu ebu bulelela patu bipupu bienzeka. Tshilejilu, mu ngondo wa 12 wa 2011 tshipepele tshikole tshiakabueja mâyi a bungi mu tshidiila tshia Mindanao mu Philippines. Nzubu ya bantu mipite pa 40000 yakadina diakamue mu mâyi kusangisha ne ya bungi ya bena Kristo netu. Kadi Betele wakafila luapolo wamba ne: “Kumpala mene kua komite wa diambuluishangana kufika muaba au, bana betu ba miaba mikuabu bakavua benda batuma diambuluisha.”

20 Bia muomumue, pavua buloba buzakale ne mâyi mapasalale ku Est kua Japon, bana betu ba bungi bakajimija bintu biabu bia bungi. Bamue bakashala kabayi tshintu. Tshilejilu, Yoshiko wakajimija nzubu wende uvua mu kilometre 40 ne Nzubu wa Bukalenge. Muanetu wa bakaji eu udi wamba ne: “Biakatukemesha bua kumona ne: dituku dimue panyima pa dikanka dia buloba, mutangidi wa tshijengu ne muanetu wa balume mukuabu bakalua kutukeba.” Udi useka wamba ne: “Tuvua banyishe bikole diambuluisha dia mu nyuma dituvua bapete ku diambuluisha dia tshisumbu. Tuvua bapete kabidi mipila, bisabata, bibuta ne bilamba dia kulala nabi.” Muanetu kampanda wa mu komite wa diambuluishangana udi wamba ne: “Bana betu bavua bafumina mu Japon mujima bavua benza mudimu bu muntu umue, bambuluishangana umue ne mukuabu. Bana betu bakafumina too ne mu États-Unis bua kufila diambuluisha. Pavuabu babebeja bua tshinyi bavua bumbukila muaba mule nunku, bavua bamba ne: tudi mu buobumue ne bena Kristo netu ba mu Japon ne badi dijinga ne diambuluisha.” Kuenaku usanka bua kuikala mu bulongolodi budi buditatshisha bikole bua bantu badimu anyi? Ikala mujadike ne: Yehowa udi usanka bikole bua kumona buobumue bua mushindu eu.

21 Kuikala ne lungenyi lua mushindu eu mpindieu nekutuambuluishe bua kupita bimpe ne bipupu bidi kumpala mu buobumue nansha tuetu kule ne bana betu ba miaba mikuabu pa buloba. Bushuwa, lungenyi elu ludi lutuambuluisha bu didibidija bua ntatu itudi ne bua kutuilangana nayi bu mudi ndongoluelu eu wenda utangila ku tshibungubungu. Fumiko uvua mupande ku tshipepele tshikole tshivua tshienzeke mu Japon udi wamba ne: “Nshikidilu ukadi pabuipi menemene. Tudi ne bua kutungunuka ne kuambuluisha bana betu patutshidi bindile tshikondo tshikalaku kakuyi bipupu.”

22. Mmasanka kayi a kashidi atuapeta bua buobumue bua bena Kristo?

22 Bansonga ne bakulumpe badi balonga mpindieu mua kushala mu buobumue badi badilongolola bua kupanduka ku nshikidilu wa ndongoluelu eu mubi udi mutapuluke. Anu bu ku kale, Nzambi wetu neasungile bantu bende. (Yesh. 52:9, 10) Shala mulame mu lungenyi ne: newikale munkatshi mua bantu basungilabu wewe muenze mudimu pamue ne bantu ba Nzambi badi mu buobumue. Bualu bukuabu budi mua kutuambuluisha nkuvudija dianyisha dietu bua bitukadi bapete. Tshiena-bualu tshidi tshilonda netshiakule bua bualu ebu.