Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 12 2014

Udiku ne bua kushintulula lungenyi luebe anyi?

Udiku ne bua kushintulula lungenyi luebe anyi?

KASUMBU ka bansonga bena Kristo kampanda nkasue kuya kumona filme. Bakavua bumvue ne: bansonga bakuabu ba bungi ba mu tshilongelu tshiabu bavua banyishe filme au. Padibu bafika ku sine, badi batangila ku tablo ne bamona balamike foto ya bingoma binene ne ya bantu bakaji bavuale bibi. Nebenze tshinyi? Nebabuele anu mu sine bua kutangila filme au anyi?

Bualu ebu budi buleja ne: tutu tuangata mapangadika a bungi mimpe anyi mabi adi mua kunyanga anyi kuakaja buena Kristo buetu ne malanda etu ne Yehowa. Imue misangu udi mua kuikala mulongolole bua kuenza bualu kampanda, kadi paudi utangilulula tshilumbu atshi, udi ushintulula lungenyi luebe. Kuenza nunku kudi kuleja mutudi bena mioyo ibidi anyi peshi nkuimpe?

Dîba didi kushintulula lungenyi KUBI

Dinanga ditudi banange Yehowa divua ditusake bua kudilambula kudiye ne kutambula. Tudi ne dijinga dikole dia kushala ne lulamatu kudi Nzambi. Kadi muluishi wetu Satana Diabolo mmudisuike bua kunyanga muoyo wetu mutoke. (Buak. 12:17) Tuvua bangate dipangadika dia kuenzela Yehowa mudimu ne kutumikila mikenji yende. Bu mutudi tuangata didilambula dietu kudi Yehowa ne mushinga, mbibi tuetu bashintulule lungenyi luetu. Tudi mua kujimija muoyo.

Kukadi bidimu bipite pa 2 600 pavua Nebukadenesâ mukalenge wa Babulona muenze lupingu lunene lua or ne muele mukenji bua bantu bonso baluinamine ne balutendelele. Muntu yonso uvua kayi utumikila mukenji eu bavua ne bua kumuela mu tshikutu tshia kapia. Batendeledi ba Yehowa ba lulamatu basatu, mmumue ne: Shadalaka, Meshaka ne Abedenego kabakawutumikila to. Bu muvuabu kabayi binamine lupingu alu, bakabela mu tshikutu tshia kapia. Yehowa wakabasungila mu tshishima, kadi bavua bitabe bua kuteka muoyo wabu mu njiwu pamutu pa kushintulula dipangadika divuabu bangate dia kuenzela Nzambi mudimu.—Dan. 3:1-27.

 Panyima pa matuku, muprofete Danyele wakananukila mu disambila nansha muvuabu bakana bua kumuela mu mbuina bua ntambue. Eyowa wakatungunuka anu ne kusambila Yehowa misangu isatu ku dituku. Danyele kavua mushintulule dipangadika diende dia kutendelela Nzambi mulelela to. Nunku, bakasungila muprofete Danyele “kudi nyama ya ntambue.”—Dan. 6:1-27.

Batendeledi ba Nzambi ba lelu badi pabu bakumbaja didilambula diabu kudiye. Mu tshilongelu kampanda tshia mu Afrike, kasumbu ka balongi kampanda bavua Bantemu ba Yehowa bakabenga bua kuenza tshilele kampanda bua kutendelela tshintu kasanga tshia ditunga. Bavua ne bua kubipata mu tshilongelu bobu kabayi benze tshilele etshi pamue ne balongi bakuabu. Katupa kakese pashishe, ministre wa malu a tulasa wakalua mu tshimenga tshiabu ne kuyukilaye ne bamue balongi Bantemu. Bansonga Bantemu aba bakamuleja dipangadika diabu ne kanemu konso kadi kabayi batshina. Katshia anu dîba adi, tshilumbu etshi katshitu tshianji kujuka kabidi to. Bana betu ba balume ne ba bakaji bansonga badi mpindieu baya mu tulasa kabayi babenzeja bua kunyanga malanda abu ne Yehowa nansha.

Tuangate kabidi tshilejilu tshia Joseph, uvua mukajende mupete kansere ne mufue lufu lua tshikoso. Bena mu dîku dia ba Joseph bakumvua dijinga diende pa bidi bitangila dienza mikiya ya madilu ne kudinemekabu: “Tshivua dikubakuba. Kadi bena mu dîku dia ba mukajende ki m’Bantemu to, ne bavua basue bua kuenza imue mikiya ya madilu kusangisha ne bilele bidi kabiyi bisankisha Nzambi. Joseph udi wamba ne: “Pamvua tshiyi ngitaba tshivuabu bajinga, bavua bajinga kuenzeja bana banyi bavua pabu bashale balamate dipangadika dietu. Balele aba bakateta bua kuteka madilu kumbelu kuanyi bu mutu bantu benza, kadi ngakabambila ne: bobu basumishe bua kuateka, kabaatekedi kuanyi to. Bavua bamanye ne: kuteka madilu kakuvua kumvuangana ne ditabuja dianyi nansha divua nadi mukajanyi to. Nunku panyima pa tuetu bamane kukokangana bikole, bakaya kuatekela muaba mukuabu.”

Udi wamba kabidi ne: “Mu tshikondo tshikole tshia madilu etshi, ngakalomba Yehowa bua angambuluishe bua meme ne bana banyi katushipi mikenji yende to. Wakateleja disambila dianyi ne kutuambuluishaye bua kushala bashindame nansha muvuabu bajinga kutuenzeja malu ku bukole.” Bua Joseph ne bana bende, kabivua bikengela kuangata dipangadika dia kushintulula lungenyi luabu bua bidi bitangila ntendelelu to.

Dîba didi kushintulula lungenyi mua kuikala DISUNGULA

Panyima pa Pasaka wa mu 32, mamu kampanda wa mu Suliyafoinike wakaya kudi Yezu mu tshimenga tshia Sidona. Wakamulomba njila ne njila bua umbushe demon uvua munda mua muanende wa bakaji. Kumpala Yezu kakamuandamuna to. Wakambila bayidi bende ne: “Bavua bantume anu kudi mikoko mijimine ya mu nzubu wa Isalele, ki nkudi bantu bakuabu to.” Pakatungunuka mamu eu, Yezu wakamba ne: “Ki mbimpe kuangata biakudia bia bana kubielela bana ba mbua to.” Bua kuleja muvuaye ne ditabuja dikole, mamu eu wakandamuna ne: “Mmuomu Mukalenge, kadi bana ba mbua batu badia bisunsukila bidi bimata ku mêsa a bamfumu babu.” Yezu wakitaba dilomba diende ne kuondopa muanende.—Mat. 15:21-28.

Pavua Yezu muenze nunku, uvua muidikije Yehowa bua kuleja muvuaye pabuipi bua kushintuluka padi nsombelu umulomba bua kuenza nanku. Tshilejilu, Nzambi uvua mulongolole bua kubutula bena Isalele pavuabu benze kana ka ngombe ka or, kadi wakitaba pavua Mose mumulombe bua kushintulula dipangadika diende.—Ekes. 32:7-14.

Mupostolo Paulo wakidikija Yehowa ne Yezu. Tshikondo kampanda, Paulo wakamona ne: kabivua bimpe bua yeye kuenza luendu lua bumisionere ne Yone Mâko to, bualu uvua mushiye Paulo ne Bânaba mu luendu luabu lua bumisionere lua kumpala. Kadi, pashishe Paulo wakaleja patoke ne: Mâko uvua ubambuluisha bikole ne uvua ne mushinga buende yeye. Nanku Paulo wakambila Timote ne: “Luaku ne Mâko, bualu neangambuluishe bikole mu mudimu.”—2 Tim. 4:11.

Netuambe tshinyi buetu tuetu? Mu didikija Tatu wetu wa mu diulu udi ne dinanga ne luse,  ne lutulu, tudi mua kumona imue misangu bitulomba bua kushintulula lungenyi luetu. Tshilejilu, tudi mua kushintulula mushindu utudi tumona bantu bakuabu. Bishilangane ne Yehowa ne Yezu, tuetu tudi bena mibi. Bikalabi ne: bobu badi bashintulula lungenyi, katuenaku petu mua kukonkonona nsombelu ya bantu bakuabu bua kuteta kushintulula mushindu utudi tubamona anyi?

Kushintulula lungenyi kudi mua kuikala kuimpe patudi tukonkonona bipatshila bietu bia mu nyuma. Bamue bantu badi balonga Bible ne bakadi babuela mu bisangilu bua tshikondo kampanda badi mua kubenga bua kutambula. Peshi bamue bana betu badi mua kuelakana bua kulua bampanda-njila nansha bobu ne mushindu wa kuenza mudimu eu. Bana betu ba balume bakuabu badi mua kubenga bua kuipatshila majitu mu tshisumbu. (1 Tim. 3:1) Udi pebe mu nsombelu wa mushindu eu anyi? Yehowa udi ukulomba ne dinanga bua kuenza midimu eyi. Kuenaku mua kushintulula lungenyi luebe ne kudifila bua kuenzela Nzambi ne bantu bakuabu mudimu ne disanka anyi?

Kushintulula lungenyi kudi mua kupetesha mabenesha

Muanetu mukuabu wa bakaji diende Ella udi wamba bua mudimu udiye wenza ku Betele kampanda wa Bantemu ba Yehowa wa mu Afrike ne: “Pangakafika ku Betele, tshivua muele meji ne: mvua mua kunengaku to. Mvua ne dijinga dia kuenzela Yehowa mudimu ne muoyo mujima, kadi mvua mulamate dîku dietu bikole. Kumpala, dîku dietu divua dinsamina muoyo bikole. Kadi, muanetu utuvua nende mu nzubu umue wakakankamija, ke meme kuangata dipangadika dia kushala. Nkadi ne bidimu 10 ku Betele, ndi ngumvua anu mua kutungunuka ne kuenzela bena Kristo nanyi mudimu ne kushala ku Betele bungi bua matuku onso adi akengela.”

Dîba didibi BIKENGELA kushintulula lungenyi

Udi muvuluke tshivua tshifikile Kayina pavuaye mumvuile muanabu mukawu ne  mumulamine munda anyi? Nzambi wakambila muntu uvua ne tshiji eu ne: uvua mua kumuanyisha yeye mukudimuke ne muenze malu mimpe. Nzambi wakabela Kayina bua kutshimuna bubi buvua ‘bumualamine kumbelu.’ Kayina uvua ne bua kushintulula lungenyi luende ne meji ende, kadi wakabenga mubelu wa Nzambi. Bia dibungama, wakashipa muanabu ne kuluaye muntu wa kumpala uvua mushipangane.—Gen. 4:2-8.

Tshivua mua kuenzeka ntshinyi bu Kayina mushintulule lungenyi luende?

Tuangate kabidi tshilejilu tshia mukalenge Uziya. Ku ntuadijilu, uvua muenze malu mimpe ku mêsu kua Yehowa ne wakatungunuka ne kukeba Nzambi. Diakabi, wakanyanga lumu luende ne kuluaye muena lutambishi. Wakabuela mu ntempelo bua kulambula musenga wa manananshi nansha muvuaye kayi muakuidi. Pavua muakuidi mumudimuije bua kubenga kuenza bualu bua didibandisha ebu, uvuaku mushintulule lungenyi luende anyi? Tòo. Uziya “wakakuata tshiji” ne kulengululaye mubelu wende. Nanku, Yehowa wakamuela nsudi.—2 Kul. 26:3-5, 16-20.

Bushuwa, kudi bikondo bitudi anu ne bua kushintulula lungenyi luetu. Tuangate tshilejilu tshia matuku etu aa. Joachim uvua mutambule mu 1955, kadi bakamuipata mu tshisumbu mu 1978. Bidimu bipite pa 20 pashishe, wakanyingalala ne bakamupingaja mu tshisumbu tshia Bantemu ba Yehowa. Matuku adi panshi aa, mukulu kampanda wakamuebeja bua tshinyi uvua muindile mutantshi bule nunku bua kulua kulomba bua kupingana. Joachim wakandamuna ne: “Mvua ne tshiji ne lutambishi. Ndi nyingalala bua mumvua muindile mutantshi bule nunku. Pavuabu bangipate, mvua mumanye ne: Bantemu ba Yehowa bavua balongesha bulelela.” Uvua ne bua kushintulula lungenyi luende ne kunyingalala.

Tudi mua kudimona mu nsombelu idi mua kutulomba bua kushintulula lungenyi luetu ne nsombelu wetu. Tudienzejayi ku budisuile bua kuenza malu adi asankisha Yehowa.—Mus. 34:8.