Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 10 2014

 Malu A Mu Nsombelu

Malu a mushinga a mu nsombelu wanyi mu mudimu wa Bukalenge

Malu a mushinga a mu nsombelu wanyi mu mudimu wa Bukalenge

Mu 1947, bansaserdose bena Katolike ba mu tshimenga tshia Santa Ana mu Salvador bakateta bua kukebela Bantemu tshimvundu. Pavua bana betu benza dilonga diabu dia Tshibumba tshia Nsentedi dia ku lumingu, bana ba balume bakakupa mabue manene ku tshiibi tshia bamisionere tshivua tshiunzulula. Pashishe, tshisumbu tshia bantu tshilombola kudi bansaserdose tshiakafika. Bamue bavua bambule torshe ne bakuabu bakuate mpingu. Munda mua mêba abidi, bavua basa mabue ku nzubu ne bimba ne: “Virgo ikale ne muoyo!” ne “Yehowa afue!” Bavua benza nunku bua kuipata bamisionere mu tshimenga. Ndi mumanye bualu ebu bualu mvua umue wa kudibu ne mvua panyi mu tshisangilu atshi, lelu kukadi bidimu 67. *

BIDIMU bibidi kumpala kua bualu budi kuulu ebu kuenzekabu, meme ne Evelyn Trabert utuvua tuenza nende mudimu wa bumisionere tuvua bapete dipoloma mu kalasa kinayi ka Watchtower ka malu a mu Bible ka Gilada kavua tshikondo atshi kenzekela pabuipi ne tshimenga tshia Ithaca mu New York. Bakatutuma bua kuenza mudimu mu tshimenga tshia Santa Ana. Kadi kumpala kua meme kutungunuka ne muyuki wanyi wa bidimu 29 bindi muenza mu mudimu wa bumisionere, ndi musue kunulondela bua tshinyi mvua muangate dipangadika dia kuenza mudimu au.

BUMPIANYI BUANYI BUA MU NYUMA

Baledi banyi John Olson ne Eva bavua basombele mu Spokane mu Washington mu États-Unis mu 1923, tshidimu tshivuabu bandele. Bavua bena Luther kadi kabavua bitaba dilongesha dia iferno wa kapia to, bualu kadivua dipetangana ne ditabuja divuabu nadi dia ne: Nzambi utu ne dinanga to. (1 Yone 4:8) Tatu uvua wenza mudimu mu nzubu wa dienzela mampa ne butuku kampanda, muena mudimu wabu wakamujadikila ne: Bible katu ulongesha ne: iferno mmuaba udibu bakengeshila bantu to. Katupa kakese, baledi banyi bakatuadija kulonga Bible ne Bantemu ba Yehowa ne bakamanya tshidi Bible ulongesha menemene bua tshidi tshienzeka panyima pa lufu.

 Ntshivua anu ne bidimu 9, kadi ndi mvuluka muvua baledi banyi bakula ne disanka bua bulelela bua mu Bible bupiabupia buvuabu bapete. Disanka diabu diakavula bikole pakamanyabu ne: dîna dia Nzambi mulelela divua Yehowa, ne pakamanyabu ne: bavua basuludibue ku dilongesha dia Busatu bunsantu didi ne tshibuejakaji. Ngakatuadija kumina malongesha mimpe a mu Bible aa anu bu tshivuare, ndonga ‘bulelela budi bupetesha budikadidi.’ (Yone 8:32) Nunku, tshivua mmona kulonga Bible bu kudi kutshiokesha to, kadi mvua ne disanka misangu yonso dia kukonkonona Dîyi dia Nzambi. Nansha mumvua muena bundu, mvua nya kufila baledi banyi mu buambi. Bakatambula mu 1934. Mu 1939, pamvua ne bidimu 16, ngakatambula panyi ne kulua mutendeledi wa Yehowa.

Meme ne mamu ne tatu mu mpuilu wa mu Saint Louis mu Missouri mu 1941

Mu ngondo wa 7 wa 1940, baledi banyi bakasumbisha nzubu wabu ne tuetu bonso basatu tuakatuadija mudimu wa bumpanda-njila mu Coeur d’Alene mu Idaho. Tuakasombela mu nzubu utuvua tufutshila kumutu kua karaje ka mashinyi. Tuvua kabidi tuenzela bisangilu mu nzubu muetu. Tshikondo atshi, anu bisumbu bikese ke bivua ne Nzubu ya Bukalenge, nunku bavua badisangishila mu nzubu ya bantu peshi ivuabu bafutshila.

Mu 1941, meme ne baledi banyi tuakabuela mu mpuilu mu Saint Louis mu Missouri. Dia lumingu divua “Dituku dia bana,” ne bana ba bidimu 5 too ne 18 bavua basombe buludiludi ne tshiakuidi. Ku ndekelu kua muyuki wa muanetu Joseph Rutherford, wakatuambila tuetu bana ne: “Nuenu . . . bana bonso . . . badi bitaba bua kutumikila Nzambi ne Mukalenge wende, imanayi kuulu.” Tuakimana bonso kuulu. Pashishe muanetu Rutherford wakakema wamba ne: “Tangilayi, bantemu bapiabapia ba Bukalenge bapite pa 15000!” Bualu ebu buakakolesha dipangadika dianyi dia kulua mpanda-njila mu nsombelu wanyi mujima.

MIDIMU INDI MUENZE

Ngondo mikese panyima pa mpuilu wa mu Saint Louis, dîku dietu diakaya kusombela ku Sud kua Californie mu tshimenga tshia Oxnard, ne tuvua ne mudimu wa kuenza tshisumbu. Tuvua basombele mu dikadika dikese muvua anu bulalu bumue. Butuku buonso mvua ne bua kuadija “bulalu” buanyi pa mêsa a kudiila, bishilangane kakese ne pamvua ne wanyi nzubu wa bulalu.

Kumpala kua tuetu kufika mu Californie, ditunga dia Japon diakela Pearl Harbor mu Hawaii mvita mu dia 7 ngondo wa 12 wa 1941. Dituku diakalonda, États-Unis wakabuela mu Mvita mibidi ya buloba bujima. Mbulamatadi wakela mukenji bua bakose nzembu, ne tuvua ne bua kujima midilu yonso butuku. Mazuwa a bena Japon avua makuate bitudilu bia mu Californie, mîdima mikole ivua yambuluisha bua kubapangisha bua kukupa bombe mu tshimenga.

Panyima pa ndambu wa ngondo, mu ngondo wa 9 wa 1942, tuakabuela mu mpuilu wa Bukua-panu bupiabupia bulombola kudi Nzambi mu Cleveland mu Ohio. Tuakateleja muyuki wa muanetu Nathan Knorr uvua ne tshiena-bualu tshia ne: “Ditalala nedinenge anyi?” Wakumvuija Buakabuluibua nshapita wa 17 udi wakula bua ‘nyama wa luonji uvuaku, kadi kenaku, tshidibi ukadi pa kupatuka mu tshina tshidi katshiyi ne ndekelu.’ (Buak. 17:8, 11) Muanetu Knorr wakumvuija ne: “nyama wa luonji” uvua Nsangilu wa matunga uvua muimanyike midimu yende mu 1939. Bible ukavua mulaye ne: bavua ne bua kupinganyina Nsangilu eu kudi bulongolodi bukuabu buvua mua kufikisha ku ndambu wa ditalala. Ke tshiakenzeka mu 1945, Mvita mibidi ya buloba bujima yakajika. Pashishe “nyama” wakapatuka kabidi bu Bulongolodi bua matunga masanga. Nunku Bantemu ba Yehowa bakavudija mudimu wabu wa buambi pa buloba bujima ne kuakenzeka didiunda dinene divua katshia kadiyi dianji kuenzeka.

Dipoloma dianyi dia ku Gilada

Mulayi wa buprofete eu wakangambuluisha bua kumona malu atshivua alua. Pakamanyishabu ne: kalasa ka Gilada kavua ne bua kutuadija tshidimu tshivua tshilonda, dijinga dianyi dia kulua misionere diakakola. Mu 1943, bakantuma bua kuenza mudimu wa bumpanda-njila mu Portland mu Oregon. Mu matuku  au, tuvua tuenza mudimu ne tshisanji tshia fono bua kuelela bantu miyuki ku mabu, ne pashishe tuvua tubapesha mikanda ya malu a mu Bible ivua yakula bua Bukalenge bua Nzambi. Tshidimu atshi tshijima, mvua anu ngela meji bua mudimu wa bumisionere.

Mu 1944, mvua ne disanka pamvua mupete dibikila dia kuya ku Gilada pamue ne Evelyn Trabert, mulunda wanyi wa pa muoyo. Munkatshi mua ngondo itanu, balongeshi betu bakatuleja mua kupeta disanka mu dilonga dia Bible. Budipuekeshi buabu buvua butukemeshe. Imue misangu, patuvua tudia, bana betu ba balume aba ke bavua batuabanyina biakudia. Tuakapeta mapoloma mu dia 22 ngondo wa 1 wa 1945.

MUDIMU WANYI WA BUMISIONERE

Meme ne Evelyn pamue ne Leo Mahan ne mukajende Esther tuakafika mu Salvador muvuabu batutume bua kuenza mudimu mu ngondo 6 wa 1946. Tuakasangana budimi abu ‘butoke bua kunowa.’ (Yone 4:35) Bualu budi bulonda ku ntuadijilu kua muyuki eu budi buleja muvua bamfumu ba bitendelelu ne tshiji tshikole. Lumingu lumue kumpala, tuvua benze mpuilu wa tshijengu wa kumpala mu Santa Ana. Tuvua bamanyishe miaba yonso bua muyuki wa patoke ne tuvua ne disanka bua muvua bantu batue ku 500 babuelamu. Pamutu pa kumvua buôwa bua tshimenga, tuakadiumvua benzejibue bikole bua kushalamu ne kuambuluisha bantu ba muoyo muimpe. Nansha muvua bamfumu ba bitendelelu bambile bantu bua kubenga kubala Bible ne anu bantu bakese bakumbane bua kumupeta, bantu ba bungi bavua ne nyota ya bulelela. Bavua banyisha mutuvua tudienzeja bua kulonga tshiena Espagne bua tufike ku dibalongesha bua Nzambi mulelela Yehowa ne bua mulayi wende muimpe wa kujadikulula Mparadizu pa buloba.

Tuetu batanu ba mu kalasa ka Gilada kamue bavuabu batutume mu Salvador. Ku dia bakaji batangile ku dia balume: Evelyn Trabert, Millie Brashier, Esther Mahan, meme ne Leo Mahan

Rosa Ascencio uvua umue wa ku balongi banyi ba ntuadijilu. Pakatuadijaye kulonga Bible, bakabulukangana ne mulume uvuabu basombe nende. Pashishe mulume eu wakatuadija pende kulonga Bible. Bakaselangana ne pashishe kutambulabu ne kuluabu Bantemu ba Yehowa ba tshisumi. Rosa ke muntu wa kumpala uvua mulue mpanda-njila mu Santa Ana. *

Rosa uvua ne kamakazen ka biakudia. Pavuaye uya mu buambi, uvua ukanga kamakazen kende ne utekemena ne: Yehowa neamukumbajile majinga ende. Pavuaye ulua kukakangula panyima pa mêba makese, bakiliya bavua bukunguila bua kusumba. Wakadimuena mudi mêyi a mu Matayi 6:33 malelela ne wakashala ne lulamatu too ne pakafuaye.

Musangu kampanda, nsaserdose wa mu tshimenga wakaya kumona muena nzubu utuvua tuetu bamisionere basambombo tufutshila ne kumudimuijaye wamba ne: tuetu batungunuke ne kufutshila nzubu wende, bavua ne bua kubipata yeye ne mukajende mu tshitanda. Muena lupangu uvua ngenda mushinga muende lumu ukavua mutshioke bua bikadilu bibi bia bamfumu ba bitendelelu ne kakitaba bua kumuenzejabu malu to. Yeye muine wakambila nsaserdose ne: nansha bobu bamuipate mu tshitendelelu kakuvua bualu to. Wakatujadikila ne: uvua mutuanyishile bua kusomba tshikondo bule butuvua basue.

MUENA MU TSHIMENGA UDIBU BANEMEKA UDI ULUA NTEMU

Biro bia filiale bivuabu bibake mu 1955

Mu San Salvador, tshimenga tshikulu misionere mukuabu uvua ulonga Bible ne mukaji wa enjenyere kampanda diende Baltasar Perla. Muntu eu uvua ne muoyo muimpe uvua mujimije ditabuja kudi Nzambi  pakamonaye muvua bamfumu ba bitendelelu ne lubombo. Pakakumbana tshikondo bua kuibaka biro bia filiale, Baltasar wakafila plan ne kuibakaye kayi ufutshisha makuta bua mudimu wende nansha muvuaye kayi muanji kuikala mu bulelela.

Panyima pa Baltasar mumane kuenza mudimu ne bantu ba Yehowa mu dibaka, wakatuishibua ne: uvua mupete ntendelelu mulelela. Wakatambula mu dia 22 ngondo wa 7 wa 1955, ne mukajende Paulina wakatambula pende katupa kakese pashishe. Muanende wa balume ne wa bakaji badi benzela Yehowa mudimu ne lulamatu. Muanende wa balume Baltasar mmuenze mudimu ku Betele wa ku Brooklyn munkatshi mua bidimu 49, muaba udiye utua mudimu wa diyisha wa pa buloba bujima udi utungunuka ne kuya kumpala nyama ku mikolo ne mpindieu udi mu komite wa filiale mu États-Unis. *

Patuakatuadija kuenza mpungilu mu San Salvador, muanetu Perla wakatuambuluisha bua kupeta nzubu munene wa didibidija bua kuenzelamu mpungilu. Ku ntuadijilu, tuvua tusomba anu mu bibasa bikese; kadi bu muvua Yehowa mutubeneshe, milongo ya bibasa ivua anu yenda ivula ku tshidimu ne ku tshidimu too ne mutuakuwula mu nzubu au tente ne bantu kutuadija kusomba ne pambelu. Mu bikondo bia disanka abi, ngakapetangana ne bantu bamvua mulonge nabu Bible. Fuanyikija mumvua mudiumvue pavua balongi banyi ba kale bammanyisha kudi bantu bavuabu balonge nabu Bible batshivua batambuilaku ne balue bu “bikulu” banyi.

Muanetu Frederick Franz uyukila ne bamisionere mu mpungilu

Mu mpuilu kampanda, muanetu wa balume mukuabu wakasemena kundi ne kungambila ne: uvua ne bualu bua kuntondela. Tshivua mumumanye to, ne mvua musue kumvua tshivuaye wamba. Wakamba ne: “Mvua umue wa ku bana bavua banuasa mabue mu Santa Ana.” Mpindieu ukavua wenzela Yehowa mudimu pamue nanyi. Disanka diakuwula tente mu muoyo wanyi. Diyukidilangana edi diakanjadikila ne: mudimu wa ku dîba ne ku dîba udi ne difutu dipite dia mudimu kayi wonso udi muntu mua kuenza.

Mpuilu wa tshijengu wa kumpala utuvua babuele mu Salvador

MALU ADI ASANKISHA ANDI MUSUNGULE

Munkatshi mua bidimu bitue ku 29, ngakatungunuka ne kuenza mudimu wa bumisionere mu Salvador, kutuadijila mu tshimenga tshia Santa Ana, pashishe mu Sonsonate, kuya mu Santa Tecla ne ndekelu wa bionso mu San Salvador. Mu 1975, panyima pa meme mumane kuelangana meji bikole mu disambila, ngakangata dipangadika dia kulekela mudimu wa bumisionere  ne kupingana mu Spokane. Baledi banyi bakavua bakulakaje bavua ne lulamatu bavua dijinga ne diambuluisha dianyi.

Pakafua tatu mu 1979, ngakashala ndama mamu uvua wenda uteketa ku kakese ku kakese ne katshiyi kabidi ne bukole. Panyima pa bidimu muanda mukulu wakafua pende ne bidimu 94. Mu tshikondo tshikole atshi, ngakatshioka mu lungenyi ne ku mubidi. Dibungama diakamfikisha ku dipeta kanyinganyinga kakole bu ka disama dia zona. Kadi ku diambuluisha dia disambila ne muvua tshianza tshia dinanga tshia Yehowa pambidi panyi, ngakatantamena diteta dia dinanukila adi. Mbienze anu bu Yehowa ungambila ne: ‘Too ne palua nsuki yebe mitoke, nenkutuale, nenkusungile.’—Yesh. 46:4.

Mu 1990, ngakaya mu Omak mu Washington. Muomu emu, ngakalua kabidi ne mushinga mu mudimu wa buambi wa mu tshiena Espagne, ne ndambu wa balongi banyi ba Bible bakatambula. Mu ngondo wa 11 wa 2007, tshivua kabidi nkumbana bua kulama nzubu wanyi ne mankenda to, nunku ngakaya kusombela mu tshimenga tshia pabuipi tshia Chelan mu Washington. Bena mu tshisumbu tshia tshiena Espagne badi bantabalela bimpe ne ndi ne dianyisha dia bungi kudibu. Bu mundi nkayanyi Ntemu mukulakaje mu tshisumbu emu, bena Kristo nanyi balume ne bakaji badi “bandama” ne bulenga bu “kakuabu.”

Ndi musungule bua kubenga kusedibua ne kuenza dianyi dîku anu bua kudifila bikole mu mudimu “kakuyi ditanaji” kadi ndi ne bana ba mu nyuma ba bungi. (1 Kol. 7:34, 35) Mvua muele meji ne: mu bulongolodi ebu, tshiakupeta tshintu tshionso to. Nunku, ndi muteke bintu bia kumpala pa muaba wa kumpala, mmumue ne: didilambula dianyi bua kuenzela Yehowa mudimu ne muoyo mujima. Mu bulongolodi bupiabupia, nekuikala tshikondo tshia bungi tshia kuenza midimu mikuabu yonso mimpe. Mvese untu mutambe kunanga m’Musambu wa 145:16 udi utujadikila ne: Yehowa ‘neukutshishe tshintu tshionso tshidi ne muoyo ne diakalengele.’

Mudimu wa bumpanda-njila udi ungambuluisha bua kuikala ne bukole

Nansha munkadi ne bidimu 91, ntshidi ne ndambu wa makanda, nunku ndi ntungunuka ne kuenza bumpanda-njila. Mudimu wa bumpanda-njila udi ungambuluisha bua kuikala ne bukole ne udi umpetesha ditekemena mu nsombelu wanyi. Pangakafika mu Salvador bua musangu wa kumpala, mudimu wa diyisha utshivua utuadijilaku. Nansha muvuaku buluishi bukole bua kudi Satana, lelu kudi bambi ba lumu luimpe bapite pa 39000 mu ditunga. Bualu ebu budi bushuwa bukoleshe ditabuja dianyi. Bidi bimueneka patoke ne: nyuma muimpe wa Yehowa ke udi muambuluishe malu adi bantu bende benze.

^ tshik. 4 Bala Annuaire des Témoins de Jéhovah wa mu 1981, dibeji dia 44-46.

^ tshik. 19 Tangila Annuaire wa 1981, dibeji dia 41-42.

^ tshik. 24 Tangila Annuaire wa 1981, dibeji dia 65-67, 73-75.