Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 10 2014

Nenuikale ‘bukalenge bua bakuidi’

Nenuikale ‘bukalenge bua bakuidi’

‘Nuenu nenuikale kundi bukalenge bua bakuidi ne tshisamba tshia tshijila.’—EKES. 19:6.

1, 2. Kankanunuina ka mukaji kavua dijinga ne bukubi kayi? Bua tshinyi?

MULAYI wa buprofete wa kumpala udi mu Bible udi ne mushinga wa bungi mu dikumbana dia malu adi Nzambi mulongolole. Pavua Nzambi mufile mulayi wa mu Edene, wakamba ne: ‘Nenteke lukuna pankatshi pebe [Satana] ne mukaji, ne pankatshi pa bana bebe ne bana bende.’ Mbukole kayi buvua lukuna elu ne bua kuikala nabu? Yehowa uvua muambe ne: ‘Muana wa mukaji neakuboze ku mutu kuebe, ne wewe neumusume ku tshikankanyi tshiende.’ (Gen. 3:15) Lukuna luvua pankatshi pa nyoka ne mukaji luvua ne bua kuikala lukole luenza bua Satana enze muende muonso bua kubutula kankanunuina ka mukaji.

2 Kabiena bikemesha bua muvua mufundi wa Misambu musambile Nzambi bua tshisamba tshiende tshisungula wamba ne: ‘Mona, badi nebe lukuna badi bateka diyoyo; badi bakukina bakuambulula mitu yabu. Badi bapangila malu a budimu a kuenzela bantu bebe; badi bela bifufu biabu popamue bua kutekela bantu bawakusokoka diyoyo. Badi bamba ne: Luayi, tubabutule bua kabikadi tshisamba tshia bantu kabidi.’ (Mus. 83:2-4) Bavua ne bua kukuba mulongolongo wa ndelanganyi uvua ne bua kupatula kankanunuina ka mukaji bua kawubutudibu ne kabawunyangi. Bua kukumbaja bualu ebu, Yehowa wakalongolola  kabidi malu makuabu avua ne bua kuenza bua tshivuaye mulongolole tshikumbane.

TSHIPUNGIDI TSHIDI TSHIKUBA KANKANUNUINA

3, 4. a) Ndîba kayi divua tshipungidi tshia Mikenji tshituadije mudimu watshi? Tshisamba tshia Isalele tshivua tshitabe bua kuenza tshinyi? b) Tshipungidi tshia Mikenji tshivua tshienza bua tshinyi?

3 Bu muvua ndelanganyi ya Abalahama, Izaka ne Yakoba mivule ne milue miliyo ya bungi, Yehowa wakayivuija tshisamba tshia Isalele wa kale. Ku diambuluisha dia Mose, Yehowa wakadia tshipungidi tshia pa buatshi ne tshisamba etshi pa kubelela mikenji, ne tshisamba tshia Isalele tshiakitaba bua kutumikila mikenji ya tshipungidi atshi. Bible udi wamba ne: ‘Mose wakangata mukanda wa dipungila, wakawubala kumpala kua bantu; bobu bakamba ne: mêyi onso akuamba Yehowa netuenze, netuatumikile. Mose wakangata mashi, wakaamiamina pambidi pa bantu, wakamba ne: tangilayi mashi a dipungila diakapunga nenu Yehowa bua mêyi au onso.’—Ekes. 24:3-8.

4 Tshipungidi tshia Mikenji tshiakatuadija mudimu watshi ku mukuna wa Sinayi mu 1513 kumpala kua Yezu. Ku diambuluisha dia tshipungidi etshi, tshisamba tshia Isalele wa kale tshivua tshilue tshisamba tshisungula tshia Nzambi. Yehowa wakalua ‘Mulumbuluishi wabu, Mubeledi wa mikenji ne Mukalenge wabu.’ (Yesh. 33:22) Malu avua mafikile bena Isalele adi aleja tshidi tshifikila bantu padibu batumikila mikenji miakane ya Nzambi peshi babenga kuyitumikila. Bu muvua Mikenji ikandika disela anyi disedibua ne bantu bavua kabayi batendelela Nzambi mulelela, ne ikandika ditendelela nzambi ya dishima, bivua biambuluisha bua kukuba mulongolongo wa ndelanganyi ya Abalahama bua kawunyanguki.—Ekes. 20:4-6; 34:12-16.

5. a) Tshipungidi tshia Mikenji tshivua tshipeteshe tshisamba tshia Isalele mpunga kayi muimpe? b) Bua tshinyi Nzambi wakabenga tshisamba tshia Isalele?

5 Mu tshipungidi tshia Mikenji, bavua kabidi balongolole bua kuteka bakuidi, etshi tshivua mundidimbi wa bualu bunene buvuabu balongolole mu matuku atshivua alua. (Eb. 7:11; 10:1) Mu bulelela, ku diambuluisha dia tshipungidi atshi, Isalele uvua ne mpunga wa pa buende ne diakalenga dia kuikala ‘bukalenge bua bakuidi’ ne bivua mua kuenzeka nanku anu bu bobu batumikile mikenji ya Yehowa. (Bala Ekesode 19:5, 6.) Kadi, tshisamba tshia Isalele katshiakatumikila mikenji eyi to. Pamutu pa tshisamba etshi kuangatatshi ne mushinga difika dia Masiya uvua tshitupa tshinene tshia kankanunuina ka Abalahama, tshiakamubenga. Bu tshipeta, Nzambi pende wakatshibenga.

Dibenga kutumikila dia bena Isalele kadiena dileja ne: tshipungidi tshia Mikenji tshivua tshipangile nansha (Tangila tshikoso 3-6)

6. Mikenji ivua mikumbaje bualu kayi?

6 Bu muvua bena Isalele bapangile bua kushala ne lulamatu kudi Yehowa ne kufika ku dipatula bantu bavua mua kulua bukalenge bua bakuidi, kabiena bileja ne: Mikenji ivua mipangile tshipatshila tshiayi to. Bavua bele Mikenji eyi bua kukuba kankanunuina ne kufikisha bantu kudi Masiya. Diakamue pavua Kristo mufike ne bantu bamujingulule, mudimu wa Mikenji wakakumbana. Bible udi wamba ne: “Kristo udi ndekelu wa Mikenji.” (Lomo 10:4) Kadi lukonko ludi lujuka ludi ne: Mbanganyi bavua mua kupeta diakalenga dia kuikala  bukalenge bua bakuidi? Yehowa Nzambi wakalongolola bualu bukuabu bilondeshile mikenji bua kuenza tshisamba tshipiatshipia.

DILEDIBUA DIA TSHISAMBA TSHIPIATSHIPIA

7. Ntshinyi tshikavua Yehowa muambe ku diambuluisha dia Yelemiya bua tshipungidi tshipiatshipia?

7 Matuku a bungi kumpala kua tshipungidi tshia Mikenji kufuatshi, Yehowa ukavua mumanyishe ku diambuluisha dia muprofete Yelemiya ne: uvua ne bua kudia ‘tshipungidi tshipiatshipia’ ne tshisamba tshia Isalele. (Bala Yelemiya 31:31-33.) Tshipungidi atshi tshivua ne bua kuikala tshishilangane ne tshipungidi tshia Mikenji mu mushindu wa ne: tshivua ne bua kuenza bua bafuile bantu luse bua mibi yabu kabiyi bikengela milambu ya nyama to. Mmunyi muvuatshi mua kuenza bualu ebu?

8, 9. a) Mashi a Yezu avua medibue panshi akakumbaja tshinyi? b) Tshipungidi tshipiatshipia tshivua tshipesha benamu mpunga kayi? (Tangila tshimfuanyi tshia ntuadijilu.)

8 Bidimu nkama ya bungi pashishe, Yezu wakajadika Didia dia dilolo dia Mukalenge mu dia 14 ngondo wa Nisana mu 33. Wakambila bapostolo bende ba lulamatu 11 bua dikopo dia mvinyo ne: “Dikopo edi didi dileja tshipungidi tshipiatshipia tshienza ne mashi anyi adi ne bua kuya panshi bua bualu buenu.” (Luka 22:20) Bilondeshile mukanda wa Matayi, Yezu uvua muambe ne: “Etshi tshidi tshileja ‘mashi anyi a tshipungidi’ adi ne bua kuya panshi bua kujimija mibi ya bantu ba bungi.”—Mat. 26:27, 28.

9 Mashi a Yezu avua maye panshi ke akajadika tshipungidi tshipiatshipia. Akenza kabidi bua mibi ya bantu ijimijibue musangu umue bua kashidi. Yezu kena mu tshipungidi tshipiatshipia to. Bu mudiye kayi ne bubi, kena dijinga ne kufuidibua luse to. Kadi Nzambi uvua ne bua kuenza mudimu ne mushinga wa mashi a Yezu bua ndelanganyi ya Adama. Uvua kabidi mua kuangata bamue bantu bavua badilambule kudiye “bu bana” pa kubela manyi a nyuma muimpe. (Bala Lomo 8:14-17.) Bu muvua Nzambi ubamona kabayi ne bubi, bavua mua kuikala mu mushindu kampanda bu Yezu, Muana wa Nzambi udi kayi ne bubi. Bela manyi aba bavua ne bua kulua “bapianyi pamue ne Kristo” ne kupeta diakalenga dia kulua ‘bukalenge bua bakuidi.’ Edi divua diakalenga divua tshisamba tshia Isalele tshivua muinshi mua Mikenji mua kupeta. Mupostolo Petelo wakamba bua “bapianyi pamue ne Kristo” ne: “Nuenu nudi ‘bantu basungula, bakuidi bikale bakalenge, tshisamba tshia tshijila, bantu balongolola bua kuikala tshintu tshia Nzambi tshia pa buatshi, bua numanyishe miaba yonso bikadilu bimpe’ bia yeye uvua munubikile bua kupatuka mu mîdima kubuela mu butoke buende bua dikema.” (1 Pet. 2:9) Tshipungidi etshi tshidi bushuwa ne mushinga. Tshidi tshiambuluisha bayidi ba Yezu bua kulua tshitupa tshibidi tshia kankanunuina ka Abalahama.

TSHIPUNGIDI TSHIPIATSHIPIA TSHIDI TSHITUADIJA MUDIMU

10. Ndîba kayi divua tshipungidi tshipiatshipia tshituadije mudimu watshi? Bua tshinyi katshivua tshituadije kumpala kua tshidimu atshi?

10 Ndîba kayi divua tshipungidi tshipiatshipia tshituadije mudimu watshi? Katshivua tshituadije mudimu pavua Yezu muakule bualu buatshi butuku buende bua ndekelu pa buloba to. Bualu bua tshiotshi kutuadija mudimu, mashi a Yezu avua ne bua kuedibua panshi ne bavua ne bua kuleja Yehowa mushinga wa mashi aa mu diulu. Kabidi, bavua ne bua kuitshikijila aba bavua ne bua kulua “bapianyi pamue ne Kristo” nyuma muimpe. Nunku, tshipungidi tshipiatshipia tshiakatuadija mudimu watshi mu Pentekoste wa mu 33 pavua bayidi ba Yezu ba lulamatu bedibue manyi a nyuma muimpe.

11. Mmunyi muvua tshipungidi tshipiatshipia tshienze bua bena Yuda ne bantu ba bisamba bia bende benze Isalele wa mu nyuma? Mbantu bungi kayi badi mu tshipungidi tshipiatshipia?

11 Nansha muvua tshipungidi tshia Mikenji tshia kale ‘tshituishibue ku ndekelu’ mu mushindu kampanda pavua Yehowa mumanyishe ku diambuluisha dia Yelemiya ne: uvua ne bua kudia tshipungidi tshipiatshipia ne Isalele, mudimu wa tshipungidi etshi wakatungunuka too ne  pakatuadija tshipungidi tshipiatshipia mudimu watshi. (Eb. 8:13) Pavua tshipungidi etshi tshituadije mudimu watshi, Nzambi uvua mua kumona bena Yuda ne bantu ba bisamba bia bende bavua kabayi batengula bavua bamuitabuje mu mushindu wa muomumue bualu ‘ditengudibua diabu ndia mu muoyo kudi nyuma, kadi ki ndia kudi mikenji mifunda to.’ (Lomo 2:29) Pavua Nzambi udia nabu tshipungidi tshipiatshipia, uvua ne bua kuteka mikenji yende ‘mu meji abu, ne kuyifunda mu mioyo yabu.’ (Eb. 8:10) Bungi busanga bua bantu badi mu tshipungidi tshipiatshipia budi 144000, badi benza tshisamba tshipiatshipia, mmumue ne: “Isalele wa Nzambi” anyi Isalele wa mu nyuma.—Gal. 6:16; Buak. 14:1, 4.

12. Tshipungidi tshia Mikenji ne tshipungidi tshipiatshipia mbifuanangane ku tshinyi?

12 Tshipungidi tshia Mikenji ne tshipungidi tshipiatshipia mbifuanangane ku tshinyi? Tshipungidi tshia Mikenji tshivua pankatshi pa Yehowa ne Isalele wa ku mubidi; tshipungidi tshipiatshipia tshidi pankatshi pa Yehowa ne Isalele wa mu nyuma. Mose uvua mutuangaji mu tshipungidi tshia kale; Yezu udi Mutuangaji mu tshipungidi tshipiatshipia. Tshipungidi tshia Mikenji tshivua tshijadikibue ku diambuluisha dia mashi a nyama, tshipungidi tshipiatshipia tshivua tshijadikibue ku diambuluisha dia mashi a Yezu avua medibue panshi. Kabidi, tshisamba tshia Isalele tshivua tshilongolola ku diambuluisha dia tshipungidi tshia Mikenji ku bulombodi bua Mose; aba badi mu tshipungidi tshipiatshipia mbalongolola ku bulombodi bua Yezu udi Mutu wa tshisumbu.—Ef. 1:22.

13, 14. a) Mmunyi mudi tshipungidi tshipiatshipia tshipetangana ne Bukalenge? b) Bidi bikengela tshinyi bua Isalele wa mu nyuma kukumbanaye bua kukokesha ne Kristo mu diulu?

13 Tshipungidi tshipiatshipia tshidi tshipetangana ne Bukalenge mu ngumvuilu wa ne: tshidi tshienza tshisamba tshia tshijila tshidi ne diakalenga dia kulua bakalenge ne bakuidi mu Bukalenge bua mu diulu abu. Tshisamba atshi tshidi tshienza tshitupa tshibidi tshia kankanunuina ka Abalahama. (Gal. 3:29) Nunku, tshipungidi tshipiatshipia tshidi tshikolesha tshipungidi tshia Abalahama.

14 Kudi bualu bukuabu budi butangila Bukalenge budi ne bua kujadikibua. Tshipungidi tshipiatshipia tshidi tshipatula Isalele wa mu nyuma ne tshifila tshishimikidi kudi benamu bua kulua “bakokeshi pamue ne Kristo.” Kadi bivua bikengela kulongolola bualu kampanda bilondeshile mikenji bua kubanyishila bua kulonda Yezu mu Bukalenge buende bu bakalenge ne bakuidi mu diulu.

TSHIPUNGIDI TSHIDI TSHIPETESHA BAKUABU MUSHINDU WA KUKOKESHA NE KRISTO

15. Ntshipungidi kayi tshivua Yezu nkayende mudie ne bayidi bende ba lulamatu?

15 Panyima pa Yezu mumane kujadika Didia dia dilolo dia Mukalenge, wakadia tshipungidi ne bayidi bende ba lulamatu tshidibu babikila ne: tshipungidi tshia Bukalenge. (Bala Luka 22:28-30.) Bishilangane ne bipungidi bikuabu bidi Yehowa muikale umue wa ku bitupa bia tshipungidi, etshi tshipungidi tshidi anu pankatshi pa Yezu ne bayidi bende bela manyi. Pavua Yezu muambe ne: “Anu bu mudi Tatu wanyi mudie nanyi tshipungidi,” bidi bimueneka ne: uvua wakula bua tshipungidi tshivua Yehowa mudie nende tshia kuikala “muakuidi kashidi bu Melekisedeke.”—Eb. 5:5, 6.

16. Tshipungidi tshia Bukalenge ntshipeteshe bena Kristo bela manyi diakalenga kayi?

16 Bapostolo 11 ba lulamatu bavua ‘bashale ne Yezu mu makenga ende.’ Tshipungidi tshia Bukalenge tshivua tshibajadikile ne: bavua ne bua kuikala nende mu diulu ne kusomba mu nkuasa ya bukalenge bua kukokesha bu bakalenge ne kuenza mudimu bu bakuidi. Kadi ki nganu bapostolo 11 aba nkayabu bavua bapete diakalenga edi to. Yezu uvua mutumbishibue wakamuenekela mupostolo Yone mu tshikena kumona umuambila ne: “Mutshimunyi nemmuanyishile bua kusomba nanyi mu nkuasa wanyi wa bukalenge, anu bu mumvua panyi mutshimune ne musombe ne Tatu wanyi mu nkuasa wende wa bukalenge.” (Buak. 3:21) Nunku, tshipungidi tshia Bukalenge  ntshienza ne bena Kristo bela manyi 144000. (Buak. 5:9, 10; 7:4) Etshi ke tshipungidi tshidi tshienza tshishimikidi bilondeshile mikenji bua bobu kukokesha ne Yezu mu diulu. Mbifuanangane ne mukaji wa mu dîku dia banene udi ne bua kuselangana ne mukalenge udi ukokesha ne kulua mukumbane bua kukokesha nende. Bushuwa Mifundu idi ileja mudi bena Kristo bela manyi bikale “mukaji” wa Kristo, “utshidi kamama” mulaya bua kuselangana ne Kristo.—Buak. 19:7, 8; 21:9; 2 Kol. 11:2.

IKALA NE DITABUJA DIKOLE KU BUKALENGE BUA NZAMBI

17, 18. a) Umvuija mu tshikoso bipungidi bisambombo bitudi bakonkonone bidi bipetangana ne Bukalenge. b) Bua tshinyi tudi ne bua kuikala ne ditabuja dikole mu Bukalenge?

17 Bipungidi bionso bitudi bakonkonone mu biena-bualu bibidi ebi bidi bitangila tshitupa tshimue tshia Bukalenge anyi bia bungi. (Tangila tablo wa ne: “Muakumbaja Nzambi malu adiye mulongolole.”) Bualu ebu budi buleja ne: bulongolodi bua Bukalenge mbujadika bikole pa malu adi apetangana ne mikenji. Nunku, tudi ne malu adi atusaka bua kueyemena ne muoyo mujima Bukalenge bua Masiya bu tshiamu tshidi Nzambi wenza natshi mudimu bua kukumbaja tshivuaye mulongolole bua buloba ne bantu katshia ku ntuadijilu.—Buak. 11:15.

Ku diambuluisha dia Bukalenge bua Masiya, Yehowa neakumbaje tshidiye mulongolole bua buloba (Tangila tshikoso tshia 15-18)

18 Kakuyi mpata, Bukalenge ke tshintu tshimue tshiajikija ntatu ya bantu. Tudi batuishibue bikole ne: nebupeteshe bantu bonso mabenesha a kashidi. Nunku, tumanyishayi bakuabu bulelela ebu ne tshisumi.—Mat. 24:14.