“Muena lukuna wa ndekelu udiye ne bua kujimija ndufu.” —1 KOL. 15:26.

1, 2. Nnsombelu kayi uvua nende Adama ne Eva ku ntuadijilu? Nnkonko kayi idi ijuka?

PAVUABU bafuke Adama ne Eva, kabavua ne muluishi nansha umue to. Bavua bantu bapuangane bavua basombele mu mparadizu. Bavua mu malanda makole ne Mufuki wabu ne bavua bu bana bende. (Gen. 2:7-9; Luka 3:38) Nzambi uvua mubapeshe mudimu wa mushinga mukole. (Bala Genese 1:28.) Bavua ne bua ‘kuuja buloba tente ne kubukokesha’ munkatshi mua tshikondo bule kampanda. Kadi bua kutungunuka ne ‘kukokesha tshintu tshionso tshidi ne muoyo tshidi tshiendakana pa buloba,’ bivua bikengela bua Adama ne Eva bikale ne muoyo kashidi. Bavua ne bua kuenza mudimu eu bua kashidi.

2 Kadi, bua tshinyi malu adi mushindu mukuabu lelu? Mmunyi muvua baluishi ba bungi ba diakalenga dia muntu kusangisha ne lufu, muena lukuna mutambe bunene bafike ku dikalaku? Ntshinyi tshienza Nzambi bua kumbusha baluishi aba? Tudi mua kupeta mandamuna a nkonko eyi ne mikuabu ya buena eyi mu Bible, ne netuakonkonone mpindieu.

 DIDIMUIJA DIFILA NE DINANGA

3, 4. a) Mmukenji kayi uvua Nzambi muelele Adama ne Eva? b) Kutumikila mukenji eu kuvua ne mushinga kayi?

3 Nansha muvua Adama ne Eva ne diakalenga dia kuikala ne muoyo kashidi, kabavua ne muoyo udi kawuyi ufua to. Bua bobu kushala ne muoyo, bavua ne bua kupuyakana, kunua mâyi, kulala ne kudia. Bualu bua mushinga wa bungi budi ne: dikala diabu ne muoyo divua dilondeshila malanda avuabu nawu ne Mubapeshi wa muoyo. (Dut. 8:3) Kuitaba buludiki bua kudi Nzambi kuvua ne mushinga bua bobu kutungunuka ne kuikala ne muoyo. Yehowa wakaleja Adama bualu ebu patoke kumpala mene kua kufukaye Eva. Mushindu kayi? Bible udi wamba ne: ‘Yehowa Nzambi wakamuelela mukenji ne: udi mua kudia mamuma a mitshi yonso ya mu budimi, bu muudi musue; kadi mamuma a mutshi wa lungenyi lua kujingulula malu mimpe ne malu mabi kuadi nansha; bualu bua mu dituku diudi uadia wewe neufue bulelela.’—Gen. 2:16, 17.

4 “Mutshi wa lungenyi lua kujingulula malu mimpe ne malu mabi” uvua uleja ne: Nzambi uvua ne bukenji bua kuleja tshivua tshimpe ne tshivua tshibi. Bushuwa, Adama ukavua lungenyi lua tshidi tshimpe ne tshidi tshibi bualu bavua bamufuke ku tshimfuanyi tshia Nzambi ne uvua ne kondo ka muoyo. Mutshi uvua uleja Adama ne Eva ne: bavua misangu yonso dijinga ne bulombodi bua kudi Yehowa. Buabu bobu, kudia mutshi kuvua kuleja ne: bavua bajinga budikadidi buvua mua kubakebela bobu ne bana babu njiwu minene. Mukenji wa Nzambi ne dinyoka divua difumina ku dibenga kuwutumikila bivua bileja bunene bua bubi bua dilonda njila mubi au.

MUVUA LUFU LUBUELE MU BANTU

5. Mmunyi muvuabu bafikishe Adama ne Eva ku dibenga kutumikila?

5 Pakafukabu Eva, Adama wakamuambila mukenji wa kudi Nzambi. Uvua muwumanye bimpe ne uvua mua kuwambulula mêyi pa kuamba onso. (Gen. 3:1-3) Uvua muwambuluile Satana uvua wakula nende ku diambuluisha dia nyoka. Satana uvua mulekele dijinga dia kupeta bukokeshi ne budikadidi dikola munda muende. (Fuanyikija ne Yakobo 1:14, 15.) Bua kukumbajaye tshipatshila tshiende tshibi etshi, wakamba muvua Nzambi muena dishima. Wakajadikila Eva ne: kupeta budikadidi kuvua mua kumuvuija bu Nzambi kadi kakuvua mua kumufikisha ku lufu to. (Gen. 3:4, 5) Eva wakamuitabuja, kulejaye muvuaye mudikadile pa kudia tshimuma ne kusaka Adama ku ditshidia pende. (Gen. 3:6, 17) Diabolo uvua mumushime. (Bala 1 Timote 2:14.) Adama ‘wakateleja mukajende.’ Nansha muvua nyoka mua kuikala mumueneke bu mulunda, Satana Diabolo uvua bushuwa muluishi mubi uvua mumanye bipeta bibi bivua mua kufumina ku malu avuaye muambile Eva.

6, 7. Mmunyi muvua Yehowa mukose tshilumbu tshia Adama ne Eva?

6 Adama ne Eva bakatombokela muntu uvua mubapeshe muoyo ne bintu bionso bivuabu nabi. Bushuwa, Yehowa uvua mumanye bimpe malu onso avua menzeke. (1 Kul. 28:9; bala Nsumuinu 15:3.) Uvua mulekele bantu basatu aba bua baleje muvuabu bamumona. Bu mudi Yehowa muikale Tatu, biakamunyingalaja bikole. (Fuanyikija ne Genese 6:6.) Kadi bu Mulumbuluishi, wakenzela bena mibi aba malu bilondeshile buakane.

7 Nzambi wakambila Adama ne: ‘Mu dituku diudi udia [mamuma a mutshi wa lungenyi lua kujingulula malu mimpe ne malu mabi] wewe neufue bulelela.’ Adama uvua mua kuikala mumvue ne: “dituku” adi divua dia mêba 24. Panyima pa yeye mumane kushipa mukenji wa Nzambi, uvua mua kuikala mutekemene bua Yehowa enze bualu kampanda kumpala kua dîba kubueladi. Yehowa wakalua kudi mulume ne mukaji “dilolo.” (Gen. 3:8) Bu mudiye  Mulumbuluishi muakane, wakanji kuteleja bivuabu bamuambila. (Gen. 3:9-13) Pashishe, wakakosela benji ba malu mabi aba tshibawu. (Gen. 3:14-19) Bu yeye mubashipe diakamue, malu avuaye mulongolole bua Adama ne Eva ne ndelanganyi yabu, kaavua mua kukumbana to. (Yesh. 55:11) Nansha muvuaye mubakosele tshibawu tshia lufu ne muvua bipeta bia bubi bituadije diakamue, wakalekela Adama ne Eva bua balele bana bavua mua kupeta masanka avua afumina ku malu avuaye mua kulongolola. Wakamona Adama ne Eva bu bafue mu dituku divuabu benze bubi. Bu mudi bidimu 1000 bikale bu dituku dimue ku mêsu kua Yehowa, bakafua mu “dituku” dimue dimue adi.—2 Pet. 3:8.

8, 9. Ntshinyi tshivua bubi bukebele ndelanganyi ya Adama? (Tangila tshimfuanyi tshia ntuadijilu.)

8 Bana ba Adama ne Eva bavuaku ne bua kupeta bipeta bibi bia tshivua baledi babu benze anyi? Eyowa. Lomo 5:12 udi wamba ne: “Bu muakalua bubi pa buloba bua muntu umue, ne lufu lulue bua bubi abu, nunku lufu luakakuata bantu bonso, bualu bantu bonso bakenza bubi.” Muntu wa kumpala wakafua uvua muena lulamatu Abele. (Gen. 4:8) Pashishe, bana bakuabu ba Adama bakakulakaja ne kufuabu. Bavuaku bapiane bubi ne lufu anyi? Mupostolo Paulo udi wandamuna ne: ‘Dibenga kutumikila dia muntu umue ndivuije bantu ba bungi bena mibi.’ (Lomo 5:19) Bubi ne lufu bidi bantu bapiane kudi Adama biakalua baluishi babu banene, bidi bantu bapange bupuangane kabayi mua kuepuka. Nansha mutudi katuyi kumvuija bimpe muvua bubi ne lufu bisambulukile bana ba Adama, tudi mua kumona tshidibi bikebeshe.

9 Mbikumbane bua mudi Bible ufuanyikija bubi ne lufu bidi bantu bapiane ne ‘tshilamba tshikudika tshidi tshibuikila pa mitu ya bantu bonso, ne tshibuikilu tshidi tshiadija pa mutu pa bisamba bionso.’ (Yesh. 25:7) Kakuena muntu udi mua kuepuka bubi ne lufu to. Ke bualu kayi Bible udi wamba ne: ‘Bantu bonso badi bafua mu Adama.’ (1 Kol. 15:22) Nunku, Paulo wakebeja ne: “Nnganyi wansungila ku mubidi udi uya nanyi ku lufu elu?” Kuvuaku muntu uvua mua kumusungila anyi? *Lomo 7:24.

NEBAJIMIJE BUBI NE LUFU BIA MU ADAMA

10. a) Ngimue mvese kayi idi ileja ne: Yehowa neajimije lufu lua mu Adama? b) Mvese eyi idi ileja tshinyi bua bidi bitangila Yehowa ne Muanende?

10 Bushuwa, Yehowa uvua mua kusungila Paulo. Diakamue panyima pa Yeshayi mumane kuakula bua ‘tshilamba,’ wakafunda ne: ‘Yeye wakumina lufu tshiendelele; ne Mukalenge Yehowa neakupule binsonji ku mêsu kua bantu bonso.’ (Yesh. 25:8) Anu bu tatu udi umbusha bintu bidi bikebela bana bende tunyinganyinga ne ubakupula binsonji, Yehowa udi ne disanka dia bungi dia kumbusha lufu lua mu Adama. Udi ne muntu udi umuambuluisha mu tshilumbu etshi. Mukanda wa 1 Kolinto 15:22 udi wamba ne: “Anu bu mudi bantu bonso bafua mu Adama, nunku kabidi mu Kristo bonso nebapete muoyo.” Bia muomumue, panyima pa Paulo mumane kuebeja ne: “Nnganyi wansungila?,” wakatungunuka wamba ne: “Ndi ngela Nzambi tuasakidila ku butuangaji bua Yezu Kristo Mukalenge wetu.” (Lomo 7:25) Dinanga divua disake Yehowa bua kufuka bantu kadivua dijike bua muvua Adama ne Eva bamutombokele to. Muntu uvua muambuluishe Yehowa bua kufuka mulume ne mukaji ba kumpala kavua mujimije dinanga diende dia pa buadi bua ndelanganyi yabu to. (Nsu. 8:30, 31) Kadi mmunyi muvuabu mua kusungila bantu ku bubi ne lufu?

11. Ntshinyi tshivua Yehowa muenze bua kuambuluisha bantu?

 11 Dipanga bupuangane dia bantu ne lufu mbifumine ku bubi buvua Adama muenze ne ku dilumbuluisha diakane dia Yehowa. (Lomo 5:12, 16) Bible udi wamba ne: ‘Bantu ba mishindu yonso mbapete dipila bua tshilema tshimue.’ (Lomo 5:18) Ntshinyi tshivua Yehowa mua kuenza bua kumbushila bantu dipila kayi ushipa mikenji yende? Tudi tupetela diandamuna mu mêyi a Yezu a ne: ‘Muana wa muntu wakalua bua kufila muoyo wende bu tshia kupikula natshi bantu ba bungi.’ (Mat. 20:28) Bu muvua Yezu, muanabute wa Yehowa wa mu nyuma uvua muledibue pa buloba mupuangane, uvua mua kufila tshia kupikula natshi. Mmunyi muvua tshia kupikula natshi etshi tshipetangana ne buakane?—1 Tim. 2:5, 6.

12. Ntshintu kayi tshia kupikula natshi tshidi tshikumbanangane ne buakane bua Yehowa?

12 Bu muvua Yezu muntu mupuangane, uvua pende ne diakalenga dia kuikala ne muoyo wa kashidi anu bu muvua Adama kumpala kua kuenzaye bubi. Disua dia Yehowa divua dia ne: buloba buwule tente ne bana ba Adama bapuangane. Nunku, bu muvua Yezu munange Tatuende ne bana ba Adama bikole, wakafila muoyo wende wa buntu bu mulambu. Eyowa, Yezu wakafila muoyo wa buntu mupuangane uvua ukumbanangana ne uvua Adama mujimije. Pashishe, Yehowa wakapeshilula Muanende muoyo ne mubidi wa mu nyuma. (1 Pet. 3:18) Yehowa wakitaba mulambu wa Yezu, muntu mupuangane umue, uvua upetangana ne buakane buende bu tshia kupikula natshi peshi mushinga mufuta bua kupikula bena mu dîku dia Adama ne kubapesha ditekemena divua Adama mujimije. Mu mushindu kampanda, Yezu uvua muangate muaba wa Adama. Paulo udi umvuija ne: “Mbafunde mene ne: ‘Muntu wa kumpala Adama wakalua anyima udi ne muoyo.’ Adama wa ndekelu wakalua nyuma udi ufila muoyo.”—1 Kol. 15:45.

Abele, muntu wakafua wa kumpala neapetele masanka mu tshia kupikula natshi tshifila kudi Yezu (Tangila tshikoso tshia 13)

13. Ntshinyi tshienza “Adama wa ndekelu” bua kuambuluisha bafue?

13 Ndekelu wa bionso, tshikondo netshilue tshikala “Adama wa ndekelu” mua kuenza malu bu “nyuma udi ufila muoyo” kudi bantu mu tshibungi. Nebapingajile bana ba Adama ba bungi muoyo. Bua tshinyi? Bualu bavua ne muoyo kumpala ne bakafua. Nebikengele bua bababishe, mmumue ne: bapetulula muoyo pa buloba.—Yone 5:28, 29.

14. Yehowa mmulongolole tshinyi bua kumbusha dipanga bupuangane divua Adama musambulujile ndelanganyi yende?

14 Mmunyi muenzekabi ne: bantu bapikudibue ku dipanga bupuangane? Yehowa wakenza Bukalenge bua mu diulu buenza ne “Adama wa ndekelu” ne bena diende badibu basungule munkatshi mua bantu. (Bala Buakabuluibua 5:9, 10.) Aba bonso badisangisha ne Yezu mu diulu nebikale bamanye tshidi kuikala mupange bupuangane kumvuija. Munkatshi mua bidimu tshinunu, Yezu ne bena diende nebambuluishe bantu bikala pa buloba pa kujikija dipanga bupuangane divuabu kabayi mua kumbusha nkayabu.—Buak. 20:6.

15, 16. a) Padi Bible wakula bua ‘muena lukuna wa ndekelu lufu,’ udi wakula bua lufu kayi? Ndîba kayi diamujimijabu? b) Bilondeshile 1 Kolinto 15:28, ntshinyi tshienza Yezu mu bungi bua matuku?

15 Ku ndekelu kua bidimu tshinunu bia bukokeshi bua Bukalenge, bantu badi batumikila Nzambi nebikale bamane kupikudibua kudi baluishi bonso bavua bafumine ku dibenga kutumikila dia Adama. Bible udi wamba ne: “Anu bu mudi bantu bonso bafua mu Adama, nunku kabidi mu Kristo bonso nebapete muoyo. Kadi muntu ne muntu mu mulongo wende: Kristo mamuma a kumpala, pashishe bantu ba Kristo mu tshikondo tshia dikalaku diende. Pashishe ku ndekelu, neapingaje Bukalenge kudi Nzambi wende ne Tatu wende, pikalaye mumane kujimija mbulamatadi yonso ne bukokeshi  buonso ne bukole. Bualu udi ne bua kukokesha bu mukalenge too ne pateka Nzambi bena lukuna bonso muinshi mua makasa ende. Muena lukuna wa ndekelu udiye ne bua kujimija ndufu.” (1 Kol. 15:22-26) Eyowa, lufu ludi lufumine mu Adama nelujimine ndekelu wa bionso. Nebumbushe bua kashidi ‘tshilamba’ tshidi tshijika bukua bantu bonso.—Yesh. 25:7, 8.

16 Mupostolo Paulo udi ujikija mêyi ende mafundisha ku nyuma mu tshikoso wamba ne: “Patekibua bintu bionso ku bukokeshi buende, Muana muine neaditeke ku bukokeshi bua Yeye uvua muteke bintu bionso ku bukokeshi buende, bua Nzambi ikale ku mutu kua bintu bionso.” (1 Kol. 15:28) Tshipatshila tshia bukokeshi bua Muana netshikale tshimane kukumbana. Pashishe, ne disanka dionso, neapingaje bukokeshi kudi Yehowa ne neamupeshe dîku dia bukua bantu dipuangane.

17. Ntshinyi tshienzelabu Satana ndekelu wa bionso?

17 Kadi, ntshinyi tshiafikila Satana, eu uvua mutuadije kukebela bantu makenga adibu nawu? Buakabuluibua 20:7-15 udi wandamuna. Pelabu bantu bapuangane diteta dia ndekelu, nebalekele Satana bua kutetaye bua kubapambuisha. Nebabutule bua kashidi Diabolo ne aba badi balonda bulombodi buende mu “lufu luibidi.” (Buak. 21:8) Kabakujimija lufu elu to, bualu bantu badi bafua lufu luibidi elu kabakupetulula muoyo kabidi to. Kadi “lufu luibidi” ki mmuena lukuna wa bantu badi banange Mufuki wabu ne badi bamuenzela mudimu to.

18. Mmunyi muikala mudimu uvua Nzambi mupeshe Adama mua kukumbana?

18 Bantu bapuangane nebikale banyishibue tshishiki kumpala kua Yehowa bua kupeta muoyo wa tshiendelele, kakutshiyi muena lukuna nansha umue. Mudimu uvuabu bapeshe Adama newukumbane yeye kayiku. Buloba nebuwule tente ne ndelanganyi yende yikala ne disanka dia kubulama ne kulama nyama. Katujimiji dianyisha ditudi nadi bua mushindu wikala Yehowa mua kujimija lufu, muena lukuna wa ndekelu nansha.

^ tshik. 9 Mukanda wa Étude perspicace des Écritures udi uleja ne: Padi bena malu a sianse bateta kukeba diumvuija dia ne: bua tshinyi tutu tukulakaja ne tufua, batu bapua bualu bua mushinga muoyo. Kabatu bitaba ne: Mufuki ke uvua mukosele bantu ba kumpala tshibawu tshia lufu to. Nunku, kabena mua kumvua bualu ebu bimpe to.—Volime 2, dibeji dia 1147.