Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 9 2014

Baledi wetu—Lamayi bana benu

Baledi wetu—Lamayi bana benu

“Umanye bimpe mudi mushindu wa bisumbu bia mikoko yebe.” —NSU. 27:23.

1, 2. a) Ngimue midimu kayi ivua nayi mulami wa mikoko muena Isalele? b) Mmunyi mudi baledi bafuanangane ne balami ba mikoko?

BALAMI ba mikoko ba mu Isalele wa kale bavua ne nsombelu mukole. Pa kumbusha miunya mikole ne mashika, bavua kabidi ne bua kukuba mikoko yabu kudi nyama ya luonji ne kudi bivi. Balami ba mikoko bavua batabalela mukoko wonso pa tshibidilu ne bavua buondopa ivua isama peshi mitapike. Bavua batamba kutabalela mikoko itshivua miana bualu kayivua ne bukole bua muomumue ne mikoko ikavua mikole to.—Gen. 33:13.

2 Baledi bena Kristo badi ne bua kuikala ne ngikadilu ya buena ya balami ba mikoko. Baledi badi ne bujitu bua kukolesha bana babu “ne mibelu ne didimuija bia Yehowa.” (Ef. 6:4) Mmudimu mupepele anyi? Tòo. Bana batu batuilangana misangu ya bungi ne ngenyi mibi idi Satana umuangalaja ne badi kabidi ne majinga a kuenza malu mabi. (2 Tim. 2:22; 1 Yone 2:16) Biwikala ne bana, mmunyi muudi mua kubambuluisha? Tukonkonone malu asatu audi mua kuenza bua kulama bana bebe aa: 1) kubamanya, 2) kubadisha ne 3) kubalombola.

 MANYA BANA BEBE

3. Bua baledi, ‘kumanya mushindu’ udi bana babu kudi kumvuija tshinyi?

3 Mulami muimpe wa mikoko utu ukonkonona mukoko ne mukoko wonso bimpe bua kumanya bikalawu ne makanda a mubidi. Mu ngumvuilu wa mu tshimfuanyi, udi pebe mua kuenza bia muomumue bua bana bebe. Bible udi wamba ne: “Umanye bimpe mudi mushindu wa bisumbu bia mikoko yebe.” (Nsu. 27:23) Bua kuenza nunku, udi ne bua kumanya bienzedi bia bana bebe, meji adibu bela ne mushindu udibu badiumvua. Mmunyi muudi mua kukumbaja bualu ebu? Umue wa ku mishindu mitambe buimpe, nkuikala ne tshibidilu tshia kuyukila ne bana bebe.

4, 5. a) Ngenyi kayi misunguluke idi mua kuambuluisha bana bua kuambila baledi babu malu adibu nawu? (Tangila tshimfuanyi tshia ntuadijilu.) b) Ntshinyi tshiudi wewe muenze bua bana bebe kukuambilabu malu bipepele?

4 Bamue baledi mbamone ne: bitu bikole bua kuyukidilangana ne bana nangananga padibu balua bansonga, bualu badi mua kuikala kabayi basue bua kuleja meji adibu nawu ne mushindu udibu badiumvua. Bikalabi nanku bua bana bebe, tshiudi mua kuenza ntshinyi? Pamutu pa kuenzeja muanebe wa balume anyi wa bakaji bua kuyukila nende ntanta mule muyuki mukolakane, teta kuyukila nabu mu bikondo binudi badilekelele. (Dut. 6:6, 7) Bidi mua kukulomba bua nuenu kuenza malu pamue. Nudi mua kupatuka nabu ku makasa peshi mu mashinyi, kunaya nabu anyi kuenza nabu midimu kampanda ya kumbelu pamue. Nsombelu ya nunku idi mua kuambuluisha bana bakadi bitende bua kudiumvua badilekelele ne kuamba patoke yonso idibu nayi munda.

5 Ntshinyi tshiudi ne bua kuenza bikala muanebe umueneka kayi anu musue kuakula? Udi mua kuteta mishindu mikuabu. Tshilejilu, pamutu pa kukonka muanebe wa bakaji bua akuambile muvua dituku diende dipite, udi mua kumulondela muvua diebe wewe dipite. Muanebe udi mua kulua pende kukuleja malu avua mamufikile munda mua dituku. Peshi bua wewe kumanya lungenyi lua muanebe mu tshilumbu kampanda, muela nkonko idi itangila anu tshilumbu atshi, kadi ki ngidi imutangila yeye to. Udi mua kumuebeja mudi umue wa ku balunda bende wela meji bua tshilumbu atshi. Pashishe udi mua kumuebeja mubelu udiye mua kupesha mulunda wende au.

6. Kuikala pabuipi bua kuteleja ne kuikala muntu wa kukuatshila malu bidi biumvuija tshinyi?

6 Bushuwa, bua bana bebe kukuambilabu malu badilekelele, mbimpe bamona ne: udi pabuipi bua kubateleja ne udi muntu wa kukuatshila malu. Padi baledi misangu yonso bamueneka bikale ne bia bungi bia kuenza kakuyi mushindu wa kuyukila, bana mu dîku badi pamuapa mua kudilamina malu abu. Netuambe tshinyi bua tshilumbu tshia kuikala muntu wa kukuatshila malu? Kabiena biumvuija anu kuamba patupu ne: “Nudi mua kulua kundi dîba kayi dionso” to. Bana bebe bakadi bitende badi ne bua kudiumvua ne: kuakupepeja malu adibu bakuambila peshi kuadiundisha to. Baledi ba bungi badi tshilejilu tshimpe mu bualu ebu. Kayla udi ne bidimu 19 udi wamba ne: “Ndi mua kuambila papa bualu kayi buonso. Katu unkosa ku mêyi peshi undumbuluisha to, kadi utu anu unteleja patupu. Pashishe utu umpesha mibelu mimpe pa tshibidilu.”

7. a) Mmuenenu kayi wa nkatshinkatshi udi muledi mua kuikala nende mu tshilumbu tshia dipatuka dia mulume ne mukaji? b) Mmunyi mudi baledi mua kufiikisha bana babu munda kabayi bamanye?

7 Nansha paudi wakula bua biena-bualu bidi bikole bua kuakula bualu buabi bu mudi: tshilumbu tshia dipatuka ne nsongalume peshi nsongakaji kampanda, kutambi kuimanyina anu pa madimuija eku upua muoyo bua kulongesha bana bebe mushindu muimpe wa kupita ne tshilumbu etshi to. Tshilejilu, fuanyikija ne: udi uya mu restoran ne umona ne: mu liste wa biakudia mudi anu madimuija adi atangila biakudia bibi. Newumbuke muaba au ne kuya mu restoran mukuabu. Bana bebe badi pabu mua kuenza bia muomumue padibu balua kuudi bua ubapeshe mibelu kadi ubapesha anu liste wa madimuija makolakane. (Bala Kolosayi 3:21.) Pamutu pa kuenza nanku, ikala ne nkatshinkatshi. Emily muanetu wa bakaji kampanda utshidi nsonga udi wamba ne: “Patu baledi banyi bayukila nanyi pa tshilumbu tshia kupatuka  ne nsongalume, kabatu bakula pa tshilumbu etshi bua tshimueneke tshibi to. Batu bimanyina pa disanka didi difumina ku dimanya muntu kampanda ne ku dipeta muntu kampanda wa kuselangana nende. Bualu ebu mbungambuluishe bua kudiumvua mudilekelele ne kuakula nabu bua tshilumbu etshi. Bushuwa, ntu musue kubaleja muntu yonso undi mudie nende bulunda pamutu pa kubasokoka bualu ebu.”

8, 9. a) Mmasanka kayi adi afumina ku diteleja muntu kuyi umukosa ku mêyi? b) Mbipeta kayi bimpe biuvua mupete bua diteleja bana bebe?

8 Mu diumvuangana ne tshivua Kayla muambe, udi mua kuleja muudi muntu wa kukuatshila malu paudi uteleja bana bebe ne lutulu. (Bala Yakobo 1:19.) Mamu kampanda udi udikoleshila bana diende Katia udi wamba ne: “Kumpala mvua mfika munda bikole bua kalu konso kavua muananyi wa bakaji wenza. Tshivua mmupesha mpunga wa kujikija bualu buvuaye ungambila to. Bivua bintshiokesha bua kumuteleja ne tshivua musue bua antondeshe nsombelu to. Kadi mpindieu bu munkadi mushintulule ngenzelu wanyi wa malu, muananyi mmushintulule pende wende. Mpindieu tudi tuyukila nende bimpe.”

Bateleja bua kubamanya (Tangila tshikoso 3-9)

9 Tatu mukuabu diende Ronald uvua pende mu nsombelu wa muomumue ne muanende wa bakaji. Udi wamba ne: “Pavuaye mungambile ne: bavua banangangane ne nsongalume mukuabu mu kalasa, ngakafiika munda diakamue. Kadi pangakela meji bua mudi Yehowa ne lutulu kudi batendeledi bende ne kayi ne malu makole kudibu, ngakamona ne: bivua bimpe bua meme kushila muananyi wa bakaji mpunga wa kulejaye mudiye udiumvua kumpala kua meme kumuambuluisha. Ndi ne disanka bua tshindi muenze. Bua musangu wa kumpala, ngakajingulula malu avua muananyi wa bakaji nawu mu meji. Pakajikijaye, ngakamona ne: bivua bipepele bua meme kuyukila nende mu mushindu muimpe. Bualu bua dikema, wakatumikila mibelu yanyi ne muoyo mujima. Wakaleja muvuaye ne dijinga dikole dia kushintulula tshikadilu tshiende.” Kuyukila ne bana bebe misangu yonso kudi kukupesha mushindu muimpe wa kumanya meji adibu bela ne mushindu udibu badiumvua. Bu tshipeta, newikale ne muaba mu mapangadika ikalabu bangata. *

DISHA BANA BEBE

10, 11. Mmunyi muudi mua kuambuluisha bana bebe bua kabapambuki mu njila?

10 Mulami muimpe wa mikoko mmumanye ne: umue wa ku mikoko yende udi mua kuya kule ne tshisumbu tshia mikoko. Pamuapa udi mua kulonda mashinde adi kantanta pashishe kulonda makuabu adi kule, nunku wenda usemena kule ne  tshisumbu tshia mikoko. Mu mushindu wa muomumue, muana udi mua kutuadija kulonda ku kakese ku kakese njila udi mua kumufikisha ku dinyanga malanda ende ne Nzambi, mukokibue kudi malunda mabi peshi mishindu mibi ya dijikija lutetuku. (Nsu. 13:20) Mmunyi muudi mua kumuambuluisha bua nsombelu wa nunku kamufikidi?

11 Paudi uyisha bana bebe, enza malu ne lukasa paudi ujingulula miaba kampanda idibu ne butekete. Ubambuluishe bua kukoleshabu ngikadilu ya buena Kristo idibu nayi kadi idi ikengela kukolesha. (2 Pet. 1:5-8) Tshikondo tshionso tshia ntendelelu wa mu dîku ke tshidi tshimpe bua wewe kuenza nunku. Mudimu wetu wa Bukalenge wa ngondo wa 10 wa 2008 udi wamba bua bualu ebu ne: “Bamfumu ba mêku badi ne bua kuambula bujitu buabu kumpala kua Yehowa; bua nanku badi ne bua kuikala benza bua ne: bikale ne programe muimpe wa dilonga dia Bible mu mêku abu lumingu luonso ne bikale bamunemeka.” Utuku wenza mudimu bimpe ne tshikondo etshi bua kufila biakudia bimpe bidi mua kulama bana bebe anyi? Ikala mujadike ne: bana bebe badi banyisha bikole mushindu uudi ukeba bua kukumbaja tshia kumpala majinga abu a mu nyuma.—Mat. 5:3; Filip. 1:10.

ubadishe bimpe (Tangila tshikoso tshia 10-12)

12. a) Mmunyi mudi kuenza ntendelelu wa mu dîku pa tshibidilu kuambuluishe bansonga? (Akula kabidi bua malu adi mu kazubu ka ne: “Badi bamuanyisha.”) b) Mmunyi mudi ntendelelu wa mu dîku mukuambuluishe?

12 Tumone tshivua nsonga kampanda diende Carissa muambe bua muvua programe wa Ntendelelu wa mu dîku muambuluishe dîku diabu. Wakamba ne: “Bitu binsankisha bikole patutu tusomba bonso pamue tuyukila. Patutu tuenza nunku, tutu tshintu tshimue ne tukuata malu mimpe. Papa wanyi utu unemeka programe wetu wa ntendelelu wa mu dîku. Bidi bitukolesha patudi tumona ne: utu wangata programe eu ne mushinga ne ebi bidi binsaka panyi bua kumuangata ne mushinga. Bidi binsaka kabidi bua kumunemeka bu tatuanyi ne bu mulombodi wanyi mu malu a mu nyuma.” Muanetu wa bakaji mukuabu utshidi nsonga diende Brittney wakamba ne: “Ntendelelu wa mu dîku mmunsemeje pabuipi ne baledi banyi bikole. Udi undeja ne: mbasue kuteleja malu andi nawu ne badi bushuwa bantabalela. Ntendelelu eu udi utuambuluisha bua kuikala mu dîku dikole ne didi mu buobumue.” Bushuwa, kudisha bana bebe mu nyuma nangananga ku diambuluisha dia ntendelelu wa mu dîku mmushindu munene uudi mua kuikala mulami muimpe wa mikoko. *

LOMBOLA BANA BEBE

13. Ntshinyi tshidi mua kusaka muana bua kuenzela Yehowa mudimu?

13 Mulami muimpe wa mikoko utu wenza mudimu ne dikombo bua kulombola ne kukuba mikoko yende. Tshimue tshia ku bipatshila biende binene ntshia kulombola mikoko yende mu “madimi adi ne mashinde makane.” (Yeh. 34:13, 14) Wewe bu muledi, kuenaku pebe ne tshipatshila tshia mu nyuma tshia buena etshi anyi? Udi musue kulombola bana bebe bua kuenzelabu Yehowa mudimu. Udi musue bua bana bebe badiumvue bu muvua mufundi wa Misambu wakamba ne: “Ndi ne disanka bua kuenza disua diebe, Nzambi wanyi, bulelela, mukenji webe udi mu mutshima wanyi.” (Mus. 40:8) Bansonga badi ne dianyisha dia nunku, nebadilambule kudi Yehowa ne nebatambule. Badi ne bua kuenza nunku padibu bapeta dimanya dikumbane bua kuangata dipangadika ne kupeta dijinga dilelela dia kuenzela Yehowa mudimu.

14, 15. a) Baledi bena Kristo badi ne bua kuikala ne tshipatshila kayi? b) Ntshinyi tshidi mua kufikisha muana ku dikala ne dielakana bua ntendelelu mulelela?

14 Kadi netuambe tshinyi bua bana badi bamueneka kabayi balubuluka mu nyuma pamuapa belakana too ne bua ditabuja diabu? Dienzeja bua kubakuna dinanga dia Yehowa Nzambi ne dianyisha bua malu onso mimpe adiye muenze. (Buak. 4:11) Pashishe, padibu bakumbana bua kuenza nunku, badi mua kudiangatshila dipangadika dia kutendelela Nzambi.

15 Kadi mu lupolo alu, newenze tshinyi bikala bana bebe batuadija kuela mpata? Mmunyi muudi mua kubalama ne kubambuluisha bua bamone ne: kuenzela Yehowa mudimu kudi bushuwa bualu  butambe buimpe bua mu nsombelu ne nekubapeteshe masanka a kashidi? Teta mua kumanya bualu budi bubafikisha ku dikala ne mpata. Tshilejilu, muanebe wa balume udiku mu bulelela ubenga malongesha a mu Bible anyi, peshi udi utshina patupu bua kuyisha bana nende? Muanebe wa bakaji udiku bushuwa wela mpata bua mudi mikenji ya Nzambi ya meji anyi, peshi udi udiumvua nkayende ne udiumvua ne: bantu bakuabu mbamulekele?

ubalombole mu njila wabu (Tangila tshikoso tshia 13-18)

16, 17. Mmu mishindu kayi mudi baledi mua kuambuluisha bana babu bua kunanga bulelela?

16 Nansha biobi bikale bua bualu kayi, udi mua kuambuluisha muanebe bua kumbusha mpata yonso idiye nayi bua bidi bitangila bulelela. Mushindu kayi? Mushindu umue udi bantu ba bungi bamone mukumbane bua kupatula bipeta bimpe nkupatula malu adi munda mua muanabu wa balume anyi wa bakaji pa kumuebeja ne: “Buebe wewe kuikala muena Kristo mbualu bukole anyi mbualu bupepele? Kuikala muena Kristo kudi kukupetesha masanka kayi? Kudi kukulomba malu kayi? Malu adiku kulomba adiku a bungi kupita audi upeta mpindieu ne awalua kupeta kumpala eku anyi? Mmushindu kayi?” Bushuwa, udi ne bua kuela nkonko eyi mu ebe mêyi ne mu mushindu muimpe udi ukoka ntema kadi ki mbu udi ulumbuluishangana to. Panudi nuyukila, nudi mua kukonkonona mukanda wa Mâko 10:29, 30. Bamue bansonga badi mua kujinga kuenza liste ibidi, umue bua masanka adibu bapeta bua mudibu bena Kristo ne mukuabu bua malu adibu ne bua kuenza. Kuenza nunku kudi mua kukuambuluisha wewe ne bana bebe bua kumanya ntatu idibu nayi ne kubambuluisha bua kuyijikija. Bikalabi ne: tudi basue kulonga mukanda wa Bible ulongesha ne wa Dinanga dia Nzambine bantu badi bitaba, kabienaku bitambe buimpe bua kuyilonga ne bana bebe anyi? Ke tshiutu wenza anyi?

17 Mu bungi bua matuku, bana bebe nebadiangatshile dipangadika dia kusungula muntu wikalabu mua kuenzela mudimu. Kuedi meji ne: nebitabe bua kuenzela Yehowa mudimu anu bualu wewe pebe udi umuenzelawu to. Bana bebe badi ne bua kudia malanda ne Yehowa nkayabu. (Nsu. 3:1, 2) Bikalabi bimueneka bu ne: mbikolele muana bua kuenza nunku, musaka bua kukonkonona malu adiye witabuja pa kudiela nkonko bu mudi: “Ntshinyi tshidi tshinjadikila ne: Nzambi udiku? Ntshinyi tshidi tshinjadikila ne: Yehowa Nzambi udi bushuwa ungangata ne mushinga? Bua tshinyi ndi ngitaba ne: mikenji ya Yehowa idiku bua diakalenga dianyi?” Leja muudi mulami muimpe wa mikoko paudi ulombola muanebe peshi bana bebe bua kubajadikila ne: njila wa Yehowa ke njila mutambe buimpe wa kulonda mu nsombelu wetu. *Lomo 12:2.

18. Mmunyi mudi baledi mua kuidikija Yehowa, Mulami wa mikoko mutambe bunene?

18 Bena Kristo balelela bonso mbasue kuidikija Mulami wa mikoko mutambe bunene. (Ef. 5:1; 1 Pet. 2:25) Baledi badi ne bua kumanya mushindu wa bisumbu bia mikoko yabu, mmumue ne: bana babu bananga, ne badi ne bua kuenza tshionso tshidibu ne bua kuenza bua kubalombola ku masanka adi Yehowa mubalongoluele. Nunku, lama bana bebe pa kutungunuka ne kubakolesha mu bulelela.

^ tshik. 9 Bua kumanya malu makuabu, bala Tshibumba tshia Nsentedi tshia dia 1/8/2008 dibeji dia 10-12 (Mfual.).

^ tshik. 12 Bua kumanya malu makuabu, bala tshiena-bualu tshia ne: “Ntendelelu wa mu dîku udi ne mushinga bua kupanduka” mu Tshibumba tshia Nsentedi tshia dia 15/10/2009, dibeji dia 29-31.

^ tshik. 17 Mbakule kabidi bua bualu ebu mu Tshibumba tshia Nsentedi tshia dia 1/2/2012, dibeji dia 18-21 (Mfual.).