Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 8 2014

Nkonko ya babadi

Nkonko ya babadi

Yezu wakambila Basadoke ne: bantu babika ku lufu “kabena basela anyi basedibua to.” (Luka 20:34-36) Uvuaku wakula bua bantu babika bua kupeta muoyo pa buloba anyi?

Elu ndukonko lua mushinga mukole, nangananga kudi aba badi bafuishe bena dibaka nabu bavuabu banange. Bantu ba mushindu eu badi mua kuikala bajinga ne muoyo mujima bua kupetangana kabidi mu dibaka ne bena dibaka nabu aba mu bulongolodi bupiabupia pababishabu. Mulume kampanda uvua mufuishe mukajende wakamba ne: “Meme ne mukajanyi katuvua basue bua dibaka dietu difua to. Tuvua ne dijinga dikole dia kutungunuka ne kutendelela pamue bu mulume ne mukaji bua kashidi. Tshitu muanji kushintulula meji anyi to.” Kudiku bualu kampanda budi butusaka bua kutekemena ne: bantu babishibua nebaselangane anyi? Mu kuamba kuimpe, katuena mua kuamba nanku to.

Kukadi bidimu, mikanda yetu ivua ileja ne: mêyi a Yezu adi akula bua dibika dia bafue ne diselangana avua akula bua bantu babika bua kupeta muoyo pa buloba ne aleja ne: bantu babishibua bua kupeta muoyo mu bulongolodi bupiabupia kabakuselangana to. * (Mat. 22:29, 30; Mâko 12:24, 25; Luka 20:34-36) Nansha mutudi katuyi mua kushindika bualu ebu, bidiku mua kuikala ne: mêyi a Yezu adi akula bua bantu babika bua kupeta muoyo mu diulu anyi? Tukonkononayi tshivua Yezu muambe.

Mbanganyi bavua Yezu uyukila nabu pavuaye muakule bua dibishibua? (Bala Luka 20:27-33.) Uvua uyukila ne Basadoke bavua kabayi bitabuja dibika dia bantu ne bavua bakeba kumukuata ku mêyi pavuabu bamuele lukonko luvua lutangila dibika dia bantu ku lufu ne disedibua dia mukaji kudi bana babu ne bayende. * Yezu wakabandamuna ne: “Bana ba mu ndongoluelu wa malu eu badi basela, badi basedibua, kadi bantu badibu bamone bakumbane bua kufika ku ndongoluelu wa malu au ne ku dibishibua dia bantu ku lufu kabena basela anyi basedibua to. Nunku kabakufua kabidi to, bualu badi bu banjelu ne mudibu bana ba dibishibua badi balua bana ba Nzambi.”—Luka 20:34-36.

Bua tshinyi mikanda yetu ivua mileje ne: Yezu uvua mua kuikala wakula bua bantu babishibua bua kupeta muoyo pa buloba? Bualu ebu buvua buimanyine pa ngenyi minene ibidi. Lua kumpala: Basadoke bavua mua kuikala bela meji bua dibika dia bantu bua kupeta muoyo pa buloba pavuabu bakula ne Yezu ne uvua mua kuikala mubandamune bilondeshile lungenyi luvuabu nalu. Luibidi: Yezu wakajikija diandamuna diende pa kutela Abalahama, Izaka ne Yakoba bavua bankambua ba lulamatu badi mu mulongo wa bantu babika bua kupeta muoyo pa buloba.—Luka 20:37, 38.

Kadi, bidi bimueneka ne: Yezu uvua mua kuikala wela meji bua bantu babika bua kupeta muoyo mu diulu. Mmalu kayi adi mua kutusaka bua kuamba nanku? Tukonkononayi biambilu bibidi binene bidi mu diandamuna divua Yezu mupeshe Basadoke.

‘Bantu badibu bamone bakumbane bua kubishibua ku lufu.’ Bena Kristo bela manyi ba lulamatu badi ‘babadibua bakumbanyine Bukalenge bua Nzambi.’ (2 Tes. 1:5, 11) Mbabadibue bakane bua kupetabu muoyo ku diambuluisha dia tshia kupikula natshi ne kabena bafua bua dipila dia mibi to. (Lomo 5:1, 18; 8:1) Badi bababikila ne: ‘ba diakalenga ne ba tshijila’ ne mbakumbanyine dibishibua bua kupeta muoyo mu diulu. (Buak. 20:5, 6) Bishilangane, bantu babishibua bua kupeta muoyo pa buloba badi munkatshi mua “bantu bakane.” (Bien. 24:15) Tudiku mua kubamba ne: ‘mbabadibue bakumbane’ bua kubishibua anyi?

 “Kabena mua kufua kabidi.” (MML) Yezu kavua muambe ne: “Kabakufua kabidi” to. Kadi uvua muambe ne: “Kabena mua kufua kabidi.” Nkudimuinu mikuabu idi yamba ne: “Kabena bamanye mua kufua kabidi” ne “Lufu kaluena kabidi ne bukokeshi kudibu to.” Bela manyi badi bajikija lubilu luabu lua pa buloba ne lulamatu badi bababisha bua kuya mu diulu ne babapesha muoyo udi kawuyi mua kufua, mmumue ne: udi kauyi ndekelu anyi udi kawuyi mua kubutuka. (1 Kol. 15:53, 54) Lufu kaluakuikala kabidi ne bukole kudi aba badi babishibua bua kuikala ne muoyo mu diulu to. *

Bilondeshile bitudi bamone ebi, ntshinyi tshitudi mua kuamba? Bidi bimueneka ne: mêyi a Yezu adi atangila diselangana ne dibishibua adi akula bua bantu babika bua kupeta muoyo mu diulu. Bikalabi nanku, mêyi ende adi mua kutuambila amue malu adi atangila bantu babishibua bua kupeta muoyo mu diulu bu mudi aa: kabena mua kusela anyi kusedibua, kabena mua kufua ne mu mushindu kampanda badi bu banjelu mmumue ne: bifukibua bia mu nyuma bidi mu diulu. Kadi bualu ebu budi bujula imue nkonko.

Lua kumpala, bikalabi ne: Basadoke bavua bobu bela meji bua bantu babika bua kupeta muoyo pa buloba, bua tshinyi Yezu uvua yeye wakula bua bantu badi babika bua kuya mu diulu? Misangu ya bungi Yezu kavua wandamuna baluishi bende bilondeshile muvuabu bela meji to. Tshilejilu, wakambila bena Yuda bavua bamulomba tshimanyinu ne: “Upulayi ntempelo eu, nemmujule mu matuku asatu.” Yezu uvua mua kuikala mumanye ne: bavua bela meji bua ntempelo muena dîna eu, “kadi yeye uvua wakula bua ntempelo wa mubidi wende.” (Yone 2:18-21) Pamuapa Yezu uvua mumone ne: kabivua ne mushinga bua kuandamuna Basadoke bena lubombo bavua kabayi bitabuja dibika dia bafue peshi dikalaku dia banjelu to. (Nsu. 23:9; Mat. 7:6; Bien. 23:8) Kadi Yezu uvua mua kuikala musue kuleja bayidi bende malu avua atangila dibishibua bua kuya mu diulu. Bavua bayidi balelela bavua mua kupeta ditekemena dia kuya mu diulu.

Luibidi, bua tshinyi Yezu uvua mutele ku ndekelu kua muyuki wabu Abalahama, Izaka ne Yakoba, bantu bikala mua kubishibua bua kupeta muoyo pa buloba? (Bala Matayi 22:31, 32.) Kumpala kua Yezu kutela bantu ba lulamatu aba, wakatuadija mêyi ende ne mêyi avua akula “bua dibika dia bafue.” Tshiambilu etshi tshidi mua kuambuluisha bua kumbuka mu tshilumbu tshia dibika dia bantu bua kuya mu diulu kubuela mu tshia dibika dia bantu bua kupeta muoyo pa buloba. Yezu uvua mumanye ne: Basadoke batu bitaba malu avua Mose mufunde, ke bualu kayi wakatela mêyi a Nzambi avuaye muambile Mose ku kamutshi kavua kalakuka mudilu. Yezu uvua musue kujadikila Basadoke ne: dibishibua dia bantu bua kuikala ne muoyo pa buloba divua bumue bua ku malu adi Nzambi mulongolole.—Ekes. 3:1-6.

Luisatu, bikala mêyi a Yezu avua akula bua dibika dia bantu ne dibuela mu dibaka atangila bantu bikala mua kubishibua bua kuya mu diulu, bidiku biumvuija ne: aba babishibua bua kupeta muoyo pa buloba nebikale mua kubuela mu dibaka anyi? Dîyi dia Nzambi ki ndifile diandamuna ditoke ku lukonko elu to. Bu bikalabi ne: Yezu uvua wakula bua bantu babika bua kuya mu diulu, nunku mêyi ende ki mmaleje patoke bikala bantu babishabu bua kuikala ne muoyo pa buloba mua kusela anyi kusedibua mu bulongolodi bupiabupia to.

Kadi bua mpindieu tudi bamanye ne: Dîyi dia Nzambi didi dileja patoke ne: lufu lutu lufikisha dibaka ku difua. Nunku, mulume anyi mukaji udi mufuishe muena dibaka nende kena ne bua kudiumvua mupile yeye muangate dipangadika dia kusela anyi kusedibua kabidi to. Edi ndipangadika dia muntu nkayende, ne bantu bakuabu kabena ne bua kuakula bibi bua muntu udi ukeba muntu udiye munange bua kubuela nende mu dibaka to.—Lomo 7:2, 3; 1 Kol. 7:39.

Kakuyi mpata, tudi mua kuikala ne nkonko ya bungi idi itangila nsombelu wikala nende bantu mu bulongolodi bupiabupia. Pamutu pa kusamisha mutu patupu bua kupeta mandamuna a nkonko eyi, mbimpe tuindile bua kudimuenena. Kadi tudi ne bua kuikala bajadika ne: bantu badi batumikila Yehowa nebikale ne disanka, bualu neabakumbajile mu mushindu muimpe majinga abu ne malu adibu bajinga kumanya.—Mus. 145:16.

^ tshik. 4 Bala Tshibumba tshia Nsentedi tshia dia 1/6/1987, dibeji dia 30-31, mu Mfualansa.

^ tshik. 5 Mu bikondo bia kale, disedibua dia mukaji kudi bana babu ne bayende divua tshilele tshivua tshilomba ne: muntu uvua mua kusela mukaji wa muanabu uvua mufue kayi mushiye bana, bua amulelele muana uvua ne bua kutungunuja dîna dia muanabu mu dîku.—Gen. 38:8; Dut. 25:5, 6.

^ tshik. 9 Bantu babika bua kupeta muoyo pa buloba nebapete diakalenga dia kuikala ne muoyo wa kashidi, kadi ki mmuoyo udi kawuyi mua kufua to. Bua kumanya malu a bungi adi aleja dishilangana didi pankatshi pa muoyo udi kawuyi ufua ne muoyo wa kashidi, bala Tshibumba tshia Nsentedi tshia dia 1/7/1984, dibeji dia 30-31, mu Mfualansa.