Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 7 2014

“Nenuikale bantemu banyi”

“Nenuikale bantemu banyi”

‘Yezu wakabambila ne: “Nenuikale bantemu banyi too ne ku ntengu ya buloba.”’—BIEN. 1:7, 8.

1, 2. a) Nnganyi udi ntemu munene wa Yehowa? b) Dîna Yezu didi diumvuija tshinyi? Mmunyi muvua muana wa Nzambi muenze malu mu diumvuangana ne dîna edi?

PAVUABU balumbuluisha Yezu Kristo ku kabadi, wakambila nguvena wa mu Yuda uvua muena Lomo ne: “Mvua muledibue bua bualu ebu ne ndi mulue pa buloba bua bualu ebu, bua kumanyisha bulelela.” (Bala Yone 18:33-37.) Yezu wakaleja muvuaye mukalenge. Panyima pa bidimu, mupostolo Paulo wakakula bua tshilejilu etshi tshia dikima tshia Yezu “uvua mujikule malu bimpe patoke bu ntemu kumpala kua Ponsio Pilato.” (1 Tim. 6:13) Bushuwa, imue misangu bitu bilomba dikima dia bungi bua kuikala “ntemu wa lulamatu ne mulelela” mu bulongolodi bua Satana budi buwule tente ne lukinu.—Buak. 3:14.

2 Bu muvua Yezu muikale wa mu tshisamba tshia Yuda, uvua ntemu wa Yehowa katshia ku tshilelelu. (Yesh. 43:10) Bushuwa, wakalua ntemu munene kupita bantemu bonso bavua Nzambi muenze nabu mudimu mu dîna diende. Yezu wakangata diumvuija dia dîna divua Nzambi mumupeshe ne mushinga wa bungi. Pavua muanjelu muambile Jozefe, tatuende wa Yezu wa pa buloba ne: Mariya uvua muimite difu ku diambuluisha dia nyuma muimpe, wakasakidila ne: “Nealele muana wa balume, neumuinyike dîna ne: Yezu, bualu neasungile bantu bende ku mibi yabu.” (Mat. 1:20, 21) Bamanyi ba malu a mu Bible mu tshibungi badi bitaba ne: dîna Yezu didi difumina ku dîna dia  mu tshiena Ebelu dia ne: Yeshua, ne dîna edi didi ne tshikepeshilu tshia dîna dia Nzambi; didi diumvuija ne: “Yehowa udi lupandu.” Mu diumvuangana ne diumvuija dia dîna edi, Yezu wakambuluisha “mikoko mijimine ya mu nzubu wa Isalele” bua kunyingalalayi bua mibi yayi bua Yehowa kuyanyishayi kabidi. (Mat. 10:6; 15:24; Luka 19:10) Nunku, Yezu wakayisha bua Bukalenge bua Nzambi ne tshisumi. Mâko wakafunda ne: “Yezu wakaya mu Galela wenda uyisha lumu luimpe lua Nzambi, wamba ne: ‘Tshikondo tshijadika tshikadi tshikumbane, Bukalenge bua Nzambi bukadi busemene pabuipi. Kudimunayi mitshima yenu, nuitabuje lumu luimpe.’” (Mâko 1:14, 15) Yezu wakela kabidi patoke ne dikima bamfumu ba bitendelelu bena Yuda bavua badisangishe ne bena Yuda bua kumushipa.—Mâko 11:17, 18; 15:1-15.

“MALU MANENE A DIKEMA A NZAMBI”

3. Ntshinyi tshiakenzeka dituku disatu panyima pa lufu lua Yezu?

3 Bualu bua dikema, mu dituku disatu panyima pa lufu lubi lua Yezu, Yehowa wakamujula ku lufu ne mubidi wa mu nyuma udi kawuyi ufua, kadi ki nne mubidi wa mashi ne mâyi to. (1 Pet. 3:18) Bua kujadika bualu ebu, Mukalenge Yezu wakangata mubidi wa mashi ne mâyi bu tshijadiki tshia muvuaye mujuke ku lufu. Mu dituku dia kumpala yeye mumane kubika ku lufu, wakamueneka kudi bapostolo bashilangane misangu mitue ku itanu.—Mat. 28:8-10; Luka 24:13-16, 30-36; Yone 20:11-18.

4. Ntshisangilu kayi tshivua Yezu mulombole dituku divuabu bamubishe ku lufu? Mmudimu kayi uvuaye muleje bayidi bende patoke bua kuenza?

4 Musangu muitanu uvua Yezu mumuenekele bantu bivua bua kudimanyisha kudi bapostolo bende ne kudi bantu bakuabu bavua badisangishe nabu. Mu tshikondo tshidi katshiyi kupua muoyo etshi, bivua bienze anu bu ne: uvua mulombole dilonga dia Dîyi dia Nzambi. Bible udi wamba ne: “Wakabunzulula lungenyi bimpe menemene bua kujingululabu malu a mu Mifundu minsantu.” Nunku, bakumvua ne: lufu ludibu bamushipe kudi baluishi ba Nzambi ne mushindu uvuabu bamubishe ku lufu mu tshishima bikavua bimanyisha mu Mifundu. Ku ndekelu kua tshisangilu tshivua tshienzeke dituku divuaye mubike atshi, Yezu wakaleja patoke bantu bavua bamuteleja mudimu uvuabu ne bua kuenza. Wakabambila muvuabu “ne bua kuyisha mu bisamba bionso dikudimuna dia mutshima bua kupeta dilekelela dia mibi mu dîna diende, kubangila mu Yelushalema.” Wakasakidila ne: “Nudi ne bua kuikala bajadiki ba malu aa.”Luka 24:44-48.

5, 6. a) Bua tshinyi Yezu uvua muambe ne: “Nenuikale bantemu banyi”? b) Mbualu kayi bupiabupia buvua Yehowa mulongolole buvua bayidi ba Yezu ne bua kumanyisha?

5 Nunku, matuku 40 pashishe, pavua Yezu mumuenekele bapostolo bende bua musangu wa ndekelu, bavua mua kuikala bumvue bimpe tshivuaye musue kuamba pakabapeshaye mukenji wa mushinga mu mêyi matoke eu ne: “Nuenu nenupete bukole panupuekela nyuma muimpe, nenuikale bantemu banyi mu Yelushalema, mu Yudaya mujima, mu Samaleya, too ne ku ntengu ya buloba.” (Bien. 1:8) Bua tshinyi Yezu uvua muambe ne: “nenuikale bantemu banyi,” kadi kayi wamba ne: ba Yehowa? Yezu uvua mua kuamba ne: ba Yehowa, kadi bantu bavuaye wambila bavua bena Isalele ne bakavua bamane kuikala bantemu ba Yehowa.

Bu mutudi bayidi ba Kristo, tudi tutungunuka ne kumanyisha malu adi Yehowa mulongolole mu matuku atshidi alua (Tangila tshikoso 5 ne 6)

6 Bayidi ba Yezu bavua mpindieu ne bua kumanyisha bualu bupiabupia buvua Yehowa mulongolole, bualu buvua bupite kule ne kule dipikudibua dia bena Isalele mu bupika bua bena Ejipitu ne pashishe bua bena Babilona. Lufu lua Yezu Kristo ne dibika diende mbienze bua bantu bapikudibue ku bupika butambe bubi, mmumue ne: bupika bua bubi ne lufu. Mu Pentekoste wa mu 33, bayidi ba Yezu bavua bafuma ku diedibua manyi bakamanyisha bantu “malu manene a dikema a Nzambi,” ne bantu ba bungi bavua babateleje bakitaba. Nunku, Yezu uvua musombe ku dia balume dia Tatuende ne uvua umona muvua dîna diende dimanyishibua bikole ne bantu binunu bia bungi bakudimuna mitshima ne bitabuja  muvua Yehowa wenza nende mudimu bua kupetesha bantu lupandu.—Bien. 2:5, 11, 37-41.

“TSHIA KUPIKULA NATSHI BANTU BA BUNGI”

7. Malu avua menzeke mu dituku dia Pentekoste wa mu 33 akaleja tshinyi?

7 Malu avua menzeke mu dituku dia Pentekoste wa mu 33 akaleja ne: Yehowa uvua muitabe mushinga wa mulambu mupuangane wa Yezu bu tshintu tshia kubuikidila natshi bantu bubi. (Eb. 9:11, 12, 24) Anu muvua Yezu muleje, “kavua mulue bua bamuenzele mudimu to, kadi wakalua bua kuenzela bakuabu mudimu ne kufila muoyo wende bu tshia kupikula natshi bantu ba bungi.” (Mat. 20:28) “Bantu ba bungi” bavua ne bua kupetela masanka mu mulambu wa Yezu udi upikula kabavua ne bua kuikala anu bena Yuda bavua bakudimune mitshima nkayabu to. Kadi, Nzambi mmusue “bua bantu ba mishindu yonso basungidibue” bualu mulambu udi upikula udi “umbusha mibi ya ba pa buloba.”1 Tim. 2:4-6; Yone 1:29.

8. Tshivua tshiambuluishe bayidi ba Yezu bua kutungunuka ne kuyisha malu ende ntshinyi? Ntshinyi tshivuabu bafike ku dikumbaja?

8 Bayidi ba Yezu ba kumpala bavuaku ne dikima divua dikengela bua kutungunuka ne kumanyisha malu ende anyi? Eyowa, kadi kabavua benza mudimu eu ku bukole buabu to. Bukole bua nyuma muimpe wa Yehowa buakabasaka ne kubapesha bukole bua kutungunuka ne kufila bumanyishi. (Bala Bienzedi 5:30-32.) Bidimu 27 panyima pa Pentekoste wa mu 33, bavua mua kuamba ne: “mukenji wa bulelela wa lumu luimpe” mmufike kudi bena Yuda ne kudi bantu ba bisamba bia bende “munkatshi mua bifukibua bionso bidi muinshi mua diulu.”—Kolos. 1:5, 23.

9. Anu mukavuabu bamanyishe, ntshinyi tshivua tshienzekele tshisumbu tshia bena Kristo tshia kumpala?

9 Kadi bia dibungama, tshisumbu tshia bena Kristo ba kumpala tshivua tshikezuke etshi tshiakatuadija kunyanguka ku kakese ku kakese. (Bien. 20:29, 30; 2 Pet. 2:2, 3; Yuda 3, 4) Anu muvua Yezu muleje, butontolodi ebu buvua bukebesha kudi “mubi” peshi Satana buvua ne bua kuvula ne kubuitshidija buena Kristo bulelela too ne ku “nshikidilu wa ndongoluelu wa malu.” (Mat. 13:37-43) Pashishe Yehowa uvua ne bua kuteka Yezu bu Mukalenge ku mutu kua bantu. Bualu ebu buakenzeka mu ngondo wa 10 wa 1914 ne tshivua ntuadijilu wa “matuku a ku nshikidilu” wa ndongoluelu mubi wa malu wa Satana.—2 Tim. 3:1.

10. a) Bena Kristo bela manyi ba tshikondo tshietu etshi bakavua bamanyishe bua tshidimu kayi tshia mushinga? b) Ntshinyi tshiakenzeka mu ngondo wa 10 wa 1914? Mmunyi muvua bualu ebu bumueneke patoke?

10 Bena Kristo bela manyi ba tshikondo tshietu  etshi bakavua baleje kumpala muvua ngondo wa 10 wa 1914 ne bua kuikala wa pa buende. Bavua baleje bualu ebu bilondeshile mulayi wa buprofete wa Danyele udi wakula bua mutshi munene uvuabu bakose ne uvua ne bua kukola kabidi panyima pa ‘bikondo muanda mutekete.’ (Dan. 4:16, NWT) Yezu wakakula kabidi bua tshikondo etshi bu “tshikondo tshijadika tshia bisamba” mu mulayi wende uvua wakula bua dikalaku diende mu matuku atshivua alua ne bua ‘nshikidilu wa ndongoluelu wa malu eu.’ Katshia anu ku tshidimu tshia 1914, ‘tshimanyinu tshia dikalaku dia Yezu’ bu Mukalenge mupiamupia wa buloba ntshimueneke patoke kudi bantu bonso. (Mat. 24:3, 7, 14; Luka 21:24) Nunku, katshia anu ku tshikondo atshi, mu “malu manene a dikema a Nzambi” mudi ditekibua dia Yezu bu Mukalenge kudi Yehowa ku mutu kua bantu.

11, 12. a) Mukalenge mupiamupia wa buloba uvua mutuadije kuenza tshinyi panyima pa mvita mu 1919? b) Mbualu kayi bukuabu buakatuadija kuenzeka kubangila mu 1935? (Tangila tshimfuanyi tshia ntuadijilu.)

11 Bu muvua Yezu Kristo mulue Mukalenge mupiamupia wa buloba, wakatuadija diakamue kusungila bayidi bende bela manyi ku bupika bua “Babilona munene.” (Buak. 18:2, 4) Mu 1919 panyima pa mvita, kuakamueneka mpunga wa kumanyisha mushindu uvua Nzambi mulongolole bua kupeta lupandu ne kumanyisha lumu luimpe lua muvuabu bajadike Bukalenge. Bena Kristo bela manyi bakapeta mpunga wa kufila bumanyishi ne biakambuluisha bua kusangisha bela manyi binunu bia bungi bua kuluabu bapianyi pamue ne Kristo.

12 Kutuadijila mu 1935, biakamueneka patoke ne: Kristo ukavua mutuadije kusangisha miliyo ya “mikoko mikuabu” ivua mua kuenza “musumba munene wa bantu” ba mu bisamba bionso. Musumba munene udi ku bulombodi bua bena Kristo bela manyi eu udi kabidi ulonda tshilejilu tshia dikima dia Yezu ne udi umanyisha patoke ne: lupandu luabu ludi lufumina kudi Nzambi ne kudi Kristo. Padibu bananukila ne kuenza mudimu eu ne batungunuka ne kuleja ditabuja mu mulambu wa Kristo udi upikula, bantu aba nebapete diakalenga dia kupanduka ku “dikenga dinene” dikala mua kufikisha bulongolodi bua Satana ku ndekelu.—Yone 10:16; Buak. 7:9, 10, 14.

‘UKOLESHE MUOYO BUA KUAMBA LUMU LUIMPE’

13. Bu mutudi Bantemu ba Yehowa, tudi badisuike bua kuenza tshinyi? Ntshinyi tshitudi ne bua kuenza bua kukumbaja bualu ebu?

13 Tutungunukayi ne kuangata ne mushinga dikala dietu Bantemu ba “malu manene a dikema a Nzambi” adi Yehowa muenze ne ba milayi yende ya matuku atshilualua. Bushuwa, kabitu bipepele misangu yonso bua kufila bumanyishi to. Bana betu ba bungi badi bayisha mu teritware mudi bantu kabayi babateleja, babapuekesha milongo peshi babakengesha bikole. Tudi mua kuenza anu bu muvua mupostolo Paulo ne bena diende benze. Paulo wakamba ne: “Tuakakolesha muoyo ku diambuluisha dia Nzambi wetu bua kunuambila lumu luimpe lua Nzambi  munkatshi mua buluishi bua bungi.” (1 Tes. 2:2) Nunku, katutshioki to. Kadi, tudisuike bua kukumbaja didilambula dietu too ne pabutulabu ndongoluelu wa Satana. (Yesh. 6:11) Katuena mua kuenza nunku ku bukole buetu nkayetu to, kadi anu bu bena Kristo ba kumpala, tudi ne bua kusambila Yehowa bua ku diambuluisha dia nyuma wende tupete “bukole budi bupite bua pa tshibidilu.”—Bala 2 Kolinto. 4:1, 7; Luka 11:13.

14, 15. a)  Mmushindu kayi uvuabu benzela bena Kristo ba mu bidimu lukama bia kumpala malu? Mupostolo Petelo wakabakankamija mushindu kayi? b) Padibu batukengesha bua mutudi Bantemu ba Yehowa, tudi ne bua kudiumvua mushindu kayi?

14 Lelu, bantu miliyo ya bungi badi bamba mudibu bena Kristo, “kadi badi bamuvila mu bienzedi biabu, bualu mbantu babi, badi kabayi batumikila ne ki mbanyishibue bua kuenza mudimu muimpe wa mushindu nansha umue.” (Tito 1:16) Mbimpe tuvuluke ne: mu bidimu lukama bia kumpala, bavua bakine bena Kristo balelela kudi bantu ba bungi ba mu tshikondo tshiabu. Ke bua tshinyi mupostolo Petelo wakafunda ne: ‘Bobu banupenda bua dîna dia Kristo, nudi ba diakalenga, bualu nyuma wa Nzambi udi pambidi penu.’—1 Pet. 4:14.

15 Mêyi mafundisha ku nyuma wa Nzambi aa adiku mua kukumbanyina Bantemu ba Yehowa lelu anyi? Eyowa, bualu tudi tumanyisha bumfumu bua Yezu. Nunku, kuikala bakinyibue bua mutudi tubikidibua ku dîna dia Yehowa kudi mushindu umue ne ‘kupendibua bua dîna dia Yezu Kristo’ wakambila baluishi bende ne: “Ndi mulue mu dîna dia Tatu wanyi, kadi kanuena bangakidile.” (Yone 5:43) Nunku, musangu mukuabu wakukengeshabu paudi mu buambi, wikale ne dikima. Dikengeshibua dia nunku didi dileja mudi Nzambi ukuanyisha ne mudi nyuma wende ‘pambidi pebe.’

16, 17. a) Mmunyi mudi bantu ba Yehowa ba mu bitupa bia bungi bia pa buloba badiumvua? b) Udi mudisuike bua kuenza tshinyi?

16 Tuvuluke kabidi ne: kudi didiunda dia bungi didi dienzeka mu bitupa bia bungi bia pa buloba. Nansha mu teritware mudibu bayishe bikole, mutshidi anu bantu badi bajinga kuteleja ne batudi mua kuambila mukenji muimpe wa lupandu. Tudi ne bua kuikala ne tshisumi bua kupinganyina bantu bavua batuteleje ne koku mushindu kulonga nabu Bible, kubambuluisha bua kuyabu kumpala too ne padibu badilambula ne batambula batismo. Pamuapa udi pebe mua kumvua bu muanetu Sarie wa mu Afrike du Sud udi wenza mudimu wa buambi ne tshisumi kukadi bidimu bipite pa 60. Udi wamba ne: “Ndi ne dianyisha dia bungi bualu ku diambuluisha dia mulambu wa Yezu udi upikula, ndi mua kupeta malanda mimpe ne Yehowa Mukalenge wa diulu ne buloba ne ndi ne disanka bua mundi mmanyisha dîna diende dinene.” Yeye ne bayende Martinus mbambuluishe bantu ba bungi kusangisha ne bana babu balela basatu bua kulua batendeledi ba Yehowa. Sarie udi wamba kabidi ne: “Kakuena mudimu mukuabu udi upetesha disanka dia bungi bu eu, ne ku diambuluisha dia nyuma muimpe, Yehowa udi upesha yonso wa kutudi bukole bukumbane bua kutungunuka ne kuenza mudimu eu udi usungila mioyo ya bantu.”

17 Nansha tuetu bikale bena Kristo batambule peshi tudienzeja bua kutambula, kudi malu a bungi adi mua kutusaka bua kuanyisha diakalenga ditudi nadi dia kuikala mu tshisumbu tshia Bantemu ba Yehowa tshia pa buloba bujima. Nunku, tungunuka ne kuyisha lumu luimpe bikole eku uditatshisha bua kushala mukezuke mu bulongolodi bua Satana budi kabuyi bukezuke. Wewe muenze nunku, neutumbishe Tatu wetu wa dinanga Yehowa muena dîna dinene ditudi ne diakalenga dia kubikidibua.