Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 6 2014

“Udi ne bua kunanga muntu nebe bu muudi mudinange”

“Udi ne bua kunanga muntu nebe bu muudi mudinange”

Mukenji muibidi udi mufuanangane nawu udi ne: “Udi ne bua kunanga muntu nebe bu muudi mudinange.”’ —MAT. 22:39.

1, 2. a) Yezu wakamba ne: mukenji munene muibidi wa mu mikenji mmukenji kayi? b) Netuandamune nkonko kayi?

MUFALESE mukuabu wakebeja Yezu bua kumuteta wamba ne: “Mulongeshi, mu Mikenji yonso, mmukenji kayi udi mutambe mikuabu?” Anu mutuvua bamone mu tshiena-bualu tshishale Yezu wakamuandamuna ne: “Mukenji munene ne wa kumpala” udi ne: “Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso.” Yezu wakasakidila kabidi ne: “Muibidi udi mufuanangane nawu udi ne: ‘Udi ne bua kunanga muntu nebe bu muudi mudinange.’”—Mat. 22:34-39.

2 Yezu wakamba ne: tudi ne bua kunanga muntu netu bu mutudi badinange. Nunku bimpe tudiebeje ne: Muntu netu nganyi? Mmunyi mutudi mua kuleja ne: tudi banange muntu netu?

MUNTU NETU NGANYI MENEMENE?

3, 4. a) Yezu wakafila tshilejilu kayi bua kuandamuna lukonko lua ne: “Muntu nanyi nganyi”? b) Mmunyi muvua muena Samaleya muambuluishe muntu uvuabu banyenge bintu, bakume ne bashiye mufue tshipuka? (Tangila tshimfuanyi.)

3 Tudi mua kuela meji ne: muntu netu ngutudi nende pabuipi, mulunda wetu wa pa muoyo ne utu utuambuluisha. (Nsu. 27:10)  Kadi mona tshivua Yezu muambe pavua muntu kampanda uvua udiamba muvuaye muakane mumuebeje ne: “Muntu nanyi nganyi?” Bua kumuandamuna, Yezu wakafila tshilejilu tshia muena Samaleya wa luse. (Bala Luka 10:29-37.) Tuvua mua kutekemena ne: muakuidi muena Isalele ne muena Lewi ke bavua mua kuenzela muntu uvuabu banyenge bintu, bakume ne balekele mufue tshipuka eu malu bu binende. Kadi bakamupita kabayi bamuenzela bualu nansha bumue. Bakambuluisha muntu eu kudi muena Samaleya, muntu wa mu tshisamba tshia bantu bavua batumikila mikenji ya Mose bavua bena Yuda kabayi bangata ne mushinga.—Yone 4:9.

4 Bua kuambuluisha muntu eu, muena Samaleya wa luse wakamuela manyi ne mvinyo mu mputa yende. Ndenaliyo ibidi ivuaye mushile muntu uvua umulama ivua ne mushinga wa difutu dia matuku abidi. (Mat. 20:2) Nunku mbipepele bua kumona muntu uvua bushuwa muinende wa muntu uvuabu batape mputa. Tshilejilu tshia Yezu tshidi bulelela tshitulongesha bua kuleja bantu netu luse ne dinanga.

Batendeledi ba Yehowa badi pabuipi bua kuleja bakuabu dinanga (Tangila tshikoso 5)

5. Mu tshipupu tshivua tshienzeke matuku mashale aa, mmunyi muvua batendeledi ba Yehowa baleje ne: mbanange bantu nabu?

5 Misangu ya bungi bitu bikole bua kupeta bantu badi ne luse bu lua muena Samaleya wa luse. Bidi nanku nangananga mu “matuku a ku nshikidilu” makole aa bualu bantu ba bungi ki mbanange bantu nabu, mbena luonji ne ki mbanange malu mimpe to. (2 Tim. 3:1-3) Tshilejilu, nsombelu mikole idi mua kumueneka tshikondo tshidi bipupu bienzeka. Mona tshiakenzeka pavua tshipepele tshikole tshidi tshibueja mâyi mu bantu tshivuabu babikila ne: Sandy tshienzeke mu tshimenga tshia New York mu ngondo wa 10 wa 2012. Mu tshimue tshitupa tshia mu tshimenga etshi tshivua tshipepele tshinyange bikole, bivi bakanyenga bantu bintu, pabu bantu aba bakavua batata bua dipangila dia nzembu, bua muvuaku mashika ne bapangile bintu bikuabu bia mushinga. Kadi Bantemu ba Yehowa buobu, bakenza programe wa kuambuluisha Bantemu nabu pamue ne bantu bakuabu mu tshimenga etshi. Bena Kristo batu benza malu aa bualu mbanange bantu nabu. Mmu imue mishindu kayi mikuabu mutudi mua kuleja ne: tudi banange bantu netu?

MUTUDI MUA KULEJA NE: TUDI BANANGE MUNTU NETU

6. Mmunyi mudi mudimu wetu wa buambi uleja ne: tudi ne luse?

6 Tupeshe bantu diambuluisha dia mu nyuma. Tudi tubapesha diambuluisha edi patudi tuditatshisha bua kutuma meji abu ku “busambi bua mu Mifundu minsantu” budi bukolesha. (Lomo 15:4) Kakuyi mpata, tuleja mutudi ne luse patudi tuleja bantu bakuabu bulelela bua mu Bible mu mudimu wetu wa kuyisha. (Mat. 24:14) Tudi ne diakalenga dinene dia kumanyisha mukenji wa Bukalenge wa kudi “Nzambi udi ufila ditekemena.”—Lomo 15:13.

7. Mubelu munene mmubelu kayi? Tudi tupeta tshinyi patudi tuwutumikila?

7 Tumikila mubelu munene. Mubelu eu mmuleja mu mêyi avua Yezu muambe mu muyuki wende wa pa mukuna aa: “Malu onso anudi basue bua bantu banuenzele, nudi ne bua kubenzelawu penu. Ke tshidi Mikenji ne mêyi a baprofete biamba.” (Mat. 7:12) Patudi tuenzela bantu bakuabu malu anu muvua Yezu muleje, tudi tuenza malu adi apetangana ne “Mikenji” (Genese too ne ku Dutelonome) ne adi apetangana ne “mêyi a baprofete” (mikanda ya baprofete ya mu Mifundu ya mu tshiena-Ebelu). Bilondeshile mifundu eyi bidi bimueneka patoke ne: Nzambi udi ubenesha bantu badi baleja bakuabu dinanga. Tshilejilu Yehowa wakamba ku butuangaji bua Yeshayi ne: ‘Nulonde kulumbulula kuakane, nuenze malu makane. Udi muvudijibue disanka mmuntu udi wenza muanda eu.’ (Yesh. 56:1, 2) Badi batubenesha bualu tudi tuenzela bantu netu malu ne dinanga ne buakane.

8. Bua tshinyi tudi ne bua kunanga bena lukuna betu? Ntshinyi tshidi mua kuenzeka patudi tuenza nunku?

 8 Nanga bena lukuna bebe. Yezu wakamba ne: “Nuakumvua tshivuabu bambe ne: ‘Udi ne bua kunanga muntu nebe, kadi kukina muena lukuna webe.’ Kadi ndi nnuambila ne: Tungunukayi ne kunanga badi nenu lukuna, ne kulombela badi banukengesha Nzambi; bua kuleja munudi bana ba Tatu wenu wa mu diulu.” (Mat. 5:43-45) Mupostolo Paulo wakamba pende mêyi a muomumue pakafundaye ne: “Bikala muena lukuna webe ne nzala, umupeshe biakudia; bikalaye ne nyota, umupeshe tshia kunua.” (Lomo 12:20; Nsu. 25:21) Bilondeshile Mikenji ya Mose, muntu uvua ne bua kuambuluisha muena lukuna wende bua kujula nyama wende uvua mudishinde ne bujitu. (Ekes. 23:5) Pavua bantu bavua bena lukana benza mudimu pamue nunku bavua balua balunda. Bu mudi bena Kristo baleja bantu dinanga, bena lukuna betu ba bungi mbashintulule mioyo yabu bua meji mabi avuabu batuelela. Tuetu baleje bena lukuna betu dinanga, too ne aba badi batukengesha ne tshikisu, nebituenze disanka padi umue wa kudibu ulua muena Kristo mulelela.

9. Yezu wakamba tshinyi bua dikeba dia ditalala ne bena Kristo netu?

9 ‘Tungunuka ne kukeba ditalala ne bantu bonso.’ (Eb. 12:14) Bushuwa, mu bantu aba mudi kabidi bena Kristo netu bualu Yezu wakamba ne: “Paudi ufika ne mulambu webe ku tshioshelu, wewe muvuluke ne: muanenu udi nebe tshilumbu, ushiye mulambu webe kumpala kua tshioshelu. Ndaku wanji kulengejangana ne muanenu, pashishe ulue kufila mulambu webe.” (Mat. 5:23, 24) Nzambi neatubeneshe tuetu baleje bena Kristo netu dinanga ne benze malu diakamue bua kukeba nabu ditalala.

10. Bua tshinyi katuena ne bua kuimanyina pa bilema bia bakuabu?

10 Kuimanyinyi pa bilema bia bakuabu nansha. Yezu wakamba ne: “Lekelayi kulumbuluishangana bua kabanulumbuluishi penu; bualu nebanulumbuluishe ne dilumbuluisha dinudi nulumbuluisha nadi bakuabu, nebanupimine ne tshipiminu tshinudi nupimina natshi bakuabu. Bua tshinyi udi utangila kasosa kadi mu dîsu dia muanenu kuyi utangila mukamba udi mu dîsu diebe wewe? Mmunyi muudi mua kuambila muanenu ne: ‘Enza nkupatule kasosa kadi mu dîsu diebe,’ pebe wewe muikale ne mukamba mu diebe dîsu? Muena lubombo! Anji patula mukamba udi mu dîsu diebe wewe, pashishe neumone bimpe mua kupatula kasosa  kadi mu dîsu dia muanenu.” (Mat. 7:1-5) Eu mmushindu wa kutuleja ne: katuikadi tuakula bibi bua tulema tukese tua bakuabu, pabi pamuapa tuetu bikale tutu tuenza bilema binene kupita.

MUSHINDU WA PA BUAWU WA KULEJA MUTUDI BANANGE MUNTU NETU

11, 12. Mmu mushindu kayi umue munene mutudi tuleja bantu netu dinanga?

11 Tudi basue kuleja bantu netu dinanga mu mushindu umuepele munene. Anu bu Yezu, tudi tuyisha lumu luimpe lua Bukalenge. (Luka 8:1) Yezu wakapesha bayidi bende mudimu wa ‘kuvuija bantu ba mu bisamba bionso bayidi.’ (Mat. 28:19, 20) Tuetu tuenza nunku bua kukumbaja mudimu eu, tudi tuambuluisha bantu bakuabu bua kumbuka mu njila munene ne mualabale udi ufikisha ku kabutu bua babuele mu njila mubumbakane udi ufikisha ku muoyo. (Mat. 7:13, 14) Tuikale bajadike ne: Yehowa udi ubenesha didifila dia nunku.

12 Anu bu Yezu, tudi tuambuluisha bantu bua bamanye ne: badi dijinga ne biakudia bia mu nyuma. (Mat. 5:3) Bua bantu badi bitaba, tudi tubambuluisha bua kukumbaja dijinga diabu edi patudi tubambila “lumu luimpe lua Nzambi.” (Lomo 1:1) Bantu badi bitaba mukenji wa Bukalenge badi balengejangana ne Nzambi ku butuangaji bua Yezu Kristo. (2 Kol. 5:18, 19) Nunku patudi tuyisha lumu luimpe, tudi mu bulelela tuleja bantu netu dinanga mu mushindu wa mushinga.

13. Udi udiumvua mushindu kayi bua mudimu wetu wa kumanyisha Bukalenge?

13 Patudi tupinganyina bantu ne tulombola malonga a Bible, tudi tupeta disanka dia kubambuluisha bua batumikile mikenji miakane ya Nzambi. Kuenza nunku kudi mua kushintulula nsombelu wa mulongi wa Bible. (1 Kol. 6:9-11) Bushuwa bidi bitusankisha bua kumona mudi Nzambi wambuluisha bantu badi “badiakaje bua kupeta muoyo wa tshiendelele” bua bashintuluke ne badie nende malanda makole. (Bien. 13:48) Bua bantu ba bungi, disanka ndipingane pa muaba wa ditekeshibua mu mikolo ne dieyemena Tatuetu wa mu diulu ndipingane pa muaba wa tunyinganyinga tukole. Bidi bituenza disanka bua kumona mudi bantu bapiabapia baya kumpala mu nyuma. Kuenaku witaba ne: ndibenesha bua mutudi bamanyishi ba Bukalenge ne tuleja bantu netu dinanga mu mushindu wa pa buawu eu anyi?

MUDI PAULO MUMVUIJE DINANGA

14. Amba mu mêyi ebe amue malu adi dinanga dienza adi mu 1 Kolinto 13:4-8.

14 Mu nsombelu wetu ne bantu bakuabu, kutumikila tshidi Paulo muambe bua dinanga kudi mua kutuepula ku bilumbu bia bungi, kutupetesha disanka ne kutupetesha mabenesha a kudi Nzambi. (Bala 1 Kolinto 13:4-8.) Tuakulayi mu tshikoso bua tshidi Paulo muambe bua dinanga ne tumone mutudi mua kutumikila mêyi ende mu nsombelu wetu ne bantu bakuabu.

15. a) Bua tshinyi tudi ne bua kuikala ne lutulu ne buimpe? b) Bua tshinyi tudi ne bua kuepuka mukawu ne lutambishi?

15 “Dinanga didi ne lutulu ne buimpe.” Anu mudi Nzambi muleje bantu bena mibi lutulu ne bulenga, tudi petu ne bua kuikala ne lutulu ne buimpe padi bantu bakuabu benza bilema anyi kabayi ne bukalanga. “Dinanga kadiena ne mukawu,” nunku dinanga dilelela nedituambuluishe bua kubenga kualakana bintu bia muntu mukuabu peshi majitu adiye nawu mu tshisumbu. Kabidi, tuetu ne dinanga katuakudiuwuja anyi kuditambisha to. Mu bulelela, ‘mêsu adi ne dipetu ne mutshima udi udibandisha bidi disanka dia bantu babi.’—Nsu. 21:4.

16, 17. Mmalu kayi atudi ne bua kuenza adi apetangana ne mêyi a mu 1 Kolinto 13:5, 6?

16 Dinanga neditusake bua kuenzela bantu bakuabu malu mu mushindu muimpe. Katuakubashima, kubiba anyi kubenzela bualu budi bubengangana ne mikenji ne mêyi manene a Yehowa to. Dinanga neditusake bua kuditatshisha  bua bantu bakuabu pamutu pa kuditatshisha anu bua malu etu.—Filip. 2:4.

17 Dinanga dilelela kaditu dikuata tshiji lukasa ne “kadiena dibalulula malu mabi adibu badienzela,” bienze bu ne: tudi tufunda misangu yonso idi bakuabu batuenzela malu mabi. (1 Tes. 5:15) Tuetu balamine muntu munda, katuakusankisha Nzambi ne netuikale mu bulelela tusonsola kapia kikala mua kulua kutema, tudienzela tuetu ne bakuabu bibi. (Lew. 19:18) Dinanga didi disanka ne bulelela, kadi kadiakutusaka bua ‘kusanka bua malu mabi’ nansha bikala muntu udi mutukine ukenga.—Bala Nsumuinu 24:17, 18.

18. Mukanda wa 1 Kolinto 13:7, 8 udi utulongesha tshinyi bua dinanga?

18 Tukonkonone mudi Paulo umvuija kabidi dinanga. Wakamba ne: “dinanga didi dikolesha muoyo mu malu onso.” Muntu yeye mutuenzele bibi ne mutulombe luse, dinanga didi ditusaka bua kumufuila luse. Dinanga didi “ditabuja malu onso” mu Dîyi dia Nzambi ne dienza bua tuikale ne disanka bua biakudia bia mu nyuma bitudi tupeta. Dinanga didi “ditekemena malu onso” adi mu Bible ne didi ditusaka bua kuambila bakuabu ne lukasa malu atudi batekemene. (1 Pet. 3:15) Tudi kabidi tusambila ne tutekemena malu mimpe mu bikondo bikole. Dinanga didi “ditantamena malu onso,” nansha bobu batuenzele bubi kampanda, batukengesha anyi tuetu ne ntatu mikuabu. Kabidi “dinanga kadiena dishikila nansha.” Bantu badi batumikila Nzambi nebikale nadi kashidi ne tshiendelela.

TUNGUNUKA NE KUNANGA MUNTU NEBE BU MUUDI MUDINANGE

19, 20. Mmubelu kayi wa mu Bible udi ne bua kutusaka bua kutungunuka ne kunanga muntu netu?

19 Tuetu tutumikila mibelu ya mu Bible, tudi mua kutungunuka ne kuleja dinanga kudi bantu netu. Nunku katuakunanga anu bantu ba tshisamba tshimue netu to, kadi netunange bantu bonso. Tudi kabidi ne bua kuvuluka ne: Yezu wakamba ne: “Udi ne bua kunanga muntu nebe bu muudi mudinange.” (Mat. 22:39) Nzambi ne Kristo mbatekemene bua tunange bantu netu. Tuetu katuyi bamanye tshia kuenza mu nsombelu kampanda udi pankatshi petu ne muntu kansanga, tusambilayi Nzambi bua atulombole ku diambuluisha dia nyuma muimpe. Tuetu benze nunku Yehowa neatubeneshe ne neatuambuluishe bua kuenza malu mu mushindu muimpe.—Lomo 8:26, 27.

20 Badi babikila mukenji wa kunanga muntu netu bu mutudi badinange ne: “mukenji wa bumfumu.” (Yak. 2:8) Panyima pa Paulo mumane kutela imue mikenji ya mu Mikenji ya Mose, wakamba ne: “Mêyi makuabu onso mmasangisha mu dîyi edi: ‘Udi ne bua kunanga muntu nebe bu muudi mudinange.’ Dinanga kaditu dienzela muntu netu bibi; nunku dinanga didi dikumbaja mikenji.” (Lomo 13:8-10) Nunku tudi ne bua kutungunuka ne kunanga muntu netu.

21, 22. Bua tshinyi tudi ne bua kunanga Nzambi ne muntu netu?

21 Patudi tuelangana meji bua mushindu utudi mua kunanga bantu netu, mbimpe tuelangane meji pa mêyi a Yezu a ne: Tatu wende “utu ubandishila bantu babi ne bantu bimpe dîba diende ne ulokeshila bantu bakane ne badi kabayi bakane mvula.” (Mat. 5:43-45) Tudi ne bua kunanga muntu netu nansha yeye muntu muimpe anyi muntu mubi. Anu mutukadi bamone, mushindu munene wa kuleja mutudi banange muntu eu nkumumanyisha mukenji wa Bukalenge. Muntu eu yeye muitabe lumu luimpe ne dianyisha, neapete masanka a bungi adi mamuindile kumpala.

22 Kudi malu a bungi adi atusaka bua kunanga Yehowa ne muoyo mujima. Kudi kabidi mishindu ya bungi ya tuetu kuleja mutudi banange muntu netu. Patudi tunanga Nzambi ne bantu netu, tudi tuleja kanemu bua tshivua Yezu muambe bua malu a mushinga aa. Kupita bionso, tudi tusankisha Yehowa Tatuetu wa mu diulu udi mutunange.