Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 4 2014

Utu mumanye anyi?

Utu mumanye anyi?

Mu tshikondo tshivuabu bafunda Bible, tshilele tshia kudipanda bilamba ku bukole tshivua tshimvuija tshinyi?

Bible udi uleja nsombelu ndambu ivua bantu badipande bilamba. Tshienzedi etshi tshidi mua kukemesha bantu lelu, kadi bua bena Yuda tshivua tshileja ne: muntu uvua ne kanyinganyinga, mubungame, mupuekeshibue milongo, ne udi tshiji anyi mmufuishe.

Tshilejilu, Lubena ‘wakapanda tshivualu tshiende’ pakamonaye ne: malu avuaye mulongolole bua kusungila muanabu Jozefe kaakakumbana, bualu bakapana Jozefe mu bupika. Yakobo tatuabu, ‘wakapanda bivualu biende’ pakelaye meji ne: bavua badie Jozefe kudi nyama wa luonji. (Gen. 37:18-35) Yobo ‘wakapanda muzabi wende,’ pakamuambilabu ne: bana bende bonso bavua bafue. (Yobo 1:18-20) Muntu muikale ne ‘bilamba bipandike’ wakamuenekela Muakuidi Munene Eli bua kumambila ne: bavua batshimune bena Isalele mu mvita, bashipe bana ba Eli ba balume babidi ne banyenge mushete wa tshipungidi. (1 Sam. 4:12-17) Pakumvua Yoshiya mêyi a Mukenji avuabu bamubadila ne kumvua ne: bantu bende bavua benze tshilema, ‘wakadipanda bilulu biende.’—2 Bak. 22:8-13.

Pavuabu balumbuluisha Yezu, Muakuidi munene Kayifa “wakapanda bilamba biende bia pa mutu,” bualu uvua wela meji ne: Yezu uvua mupende Nzambi. (Mat. 26:59-66) Bilondeshile mikenji ya malu a ntendelelu ya ba rabbi, bavua bambe ne: muntu yonso uvua umvua bapenda dîna dia Nzambi uvua ne bua kupanda bilamba biende. Kadi mukenji mukuabu wa ba rabbi uvuabu bele panyima pa dibutuka dia Yelushalema wakaleja ne: “Lelu muntu yeye mumvue bapenda dîna dia Nzambi, kena ne bua kupanda bilamba biende to, bualu bilamba bikuabu bivua mua kuikala bimane kupandika.”

Bushuwa, tshilele tshia kudipanda bilamba katshivua ne mushinga ku mesu kua Nzambi bikala uvua utshienza kayi ne kanyinganyinga kalelela to. Nunku, Yehowa wakambila bantu bende bua ‘kupanda mitshima yabu, kabapandi bivualu biabu, bapingane kudiye.’—Yoe 2:13.