Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2014

Tusankayi bua dibaka dia muana wa mukoko

Tusankayi bua dibaka dia muana wa mukoko

‘Tusankayi ne tutuayi tshianga tshikole bualu dibaka dia Muana wa mukoko diafiki.’BUAK. 19:7.

1, 2. a) Ndibaka dia nganyi dikala mua kupetesha badi mu diulu disanka? b) Netuandamune nkonko kayi?

KULONGOLOLA tshibilu tshia dibaka kutu misangu yonso kuangata dîba dia bungi. Kadi netutambe kuakula bua dibaka dia pa buadi, mbuena kuamba ne: dibaka dia Mukalenge. Elabi meji: mbatuadije kudilongolola kukadi bidimu bitue ku 2000. Mpindieu tshikondo ntshisemene bikole tshikala basedianganyi mua kudisangisha. Mu katupa kîpi emu, mizike mimpe neyituadije mu dibalasa dia Mukalenge, ne misumba ya mu diulu neyimbe ne dîyi dikole ne: “Tumbishayi Yah, bualu Yehowa Nzambi wetu Wa Bukole Buonso watuadiji kukokesha. Tusankayi ne tutuayi tshianga tshikole, tumupeshayi butumbi, bualu dibaka dia Muana wa mukoko diafiki ne mukajende ukadi mudilongolole.”Buak. 19:6, 7.

2 Yezu Kristo ke “Muana wa mukoko” wikala ne bua kuenza dibaka diapetesha badi mu diulu disanka. (Yone 1:29) Mmuvuale mushindu kayi bua dibaka? Mubangila wende nganyi? Mmunyi mukadibu balongolole mubangila wende bua dibaka? Dibaka nedienzeke dîba kayi? Badi mu diulu nebasanke bua dibaka edi, kadi bantu badi ne ditekemena dia kuikala ne muoyo wa kashidi pa buloba nebadisangishaku  pabu mu disanka edi anyi? Patudi tuenda tukonkonona Musambu wa 45, tuikalayi ne ntema bua kupeta mandamuna a nkonko eyi.

‘BIVUALU BIENDE BIDI BINUNKA MUPUYA WA MANANANSHI’

3, 4. a) Bilamba bia Musedianganyi bidi mushindu kayi? Ntshinyi tshidi tshivudija disanka diende? b) ‘Bana bakaji ba mukalenge’ ne ‘mukalenge mukaji’ badi basanka pamue ne Musedianganyi mbanganyi?

3 Bala Musambu wa 45:8, 9. Yezu Kristo Musedianganyi mmuvuale bilamba biende bia dibaka bia bukalenge. Nunku, bivualu biende bidi binunka mupuya muimpe bu wa “bintu bia manananshi bidi bitambe buimpe” bu mudi: mire ne kasia bivua munkatshi mua bilengejilu bivua mu manyi a tshijila avuabu bela bantu mu Isalele.Ekes. 30:23-25.

4 Mizike ya mu diulu idi mu dibalasa idi ivudija disanka dia Musedianganyi bu mukadi dibaka diende disemena. Disanka edi didi kabidi kudi ‘mukalenge mukaji,’ mbuena kuamba ne: tshitupa tshia bulongolodi bua Nzambi tshia mu diulu, tshidi tshienza kabidi ne ‘bana bakaji ba mukalenge,’ mmumue ne: banjelu ba tshijila. Bidi bienza disanka bua kumvua mêyi a mu diulu amba ne: ‘Tusankayi ne tutuayi tshianga tshikole bualu dibaka dia Muana wa mukoko diafiki.’

MUKAJI MMULONGOLOLA BUA DIBAKA

5. “Mukaji wa Muana wa mukoko” nganyi?

5 Bala Musambu wa 45:10, 11. Tukadi bamanye Musedianganyi, kadi udiye usela nganyi? Udiye usela mmuenza ne bena mu tshisumbu tshidi Yezu Kristo ulombola. (Bala Efeso 5:23, 24.) Nebenze tshitupa tshia Bukalenge bua Masiya. (Luka 12:32) Bantu aba 144000 mbena Kristo bela manyi badi “batungunuka ne kulonda Muana wa mukoko kuonso kudiye uya.” (Buak. 14:1-4) Badi balua “Mukaji wa Muana wa mukoko,” ne basomba pamue nende mu diulu.Buak. 21:9; Yone 14:2, 3.

6. Bua tshinyi badi babikila bela manyi ne: ‘muana mukaji wa mukalenge’? Bua tshinyi badi babalomba bua ‘kupua bantu babu muoyo’?

6 Kabena anu babikila nsongakaji waselabu eu ne: ‘muana mukaji’ to, kadi badi bamubikila kabidi ne: ‘muana mukaji wa mukalenge.’ (Mus. 45:13) ‘Mukalenge’ eu nganyi? Yehowa udi wangata bena Kristo bela manyi aba bu “bana” bende. (Lomo 8:15-17) Bu mudi bela manyi ne bua kulua mukaji wa mu diulu, badi babambila ne: ‘Upue bantu bebe ne nzubu [wa ku mubidi] wa tatuebe muoyo.’ Badi ne bua kushala bateke meji abu ‘ku malu a muulu, ki nku malu a pa buloba.’Kolos. 3:1-4.

7. a) Kristo mmulongolole mukaji waselaye mushindu kayi? b) Mukaji udi umona mulume wamusela mushindu kayi?

7 Kukadi bidimu bia bungi, Kristo udi munkatshi mua kulongolola mukaji waselaye bua dibaka dia mu diulu. Mupostolo Paulo wakamba ne: Kristo uvua “munange tshisumbu ne mudifile bua bualu buatshi, bua atshivuije tshia tshijila, utshitokesha utshisukula ne mâyi ku diambuluisha dia dîyi, bua alue ne tshisumbu kudiye yeye muine mu butumbi buatshi, katshiyi ne katoba anyi munyengu anyi tshintu tshikuabu tshia mushindu eu, kadi bua tshikale tshia tshijila, katshiyi kalema.” (Ef. 5:25-27) Paulo wakambila bena Kristo bela manyi ba mu Kolinto wa kale ne: “Ndi ne mukawu bua bualu buenu bilondeshile mukawu wa Nzambi, bualu meme nkayanyi mvua mulaye bua kunuselesha kudi mulume umue, bua nnufile kudi Kristo bu mukaji utshidi kamama.” (2 Kol. 11:2) Yezu Kristo udi Mukalenge Musedianganyi udi wanyisha “bulengele” bua mu nyuma bua mukaji waselaye. Mukaji pende udi umuitaba bu ‘mukalenge’ wende ne udi ‘umukukuila’ bu mulume wamusela.

‘BADI BAYA NE MUKAJI KUDI MUKALENGE’

8. Bua tshinyi mbikumbane mudibu baleja mukaji bu udi ne “butumbi buonso”?

8 Bala Musambu wa 45:13, 14a. Badi baleja mukaji bu udi ne “butumbi buonso” bua dibaka  dia bukalenge. Mu Buakabuluibua 21:2, badi bafuanyikija mukaji eu ne tshimenga, anyi Yelushalema mupiamupia ne ‘mmudilengeje bua kuakidila bayende.’ Tshimenga tshia mu diulu etshi tshidi ne “butumbi bua Nzambi” ne tshidi tshibalakana “bu dibue dia mushinga mukole menemene, bu dibue dia yaspe didi dikenka bu dibue dia kristale ditoke too.” (Buak. 21:10, 11) Badi bumvuija bimpe bulengele bua Yelushalema mupiamupia mu mukanda wa Buakabuluibua. (Buak. 21:18-21) Kabiena bikemesha padi mufundi wa Misambu uleja mudi mukaji eu ne “butumbi buonso.” Ndekelu wa bionso, dibaka dia bukalenge edi didi dienzekela mu diulu.

9. ‘Mukalenge’ udibu batuadila mukaji nganyi? Mukaji mmuvuale mushindu kayi?

9 Mulume udibu batuadila mukaji mMukalenge Masiya. Uvua mumulongolole, ‘mumutokeshe, mumusukule ne mâyi ku diambuluisha dia dîyi.’ Udi ‘wa tshijila, kayi kalema.’ (Ef. 5:26, 27) Mukajende udi kabidi ne bua kuikala muvuale bimpe bua dibaka. Ke mudibi. Bushuwa, ‘bivualu biende bidi bitedibue ne buanda bua or’ ne ‘badi baya nende kudi mukalenge muluate bivualu bitedibue ne malenda.’ Bua dibaka dia Muana wa mukoko, ‘mbanyishile mukaji bua kuvuala tshilamba tshimpe tshia line tshidi tshibalakana ne tshikezuke, bualu tshilamba tshia line muimpe tshidi tshileja bienzedi biakane bia bansantu.’Buak. 19:8.

‘DIBAKA DIAFIKI’

10. Dibaka dia Muana wa mukoko didi ne bua kuenzeka dîba kayi?

10 Bala Buakabuluibua 19:7. Dibaka dia Muana wa mukoko didi ne bua kuenzeka dîba kayi? Nansha mukadi ‘mukajende mudilongolole’ bua dibaka, malu adibu bambe kaena aleja menemene dîba dienzeka dibaka to. Kadi, adi aleja tshienzeka mu tshitupa tshia ndekelu tshia dikenga dinene. (Buak. 19:11-21) Bualu ebu budiku buleja ne: dibaka didi dienzeka kumpala kua Mukalenge udi uselangana kushikijaye ditshimuna diende anyi? Tòo. Bikena kumona bia mu mukanda wa Buakabuluibua ki mbileja mu mushindu udibi bilondangana to. Mu Musambu wa 45, dibaka dia bukalenge didi dienzeka panyima pa Mukalenge Yezu Kristo mumane kuvuala muele wende ne ‘mutambe baluishi bende bukole mu mvita.’Mus. 45:3, 4.

11. Leja mualondangana malu bua Kristo kushikija ditshimuna diende.

11 Nunku tudi mua kuamba ne: malu neenzeke mu mushindu eu: Tshia kumpala, nebabutule “ndumba munene” udi Babilona Munene anyi nsangilu wa bitendelelu bionso bia dishima. (Buak. 17:1, 5, 16, 17; 19:1, 2) Tshibidi, Kristo neatungunuke ne kubutula bishadile bia bulongolodi bubi bua Satana ku Armagedone, “mvita ya dituku dinene dia Nzambi Wa Bukole Buonso.” (Buak. 16:14-16; 19:19-21) Tshisatu, Mukalenge Muluanganyi wa mvita neashikije ditshimuna diende pelaye Satana ne bademon bende mu tshina tshidi katshiyi ne ndekelu, mmumue ne: ubavuija kabayi ne bukole.Buak. 20:1-3.

12, 13. a) Dibaka dia Muana wa mukoko nedienzeke dîba kayi? b) Mbanganyi basanka mu diulu bua dibaka dia Muana wa mukoko?

12 Padi bena Kristo bela manyi bajikija lubilu luabu lua pa buloba mu tshikondo tshia dikalaku dia Kristo, badi babajula bua kupetabu muoyo mu diulu. Katupa kakese panyima pa dibutuka dia Babilona munene, Yezu neasangishe bashadile ba ku bena mu kasumbu ka mukaji. (1 Tes. 4:16, 17) Kadi kumpala kua mvita ya Armagedone kutuadijayi, bena mu kasumbu ka “mukaji” bonso nebikale mu diulu. Panyima pa mvita eyi, dibaka dia Muana wa mukoko nedienzeke. Tshikondo tshia dibaka etshi netshikale tshikondo tshia disanka dia dikema. Buakabuluibua 19:9 udi wamba ne: “Ba diakalenga mbantu badibu babikile ku didia dia dilolo dia dibaka dia Muana wa mukoko.” Bushuwa bantu 144000 badi benza kasumbu ka mukaji nebikale ba diakalenga. Mukalenge Musedianganyi neasanke bikole bua kuikala ne bena diende bonso ‘badia ne banua ku mêsa ende mu Bukalenge  buende ne basombe mu nkuasa ya bukalenge’ mu ngumvuilu wa mu tshimfuanyi. (Luka 22:18, 28-30) Kadi, ki nganu Musedianganyi ne mukajende bikala ne bua kusanka bua dibaka dia Muana wa mukoko to.

13 Anu mutukavua bamone, misumba ya mu diulu idi yimba tshia pamue ne: ‘Tusankayi ne tutuayi tshianga tshikole, tupeshayi Yehowa butumbi, bualu dibaka dia Muana wa mukoko diafiki ne mukajende ukadi mudilongolole.’ (Buak. 19:6, 7) Kadi netuambe tshinyi bua batendeledi ba Yehowa bikala pa buloba? Nebasankaku pabu anyi?

“BADI BABAFILA NE DISANKA”

14. Bilondeshile Musambu wa 45, ‘balunda ba mukaji batshidi tumama’ mbanganyi?

14 Bala Musambu wa 45:12, 14b, 15. Muprofete Zekâya ukavua muambe ne: mu matuku a ku nshikidilu, bantu ba bisamba bavua ne bua kudisangisha ne bashadile ba ku Isalele wa mu nyuma. Wakafunda ne: ‘Mu matuku au bantu dikumi ba mu muaku ne mu muaku nebakuate ku luzemba lua tshivualu tshia muena Yuda, bamuambila ne: Tudi basue kuya nebe, bualu bua tuakumvua ne Nzambi udi nebe.’ (Zek. 8:23) Mu Musambu wa 45:12, badi babikila “bantu dikumi” ba mu tshimfuanyi aba ne: ‘muana mukaji wa Tulo,’ kabidi ne: ‘badi ne bubanji bupite.’ (NW) Badi balua kudi bashadile ba ku bela manyi ne mapa, ‘bakeba diakalengele’ diabu ne bua babambuluishe mu nyuma. Katshia mu tshidimu tshia 1935, bantu miliyo ya bungi mbitabe bua bashadile bela manyi ‘babalombole ku buakane.’ (Dan. 12:3) Bena Kristo ba lulamatu badi benzejangana mudimu ne bela manyi mbashintulule nsombelu wabu, balue bakaji batshidi tumama mu ngumvuilu wa mu nyuma. ‘Balunda ba mukaji batshidi tumama’ aba mbadilambule kudi Yehowa ne badi bakokela Mukalenge Musedianganyi ne lulamatu.

15. Mmunyi mudi ‘balunda ba mukaji batshidi tumama’ benza mudimu pamue ne bena mu kasumbu ka mukaji batshidi pa buloba?

 15 Bashadile ba ku bena mu kasumbu ka mukaji badi nangananga ne dianyisha dia bungi kudi ‘balunda ba mukaji batshidi tumama’ bua mudibu babambuluisha ne tshisumi mu mudimu wa diyisha “lumu luimpe elu lua Bukalenge” pa buloba bujima budi bantu basombe. (Mat. 24:14) Ki nganu “nyuma ne mukaji musela badi batungunuka ne kuamba ne: ‘Luaku!’” to, kadi muntu yonso udi umvua udi wamba ne: “Luaku!” (Buak. 22:17) Eyowa, “mikoko mikuabu” idi yumvua bena mu kasumbu ka mukaji bamba ne: “Luaku!” ne badi badisangisha ne mukaji bua kuambila muntu yonso udi pa buloba ne: “Luaku!”Yone 10:16.

16. Yehowa mmupeshe mikoko mikuabu diakalenga kayi?

16 Bashadile ba ku bela manyi mbanange bena diabu ne badi ne disanka dia kumanya ne: Yehowa, Tatuende wa Musedianganyi mmupeshe mikoko mikuabu idi pa buloba eyi diakalenga dia kudisangisha mu disanka dinene dia dibaka dia Muana wa mukoko didi dienzekela mu diulu. Bakavua balaye ne: ‘Balunda ba mukaji batshidi tumama’ aba bavua ne bua kuikala ne “disanka ne musangelu.” Bushuwa, mikoko mikuabu idi ne ditekemena dia kuikala ne muoyo wa kashidi pa buloba neyidisangishe mu disanka dikala mu diulu ne pa buloba padi dibaka dia Muana wa mukoko dienzeka mu diulu. Mbikumbane padi mukanda wa Buakabuluibua uleja mudi bena mu ‘musumba munene bimane kumpala kua nkuasa wa bukalenge ne kumpala kua Muana wa mukoko.’Buak. 7:9, 15.

Dibaka dia Muana wa mukoko didi dipetesha ‘balunda ba mukaji batshidi tumama’ disanka (Tangila tshikoso tshia 16)

‘BANA BEBE BA BALUME NEBAPINGANE MU MUABA WA BANKAMBUA BEBE’

17, 18. Mmushindu kayi udi dibaka dia Muana wa mukoko dipatula bipeta bimpe? Mu bukokeshi bua bidimu tshinunu, Kristo nealue tatuende wa banganyi?

17 Bala Musambu wa 45:16. ‘Balunda ba mukaji [wa Kristo] batshidi tumama’ nebasanke kabidi pamonabu dibaka dipatula bipeta bimpe mu bulongolodi bupiabupia. Mukalenge Musedianganyi neatume ntema yende pa buloba ne neabishe ‘bankambua’ bende ba pa buloba balua “bana” bende ba pa buloba. (Yone 5:25-29; Eb. 11:35) Neasungule munkatshi muabu ‘bakokeshi mu miaba yonso ya pa buloba.’ Pamuapa, Kristo neasungule bakokeshi bakuabu munkatshi mua bakulu ba lulamatu badi ne muoyo lelu bua kuikalabu balombola mu bulongolodi bupiabupia.Yesh. 32:1.

18 Munkatshi mua Bukokeshi bua bidimu tshinunu, Kristo nealue tatuende wa bantu bakuabu kabidi. Bushuwa, bantu bonso bapeta muoyo wa kashidi pa buloba, nebawupete bualu mbaleje ditabuja mu mulambu wa Yezu udi upikula. (Yone 3:16) Nunku nealue ‘Tatuabu wa Tshiendelele.’Yesh. 9:6, 7.

BASAKIBUE BUA KUMANYISHA DÎNA DIENDE

19, 20. Mmushindu kayi udi malu mimpe adi mu Musambu wa 45 atangila bena Kristo bonso ba matuku etu aa?

19 Bala Musambu wa 45:1, 17. Bushuwa, malu adi mu Musambu wa 45 adi atangila bena Kristo bonso. Bashadile ba ku bena Kristo bela manyi badi pa buloba badi ne disanka bua diakalenga didibu nadi dia kudisangisha mu diulu ne bana babu ne dia kudisangisha kabidi ne Mubasedi. Mikoko mikuabu mmisakibue bua kukokela bikole Mukalenge wa butumbi ne idi ne dianyisha bua diakalenga didiyi nadi dia kudisangisha ne bashadile ba mu kasumbu ka mukaji badi pa buloba. Panyima pa dibaka, Kristo ne aba bakokesha pamue nende nebapeteshe bantu bonso badi pa buloba masanka kaayi kuamba.Buak. 7:17; 21:1-4.

20 Bu mututshidi bindile dikumbana dia ‘mêyi adi mimpe’ adi atangila Mukalenge Masiya, kabienaku bitusaka bua ‘kumanyisha dîna diende’ anyi? Tuikalayiku munkatshi mua bantu ‘batumbisha Mukalenge too ne kashidi.’