Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2014

“Bukalenge buebe bulue”—Kadi ndîba kayi?

“Bukalenge buebe bulue”—Kadi ndîba kayi?

“Panudi numona malu aa onso, numanye ne: udi pabuipi, ukadi ku biibi.”MAT. 24:33.

1, 2. a) Ntshinyi tshidi mua kuenza bua tupue amue malu muoyo anyi tubenge kumona tshintu kampanda? b) Mbualu kayi butudi ne bua kumanya bua bidi bitangila Bukalenge bua Nzambi?

ANU bu muukadi pamuapa mumone, bantu batu bamone bualu kampanda batu imue misangu babulonda bishilangane kakese. Bia muomumue, bidi mua kukolela muntu bua kuvuluka bimpe menemene tshivua munganga mumuambile pavuaye mumuenze mateta. Peshi bidi mua kukolela muntu bua kumona nsapi peshi manete ende pende muikale nabi pabuipi. Bua tshinyi bitu bienzeka nanku? Bakebuludi badi bamba ne: kudi bumpofo kampanda budi butukuata patudi tujinga kuenza malu a bungi musangu umue. Bidi bimueneka ne: buongo buetu budi buenza bua tutume ntema anu ku bualu bumue.

2 Bantu ba bungi lelu badi ne bumpofo bua muomumue bua bidi bitangila malu adi enzeka pa buloba. Badi mua kuitaba ne: malu a pa buloba mmashintuluke bikole katshia ku 1914, kadi ki mbamanye bua tshinyi malu aa adi enzeka. Bu mutudi balongi ba Bible, tudi bamanye ne: mu mushindu kampanda, Bukalenge bua Nzambi buakalua mu 1914 pavuabu bateke Yezu bu Mukalenge mu diulu. Kadi tudi bamanye ne: kudi malu makuabu adi ne bua kuenzeka bua disambila dia ne: “Bukalenge buebe bulue. Disua diebe dienzeke kabidi pa buloba muomumue ne mu diulu” dikumbane. (Mat. 6:10) Bidi bimueneka patoke  ne: mu malu au mudi nshikidilu wa ndongoluelu mubi wa malu eu. Anu padi bualu ebu buenzeka ke pikala disua dia Nzambi mua kuenzeka pa buloba bu mudidi dienzeka mu diulu.

3. Mbualu kayi buimpe butudi tupeta patudi tulonga Dîyi dia Nzambi?

3 Bu mutudi ne tshibidilu tshia kulonga Dîyi dia Nzambi, tudi tumona ne: milayi idi yenda ikumbana lelu. Ndishilanganapu kayi ne bantu bakuabu! Batu baditatshisha bikole bua mioyo yabu, mbaditue mu dikeba dia bintu, mbibafikishe ku dipepeja tshijadiki tshia ne: Kristo mmutuadije kukokesha katshia ku 1914 ne mu katupa kîpi emu neikale ne bua kumbusha malu mabi. Kadi, udi mua kudiebeja ne: biwikala ukadi muenzele Nzambi mudimu kukadi bidimu makumi a bungi, utshidiku mumanye ne uditatshisha bua diumvuija dia matuku atudi bu muuvua wenza kumpala anyi? Nansha biwikala mulue Ntemu kutshidi matuku, nku tshinyi kuudi mutuishile mêsu ebe? Nansha diandamuna dietu dikale mushindu kayi, tukonkononayi malu a mushinga asatu adi mua kutusaka bua kuikala batuishibue ne: Mukalenge udi Nzambi musungule neenze malu makuabu bua disua dia Nzambi dienzeke pa buloba bu mudibi bikengela.

BENDESHI BA TUBALU BAKADI BAMUENEKE

4, 5. a) Ntshinyi tshidi Yezu wenza katshia ku 1914? (Tangila tshimfuanyi tshia ntuadijilu.) b) Bendeshi ba tubalu basatu badi baleja tshinyi? Malu mmenzeke mushindu kayi?

4 Mu 1914, bakapesha Yezu Kristo udibu baleja mubande pa kabalu katoke tshifulu tshia butumbi mu diulu. Diakamue wakaya bua kushikija ditshimuna diende kudi ndongoluelu mubi wa Satana. (Bala Buakabuluibua 6:1, 2.) Mulayi udibu bumvuije mu Buakabuluibua nshapita 6 wakasaka bantu bua kutekemena ne: panyima pa bamane kujadika Bukalenge bua Nzambi mu diulu, malu a pa buloba avua ne bua kunyanguka ne lukasa luonso, kuvua ne bua kuenzeka mvita, biyole bia nzala, bipupu ne malu makuabu avua akebesha lufu. Malu aa mmaleja kudi bendeshi ba tubalu basatu badi benda balonda Yezu Kristo pabuipi.Buak. 6:3-8.

5 Anu mukavuabu balaye, ‘bakumbusha ditalala pa buloba’ nansha muvua bantu balaye bua kuambuluishangana pa buloba bujima ne benze bipungidi bia ditalala. Tudi mua kumona Mvita ya kumpala ya buloba bujima bu ntuadijilu wa mvita minene bilondeshile malu adi menzeke pa buloba matuku mashale aa. Nansha mudi malu a mpetu ne a sianse maye kumpala katshia ku 1914, biyole bia nzala bidi anu bitungunuka ne kutatshisha bantu pa buloba. Kabidi, nnganyi udi mua kuela mpata ne: bipupu bionso, dikanka dia buloba ne dipasalala dia mâyi, ne ‘masama a lufu’ kabiena bitungunuka ne kushipa bantu miliyo ya bungi tshidimu tshionso etshi? Mushindu udi malu aa enzeka ku musangu ne ku musangu pa buloba bujima ne anenga bikole kawutu muanji kuenzeka musangu mukuabu katshia bafuka bantu to. Udiku mumanye tshidiwu aleja anyi?

Bu mudi bendeshi ba tubalu baditue mu lubilu, malu a pa buloba adi atungunuka ne kubipa (Tangila tshikoso 4 ne 5)

6. Mbanganyi bavua bajingulule dikumbana dia mulayi wa mu Bible? Bualu ebu buakabasaka bua kuenza tshinyi?

6 Bantu ba bungi bakashala mu ditanaji pakabudika Mvita ya kumpala ya buloba bujima ne gripe wa bena Espagne. Kadi, bena Kristo bela manyi bakavua bambe muvua tshidimu tshia 1914 mua kuikala ndekelu wa bikondo bia bantu ba bisamba bia bende peshi “tshikondo tshijadika tshia bisamba.” (Luka 21:24) Kabavua bamanye menemene tshivua ne bua kuenzeka to. Kadi bavua bamanye ne: tshidimu tshia 1914 tshivua ne bua kuikala tshidimu tshivua bukokeshi bua Nzambi ne bua kutuadija. Diakamue pakajingululabu dikumbana dia mulayi wa mu Bible, bakamanyisha bantu bakuabu ne dikima ne: bukokeshi bua Nzambi bukavua butuadije. Mushindu uvuabu baditatshisha bua kumanyisha Bukalenge wakabakebela buluishi bukole. Bualu ebu buvua buenzeke mu matunga a bungi ne buvua dikumbana dikuabu dia mulayi. Mu bidimu biakalonda, baluishi ba Bukalenge ‘bakapangadija malu mabi avua alonda mikenji yabu.’ Bakakengesha bana betu ne tshikisu, kubela mu maloko, kuowabu bamue, kuasabu bakuabu bingoma ne kukosa banga mitu.Mus. 94:20; Buak. 12:15.

7. Bua tshinyi bantu ba bungi kabena bajingulula diumvuija dilelela dia malu adi enzeka pa buloba lelu?

 7 Bu mudiku bijadiki bungi nunku bidi bileja ne: bakadi bajadike Bukalenge bua Nzambi mu diulu, bua tshinyi bantu ba bungi kabena bitaba bualu ebu? Bua tshinyi ki mbakumbane bua kumvua dipetangana didi pankatshi pa malu adi enzeka pa buloba ne milayi misunguluke ya mu Bible idi bantu ba Nzambi bamanyisha kukadi bidimu bia bungi? Bidiku bienzeka nanku bualu bantu ba bungi mbatuishile mêsu abu anu pa malu adibu badimuena ne abu abidi anyi? (2 Kol. 5:7) Malu adibu benza adiku abapangisha bua kumona tshidi Nzambi wenza anyi? (Mat. 24:37-39) Bamue ba kudibu badiku mu ditanaji bua malu adi Satana wenza anyi? (2 Kol. 4:4) Bidi bikengela kuikala ne ditabuja ne bukole bua kumona malu adi mêsu etu kaayi mua kumona to. Ndisankapu kayi ditudi nadi bua mutudi bajingulule malu adi enzeka!

MALU MABI ADI ENDA ABIPA BIKOLE MENEMENE

8-10. a) Mmunyi mudi 2 Timote 3:1-5 mukumbane? b) Fila tshilejilu bua kuleja mudi malu enda abipa bikole menemene.

8 Bualu buibidi budi butusaka bua kuamba ne: matuku mmashale makese bua Bukalenge bua Nzambi kuangata malu a pa buloba mu bianza budi ne: malu mabi adi enzeka pa buloba adi enda anu abipa bikole menemene. Kukadi bidimu bitue ku lukama bidi malu adibu baleje mu 2 Timote 3:1-5 matuadije kukumbana. Malu aa adi pawu enzeka pa buloba bujima ku musangu ne ku musangu ne anenga bikole. Kuenaku umona ne: mulayi eu mmukumbane bikole anyi? Tukonkononayi bimue bilejilu bidi bijadika bualu ebu.Bala 2 Timote 3:1, 13.

9 Ela meji bua dishilangana didi pankatshi pa malu avuabu bamona bu mabi mu bidimu bia 1940 peshi bia 1950 ne aa adi enzeka lelu ku midimu, miaba ya dijikija lutetuku, mu manaya ne mu mvuadilu ne didilengeja. Lelu tshikisu ne tshiendenda mbitue ntanga tshibua. Bantu badi badienzeja bikole bua babamone mudibu bena tshikisu, bena tshiendenda peshi bena luonji kupita bakuabu. Malu avuabu bamona kaayi makumbane bua kuleja ku televizion mu bidimu bia 1950 ke adi bena mu mêku banyisha bua kumona lelu. Bantu ba bungi badi bitaba ne: malu a balume badi balala ne balume ne bakaji badi balala ne bakaji mbitangalake mu dijikija luteteku ne mu mvuadilu, ne badi benza malu aa too ne patoke. Tudi ne disanka bua mutudi bamanye mutu Nzambi umona malu.Bala Yuda 14, 15.

 10 Muena Kristo udi mua kuela meji bua malu avua muana mua kuenza mu bidimu bia 1950 avuabu bamona bu buntomboji mudiwu mashilangane ne adi enzeka lelu. Baledi bavua baditatshisha bikole bua kumanya bikala bana babu banua makanya, maluvu makole peshi baja maja avua ajula majinga mabi. Kadi lelu, kudi ngumu mibi ya malu atu enzeka pa tshibidilu bu mudi: Mulongi kampanda wa bidimu 15 mmuase balongi babu tshingoma, mushipe 2 ne 13 batapike. Tshisumbu kampanda tshia bansonga bavua banua bintu bia lulengu mbashipe ne tshikisu muana wa bakaji wa bidimu tshitema, bakume tatuende ne bakume kabidi mulela wende mukuabu. Badi baleja mudi bansonga ba mu ditunga kampanda dia mu Asie bakebeshe tshia bibidi tshia malu a tshikisu avua menzekamu mu bidimu dikumi bishale. Kudiku muntu udi mua kuela mpata ne: malu ki mmabipe bikole menemene anyi?

11. Bua tshinyi bantu ba bungi kabatu bamona ne: malu adi enda abipa?

11 Mupostolo Petelo uvua muambilamu pakambaye ne: “Mu matuku a ku nshikidilu, baseki nebalue ne tuseku tuabu, benza malu bilondeshile majinga abu nkayabu bamba ne: ‘Dikalaku diende divuabu balaye didi kuepi? Bualu katshia dituku divua bankambua betu balale tulu mu lufu, malu onso adi atungunuka ne kuikala anu muomumue kumbukila ku ntuadijilu kua bufuki.’” (2 Pet. 3:3, 4) Tshidi mua kuikala tshienza bua bamue bantu kuambabu nunku ntshinyi? Bidi bimueneka ne: patu bantu bibidilangana ne nsombelu kampanda, kabatu kabidi baditatshisha bua bualu buende to. Dinyanguka dia malu a bikadilu bia bantu mu tshibungi didi mua kuikala kadiyi ditonda bikole bu mudibi mua kututonda padi bantu batudi bibidilangane nabu bashintulula ngenzelu wabu wa malu diakamue mu mushindu utuvua katuyi batekemene. Kadi, mushindu udi malu a bikadilu enda anyanguka ku kakese ku kakese udi njiwu.

12, 13. a) Bua tshinyi malu adi enzeka pa buloba lelu kaena mua kututekesha mu mikolo? b) Mbualu kayi butudi mua kujingulula buatuambuluisha bua kutantamena malu adi ‘makole mua kupita nawu’?

12 Mupostolo Paulo wakatudimuija ne: “mu matuku a ku nshikidilu,” malu avua ne bua kuikala ‘makole mua kupita nawu.’ (2 Tim. 3:1) Kadi kudi mushindu wa kupita nawu, nunku katuena ne bua kusokoma malu adi enzeka to. Tudi mua kutantamena bimpe malu onso adi mua kututekesha mu mikolo anyi kutukuatshisha buôwa atudi tupeta ne diambuluisha dia Yehowa, dia nyuma wende ne dia tshisumbu tshia bena Kristo. Tudi mua kushala ne ditabuja. “Bukole budi bupite bua pa tshibidilu” mbua Nzambi, ki mbuetu to.2 Kol. 4:7-10.

13 Mbimpe tumanye ne: Paulo uvua mutuadije mulayi wa matuku a ku nshikidilu ne tshiambilu tshia ne: “Umanye bualu ebu ne.” Mêyi aa adi atujadikila ne: malu avua alonda avua ne bua kuenzeka. Kakuyi mpata, malu a mu ndongoluelu mubi eu neatungunuke anu ne kunyanguka too ne mualua Yehowa kuajikija. Bakebuludi ba malu mbaleje ne: miaba ya bungi pa buloba, bikadilu bilenga bia bamue bantu anyi bimue bisamba bivua binyanguke ne pashishe bijimine. Kadi bikadilu bia bantu pa buloba bujima kabitu bianji kunyanguka bu mudibi binyanguke lelu to. Bantu ba bungi badi mua kulengulula malu adi enzeka, kadi malu adi menzeke katshia ku 1914 adi ne bua kutuleja ne: tudi ne bua kuikala bashindike ne: mu katupa kîpi emu Bukalenge bua Nzambi nebuenze bualu kampanda bua mushinga.

BANTU BA MU TSHIKONDO ETSHI KABAKUJIKA

14-16. Mbualu kayi buisatu budi butusaka bua kuitaba ne: Bukalenge bua Nzambi ‘nebulue’ mu katupa kîpi emu?

14 Kudi kabidi bualu buisatu budi mua kutusaka bua kuikala ne dieyemena. Malu adi menzeke munkatshi mua bantu ba Nzambi adi aleja mukadi nshikidilu pabuipi. Tshilejilu, kumpala kua kujadikabu Bukalenge bua Nzambi mu diulu, kuvua kasumbu ka bela manyi ba lulamatu bavua benzela Nzambi mudimu ne tshisumi. Pavua amue malu avuabu batekemene bua enzeke mu 1914 kaayi menzeke, bakenza tshinyi? Ba bungi ba kudibu bakaleja muvuabu balamate Nzambi mu ntatu ne buluishi, ne bakatungunuka anu ne kuenzela Yehowa mudimu.  Pakapita bidimu, ba bungi ba ku bela manyi abu bakajikija ne lulamatu lubilu luabu lua pa buloba.

15 Mu mulayi uvua Yezu mumvuije uvua wakula bua matuku a ku nshikidilu, wakamba ne: “Bantu ba mu tshikondo etshi kabakujika malu onso aa kaayi menzeke.” (Bala Matayi 24:33-35.) Tudi tumvua ne: pavua Yezu muakule bua “bantu ba mu tshikondo etshi,” uvua wakula bua bisumbu bia bena Kristo bela manyi bibidi. Tshia kumpala ntshia bela manyi bavuaku mu 1914, ne bavua bajingulule dikalaku dia Kristo tshidimu atshi. Bantu bavua benza tshisumbu atshi kabavua anu ne muoyo mu 1914 patupu to, kadi bavua bela manyi a nyuma bu bana ba Nzambi kumpala kua tshidimu atshi peshi tshidimu atshi.Lomo 8:14-17.

16 Tshisumbu tshibidi tshia “bantu ba mu tshikondo etshi,” mbela manyi bavua ne muoyo patshivua bena mu tshisumbu tshia kumpala ne muoyo. Kabavua anu ne muoyo mu tshikondo tshivua bena mu tshisumbu tshia kumpala ne muoyo patupu to, kadi bavua bela manyi a nyuma mu tshikondo tshivua bena mu tshisumbu tshia kumpala batshidi pa buloba. Nunku, ki mmuela manyi yonso udiku lelu udi mu “bantu ba mu tshikondo etshi” bavua Yezu mutele to. Lelu, bena mu tshisumbu tshibidi etshi bakadi ne bidimu bia bungi. Kadi mêyi a Yezu adi mu Matayi 24:34 adi atupesha dishindika dia ne: bantu bakese ba mu “bantu ba mu tshikondo etshi kabakujika” kumpala kua kumonabu ntuadijilu wa dikenga dinene to. Bualu ebu budi butujadikila kabidi ne: nkushale tshikondo tshîpi bua Mukalenge wa Bukalenge bua Nzambi kubutulaye benji ba malu mabi ne kutulombola mu bulongolodi bupiabupia budi ne buakane.2 Pet. 3:13.

KRISTO NEATSHIMUNE MU KATUPA KÎPI EMU

17. Bijadiki bisatu bitudi bakonkonone bidi bitufikisha ku diamba tshinyi?

17 Tudi mua kuamba tshinyi bua bijadiki bisatu bitudi bakonkonone bidi bikumbana bionso lelu anyi? Yezu wakatudimuija wamba ne: katuvua mua kumanya dituku ne dîba dijalame to, ne katuena babimanye to. (Mat. 24:36; 25:13) Kadi tudi mua kumanya “tshikondo” ne tudi batshimanye anu muvua Paulo muleje. (Bala Lomo 13:11.) Tudi mu tshikondo atshi, mmumue ne: mu matuku a ku nshikidilu. Tuetu bateye ntema yonso ku mulayi wa mu Bible ne ku tshidi Yehowa Nzambi ne Yezu Kristo benza, katuena mua kupangila bua kumona tshijadiki tshidi tshitutuisha ne: tudi bushuwa pabuipi ne nshikidilu wa ndongoluelu wa malu eu to.

18. Ntshinyi tshiafikila bantu badi babenga kuitaba Bukalenge bua Nzambi?

18 Bantu badi babenga kuitaba bukokeshi bunene budibu bapeshe Yezu Kristo, muendeshi wa kabalu katoke udi mupatuke mutshimunyi nebenzejibue bua kuitaba tshilema tshiabu. Kabakupeta njila wa kunyemena to. Tshikondo atshi, bantu ba bungi nebele mbila ne buôwa bamba ne: “Nnganyi udi mua kuimana?” (Buak. 6:15-17) Kadi nshapita wa mu Buakabuluibua udi ulonda udi ufila diandamuna. Bela manyi ne aba badi ne ditekemena dia kupeta muoyo pa buloba ‘nebimane’ mu dituku adi bua mudi Nzambi ubanyisha. Pashishe, “musumba munene” wa mikoko mikuabu ayi neupanduke ku dikenga dinene.Buak. 7:9, 13-15.

19. Bu muudi mumanye tshijadiki tshidi tshileja ne: matuku a ku nshikidilu akadi ku ndekelu, utshitaba ne utshiangata ne mushinga, udi mudisuike bua kuenza tshinyi?

19 Patudi tuteya ntema ne muoyo mujima lelu ku dikumbana dia mulayi wa mu Bible mu tshikondo etshi, bintu bia mu bulongolodi bua Satana kabiakutubueja mu ditanaji peshi kabakutufofomija mêsu bua kumanya diumvuija dia malu adi enzeka pa buloba lelu to. Kristo neashikije ditshimuna diende kudi ndongoluelu mubi eu pamuelaye mvita ya ndekelu ya buakane. (Buak. 19:11, 19-21) Ela meji bua tshidi Bible utuambila bua disanka dituikala nadi.Buak. 20:1-3, 6; 21:3, 4.