Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2014

Sungula malu ne meji mu bunsonga buebe

Sungula malu ne meji mu bunsonga buebe

‘Bansongalume ne bansongakaji kabidi, batumbishe dîna dia Yehowa.’MUS. 148:12, 13.

1. Bansonga bena Kristo ba bungi badi ne diakalenga dia kuenza midimu kayi?

TUDI mu tshikondo tshia mushinga. Lelu, bantu miliyo ya bungi badi babuela mu ntendelelu mulelela kupita kumpala. (Buak. 7:9, 10) Bansonga ba bungi badi bapeta malu mimpe padibu bambuluisha bantu bakuabu bua kumvua bulelela bua mu Bible budi bupetesha muoyo. (Buak. 22:17) Bamue bansonga badi balombola malonga a Bible, bambuluisha bantu bua kuikalabu ne nsombelu muimpe. Bakuabu badi baya kuyisha lumu luimpe ne tshisumi mu miaba idibu bakula miakulu mienyi. (Mus. 110:3; Yesh. 52:7) Mmunyi muudi mua kudifila bikole bua kuenza mudimu udi bantu ba Yehowa benza eu?

2. Mmunyi mudi tshilejilu tshia Timote tshileja ne: Yehowa mmusue kupesha bansonga midimu ya kuenza? (Tangila tshimfuanyi.)

2 Bu muudi nsonga, udi mua kusungula malu adi mua kulua kukuambuluisha pashishe bua kupeta mpunga ya kuenzela Nzambi mudimu. Tshilejilu, Timote wa mu Luseta wakasungula ne meji malu akalua kumuambuluisha bua kuenza mudimu wa bumisionere pavuaye ne bidimu pamuapa bipatshila ku makumi abidi peshi makumi abidi ne ndambu. (Bien. 16:1-3) Bidi bimueneka ne: panyima pa ngondo mikese patupu, pavua Paulo mumbuke mu tshisumbu tshipiatshipia tshia mu Tesalonike bua buluishi bukole buvuaku, wakatuma Timote utshivua nsonga bua kupingana mu Tesalonike bua kukolesha bena Kristo bavuamu. (Bien. 17:5-15; 1 Tes. 3:1, 2, 6) Udiku mua kufuanyikija muvua Timote mumvue pavuaye muitabe bua kuenza mudimu eu anyi?

 BUALU BUA MUSHINGA MUKOLE BUA WEWE KUSUNGULA

3. Mbualu kayi bua mushinga buudi mua kusungula mu nsombelu webe? Ndîba kayi diudi mua kuenza disungula edi?

3 Tshikondo tshia bunsonga ntshikondo tshia kusungula malu a mushinga. Kadi kudi bualu bua kusungula budi ne mushinga kupita malu makuabu onso: dipangadika diebe bua kuenzela Yehowa mudimu. Ndîba kayi dimpe diudi mua kuenza disungula edi? Yehowa udi wamba ne: “Uvuluke Mufuki webe mu matuku a bunsongalume buebe.” (Muam. 12:1) Mushindu umuepele muimpe wa ‘kuvuluka’ Yehowa nkumuenzela mudimu ne muoyo mujima. (Dut. 10:12) Dipangadika diebe dia kuenzela Nzambi mudimu ne muoyo webe mujima, ndisungula dia mushinga mukole diwikala ne bua kuenza mu nsombelu webe. Nedilenge matuku ebe atshidi alua.Mus. 71:5.

4. Pa kumbusha kusungula bua kuenzela Yehowa mudimu, mmalu kayi makuabu a mushinga audi mua kusungula ikala mua kulenga mushindu uudi wenzela Nzambi mudimu?

4 Bushuwa, ki nganu kusungula bua kuenzela Yehowa mudimu kuikala mua kulenga nsombelu webe wa matuku atshidi alua to. Tshilejilu, udi kabidi mua kuela meji biwikala mua kubuela mu dibaka, muntu uudi mua kubuela nende mu dibaka ne mushindu uudi mua kupeta nsombelu muimpe. Aa mmapangadika a mushinga, kadi neuleje muudi ne meji biwikala mua kusungula tshia kumpala bua kuenzela Yehowa mudimu ne muoyo webe mujima. (Dut. 30:19, 20) Bua tshinyi? Bualu malu audi usungula adi akumbajangana. Tshiudi usungula bua dibaka ne mudimu wa kuenza netshilenge kabidi mushindu uudi wenzela Nzambi mudimu. (Fuanyikija ne Luka 14:16-20.) Bia muomumue, dipangadika diebe dia kuenzela Nzambi mudimu nedilenge malu audi usungula bua dibaka ne mudimu wa kuenza. Nunku, anji angata dipangadika bua malu adi ne mushinga wa bungi.Filip. 1:10.

NEWENZE TSHINYI MU BUNSONGA BUEBE?

5, 6. Londa bualu budi buleja mudi kusungula malu mimpe mua kupetesha disanka pashishe. (Tangila kabidi tshiena-bualu tshia ne: “Tshimvua musungule pantshivua muana” mu Tshibumba tshia Nsentedi etshi.)

5 Diakamue paudi usungula bua kuenzela Nzambi mudimu, udi mua kumona tshidiye musue bua wewe kuenza ne udi mua kuangata dipangadika dia mushindu uudi mua kumuenzela mudimu. Muanetu wa balume mukuabu wa mu Japon wakafunda ne: “Pamvua ne bidimu 14, ngakapatuka mu buambi ne mukulu kampanda ne wakamona ne: tshivua musue mudimu wa buambi to. Wakangambila ne bulenga buonso ne: ‘Yuichiro, pingana kumbelu. Usombe ne wele meji bimpe bua malu akadi Yehowa mukuenzele.’ Ngakenza anu muvuaye mungambile. Bushuwa ngakatungunuka ne kuela meji ne kusambila munkatshi mua matuku. Ku kakese ku kekese, lungenyi luanyi luakashintuluka. Diakamue, ngakalua kunanga kuenzela Yehowa mudimu. Mvua musue kubala miyuki ya bamisionere ne ngakatuadija kuela meji bua kuenzela Nzambi mudimu ne muoyo mujima.”

6 Yuichiro udi utungunuka wamba ne: “Ngakangata dipangadika dia kusungula malu avua mua kungambuluisha bua kuya kuenzela Yehowa mudimu mu ditunga dikuabu. Tshilejilu, ngakasungula bua kulonga Anglais. Pangakajikija tulasa, ngakasungula bua kuenza mudimu wa kulongesha Anglais mu mêba makese bua mpete mushindu wa kuenza mudimu wa bumpanda-njila. Pangakakumbaja bidimu 20, ngakatuadija kulonga tshiena Mongolie ne ngakapeta diakalenga dia kudisangisha ne bamanyishi ba mu kasumbu ka muakulu wa tshiena Mongolie. Bidimu bibidi pashishe, mmumue ne: mu 2007, ngakaya kuendakana mu ditunga dia Mongolie. Pamvua muye kuyisha pamue ne bamue bampanda-njila ne mumone muvua bantu ba bungi bakeba bulelela, ngakajinga bua kuya kusombela mu ditunga edi bua kuambuluisha. Ngakapingana mu Japon bua kudilongolola. Ndi ngenza mudimu wa bumpanda-njila mu ditunga dia Mongolie katshia mu ngondo 4 wa 2008. Nsombelu ki mmupepele munemu to, kadi bantu badi bitaba lumu luimpe ne ndi mbambuluisha bua kusemena pabuipi ne Yehowa. Ndi mumone ne: njila umvua musungule ke uvua mutambe buimpe.”

7. Mmalu kayi atudi ne bua kudisunguila? Mose mmutushile tshilejilu kayi?

7 Ntemu wa Yehowa yonso udi ne bua kudisunguila  tshikalaye mua kuenza mu nsombelu wende. (Yosh. 24:15) Katuena mua kukuambila bua kubuela mu dibaka, ni mmuntu uudi mua kubuela nende mu dibaka anyi mudimu uudi ne bua kuenza to. Neusungulaku mudimu udi ulomba kulonga kakese anyi? Bansonga wetu, bamue ba kunudi badi mu misoko idi mipele, bakuabu badi mu bimenga bidi ne bubanji bua bungi. Pa buloba bujima, nudi bashilangane bikole ku bumuntu, ku mamanya, ku malu anudi nujinga ne ku ditabuja. Nudi pamuapa bashilangane anu muvua bansonga bena Ebelu bavua mu Ejipitu wa kale bashilangane ne Mose patshivuaye nsonga. Mose uvua ne diakalenga dia kuikala mu lupangu lua mukalenge pavua eku bena Ebelu bakuabu bikale bapika. (Ekes. 1:13, 14; Bien. 7:21, 22) Anu bu wewe, bavua pabu mu tshikondo tshia mushinga. (Ekes. 19:4-6) Yonso wa kudibu uvua ne bua kusungula tshivuaye ne bua kuenza ne muoyo wende. Mose wakenza disungula dimpe.Bala Ebelu 11:24-27.

8. Nkuepi kudi bansonga badi bajinga kusungula malu kampanda mu nsombelu wabu mua kupetela diambuluisha?

8 Yehowa udi ukuambuluisha bua kusungula malu ne meji pautshidi nsonga. Udi ufila mibelu mu mêyi manene audi mua kulonda mu nsombelu idi ikutangila wewe. (Mus. 32:8) Kabidi, baledi bebe bena Kristo ne bakulu mu tshisumbu badi mua kukuambuluisha bua kuela meji bua kumanya mushindu wa kutumikila mêyi manene aa. (Nsu. 1:8, 9) Tukonkononayi mêyi manene asatu a mu Bible adi mua kukuambuluisha bua kusungula ne meji malu ikala mua kulenga nsombelu webe mu matuku atshidi alua mu mushindu udi mua kukupetesha masanka.

MÊYI MANENE ASATU A MU BIBLE BUA KUKULOMBOLA

9. a) Mmunyi mudi Yehowa mututue mushinga padiye mutupeshe dipa dia kudisunguila malu? b) ‘Kukeba tshia kumpala Bukalenge’ kudi kutupetesha mpunga kayi?

9 Keba tshia kumpala Bukalenge bua Nzambi ne buakane buende. (Bala Matayi 6:19-21, 24-26, 31-34.) Yehowa mmututue mushinga padiye mutupeshe budikadidi bua kudisunguila malu. Kena uleja bule bua tshikondo tshiudi mua kuyisha Bukalenge pautshidi nsonga to. Kadi Yezu wakatupesha dîyi dinene didi dituambuluisha bua kukeba tshia kumpala Bukalenge. Mushindu uudi utumikila tshidiye muambe neukupeteshe mpunga wa kuleja muudi munange Nzambi, muudi uditatshisha bua bantu bakuabu ne muudi ne dianyisha bua ditekemena dia muoyo wa tshiendelele. Paudi wela meji bua kubuela mu dibaka anyi ukeba mudimu wa bianza, konkonona bua kumanya bikala malu audi usungula mua kukukebela tunyinganyinga bua bidi bitangila majinga a ku mubidi peshi mua kuleja muudi ne tshisumi bua Bukalenge bua Nzambi ne buakane buende.

10. Ntshinyi tshivua tshipeteshe Yezu disanka? Mmalu kayi audi mua kusungula akupetesha disanka?

10 Ikala ne disanka bua kuenzela bantu bakuabu mudimu. (Bala Bienzedi 20:20, 21, 24, 35.) Yezu wakatulongesha dîyi dinene dia mu nsombelu edi ne bulenga. Uvua muntu uvua ne disanka dia bungi bualu uvua wenza disua dia Tatuende pamutu pa diende. Yezu uvua ukeba bua bantu bapuekele bitabe lumu luimpe. (Luka 10:21; Yone 4:34) Pamuapa ukadi mumone disanka ditutu tupeta patutu tuambuluisha bantu bakuabu. Wewe usungula malu manene a mu nsombelu webe ku diambuluisha dia mêyi manene avua Yezu mulongeshe, neupete disanka ne neusankishe Yehowa.Nsu. 27:11.

11. Bua tshinyi Baluka uvua mujimije disanka? Yehowa wakamupesha mubelu kayi?

11 Disanka ditambe bunene ditudi nadi didi difumina ku dienzela Nzambi mudimu. (Nsu. 16:20) Bidi bimueneka ne: Baluka, sekretere wa Yelemiya uvua mupue bualu ebu muoyo. Umue musangu, mudimu wa Yehowa kawutshivua kabidi umusankisha to. Yehowa wakamuambila ne: ‘Wewe udi udikebela malu manene anyi? Kudikebediwu nansha; bualu bua mona, nentumine bonso ba pa buloba makenga. Kadi nenkupe muoyo webe bu tshintu tshiudi unyenga mu mvita mu miaba yonso iudi uya.’ (Yel. 45:3, 5) Udi wela meji kayi? Tshivua mua kupetesha Baluka disanka, nkukeba malu manene anyi? Peshi nkupanduka ku kabutu ka Yelushalema bu muena mudimu wa Nzambi uvua ne lulamatu?Yak. 1:12.

12. Mbualu kayi buvua Ramiro musungule buvua bumupeteshe disanka mu nsombelu wende?

 12 Tuangate tshilejilu tshia Ramiro, muanetu uvua mupete disanka pavuaye wenzela bantu bakuabu mudimu. Udi wamba ne: “Ndi mufumine mu dîku dipele dia mu musoko kampanda mu Mikuna ya Andes. Pavua tutuanyi mundombe bua kumfutshila tulasa tua iniversite, tshivua mpunga munene kundi. Kadi ntshivua ntambuilaku, ne mvua mupete dilomba dikuabu: mpanda-njila kampanda uvua mundombe bua kuyisha nende mu katshimenga kansanga kakese. Ngakaya muaba eu, meme kulonga mua kukosa nsuki ne kukangula nzubu wa dikosa nsuki bua kuikala ndiambuluisha. Patuvua tuyisha bantu Bible, ba bungi bavua bitaba. Pashishe, ngakaya mu tshisumbu tshipiatshipia tshia muakulu wanyi wa ku dibele. Mpindieu ndi mpanda-njila kukadi bidimu dikumi. Kakuena mudimu mukuabu uvua mua kumpetesha disanka dia buena dindi mupete pandi muambuluishe bantu bua kulonga lumu luimpe mu muakulu wabu wa ku dibele to.”

Ramiro mmupete disanka mu dienzela Yehowa mudimu katshia pavuaye nsonga (Tangila tshikoso tshia 12)

13. Bua tshinyi tshikondo tshia bunsonga ntshikondo tshimpe tshia kuenzela Yehowa mudimu ne muoyo mujima?

13 Enzela Yehowa mudimu mu bunsonga buebe. (Bala Muambi 12:1.) Kuedi meji ne: udi ne bua kuanji kupeta mudimu muimpe ne pashishe kulua kuenzela Yehowa mudimu to. Tshikondo tshia bunsonga ntshikondo tshimpe tshia kutuadija kuenzela Yehowa mudimu ne muoyo mujima. Bansonga ba bungi batu ne majitu makese mu dîku ne badi ne makanda a kuenza midimu mikole. Ntshinyi tshiudi musue kuenzela Yehowa pautshidi nsonga? Pamuapa udi ne tshipatshila tshia kulua mpanda-njila. Udi mua kuikala musue kuya muaba udibu bakula muakulu muenyi. Peshi pamuapa udi mua kuikala mumone mishindu iudi mua kuenza mudimu ne muoyo mujima mu tshisumbu tshienu. Nansha wewe muikale ne tshipatshila tshia kuenzela Nzambi mudimu mu mushindu kayi, newikale dijinga ne kupeta mushindu wa kudiambuluisha. Nebikulombe bua kulonga mutantshi bule kayi? Neusungule bua kuenza tshinyi?

 SUNGULA MALU NE MEJI KU DIAMBULUISHA DIA MÊYI MANENE A MU BIBLE

14. Mbualu kayi budi muntu ne bua kudimukila padiye udilongolola bua matuku atshidi alua?

14 Mêyi manene asatu a mu Bible atudi bakonkonone aa adi mua kukuambuluisha bua kukonkonona mudimu uudi ne bua kuenza. Kakuyi mpata, balongeshi bebe badi mua kuikala bamanye imue midimu idibu dijinga ne bantu. Peshi kudi mua kuikala bena mu tshiapu kampanda tshia mbulamatadi badi mua kukuambila midimu idibu nayi dijinga muaba uudi peshi uudi musue kuya. Ngumu ya nunku idi mua kuikala mimpe, kadi wamanya. Bantu badi kabayi banange Yehowa badi mua kujinga kutukuna dijinga dia bintu bia pa buloba mu muoyo wetu. (1 Yone 2:15-17) Wewe utangila bintu bia pa buloba ebu, muoyo webe udi mua kukudinga bipepele.Bala Nsumuinu 14:15; Yel. 17:9.

15, 16. Nnganyi udi mua kukulombola bimpe bua bidi bitangila mudimu wa kuenza?

15 Paudi umanya mudimu uudi ne bua kuenza, newikale dijinga ne mibelu mimpe. (Nsu. 1:5) Nnganyi udi mua kukuambuluisha bua kusungula mudimu ku diambuluisha dia mêyi manene a mu Bible? Teleja bantu badi banange Yehowa, badi bakunange, bakumanye ne bamanye bimpe nsombelu uudi nende. Nebakuambuluishe bua kumanya malu audi mukumbane bua kuenza ne majinga audi nawu. Pamuapa malu adibu bamba neakuambuluishe bua kuelulula meji bua bipatshila biudi nabi. Baledi bebe bobu banange Yehowa, nebikale diakalenga kuudi. Kabidi, bakulu mu tshisumbu mbantu badi bakumbane badi mua kukulombola. Yukila kabidi ne bampanda-njila ne batangidi bena ngendu. Bua tshinyi bavua basungule bua kuenza midimu ya pa buayi? Mmushindu kayi uvuabu batuadije mudimu wa bumpanda-njila, ne badi badiambuluisha mushindu kayi? Mmasanka kayi adibu bapete mu mudimu wabu?Nsu. 15:22.

16 Bantu badi bakumanye bimpe badi mua kukupesha mibelu ne busunguluji. Tshilejilu, fuanyikija ne: udi musue kulekela tulasa tua bikadilu bua kutuadija kuenza mudimu wa bumpanda-njila nangananga bualu kuena musue mudimu mukole udi tulasa tukulomba bua kuenza to. Muntu udi mukunange udi mua kujingulula meji ebe ne kukuambuluisha bua kumona ne: kalasa kadi mua kukuambuluisha bua kuikala ne ngikadilu wa dinanukila, ngikadilu wakuambuluisha bua kuenzela Yehowa mudimu ne muoyo mujima.Mus. 141:5; Nsu. 6:6-10.

17. Mmidimu kayi itudi katuyi mua kusungula nansha kakese?

17 Muntu yonso udi wenzela Yehowa mudimu neatuilangane ne malu adi mua kumusemeja kule ne Yehowa. (1 Kol. 15:33; Kolos. 2:8) Kadi kudi imue midimu idi mua kuikala ne njiwu ya bungi ya mu nyuma kupita mikuabu. Kudiku bamue bantu muaba uudi badi ‘ditabuja diabu didiine anu bu mazuwa adi madiine mu mâyi’ panyima pa bobu bamane kusungula mudimu kampanda wa kuenza anyi? (1 Tim. 1:19) Nebikale bimpe wewe mubenga kusungula malu adi mua kunyanga malanda ebe ne Nzambi.Nsu. 22:3.

SANKA MUUDI MUENA KRISTO UTSHIDI NSONGA

18, 19. Muntu yeye mudiumvue kayi musakibue bua kuenzela Yehowa mudimu, udi ne bua kuenza tshinyi?

18 Biwikala ne dijinga dikole dia kuenzela Yehowa mudimu, enza mudimu ne mpunga idiye ukupetesha pautshidi nsonga. Sungula malu akuambuluisha bua kuenzela Yehowa mudimu mu tshikondo tshidi ne mushinga wa bungi etshi.Mus. 148:12, 13.

19 Ku lukuabu luseke, ntshinyi tshiudi ne bua kuenza biwikala kuyi muanji kudiumvua musakibue bua kuenzela Yehowa mudimu? Tungunuka ne kudienzeja bua kukolesha ditabuja diebe. Panyima pa mupostolo Paulo mumane kuleja muvuaye mudienzeje bua kuikala ne nsombelu uvua mua kumupetesha masanka, wakafunda ne: “Binuikala ne meji makuabu mu bualu kayi bonso, Nzambi neanubuluile meji atudi batele aa. Nansha bikale munyi, mu mushindu utudi baye kumpala, tutungunuke ne kuenda mu bulongame mu njila umue eu.” (Filip. 3:15, 16) Tungunuka ne kuela meji bua dinanga dia Nzambi ne mibelu yende ya meji. Yehowa udi mua kukuambuluisha bua kusungula malu ne meji mu tshikondo tshiebe tshia bunsonga kupita muntu kayi yonso.