Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 5 2017

Muvua Gayo muambuluishe bena Kristo nende

Muvua Gayo muambuluishe bena Kristo nende

GAYO ne bena Kristo bakuabu ba ku ndekelu kua bidimu lukama bia kumpala bakatuilangana ne ntatu. Bantu bavua benda batangalaja malongesha a dishima bakateta bua kutekesha bisumbu ne kubuejamu matapuluka. (1 Yone 2:18, 19; 2 Yone 7) Muntu mukuabu diende Diotelefe uvua umuangalaja “malu mabi adi kaayi ne mutu” bua mupostolo Yone ne bua bantu bakuabu, ubenga bua kuakidila bena Kristo bavua benza ngendu ne uvua udienzeja bua kuitabijija bakuabu bua kulonda tshilejilu tshiende. (3 Yone 9, 10) Ke muvua nsombelu nanku pavua Yone mufundile Gayo. Mukanda uvua mupostolo eu mufunde bu mu bidimu bia 98 bikondo bietu ebi, wakalua “mukanda muisatu wa Yone” mu Mifundu ya bena Kristo ya tshiena Greke.

Nansha muvua Gayo mutuilangane ne ntatu, wakatungunuka ne kuenzela Yehowa mudimu ne lulamatu luonso. Mmunyi muakalejaye lulamatu luende? Bua tshinyi tudi basue kuidikija tshilejilu tshia Gayo lelu? Mmunyi mudi mukanda wa Yone mua kutuambuluisha bua kuenza nanku?

MUKANDA MUFUNDILA MULUNDA MUNANGA

Mufundi wa mukanda muisatu wa Yone udi udibikila nkayende ne: “mukulu.” Biakambuluisha muanende wa mu nyuma Gayo bua amumanye bu mupostolo Yone. Yone wakabikila Gayo ne muoyo mujima ne: “munanga undi munange bushuwa.” Pashishe Yone wakaleja muvuaye musue ne: Gayo ikale ne makanda a mubidi ne a mu nyuma mimpe. Mêyi kayipu mimpe ne dielangana kalumbandi mu mushindu muimpe nunku!—3 Yone 1, 2, 4.

Gayo uvua pamuapa mutangidi mu tshisumbu, kadi mukanda wa Yone ki mmuleje nanku patoke to. Yone wakatumbisha Gayo bua muvuaye wakidila bena Kristo nende nansha muvuaye kayi mubamanye. Yone wakamona bualu ebu bu tshijadiki tshia muvua Gayo ne lulamatu, bualu kuakidila benyi kuvua misangu yonso kusunguluja batendeledi ba Nzambi.—Gen. 18:1-8; 1 Tim. 3:2; 3 Yone 5.

Mêyi a dianyisha a Yone a muvua Gayo wakidila bena Kristo nende adi aleja ne: bena Kristo bavua bumbuka muaba uvua tshisumbu baya muaba uvua mupostolo Yone, ne bantu bavua benza luendu aba bakambila Yone ne kumujadikila malu avuabu bapete. Pamuapa ke mushindu uvua Yone mupete ngumu ya bisumbu ebi.

Bena Kristo bavua benza ngendu bavua bushuwa basue kusomba ne bena Kristo nabu. Nzubu ya tshilala benyi ivua mimanyike bikole bua malu mabi, kabavua bamanye kuakidila bantu, ne muvua muwule tente ne buenzavi. Ke bualu kayi, bua muaba uvua ukumbana,  bena ngendu bavua ne meji bavua baya kusomba kua balunda; kadi bena Kristo bavua baya kusomba kua bena Kristo nabu.

“BAVUA BAPATUKE BUA DÎNA DIENDE”

Yone wakalomba Gayo bua atungunuke ne kuakidila benyi, bualu mupostolo uvua mumulombe bua ‘kutuma [bena ngendu] mu njila mu mushindu udi mua kusankisha Nzambi.’ Muaba eu, kutuma benyi mu njila wabu kuvua kumvuija kubakumbajila majinga abu bua tshitupa tshia luendu tshivua tshilonda, ne kubapesha bivua mua kubambuluisha too ne pavuabu bafika muaba uvuabu baya. Bidi bimueneka ne: ke tshikavua Gayo muenzele benyi bende ba kumpala, bualu bavua bambile Yone bua ditabuja diende ne bua dinanga divuaye mubaleje.—3 Yone 3, 6.

Benyi bavua mua kuikala bamisionere, baleji mpala ba Yone anyi batangidi bena ngendu. Bonso buabu bakenza ngendu bua lumu luimpe. Yone wakamba ne: “Bavua bapatuke bua dîna diende.” (3 Yone 7) Yone uvua ufuma ku diakula bua Nzambi (tangila mvese 6), nunku tshiambila tshia ne: “bua dîna diende” tshidi tshiakula bua dîna dia Yehowa. Ke bualu kayi benyi aba bavua bena mu tshisumbu tshia bena Kristo ne bavua bakumbane kubakidila bimpe. Bidi anu muvua Yone mufunde ne: “Tuetu tudi benzejibue bua kuakidila bantu ba mushindu eu, bua tulue benzejanganyi ba mudimu mu bulelela.”—3 Yone 8.

DIAMBULUISHA MU NSOMBELU MIKOLE

Yone kavua anu mufundile Gayo bua kumuela tuasakidila to, kadi uvua kabidi musue kumuambuluisha bua kutantamena ntatu mikole. Lumue lutatu ludi ne: muena mu tshisumbu kampanda diende Diotelefe kavua musue kuakidila bena Kristo bavua benza ngendu to. Uvua upangisha too ne bakuabu bua kuakidila benyi.—3 Yone 9, 10.

Kakuyi mpata, bena Kristo ba lulamatu bavua mua kuikala kabayi basue kusomba kua Diotelefe nansha koku mushindu. Uvua musue kuikala pa muaba wa kumpala mu tshisumbu, kavua unemeka tshintu nansha tshimue tshia kudi Yone to, ne uvua wenda utangalaja malu mabi avua kaayi ne mutu bua bapostolo ne bantu bakuabu. Nansha muvua Yone kayi mumubikile ne: mulongeshi mubi, Diotelefe uvua ubenga bukokeshi bua bapostolo. Dijinga dia Diotelefe dia kuikala muntu munene ne ngenzelu wende mubi wa malu bivua bileja ne: kavua ne lulamatu to. Tshilumbu tshia Diotelefe tshidi tshileja lungenyi lua matapuluka ludi bantu badi banange malu manene ne bena lutambishi banyanga nalu tshisumbu. Nunku mêyi avua Yone muambile Gayo a ne: “kuidikiji malu mabi,” adi atutangila petu.—3 Yone 11.

KABINGILA KANENE KADI NE BUA KUTUSAKA BUA KUENZA MALU MIMPE

Demeteliyo uvua mushilangane ne Diotelefe, bualu Yone uvua muakule bualu buende wamba muvuaye tshilejilu tshimpe. Yone wakafunda ne: ‘Bavua bakule bimpe bua Demeteliyo, bushuwa, tuetu petu tudi tujadika bualu buende ne nudi bamanye ne: bujadiki butudi tufila mbulelela.’ (3 Yone 12) Demeteliyo uvua mua kuikala dijinga ne diambuluisha dia Gayo, ne mukanda muisatu wa Yone uvua mua kuikala mukanda uvua Yone mufunde wakula bua Demeteliyo ne bua dimupesha majitu. Demeteliyo ke uvua mua kuikala mutuadile Gayo mukanda eu. Bu muvua Demeteliyo muleji mpala wa Yone anyi pamuapa mutangidi muendakanyi, uvua pamuapa mutue mpanda bivua Yone mufunde.

Bua tshinyi Yone wakalomba Gayo bua kutungunuka ne kuakidila benyi nansha mukavuaye wenza nanku? Yone uvuaku mumone ne: bivua bikengela kupetesha Gayo muoyo mukole anyi? Mupostolo uvuaku usamisha mutu ne: Gayo uvua mua kuteketa bualu Diotelefe uvua wenda wipata bena Kristo bavua bakididi ba benyi mu tshisumbu anyi? Nansha biobi nanku anyi kabiyi nanku, Yone wakajadikila Gayo wamba ne: “Muntu udi wenza malu mimpe mmufumine kudi Nzambi.” (3 Yone 11) Aka ke kabingila kanene kadi ne bua kutusaka bua kutungunuka ne kuenza malu mimpe.

Mukanda wa Yone uvuaku musake Gayo bua kutungunuka ne kuikala muakididi wa benyi  anyi? Bu muvua mukanda muisatu wa Yone mulamibue mu mikanda ya mu Bible ne muambuluishe bua kukankamija bakuabu bua ‘kuidikija malu mimpe,’ bidi bimueneka ne: uvua mumusake bua kuenza nanku.

MALONGESHA ADI MU YONE MUISATU

Katuena bamanye malu makuabu a muanetu munangibue Gayo ukavua mukulumpe to. Nansha nanku, malu makese a mu nsombelu wende adi mua kutulongesha malu a bungi.

Mmushindu kayi utudi mua ‘kuikala ne tshibidilu tshia kuakidila benyi’?

Tshia kumpala, mu mushindu kampanda, ba bungi ba kutudi mbapetele dimanya dia bulelela kudi bana betu ba lulamatu bavua basue kuenza ngendu bua kutupetesha dimanya adi. Bushuwa, ki mbantu bonso ba mu tshisumbu tshia bena Kristo lelu badi benza ngendu mile bua lumu luimpe to. Kadi anu bu Gayo, mu mushindu kampanda tudi mua kukankamija ne kutua badi benza ngendu nyama ku mikolo, bu mudi mutangidi wa tshijengu ne mukajende. Anyi tudi mua kuambuluisha bana betu ba balume anyi ba bakaji badi baya miaba mikuabu ya mu ditunga, peshi ku babende bua kuambuluisha muaba udibu dijinga ne bamanyishi ba Bukalenge ba bungi. Nunku ‘tuikalayi ne tshibidilu tshia kuakidila benyi.’—Lomo 12:13; 1 Tim. 5:9, 10.

Tshibidi, katuena ne bua kukema bua kumona imue misangu bamue bantu belesha mpata bukokeshi budi mu bisumbu lelu to. Bakela bukokeshi bua Yone mpata; ke muvuabi kabidi bua mupostolo Paulo. (2 Kol. 10:7-12; 12:11-13) Kadi mpindieu ntshinyi tshituenza bamue bantu mu tshisumbu bobu batuenzela malu a mushindu eu? Paulo wakabela Timote ne: “Mupika wa Mukalenge kena ne bua kuluangana, kadi udi ne bua kuikala muena bupole kudi bantu bonso, mukumbane bua kulongesha, udikanda padibu bamuenzela bibi, ulongesha bantomboji ne lutulu.” Tuetu bikale ne lutulu padibu batuamba bibi, bamue bantu badi ne meji mabi badi mua kushintuluka ku kakese ku kakese. Yehowa pende “udi mua kubapesha dikudimuna dia mutshima didi difikisha ku dimanya dijalame dia bulelela.”—2 Tim. 2:24, 25.

Tshisatu, bena Kristo netu badi benzela Yehowa mudimu ne lulamatu nansha padiku buluishi, badi dijinga ne kubaleja dianyisha ne kubela kalumbandi ne muoyo mujima bua lulamatu luabu. Mupostolo Yone uvua bushuwa ukankamija Gayo ne umujadikila ne: uvua wenza tshivua tshimpe. Bia muomumue, bakulu lelu badi ne bua kuidikija tshilejilu tshia Yone pa kukankamija bana betu ba balume ne ba bakaji bua ‘kabapungidi.’—Yesh. 40:31; 1 Tes. 5:11.

Mukanda wa kudi Yone uvuaye mutumine Gayo ke mukanda muîpi ku mikanda yonso idi mu Bible, mudi anu miaku 219 mu tshiena Greke. Kadi udi ne mushinga wa bungi kudi bena Kristo lelu.