Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 5 2017

Disanka dia kuikala ne nsombelu mupepele

Disanka dia kuikala ne nsombelu mupepele

DANIEL NE MIRIAM bakaselangana mu ngondo wa 9 mu 2000 ne bavua ne nsombelu muimpe mu Barcelone, mu Espanye. Daniel udi wamba ne: “Midimu yetu ya bianza ivua itupesha mpunga wa kudia mu restoran mimpe, kuenza ngendu mu matunga makuabu, ne kuvuala bilamba bimpe. Tuvua kabidi tuyisha pa tshibidilu.” Kadi pashishe bualu kampanda bua kenzeka.

Mu mpungilu wa mu 2006, Daniel wakumvua bela lukonko mu muyuki kampanda ne: “Tudiku tuenza muetu muonso bua kuambuluisha bantu badi ‘benda batenkakana’ batangile ku lufu bua babuele mu njila udi ufikisha ku muoyo wa tshiendelele anyi?” (Nsu. 24:11) Muyuki eu uvua uleja ne: tudi ne dibanza dia kuyisha mukenji wa mu Bible bualu mioyo ya bantu idi mu njiwu. (Bien. 20:26, 27) Daniel udi uvuluka wamba ne: “Ngakumvua anu bu ne: Yehowa uvua ungambila meme.” Muyuki eu wakaleja kabidi ne: tudi ne disanka dia bungi patudi tuenza bia bungi mu mudimu wa Yehowa. Daniel uvua mumanye ne: bivua nanku bualu uvua umona Miriam ukavua mutuadije bumpanda-njila muikale ne disanka dia bungi.

Muyuki eu wakalenga Daniel bikole, kufikaye ku diangata dipangadika dia ne: tshikondo tshivua tshikumbane tshia yeye kuenza mashintuluka manene mu nsombelu wende. Wakatuadija kuenza mêba makese ku mudimu, kutuadijaye bumpanda-njila ne kuelaye meji bua muvuaye yeye ne Miriam mua kuikala ne disanka bobu baye kuenzela Nzambi mudimu muaba udibu dijinga ne bamanyishi ba Bukalenge ba bungi.

NTATU KUMPALA, LUMU LUA DISANKA PASHISHE

Mu ngondo 5 mu 2007, Daniel ne Miriam bakalekela midimu yabu ya bianza, kuyabu mu ditunga dia Panama mukavuabu baye kuendakana kumpala. Teritware wabu uvua ne bidiila bia bungi mu bidiila bia Bocas del Toro mu mbuu wa Caraïbes. Bantu ba bungi badi basombele muntu amu mbena mu tshisa tshia Ngabe. Daniel ne Miriam bakela meji ne: makuta avuabu balame avua mua kubambuluisha bua kushala mu Panama bua ngondo mitue ku muanda mukulu.

Bavua benda mu bidiila abi ku buatu ne ku dikalu. Batshidi bavuluka musangu wa kumpala uvuabu bende ku makalu ntanta wa kilometre mitue ku 30 benda babanda mikuna mu munya mukole. Daniel wakatshioka bikole menemene wamba kufua tshipuka. Kadi mêku a bena Ngabe bavuabu batuilangane nabu avua mamanye kuakidila benyi, nangananga panyima pa Daniel ne Miriam bamane kulonga bimue biambilu bia mu muakulu wa muaba au. Matuku makese pashishe, bakapeta balongi ba Bible 23.

Tshiakenzeka ntshinyi pakatulabu makuta abu onso avuabu balame? Daniel udi wamba ne: “Tuakatuadija kuela meji ne binsonji ku mêsu bua kupingana mu Espanye. Tuakabungama bikole bua kushiya balongi betu ba Bible.” Kadi ngondo umue pashishe, tuakapeta lumu lua disanka. Miriam udi wamba ne: “Bavua batulombe bua kulua bampanda-njila ba pa buabu. Ndisanka kayipu dia kushala mu mudimu wetu!”

DISANKA DIABU DITAMBE BUNENE

Bua mashintuluka adi menzeke mu bulongolodi, Daniel ne Miriam bavua ne bua kuimanyika bumpanda-njila bua pa buabu mu 2015. Ntshinyi tshivuabu mua kuenza mpindieu? Bakeyemena mulayi udi mu Misambu 37:5 wa ne: ‘Uteke njila webe mu bianza bia Yehowa; umueyemene yeye kabidi, ne yeye neenze malu ende.’ Bakapeta mudimu wa bianza bua kudikuatshisha ne kuikala bampanda-njila ba pa tshibidilu, ne lelu badi benza mudimu mu tshisumbu mu Veraguas, mu Panama.

Daniel udi wamba ne: “Kumpala kua tuetu kumbuka mu Espanye, katuvua bamanye ni tuvua mua kukumbana bua kuikala ne nsombelu mupepele. Lelu tudi nende, ne katuena tupangila tshintu nansha tshimue tshia mushinga menemene to.” Ndisanka kayi ditambe bunene didibu nadi? Badi bamba ne: “Kuambuluisha bantu bena budipuekeshi bua kulonga malu a Yehowa ke disanka didi kadiyi kuamba!”