Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 4 2017

Utuku umona kulumbulula kuakane mutu Yehowa ukumona anyi?

Utuku umona kulumbulula kuakane mutu Yehowa ukumona anyi?

‘Nengambe dîna dia Yehowa, Nzambi wa kalolo udi kayi ne bubi.’—DUTELONOME 32:3, 4.

MISAMBU: 110, 2

1, 2. a) Mbualu kayi bubi buvua bufikile Nabota ne bana bende ba balume? b) Nngikadilu ibidi kayi ituakonkonona mu tshiena-bualu etshi?

BANTU babi babidi badi bashiminyina muntu mulume kampanda ne: mmuenze bualu bubi butambe. Tshidibu bamba etshi ndishima. Kadi badi bapisha muntu eu ne bamufundila tshibawu tshia lufu. Elabi meji muvua bantu bavua banange buakane mua kumvua pavuabu bamona benda bashipa tatu eu ne bana bende ba balume ne mabue pabu kabayi bamanye bualu! Ki mmuyuki mufuikakaja to. Mbualu bulelela buvua bufikile Nabota, mutendeledi wa Yehowa wa lulamatu uvua ne muoyo pavua mukalenge Ahaba ukokesha mu Isalele.—1 Bakelenge 21:11-13; 2 Bakelenge 9:26.

2 Mu tshiena-bualu etshi, netuakule bua tshivua tshifikile Nabota. Netuakule kabidi bua tshilema tshinene tshivua mukulu wa lulamatu wa mu tshimue tshia ku bisumbu bia kumpala bia bena Kristo muenze. Bilejilu bibidi ebi nebituleje mudi budipuekeshi ne kufuilangana luse ne muoyo mujima ne mushinga tuetu basue kuidikija mushindu utu Yehowa umona kulumbulula kuakane.

 LUFU KALUYI LUBAKUMBANYINE

3, 4. Nabota uvua muntu wa mushindu kayi? Bua tshinyi wakabenga kupanyisha Ahaba budimi buende bua tumuma tua mvinyo?

3 Nabota uvua ne lulamatu kudi Yehowa tshikondo tshivua bena Isalele ba bungi balonda tshilejilu tshibi tshia mukalenge Ahaba ne tshia mukajende mubi Yizebele. Bavua batendelela Bâla, nzambi wa dishima, ne kabavua banemeka Yehowa anyi mikenji yende to. Kadi Nabota uvua wangata malanda ende ne Yehowa ne mushinga kupita muoyo wende.

4 Bala 1 Bakelenge 21:1-3. Pavua Ahaba mulombe Nabota bua kusumba budimi buende bua tumuma tua mvinyo anyi bua bashintakajangane madimi, Nabota wakabenga. Bua tshinyi? Wakaleja ne kanemu konso ne: ‘Yehowa ampidishe bua meme kukupa bupianyi bua batatu banyi.’ Nabota wakabenga dilomba dia mukalenge Ahaba bualu kuenza nunku kuvua kubengangana ne mikenji ivua Yehowa muelele bena Isalele bua kabapanyi bumpianyi bua batatuabu bua kashidi. (Lewitiki 25:23; Nomba 36:7) Bulelela, Nabota wakatumikila Yehowa.

5. Ntshinyi tshivua Yizebele muenze bua kupeta budimi bua Nabota bua tumuma tua mvinyo?

5 Pakabenga Nabota kupanyisha budimi buende bua tumuma tua mvinyo, mukalenge Ahaba ne mukajende bakenza malu mabi matambe. Bua kupeta budimi abu, Yizebele mukaji wa mukalenge wakalomba bantu balume babidi bua bashiminyine Nabota bualu buvuaye kayi muenze. Bu tshipeta, bakabashipa Nabota ne bana bende babalume. Ntshinyi tshivua Yehowa muenze bua lufu luvua kaluyi lubakumbanyine elu?

KULUMBULULA KUAKANE KUA NZAMBI

6, 7. Mmunyi muvua Yehowa muleje ne: uvua munange buakane? Bua tshinyi bualu ebu buvua bukoleshe bena mu dîku dia Nabota ne balunda bende?

6 Yehowa wakatuma Eliya diakamue bua kumonangana ne Ahaba. Eliya wakambila Ahaba ne: uvua mushipianganyi ne muivi. Yehowa wakangata dipangadika kayi? Wakamba bua bashipe Ahaba, mukajende ne bana bende bu muvuabu pabu bashipe Nabota ne bana bende.—1 Bakelenge 21:17-25.

7 Bena mu dîku dia Nabota ne balunda bende bakabungama bikole bua malu mabi matambe avua Ahaba muenze. Kadi Yehowa wakamona malu mabi au ne kukebaye tshia kuenza ne lukasa luonso. Bualu ebu buakabakolesha. Nansha nanku, budipuekeshi buabu ne dieyemena diabu kudi Yehowa bivua mua kuikala bitetshibue bua tshiakenzeka pashishe.

8. Ntshinyi tshivua Ahaba muenze pakumvuaye mukenji wa Yehowa? Mbipeta kayi biakamueneka?

8 Pakumvua Ahaba tshivua Yehowa mupangadije bua kumuenzela, ‘wakadipanda bilulu biende, wakaluata bilulu bikayabala pambidi pende, wakajila bia kudia, wakalala mu bilulu bikayabala, wakenda bitulu bitulu.’ Ahaba wakadipuekesha. Mbipeta kayi biakamueneka? Yehowa wakambila Eliya ne: ‘Bualu bua yeye wakudipuekesha nunku ku mêsu kuanyi, tshiena ngenza malu au makole onso mu matuku ende: kadi nentume malu au makole ku nzubu wende mu matuku a bana bende ba balume.’ (1 Bakelenge 21:27-29; 2 Bakelenge 10:10, 11, 17) Yehowa ‘mmutetshi wa mitshima,’ ne udi umona tshitudi munda muetu menemene, wakaleja Ahaba luse.—Nsumuinu 17:3.

BUDIPUEKESHI MBUKUBI

9. Bua tshinyi budipuekeshi buvua ne bua kuikala bukubi bua bena mu dîku dia Nabota ne balunda bende?

9 Pavua bena mu dîku dia Nabota ne balunda bende bumvue ne: kabakunyoka kabidi bena mu dîku dia Ahaba too ne pafuaye, ditabuja diabu kudi Nzambi divua mua kuikala ditetshibue. Kadi budipuekeshi buvua ne bua kubambuluisha bua kulama ditabuja diabu. Bua tshinyi? Bualu bu bobu ne budipuekeshi, bavua ne bua kutungunuka ne kutendelela Yehowa, batuishibue ne: Nzambi kena mua kulumbuluisha bibi to. (Bala Dutelonome 32:3, 4.) Mu matuku atshilualua, bena mu dîku dia  Nabota nebikale ne disanka dia kumona bantu babu bavuabu banange ku dibishibua dia bantu ku lufu. Nekuikale kulumbulula kuakane bua Nabota ne bua bana bende babalume. (Yobo 14:14, 15; Yone 5:28, 29) Muena budipuekeshi mmumanye ne: ‘Nzambi mulelela nealumbuluishe mudimu wonso ne bualu buonso busokoka, nansha buimpe nansha bubi.’ (Muambi 12:14) Yehowa utu ukonkonona malu atudi katuyi bamanye. Ke bualu kayi budipuekeshi budi butukuba bua katujimiji ditabuja dietu kudi Yehowa to.

10, 11. a) Nnsombelu kayi idi mua kuteka mushindu wetu wakumona buakane mu diteta? b) Budipuekeshi nebutukube mu mishindu kayi?

10 Ntshinyi tshiwenza bakulu bobu bangate dipangadika diudi kuyi mumvue bimpe anyi kuyi witaba? Tshilejilu, ntshinyi tshiwenza, wewe anyi muntu mukuabu uudi munange yeye mujimije majitu ende mu mudimu wa Yehowa? Newenze tshinyi bobu bipate muena dibaka nebe, muanebe wa balume anyi wa bakaji peshi mulunda webe wa pa muoyo mu tshisumbu kadi kuyi witaba dipangadika dia bakulu adi? Newenze tshinyi wewe mumone ne: bakulu mbenze tshilema bua kufuila muntu kampanda uvua muenze bubi luse? Nsombelu eyi idi mua kuteka ditabuja dietu kudi Yehowa mu diteta ne mushindu udiye mulongolole malu mu tshisumbu lelu. Mmunyi mudi budipuekeshi mua kukukuba bikala umue wa ku nsombelu eyi muteke ditabuja diebe mu diteta? Tukonkononayi mishindu ibidi.

Newenze tshinyi bakulu bobu bamanyishe dipangadika kampanda diudi kuyi witaba? (Tangila tshikoso tshia 10, 11)

 11 Tshia kumpala, tuetu ne budipuekeshi, netuitabe ne: katuena ne bijadiki bionso to. Nansha tuetu tuela meji ne: tudi bamanye malu onso adi atangila tshilumbu kampanda, kadi anu Yehowa ke udi mumanye tshidi mu muoyo wa muntu. (1 Samuele 16:7) Patudi tuvuluka bualu ebu, netumanye ne budipuekeshi buonso ne: tudi ne mikalu ne tudi ne bua kuakaja mmuenenu wetu. Tshibidi, tuetu bamone anyi bobu batuenzele bualu budi kabuyi buakane, budipuekeshi nebutuambuluishe bua kutumikila, kuikala ne lutulu, ne kuindila bua Yehowa alongolole bualu abu. Bible udi wamba ne: ‘Badi batshina Nzambi nebapete diakalengele ku mêsu kuende.’ Bible udi kabidi wamba ne: ‘Kadi muntu mubi kena upeta diakalengele, yeye kena uvudija matuku ende.’ (Muambi 8:12, 13) Tuetu bashale ne budipuekeshi, nebituambuluishe ne nebiambuluishe kabidi bantu bakuabu.—Bala 1 Petelo 5:5.

TSHILUMBU TSHIA MPALA IBIDI MU TSHISUMBU

12. Mmuyuki kayi utuakonkonona? Bua tshinyi?

12 Bena Kristo ba kumpala ba ku Antioka wa mu Sulia bakatuilangana ne nsombelu uvua muteke budipuekeshi buabu mu diteta ne uvua kabidi muteke kufuilangana kuabu kua luse ne muoyo mujima mu diteta. Tukonkononayi muyuki eu ne tuenze nawu mudimu bua kukonkonona mmuenenu wetu wa kufuilangana luse. Nebituambuluishe bua kumvua bua tshinyi Yehowa udi mua kuenza mudimu ne bantu bapange bupuangane kayi upetula mikenji yende.

13, 14. Mmidimu kayi ivuabu bapeshe mupostolo Petelo? Mmunyi muvuaye muleje ne: uvua ne dikima?

13 Mupostolo Petelo uvua mukulu uvua bena Kristo ba bungi ba kale bamanye bimpe menemene. Uvua mulunda wa Yezu ne bakamupesha midimu minene. (Matayi 16:19) Tshilejilu, mu tshidimu tshia 36, bakapesha Petelo mudimu wa kuyisha Koneliyo ne ba mu nzubu muende. Bua tshinyi mudimu eu uvua wa pa buawu? Bualu Koneliyo kavua muena Yuda to, uvua muntu wa bisamba bia bende uvua kayi mutengula. Pavua Koneliyo ne ba mu nzubu muende bapete nyuma muimpe, Petelo wakamona ne: bavua ne bua kutambula ne kulua bena Kristo. Udi wamba ne: “Kudi muntu udi mua kupangisha bantu aba badi bapete nyuma muimpe anu bu tuetu bua kubatijibua mu mâyi anyi?”—Bienzedi 10:47.

14 Mu tshidimu tshia 49, bapostolo ne bakulu ba mu Yelushalema bakatuilangana bua kupangadija ni bivua bikengela bua bena Kristo ba bisamba bia bende kutengudibua. Mu tshisangilu etshi, mupostolo Petelo wakavuluija bena Kristo nende ne dikima dionso ne: wakamona muvua bantu ba bisamba bia bende bavua kabayi batengudibue bapete nyuma muimpe. Tshivua Petelo mumone etshi tshiakambuluisha kasumbu kaludiki bua kuangata dipangadika kampanda. (Bienzedi 15:6-11, 13, 14, 28, 29) Bena Kristo bena Yuda ne ba bisamba bia bende bavua ne bua kuikala ne dianyisha bua muvua Petelo mupete dikima dia kuleja bijadiki ebi. Bivua anu ne bua kuikala bipepele bua bena Kristo ba kumpala aba kueyemenabu muntu wa lulamatu ne mushindame eu.—Ebelu 13:7.

15. Ntshilema kayi tshivua Petelo muenze pavuaye ku Antioka wa mu Sulia? (Tangila tshimfuanyi tshia ntuadijilu tshia tshiena-bualu.)

15 Matuku makese panyima pa tshisangilu tshia mu Yelushalema, Petelo wakakumbula bena ku Antioka wa mu Sulia. Pavuaye kuntu aku, uvua musombe ne bena Kristo nende ba bisamba bia bende. Tudi tumona bushuwa muvuabu basue bua dimanya dia Petelo ne dimonamona diende dia malu bibambuluishe. Kadi bavua ne bua kuikala bakeme ne banyingalale bikole pavua Petelo mubenge kudia kabidi nabu. Petelo wakasaka bena Kristo bakuabu bena Yuda bua kumuidikija, kusaka too ne Bânaba bua kuenza bia muomumue. Bua tshinyi mukulu muena Kristo mushindame eu wakenza tshilema tshinene tshia nunku tshivua mua  kuikala tshitapulule bena mu tshisumbu? Lukonko lua mushinga ludi ne: Ndilongesha kayi ditudi mua kupeta ku tshilema tshia Petelo didi mua kutuambuluisha, mukulu yeye mutuambe mêyi adi atutapa ku muoyo anyi mutuenzele malu adi atunyingalaja?

16. Mmunyi muvua Paulo mupingaje Petelo mu njila? Nnkonko kayi idi ijuka?

16 Bala Galatiya 2:11-14. Petelo wakatuadija kutshina bantu. (Nsumuinu 29:25) Petelo uvua mumanye muvua Yehowa umvua bua bantu ba bisamba bia bende. Nansha nanku, uvua ne buôwa bua ne: bena Kristo bena Yuda batengula bavua bafumina mu Yelushalema kabalu kumupepeja bua muvuaye usomba ne bena Kristo ba bisamba bia bende. Mupostolo Paulo wakambila Petelo ne: uvua muena lubombo. Bua tshinyi? Bualu Paulo uvua mumvue muvua Petelo muakuile bantu ba bisamba bia bende mu tshisangilu tshivua tshienzeke mu Yelushalema mu tshidimu tshia 49. (Bienzedi 15:12; Galatiya 2:13) Ntshinyi tshivua bena Kristo ba bisamba bia bende bavua Petelo munyingalaje ne bua kuenza? Bavua ne bua kulenduka anyi? Petelo uvuaku ne bua kujimija midimu yende bua tshilema tshiende etshi anyi?

IKALA UFUILANGANA LUSE

17. Mmunyi muvua luse lua Yehowa luambuluishe Petelo?

17 Petelo uvua ne budipuekeshi ne wakitaba tshivua Paulo mumuambe atshi. Bible kena wamba ne: Petelo wakajimija mudimu nansha umue wa ku ivuaye nayi to. Kadi wakalua kufunda mikanda ibidi ya mu Bible ku diambuluisha dia nyuma wa Nzambi. Mu mukanda wende muibidi, udi mene ubikila Paulo ne: “muanetu munanga.” (2 Petelo 3:15) Tshilema tshia Petelo tshivua ne bua kuikala tshinyingalaje bena Kristo ba bisamba bia bende bikole. Kadi Yezu udi mutu wa tshisumbu wakatungunuka ne kuenza nende mudimu. (Efeso 1:22) Bena Kristo mu tshisumbu bavua ne mushindu wa kuidikija Yezu ne Tatu wende pavuabu bafuila Petelo luse. Diakalenga, muena Kristo nansha umue kakalenduka bua tshilema tshia muntu mupange bupuangane to.

18. Ndîba kayi ditudi ne bua kuidikija mushindu utu Yehowa umona kulumbulula kuakane?

18 Kakuvua bakulu bapuangane mu tshisumbu tshia kumpala tshia bena Kristo to, nansha lelu kakuena bakulu bapuangane mu tshisumbu tshia bena Kristo to. Bible udi wamba ne: “Tuetu bonso tutu tulenduka misangu ya bungi.” (Yakobo 3:2) Mbipepele bua kuitaba bualu ebu, kadi ntshinyi tshituenza tuetu badimuenene bilema bia muanetu kampanda? Netuidikijaku mushindu utu Yehowa umona kulumbulula kuakane anyi? Tshilejilu, ntshinyi tshiwenza mukulu kampanda yeye mufile diandamuna didi dimueneka dinyangakaja kabidi malu? Mukulu yeye muambe bualu kampanda budi bukunyingalaja anyi bukutapa ku muoyo kayi muele meji, neulenduke anyi? Pamutu pa kuamba diakamue ne: muanetu eu kena ukumbana kuikala kabidi mukulu, neutangidilaku Yezu, mutu wa tshisumbu ne lutulu luonso anyi? Pamutu pa kuimanyina pa tshilema tshiende, neuvulukaku bidimu bia bungi bikadi muanetu eu muenzele Nzambi mudimu ne lulamatu anyi? Muanetu kampanda yeye mukuenzele bibi kadi utungunuka ne kuikala mukulu anyi bamupesha majitu makuabu, newikalaku ne disanka bua bualu buende anyi? Wewe muitabe bua kumufuila luse ne muoyo mujima, udi uleja ne: udi widikija mushindu udi Yehowa umona kulumbulula kuakane.—Bala Matayi 6:14, 15.

19. Ntshinyi tshitudi ne bua kudisuika bua kuenza?

19 Bu mutudi banange kulumbulula kuakane, tudi bindile ne muoyo kuulu kuulu dituku dikala Yehowa mua kujikija malu mabi onso makebesha kudi Satana ne ndongoluelu wende mubi. (Yeshaya 65:17) Bua lelu, padibu batuenzela malu mabi katuyi bamanye bualu, tuitabayi ne budipuekeshi buonso ne: katuena mua kuikala ne bijadiki bionso to, ne tufuilayi badi batuenzela bibi luse ne muoyo mujima. Tuetu benze nanku, netuidikije mushindu utu Yehowa umona kulumbulula kuakane.