Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 4 2017

 MALU A MU NSOMBELU

Mudisuike bua kuikala musalayi wa Kristo

Mudisuike bua kuikala musalayi wa Kristo

Pavua masashi enda apita muaba umvua, ngakela kalamba katoke muulu bitekete bitekete. Basalayi bavua benda badidisha masashi abu bakangela dîyi dikole bua mpatuke muaba umvua musokomene au. Ngakaya kudibu tshiyi mumanye ni mvua mua kufua anyi kushala ne muoyo. Mmushindu kayi ungakafika mu nsombelu mukole eu?

NDI MULELA mu dîku dia bana muanda mukulu, meme ndi wa muanda mutekete, baledi betu bavua benji ba mudimu ba kalanda musenga mu Karítsa, kamusoko ka mu ditunga dia Grèce. Mbandele mu 1926.

Tshidimu tshimue kumpala kua meme kuledibua, baledi banyi bakatuilangana ne John Papparizos, mulongi wa Bible (ke muvuabu babikila Bantemu ba Yehowa tshikondo atshi), uvua ne tshisumi ne uvua wakula bikole. Bu muvua mushindu uvua John weleshisha bantu meji ne malu a mu Bible musankishe baledi banyi bikole, bakatuadija kubuela mu bisangilu bia balongi ba Bible bivuabu benza mu musoko wetu. Mamuanyi uvua ne ditabuja dikole kudi Yehowa Nzambi, ne nansha muvuaye kayi mumanye kubala ne kufunda, uvua wambila bantu bakuabu malu avuaye witabuja pavua mpunga umueneka. Bia dibungama, papa uvua yeye utamba kuimanyina pa bilema bia bantu, ne ku kakese ku kakese wakalekela kubuela mu bisangilu bia bena Kristo.

Meme ne bana betu tuvua tunemeka Bible, kadi mu dikole dietu masanka a bunsonga avua atubueja mu ditanaja. Pashishe mu 1939, pakabudika Mvita mibidi ya buloba bujima mu matunga a ku mputu, bualu kampanda buakenzeka mu musoko wetu buakatubungamija bibi. Muena mutumba wetu ne Nicolas Psarras, muana wa tatu mukuabu, utshivua utambuilaku ne mulue Ntemu, bakabenzeja bua kubuela mu tshiluilu tshia bena Greke. Nicolas uvua ne bidimu 20 wakambila bamfumu ba basalayi ne dikima dionso ne: “Tshiena mua kuluangana to, bualu ndi musalayi wa Kristo.” Ke kuyabu nende ku kabadi ka basalayi, kumukoselabu tshibawu tshia buloko bua bidimu 10. Biakatutonda bikole be!

Diakalenga, ku ntuadijilu kua 1941, tshiluilu tshienza ne basalayi ba matunga mashilashilangane tshiakabuela bua matuku makese mu Grèce, kupatulabu Nicolas mu buloko. Wakapingana mu Karítsa, muvua tutuanyi Ilias mumuele nkonko ya bungi ya malu a mu  Bible. Ngakabateleja ne ntema yonso. Pashishe meme ne Ilias ne Efmorfia, mukala wetu wa bakaji, tuakatuadija kulonga Bible, ne tuvua ne tshibidilu tshia kubuela mu bisangilu bia Bantemu. Tshidimu tshiakalonda, busatu buetu tuakadilambula kudi Yehowa, tuetu kutambula. Panyima pa matuku, bana betu bakuabu banayi bakalua pabu Bantemu ba lulamatu.

Mu 1942, tshisumbu tshia mu Karítsa tshivua ne bana betu ba balume ne ba bakaji tshitema bavua ne bidimu kubangila ku 15 too ne ku 25. Tuetu bonso tuvua bamanye ne: ntatu mikole ivua mituindile. Ke bua tshinyi bua kukoleshangana, tuvua tutuilangana dîba dionso dituvua basue bua kulonga Bible, kuimba misambu ya Bukalenge ne kusambila. Kuenza nunku kuakakolesha ditabuja dietu.

Demetrius ne balunda bende mu Karítsa

MVITA YA BENA DITUNGA

Bu muvua Mvita mibidi ya buloba bujima mijike, bakoministe bena Greke bakatombokela mbulamatadi wa Greke, kukebeshabi mvita mikole mu bantu. Baluanganyi ba mvita bakoministe bakatangalaka nseke yonso ya ditunga, benzeja bena mu misoko bua kudisanga nabu. Pakabuelabu mu musoko wetu, bakakuata bansonga Bantemu basatu: Antonio Tsoukaris, Ilias ne meme. Tuakabasengelela ne: tuvua bena Kristo batu kabayi babuelakana mu malu a tshididi, kadi bakatuenzeja bua kuya netu ku Mukuna wa Olympe uvua mutantshi wa mêba 12 ne musoko wetu.

Matuku makese pashishe, munene wa bakoministe wakatutumina dîyi bua kubuela mu tshiluilu tshiabu. Patuakabumvuija ne: bena Kristo balelela kabatu bambula bingoma bua kuluisha bantu nabu, munene wabu wakapeta luonji, kutusakilaye too ne kudi munene uvua pende ku mutu kuende. Patuakambulula anu mêyi amue amue au, munene au wakamba ne: “Nanku angatayi mpunda ne nuambule bantu badibu batape mputa mu mvita nuye nabu ku lupitadi.”

Tuakamuandamuna ne: “Kadi bobu batukuate kudi basalayi ba ditunga, kabakutumona petu bu bantu badi benda babaluisha anyi?” Ke yeye kuamba ne: “Nanku tuadilayi badi ku mvita biakudia.” Tuakamueleshisha meji ne: “Kadi munene kampanda wa basalayi yeye mutumone ne mpunda ne mututumine dîyi bua kuambula bingoma bua kuya nabi muaba wa mvita?” Ke kushalaye mupuwe wela meji. Ndekelu wa bionso, kuambaye ne: “Mbimpe, nudi mua kulama nansha mikoko! Shalayi ku mukuna bua kudisha mikoko.”

Anu patshivua mvita ayi itua ipela muaba utuvua, kondo ketu ka muoyo kakatusaka bua kuya kulama mikoko. Tshidimu tshimue pashishe, bakanyishila ilias, uvua muntu mukole kutudi bua kupingana kumbelu bua kulama mamu ukavua mukaji mukamba. Antonio wakasama, ke kumulekelabu. Kadi meme ngakashala anu mu buloko.

Mu lupolo alu, tshiluilu tshia bena Greke tshivua tshienda tshisemena pabuipi bikole ne bakoministe. Tuakanyema ne bakoministe bavua bankuate ku mikuna batangile mu ditunga dia Albanie divua pabuipi. Patuakasemena pabuipi ne mikalu, diakamue tuakadimona bajingila kudi basalayi bena Greke. Bantomboji bakapeta buôwa, bobu kunyema. Meme kusokoma ku mutshi uvua mupuke, ke tshivua tshimfikishe ku dilonda muyuki wanyi ne basalayi bandi mutele ku ntuadijilu.

Pangakambila basalayi bena Greke ne: bavua bankuate kudi bakoministe, bakaya nanyi bua kundumbuluisha ku kabadi ka basalayi kavua pabuipi ne Véria, tshimenga tshia Beloya tshia kale tshidibu  batele mu Bible. Kuntu aku bakandomba bua kumbuila basayi bina bia kusokomena. Pangakabenga, Munene wa basalayi wakatuma dîyi bua baye nanyi mu buloko bua mu tshidiila tshia Makrónisos tshivua tshienza buôwa.

TSHIDIILA TSHIDI TSHIENZA BUÔWA BUA BUNGI

Makrónisos, mmuaba mubi uvua munya mukole, kawuyi mâyi, udi ku muelelu wa Mbuu, ku Attica mutantshi wa kilometre 50 ne tshimenga tshia Athènes. Tshidiila etshi tshidi anu ne Kilometre 13 mu bule ne metre 500 mu butshiama. Kadi kumbukila mu 1947 too ne mu 1958, muvua bena buloko bapite pa 100 000 kusangisha ne bakoministe ne bantu bavuabu babanda bu bakoministe, baluanganyi ba mvita bavua batombokele mbulamatadi kumpala, ne Bantemu ba Yehowa ba bungi ba lulamatu.

Pangakafika ku ntuadijilu kua 1949, bakatapulula bena buloko mu tumponyi tua bungi. Bakanteka meme mu kamponyi muvua kamuyi bukubi pamue ne bantu bakuabu nkama ya bungi. Bantu batue ku 40 bavua balala panshi mu ntenta uvua muenza bua bantu 10. Tuvua tunua mâyi a manyanu ne tuvua tudia nangananga nkunde ne njilu. Lupuishi ne tshipepele bivua bitutatshisha misangu yonso. Kadi tuetu babende kabavua batuenzeja mudimu wa kasuba wa kuambula mabue uvua utshiokesha mubidi ne lungenyi bia bena buloko ba bungi ba diakabi to.

Meme ne Bantemu bakuabu bavuabu bakuate, mu tshidiila tshia Makrónisos

Dituku kampanda patuvua tuenda ku muelelu wa mâyi, ngakatuilangana ne Bantemu ba bungi ba mu tumponyi tukuabu. Disankapu kayi dia kutuilangana! Bu mutuvua tudienzeja bua bantu kabatumonyi, tuvua tutuilangana pavuaku mushindu. Tuvua kabidi tuyisha bena buloko bakuabu mu musokoko, panyima pa matuku bamue ba kudibu bakalua Bantemu ba Yehowa. Bionso bituvua tuenza abi ne disambila dienza ne muoyo mujima biakatuambuluisa bua kuikala bakole mu nyuma.

MU TSHIKUTU TSHIA KAPIA

Panyima pa ngondo 10 bamane “kundekela,” bavua bankuate bakapangadija bamba ne: tshikondo tshivua tshikumbane bua meme kuvuala bilamba bia basalayi. Pangakabenga, bakaya nanyi kudi kamanda ka mu kamponyi. Ngakamupesha kabeji kavua ne mêyi a ne: “Ndi musue kuikala anu musalayi wa Kristo.” Bobu bamane kuntatshisha bikole, kamanda kakampitshisha kumpala kua tshindondi tshiende, uvua arsheveke wa Ortodokse muena Greke uvua muluate mizabi. Pangakandamuna ne dikima dionso nkonko yende ne Bible, wakasama ne tshiji tshionso ne: “Mumbushayi muaba eu. Mmunange tshitendelelu tshiende atshi bikole!”

Dituku diakalonda mu dinda, basalayi bakandomba kabidi bua kuluata bilamba bia basalayi. Pangakabenga, bakantuta ne mbata ne mutshi mume. Pashishe bakaya nanyi mu lupitadi lua mu kamponyi bua kumanya bikala mifuba yanyi ivua mitshibuke, ne kupinganabu nanyi mu ntenta. Kuntatshisha kua ku dituku ne ku dituku eku kuakatungunuka nunku munkatshi mua ngondo ibidi.

Bu mumvua tshiyi musue kunyanga ditabuja dianyi, basalayi bakavua bashikila aba bakakeba mushindu mukuabu wa kunkengesha. Basalayi bakansuika maboko panyima, kuntutabu mfimbu mu makasa ne luonji luonso. Munkatshi mua dikenga dikole edi, ngakavuluka mêyi a Yezu aa: ‘Nudi ba diakalenga padi bantu banupenda, banukengesha. Nusanke, nuikale ne disanka dia bungi, bualu difutu dienu ndinene mu diulu; bualu ke muvuabu bakengeshe baprofete bavua kumpala kuenu.’ (Matayi 5:11, 12) Ndekelu wa bionso, bu muvuabu batungunuka ne kuntuta, ngakafua tshipuka.

Ngakatabuluka nkadi mu kazubu kikale ne mashika makole, kamuyi biakudia, mâyi nansha bulankete. Nansha nanku, mvua ne ditalala ne mutukije. Anu muvua Bible mulaye, “ditalala dia Nzambi” divua ‘dilame muoyo wanyi ne lungenyi luanyi.’ (Filipoyi 4:7) Dituku diakalonda, musalayi kampanda wakangumvuila luse, kumpeshaye biakudia, mâyi ne tshizaku. Musalayi mukuabu wakampesha biakudia biende bivuaye ne bua kudia. Mu mishindu eyi ne mikuabu ya bungi, ngakamona ne: Yehowa uvua untabalela ne dinanga dionso.

Bakokeshi bakammona bu ntomboji uvua kayi mua kushintuluka, ke kuyabu nanyi ku kabadi ka basalayi ka mu Athènes. Kuntu aku bakankosela tshibawu tshia buloko bua bidimu bisatu mu Giáros, tshidiila tshidi mu mutantshi wa kilometre 50 ku est kua Makrónisos.

“TUDI TUNUEYEMENA”

Yíaros uvua buloko bunene buvua buibaka ne tushola tukunze, muvua bena buloko bavuabu bakuate bua malu a tshididi bapite pa 5000. Muvua kabidi Bantemu ba Yehowa muanda mutekete bavuabu bakuate bua muvuabu babenge kubuelakana mu malu a tshididi. Nansha muvuabi bikandikibue bua kulonga Bible, tuvua tudisangisha bonso buetu muanda  mutekete bua kumulonga mu musokoko. Pa tshibidilu tuvua tupeta Tshibumba tshia Nsentedi mu musokoko, tuvua tutshintentula ku bianza bua kulonga.

Dimue dituku patuvua tulonga mu musokoko, mulami wa buloko wakabuela muaba utuvua badishangishe, kutunyingaye mikanda. Bakatubikidisha kudi mulombodi tshindondi, tuetu kuela meji ne: bavua ne bua kutukosela bibawu bia matuku a bungi. Kadi mulombodi wakamba ne: “Tudi banumanye, ne tudi tunemeka tshinudi. Tudi tunueyemena. Pinganayi ku mudimu.” Wakapesha too ne bamue ba kutudi midimu mipepele. Mioyo yetu yakuwula tente ne dianyisha kudi Nzambi. Nansha mutuvua mu buloko, muoyo wetu mutoke wa bena Kristo uvua mua kutumbisha Yehowa.

Lulamatu luetu luakapatula kabidi bipeta bikuabu bimpe. Pavua muena buloko kampana uvua mulongeshi wa makumi mumone bienzedi bietu bimpe, wakatuebeja bua kumanya malu atuvua tuitabuja. Pakatupatulabu tuetu Bantemu mu buloko mu 1951, bakamulekela pende. Panyima pa matuku, wakatambula, kuluaye Ntemu ne mumanyishi wa ku dîba ne ku dîba.

NTSHIDI ANU MUSALAYI

Meme ne mukajanyi Janette

Pakampatulabu meme mu buloko, ngakapingana kuetu ku Karítsa. Panyima pa matuku, meme ne bantu bakuabu ba bungi ba mu ditunga dietu tuakaya kusombela mu Melbourne, mu Australie. Meme kutuilangana ne Janette kuntu aku, uvua muena Kristo wa tshitembu, pashishe meme kumusela, tuakalela muana wa balume ne babakaji basatu, tuetu kubakolesha mu njila wa buena Kristo.

Lelu unkadi ne bidimu bipite pa 90, ntshidi anu mukulu muena Kristo udi ne tshisumi. Bua bintu bivuabu bantuta, mubidi ne makasa anyi bitu binsama imue misangu, nangananga pantu njikija buambi. Nansha nanku, ndi mudisuike bua kuikala anu “musalayi wa Kristo.”—2 Timote 2:3.