Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 4 2017

Lungenyi luebe lua budisuile lutumbishe Yehowa!

Lungenyi luebe lua budisuile lutumbishe Yehowa!

‘Bualu bua bantu bakadifila bua disua diabu, nuvudijile Yehowa disanka!’—BALUMBULUISHI 5:2.

MISAMBU: 150, 10

1, 2. a) Ntshinyi tshivua Elifaza ne Biledada bambe bua mudi Nzambi umona mudimu wetu? b) Ntshinyi tshivua Yehowa muambe bua bualu ebu?

KUKADI bidimu bia bungi bivua bantu balume basatu baye kuyukila ne Yobo mutendeledi wa Nzambi wa lulamatu. Umue wa kudibu Elifaza muena Temana, wakela Yobo imue nkonko ya mushinga eyi: ‘Muntu udi mua kukuatshisha Nzambi ne tshintu anyi? Nansha, muntu udi ne meji udi ne dikuatshisha kudiye anyi? Biwikala muakane bualu ebu budi bukuatshisha Wa Bukole Buonso anyi? Biwenda ne mutshima mutoke, bualu ebu budi bumupetesha tshintu anyi?’ (Yobo 22:1-3) Bidi bimueneka patoke ne: bua Elifaza diandamuna divua ne: tòo. Muntu mukuabu wa ku bantu aba, Biledada muena Shuhi, wakasakidila ne: bantu kabena mua kubadibua bakane kudi Nzambi to.—Bala Yobo 25:4.

2 Elifaza ne Biledada bakenza bua Yobo adiumvue ne: madikolela ende bua kuenzela Yehowa mudimu kaavua ne mushinga to. Bantu aba bavua basue bua Yobo ela meji ne: katuena kabidi ne mushinga kudi Nzambi; tudi anu bu tshibeyibeyi, tshikusu anyi musanda. (Yobo 4:19; 25:6) Bavua bamba nanku bualu bavua ne budipuekeshi anyi? (Yobo 22:29) Bushuwa, Yehowa udi mutumbuke bikole ne tuetu tudi batambe bukese patudi tudifuanyikija nende. Tuetu bimane pa lusongo lua mukuna anyi tuetu mu ndeke batangidile pa dididishi, netumone ne: tudi batambe bukese ne katuena ne mushinga. Kadi ke mushindu udi Yehowa umona madikolela  onso atudi tuenza bua kumuenzela mudimu ne kuditashisha bua Bukalenge buende anyi? Tòo. Yehowa wakambila Elifaza, Biledada ne Sofâ muntu muisatu ne: bavua bashima. Pashishe Nzambi kuamba ne: uvua wanyisha Yobo ne wakamubikila ne: “muntu wanyi.” (Yobo 42:7, 8) Nunku tuikalayi bashindike ne: bantu bapange bupuangane badi mua “kukuatshisha Nzambi ne tshintu.”

‘UDI UMUPESHA TSHINTU KAYI?’

3. Nshinyi tshivua Elihu muambe bua madikolela atudi tuenza bua kuenzela Yehowa mudimu? Ntshinyi tshivuaye usua kuamba?

3 Nsongalume mukuabu diende Elihu uvua mushale muteleje pavua bantu basatu abu bayukila ne Yobo. Pakajikijabu, Elihu wakebeja Yobo bua Yehowa ne: ‘Biwikala muakane, udi umupesha tshintu kayi? Anyi yeye udi wangata tshinyi ku tshianza tshiebe?’ (Yobo 35:7) Elihu uvua pende usua kuamba ne: madikolela etu bua kuenzela Nzambi mudimu kaena ne mushinga anyi? Tòo. Yehowa kakatandisha Elihu bu muvuaye mutandishe bakuabu abu to. Elihu uvua wamba yeye bualu bukuabu. Uvua wamba ne: Yehowa kena anu dijinga ne: tumutendelela to, yeye mmukumbane mu bionso. Kakuena tshintu nansha tshimue tshitudi mua kuenza tshiamuvuije mubanji anyi ne bukole to. Mu bulelela, ngikadilu ne bipedi bionso bimpe bidi bifumina kudi Nzambi ne udi umona mutudi tukuata nabi mudimu.

4. Mmunyi mudi Yehowa umvua patudi tuenzela bantu bakuabu malu ne bulenga?

4 Patudi tuleja dinanga dia lulamatu kudi bantu badi batendelela Yehowa, udi umona anu bu ne: yeye ke utudi tuenzela bienzedi bia lulamatu abi. Tudi tubala mu Nsumuinu 19:17 ne: ‘Udi ufuila mupele luse udi usombesha Yehowa bintu; yeye neamuenzele bimpe ku buimpe buakumuenzelaye.’ Musangu wonso utudi tuleja bakuabu luse, Yehowa udi umona. Nansha mudi Yehowa Mufuki wa diulu ne buloba, udi umona bionso bitudi tuenza ebi bu tudi tumusombesha yeye bintu, yeye pende neatufute bintu bimpe bia bungi. Yezu Muana wa Nzambi wakajadika bualu ebu.—Bala Luka 14:13, 14.

5. Nnkonko kayi ituandamuna?

5 Mu bikondo bia kale, Yehowa wakalomba muprofete Yeshayi bua kuikala muleji mpala wende ne kumuenzela mudimu mu mushindu wa pa buawu. (Yeshaya 6:8-10) Yeshayi wakitaba dilomba edi ne muoyo mujima, kuambaye ne: “Ka meme eu, untume meme!” Lelu kabidi Yehowa udi upesha bena lulamatu mpunga wa kuenza mudimu eu. Batendeledi ba Yehowa ba bungi batu baleja ne: badi pabu ne lungenyi lua buena lua Yeshayi. Badi bitaba ne muoyo mujima mudimu udibu babapesha bua kuenzela Yehowa mu mishindu ne miaba ya bungi mishilashilangane ne kutantamena ntatu ne nsombelu mikole. Kadi muntu udi mua kudiambila mundamunda ne: ‘Ntu nganyisha mpunga wa kuenzela Yehowa mudimu ku budisuile, kadi mu bulelela ke tshintu genza anyi? Meme muikalaku anyi tshiyiku, Yehowa kakuenza bua mudimu wende wenjibue anyi?’ Ukadiku mudiumvue mushindu eu anyi? Tuakulayi bua mudi amue malu avua mafikile batendeledi ba Yehowa babidi ba kale, Debola ne Balaka mua kutuambuluisha bua kuandamuna nkonko eyi.

NZAMBI UDI USHINTULULA BUÔWA BULUA DIKIMA

6. Bua tshinyi bivua bimueneke bu ne: tshiluilu tshia Yabina tshivua mua kutshimuna bena Isalele bipepele?

6 Balaka uvua muluanganyi wa mvita muena Isalele, Debola uvua muprofete. Mu bidimu 20, mukalenge wa Kanâna Yabina “wakatamba kukengesha” bena Isalele. Tshiluilu tshia Yabina tshivua ne tshikisu tshia bungi, ke bua tshinyi bena Isalele bavua mu misoko bavua ne buôwa too ne bua kupatuka mu nzubu yabu. Tshiluilu tshia Yabina tshivua ne makalu 900 a biamu mikale ne miele mikobame, kadi bena Isalele kabavua ne biabu bia mvita bia kuluangana nabi anyi ngabu ya bobu kudikuba nayi to.—Balumbuluishi 4:1-3, 13; 5:6-8. * (Tangila note.)

7, 8. a) Mmalu kayi avua Yehowa muambile Balaka kumpala? b) Mmunyi muvua bena Isalele batshimune tshiluilu tshia Yabina? (Tangila tshimfuanyi tshia ntuadijilu tshia tshiena-bualu.)

7 Patudi tufuanyikija tshiluilu tshia Yabina ne bena Isalele, bena Isalele bavua bamueneka kabayi  ne bukole, ne bivua bipepele bua kubatshimuna. Kadi Yehowa wakambila Balaka ku diambuluisha dia Debola muprofete mukaji ne: ‘Uye biebe ku luseke lua mukuna wa Tabô ne binunu dikumi bia bantu ba munkatshi mua bena Nafatale ne bena Zebulona. Meme nentume Sisela, kapitene ka masalayi a Yabina, kuudi ku musulu wa Kishona, ne makalu ende a mvita ne tshisumbu tshiende tshinene; nemmufile mu bianza biebe.’—Balumbuluishi 4:4-7.

8 Dilomba dia kupeta badisuile diakamanyika, ne bantu 10 000 kudisangishabu ku mukuna wa Tabô. Pashishe Balaka ne bantu bende bakaya bua kuluangana ne tshiluilu tshivua tshibaluisha atshi muaba uvuabu babikila ne: Tanaka. (Bala Balumbuluishi 4:14-16.) Yehowa wakambuluisha bena Isalele anyi? Eyowa. Mvula wa tshipepele tshikole wakaloka diakamue, ne muaba wa mvita uvua muume kuluawu bitotshi. Bivua bimpe bua bena Isalele. Balaka wakipata tshiluilu tshia Sisela too ne muaba uvuabu babikila ne: Haloshete, muntantshi wa kilometre 24. Mu njila amu, makalu a mvita a Sisela akajama mu bitotshi. Yeye kupatuka ne kunyemena mu Sananima, pamuapa pabuipi ne Kedeshe. Kuntu aku ke kuvua Sisela muye kusokomena mu ntenta wa mukaji mukuabu diende Yaele. Sisela uvua mutshioke bikole ne mulale tulu tukole. Anu patshivuaye mulale apu, Yaele wakamushipa ne dikima dionso. (Balumbuluishi 4:17-21) Yehowa wakambuluisha bena Isalele bua kutshimuna baluishi babu. * (Tangila note.)

MMUENENU MISHILANGANE BIKOLE BUA MUDIMU WA BUDISUILE

9. Ndilongesha kayi ditudi tupeta mu Balumbuluishi 5:20, 21 bua mvita ivua bena Isalele baluangane ne Sisela?

9 Tudi tulonga malu a bungi bua malu avua menzeke adi mu Balumbuluishi nshapita 4 patudi tubala nshapita udi ulonda. Balumbuluishi 5:20, 21 udi utuambila ne: ‘Mitoto ya mu diulu yakaluangana, mitoto ya mu njila yayi yakaluangana ne Sisela. Musulu wa Kishona mene mene wakabapita bukole.’ Bualu ebu budi bumvuija ne: banjelu bakambuluisha bena Isalele mu mvita anyi? Peshi kuvua mvula mukole wa mabue anyi? Bible kena umvuija to. Kadi mbikumbane bua kuela meji ne: Yehowa wakasungila bantu bende pa kulokesha mvula mukole muaba ne pa dîba diakanyine, bua makalu a mvita 900 au kaendi bimpe to. Mu Balumbuluishi 4:14, 15, tudi tubala ne: Yehowa ke uvua muambuluishe bena Isalele bua kutshimuna misangu isatu. Kakuvua nansha umue wa ku bena Isalele bena budisuile 10 000 uvua mua kuamba ne: yeye ke uvua mutshimune to.

10, 11. Meloze uvua tshinyi? Bua tshinyi bakamuela mulawu?

10 Mpindieu tukonkononayi bualu kampanda bua mushinga mukole. Panyima pa ditshimuna dia Isalele, Debola ne Balaka bakatumbisha Yehowa ne misambu. Bakimba ne: ‘Muanjelu wa Yehowa wakamba ne: ela Meloze mulawu, ela bena musoko au milawu mikole bualu bua bobu kabakalua bua kukuatshisha Yehowa: bua kukuatshisha Yehowa kumpala kua bantu bakole.’—Balumbuluishi 5:23.

11 Meloze uvua tshinyi menemene? Katuena bamanye to. Kadi mulawu uvuabu bele Meloze wakakumbana bualu wakabutuka yonso, tshintu nansha tshimue katshiakashala. Bidi mua kuikala ne: Meloze uvua tshimenga tshivua benamu babenge kudifila ku budisuile bua kudisanga ne Balaka mu mvita. Bu muvua bantu 10 000 badifile ku budisuile bua kuluangana ne bena Kanâna, bena Meloze bavua ne bua kuikala bumvue dilomba dia kudifila bu badisuile. Peshi Meloze uvua mua kuikala tshimenga tshivua Sisela munyemene pavuaye munyeme Balaka. Pamuapa bena Meloze bavua ne mpunga wa kukuata Sisela, kadi kabakamukuata to. Fuanyikijabi bashale batangile muluanganyi wa mvita wa tshikisu au wenda unyema mu njila yabu bua kusungila muoyo wende! Bavua mua kuikala benze bualu kampanda bua mushinga bua kutua malu avua Yehowa mulongolole mpanda. Bu bobu benze nanku, uvua mua kubafuta. Kadi pakapetabu mpunga wakuenzela Yehowa bualu kampanda, kabakenza to. Bidi bimueneka ne: bena Meloze bavua bashilangane bikole ne Yaele, uvua muenze malu ne dikima dionso.—Balumbuluishi 5:24-27.

12. Lungenyi lua bantu badibu bakuile mu Balumbuluishi 5:9, 10 ndushilangane ku tshinyi? Mmunyi mudi bualu ebu bututangila?

 12 Mu Balumbuluishi 5:9, 10 tudi tumona ne: lungenyi lua bena budisuile 10 000 luvua lushilangane bikole ne lua bantu bavua babenge kudifila ku budisuile. Debola ne Balaka bakatumbisha ‘bakokeshi ba mu Isalele bakadifila munkatshi mua bantu bua disua diabu.’ Bavua bashilangane bikole ne bavua ‘babanda panyima pa tubalu tutoke,’ bavua badimona ne mushinga wa bungi bua kuenza mudimu wa budisuile. Badi bamba bua bantu abu ne: ‘mbasombe pa biata bia bubanji’ ne ‘badi benda mu njila’ bikale ne nsombelu mulenga. Mbashilangane ne badisuile bakitaba bua kuya ne Balaka bua kuluangana mu mukuna wa mabue wa Tabô ne mu tshibandabanda tshia tshisense tshia Kishona. Bavua bambila bantu bavua basue nsombelu mupepele ne: ‘Ambayi bualu ebu.’ Bavua ne bua kuikala ne ntema ne kuela meji bua mpunga ivuabu bapangile pavuabu babenge kudifila ku budisuile mu mudimu wa Yehowa. Lelu, tudi petu ne bua kukonkonona lungenyi lutudi nalu bua mudimu wa Nzambi.

13. Mmunyi muvua lungenyi luvua nalu tshisa tshia Lubena, tshia Dana ne tshia Ashê lushilangane ne lua tshisa tshia Zebulona ne lua Nafatale?

13 Badisuile 10 000 bavua ne mpunga wa kudimuenena muvua Yehowa wenza malu bu Mukokeshi Mutambe bunene. Bavua mua kuambila bakuabu bualu abu pavuabu bakula bua “malu mimpe akenza Yehowa.” (Balumbuluishi 5:11) Kadi tshisa tshia Lubena, tshia Dana ne tshia Ashê bivua biditatshisha bikole bua mabanji abi bu mudi: mpangu ya mikoko, matu manene ne tusulu tuabu kupita muvuabu benza bua mudimu wa Yehowa. (Balumbuluishi 5:15-17) Kadi bisa bionso kabivua bienza nanku to. Bena mu tshisa tshia Zebulona ne tshia Nafatale ‘bakamba kufila mioyo yabu too ne ku lufu’ bua kukuatshisha Debola ne Balaka. (Balumbuluishi 5:18) Lungenyi lushilangane luvua nalu bisa ebi bua mudimu wa budisuile ludi mua kutupesha dilongesha dia mushinga.

“TUMBISHAYI YEHOWA”

14. Mmunyi mutudi tuleja ne: tudi tutua bumfumu bua Yehowa nyama ku mikolo?

14 Lelu, katuena tuluangana mvita yetu miena dîna eyi bua kutua bukokeshi bua Yehowa nyama ku mikolo to. Kadi tudi tuleja mutudi tutua Yehowa nyama ku mikolo patudi tuyisha ne dikima dionso ne tshisumi tshionso. Kudi dijinga dia bena budisuile mu mudimu wa Yehowa kupita kumpala. Bana betu ba balume ne ba bakaji ne bansonga  miliyo ya bungi, badi badifila ku budisuile bua kuenza mudimu wa ku dîba ne ku dîba mu mishindu mishilashilangane. Tshilejilu, ba bungi badi bampanda-njila, benza mudimu ku Betele, bibaka Nzubu ya Bukalenge ne bakuabu mbena budisuile ku nzubu ya mpuilu. Bamue bakulu badi benza mudimu mukole mu Komite wa diumvuangana ne mpitadi ne bakuabu balongolola mpungilu. Tudi batuishibue ne: Yehowa udi wanyisha dijinga dietu dia kumuenzela mudimu mu mushindu wonso udi ukengedibua ne kakupua muoyo bionso bitudi tuenza to.—Ebelu 6:10.

Kumpala kua wewe kuangata dipangadika, ela meji bua mudibi mua kubungamija bena mu dîku dienu ne bena mu tshisumbu (Tangila tshikoso tshia 15)

15. Mmunyi mutudi mua kumanya ne: katuena bajimije disanka dietu bua mudimu wa Yehowa?

15 Tudi ne bua kukonkonona meji atudi nawu bua mudimu wa budisuile. Tudi mua kudiebeja ne: ‘Ntuku ndekela bakuabu benza bobu mudimu wa bungi anyi? Ntuku nditashisha bikole bua kupeta bintu bia ku mubidi kupita mundi ngenzela Yehowa mudimu anyi? Peshi ntuku ngenza mudimu ne bionso bindi nabi mu mudimu wa Yehowa bua kuidikija ditabuja ne dikima dia Balaka, Debola ne Yaele ne bena budisuile 10 000 anyi? Ntuku ngela meji bua kuya mu tshimenga tshikuabu anyi mu ditunga dikuabu bua kukeba makuta a bungi ne kuikala ne nsombelu muimpe anyi? Biobi nanku, ntuku nsambila Yehowa bua mudi bualu ebu mua kubungamija bena mu dîku dianyi ne bena mu tshisumbu anyi?’ * (Tangila note.)

16. Nansha mudi Yehowa ne bionso, ntshinyi tshitudi mua kumupesha?

16 Yehowa mmutupeshe bunême bua bungi padiye mutuanyishile bua kutua bumfumu buende nyama ku mikolo. Katshia ku tshikondo tshia Adama ne Eva, Diabolo mmusue bua bantu bikale ku luseke luende bua kuluisha Yehowa. Kadi patudi tutua bumfumu bua Yehowa mpanda, tudi tuleja Satana patoke luseke lutudi. Ditabuja ne lulamatu luetu bidi bitusaka bua kuenza mudimu wa Yehowa ku budisuile, ne kuenza nunku kudi kumusankisha bikole. (Nsumuinu 23:15, 16) Nzambi udi mua kuandamuna ku bipendu bia Satana ku diambuluisha dia lulamatu ne ditumikila dietu dia kutua bumfumu buende mpanda. (Nsumuinu 27:11) Ditumikila dietu mbualu butudi tupesha Yehowa budi ne mushinga mukole kudiye ne budi bumupetesha disanka dia bungi.

17. Ntshinyi tshidi Balumbuluishi 5:31 utulongesha bua bualu buenzeka matuku atshilualua?

17 Mu katupa kîpi emu, bantu bonso ba pa buloba nebanyishe bumfumu bua Yehowa kupita makokeshi makuabu onso. Tudi bindile ne muoyo kuulu kuulu tshikondo atshi! Tudi tudiumvua bu Debola ne Balaka bavua bimbe ne: ‘Yehowa, bantu bonso badi nebe lukuna bafue nunku; kadi bantu badi bakusue bikale bu dîba pabandadi ne bukole buadi buonso.’ (Balumbuluishi 5:31) Bualu ebu nebuenzeke pabutula Yehowa bulongolodi bubi bua Satana ebu. Patuadija mvita ya Armagedone, Yehowa kakuikala dijinga ne bantu bena budisuile bua kubutula muluishi eu to. Kadi netuikale anu ‘bimane talalaa’ ne ‘tumona lupandu lua Yehowa.’ (2 Kulondolola 20:17) Mu dindila tshikondo atshi, tudi ne mpunga mimpe bikole ya kutua bumfumu bua Yehowa nyama ku mikolo ne dikima ne tshisumi.

18. Mmunyi mudi mudimu webe wa ku budisuile mua kuambuluisha bantu bakuabu?

18 Debola ne Balaka bakatuadija kuimba musambu wa ditshimuna bua kutumbisha Yehowa, kadi ki bantu to. Bakimba ne: ‘Bualu bua bantu bakadifila bua disua diabu, nuvudijile Yehowa disanka!’ (Balumbuluishi 5:1, 2) Bia muomumue, patudi tuenzela Yehowa mudimu mu mushindu wonso udi ukengedibua, bidi mua kusaka bantu bakuabu bua ‘kuvudijila Yehowa disanka!’

^ tshik. 6 Muele mukobame mmuele mutue, mule ne imue misangu ntshiamu tshikobame tshisakisha bikole. Miele eyi ivua ku makalu a mvita lua ku nkata mishale mipatuke, makalu au avua alua bu mashinyi adi mu lubilu bua kubutula.

^ tshik. 8 Udi mua kubala malu makuabu a mvita ya dikema eyi mu Tshibumba tshia Nsentedi tshia dia 1/8/2015, dibeji 12-15.

^ tshik. 15 Bala tshiena-bualu tshia ne: “Tunyinganyinga tua malu a makuta” mu Tshibumba tshia Nsentedi tshia dia 1/7/2015.