Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 3 2017

Leja ditabuja—Wangate mapangadika ne meji

Leja ditabuja—Wangate mapangadika ne meji

‘Tungunukayi ne kulomba ne ditabuja, kanuyi nuelakana nansha kakese.’—YAKOBO 1:6.

MISAMBU: 81, 70

1. Ntshinyi tshivua tshisake Kayina bua kuangata dipangadika dibi? Mbipeta kayi biakamueneka?

KAYINA uvua kumpala kua dipangadika dinene dia kuangata. Uvua mua kusungula bua kukanda meji ende mabi, bualu buvua mua kufikisha ku bipeta bimpe. Anyi uvua mua kulekela meji ende alombola bienzedi biende, bualu buvua mua kufikisha ku bipeta bibi. Bible udi utuambila ne: Kayina wakangata dipangadika dibi. Dipangadika diende diakamufikisha ku dishipa muanabu wa balume Abele ne diakanyanga bulunda buende ne Mufuki wende.—Genese 4:3-16.

2. Bua tshinyi bidi ne mushinga bua kuangata mapangadika mimpe?

2 Bia muomumue, tuetu bonso tudi ne bua kuangata mapangadika mu nsombelu wetu. Kutu mapangadika manene ne makese. Kadi mapangadika etu a bungi atu ne buenzeji bukole mu nsombelu wetu. Patudi tuangata mapangadika mimpe, bumue katuakuikala ne ntatu ya bungi to, kadi ne tuikale ne ditalala dia bungi mu nsombelu wetu. Kadi patudi tuangata mapangadika mabi, tudi mua kupeta ntatu ya bungi ne kuedibua mâyi ku makasa.—Nsumuinu 14:8.

3. a) Ntshinyi tshitudi mua kueyemena bua kuangata mapangadika a meji? b) Nkonko kayi ituandamuna?

3 Ntshinyi tshiatuambuluisha bua kuangata mapangadika a  meji? Tudi ne bua kuikala ne ditabuja kudi Nzambi batuishibue ne: mmusue kutuambuluisha ne neatupeshe meji atudi nawu dijinga bua kuangata mapangadika mimpe. Tudi kabidi ne bua kueyemena Dîyi diende ne mibelu idimu. (Bala Yakobo 1:5-8.) Patudi tusemena pabuipi ne Yehowa ne tunanga Dîyi diende bikole menemene, bidi bituambuluisha bua kuikala bashindike ne: mmumanye tshidi tshimpe buetu tuetu. Pashishe netukonkonone Dîyi diende kumpala kua kuangata mapangadika. Kadi mmunyi mutudi mua kuakaja mushindu wetu wa kuangata mapangadika mimpe? Katuenaku ne bua kushintulula mapangadika atukadi bangate anyi?

TUETU BONSO TUTU DIJINGA NE KUANGATA MAPANGADIKA

4. Ndipangadika kayi divua Adama ne bua kuangata? Mbipeta kayi biakamueneka?

4 Katshia anu ku ntuadijilu wabu, bantu bavua ne bua kuangata mapangadika a mushinga. Adama muntu wa kumpala uvua ne bua kusungula bua kuteleja Yehowa mufuki wende anyi kusungula bua kuteleja mukajende Eva. Adama wakasungula bua kuteleja Eva, uvua mumusake bua kuangata dipangadika dibi menemene. Bu tshipeta, Yehowa wakipata Adama mu budimi bua Edene, ne pashishe kufuaye. Lelu tuetu petu tutu tukenga anu bua dipangadika dibi dia Adama adi.

5. Mmunyi mutudi mua kumona bujitu butudi nabu bua kuangata mapangadika?

5 Bamue badi mua kuela meji ne: nsombelu uvua mua kuikala mupepele bobu kabayi bangata mapangadika to. Pamuapa ke muutu pebe wela meji. Kadi mbimpe tuvuluka ne: Yehowa kavua mufuke bantu bua bikale bu biamu bia robo bitu kabiyi biela meji anyi bisungula tshia kuenza to. Mmutupeshe Dîyi diende didi ditulongesha mua kuangata mapangadika mimpe. Yehowa mmusue bua tuangate mapangadika, bujitu ebu budi butuambuluisha. Ela meji bua bilejilu bidi bilonda ebi.

6, 7. Ndipangadika kayi divua bena Isalele ne bua kuangata? Bua tshinyi bivua bibakolele bua kudiangata? (Tangila tshimfuanyi tshia ntuadijilu tshia tshiena-bualu.)

6 Pavua bena Isalele mu buloba bulaya, bavua ne bua kusungula bua kutendelela Yehowa anyi kusungula bua kuenzela nzambi mikuabu mudimu. (Bala Yoshua 24:15.) Dipangadika adi divua mua kumueneka bu dipepele. Kadi disungula diabu divua mua kubakebela muoyo anyi lufu. Mu tshikondo tshia balumbuluishi, bena Isalele bakatungunuka ne kuangata mapangadika mabi. Bakalekela kutendelela Yehowa, kutuadijabu kutendelela nzambi ya dishima. (Balumbuluishi 2:3, 11-23) Panyima pa matuku, tshikondo tshia muprofete Eliya, bantu ba Nzambi bavua ne bua kuangata dipangadika dia kuenzela Yehowa anyi Bâla, nzambi wa dishima mudimu. (1 Bakelenge 18:21) Bidi mua kumueneka bu ne: ndisungula dipepele dia kuenza, bualu kuenzela Yehowa mudimu kutu misangu yonso kuimpe menemene. Muntu wa meji kakujinga bua kuenzela nzambi mufue mudimu to. Kadi bantu kabakaleja luseke luvuabu to. Bible udi wamba ne: bena Isalele bavua ‘benda bazobela pankatshi pa nseke ibidi.’ Eliya wakakankamija bantu aba ne meji onso bua basungule bua kutendelela Nzambi mulelela, Yehowa.

7 Bua tshinyi biakakolela bena Isalele abu bua kuangata dipangadika dimpe? Tshia kumpala, kabavua ne ditabuja kudi Yehowa to, ne bakabenga kumuteleja. Kabavua beyemene Yehowa to, ne kabavua bakeba dîba dia kulonga malu ende anyi meji ende to. Bu bobu benze nanku, bivuabu balonge bivua mua kuikala bibambuluishe bua kuangata mapangadika mimpe. (Misambu 25:12) Tshibidi, bantu ba bisamba bikuabu bavua ne buenzeji kudi bena Isalele. Benyi abu bakanyanga meji a bena  Isalele kubangatshilabu too ne mapangadika. Bu tshipeta, bena Isalele bakatuadija kulonda bantu ba bisamba abi ne kutendelela nzambi yabu ya dishima. Yehowa uvua mudimuije bena Isalele bua bualu ebu bidimu bia bungi kumpala.—Ekesode 23:2.

BANTU BAKUABU BADI NE BUA KUTUANGATSHILA MAPANGADIKA ANYI?

8. Tshilejilu tshia bena Isalele tshidi tshitupesha dilongesha kayi dia mushinga?

8 Tshilejilu tshia bena Isalele tshidi tshitulongesha ne: tuetu basue kuangata mapangadika mimpe, tudi ne bua kuenza mudimu ne Dîyi dia Nzambi. Galatiya 6:5 udi utuvuluija ne: yonso wa kutudi udi ne bujitu bua kudisunguila malu. Mbiumvuike ne: katuena ne bua kulekeela muntu mukuabu bujitu bua kutuangatshila mapangadika to. Kadi yonso wa kutudi udi ne bua kumanya ne: tshidi Nzambi wamba ntshiakane ne kusungula bua kutshienza.

9. Bua tshinyi kulekela bakuabu batuangatshila mapangadika kudi ne njiwu?

9 Mmunyi mutudi mua kulekela bakuabu batuangatshila mapangadika? Mpatudi tulekela batusaka bua kuenza disungula dibi. (Nsumuinu 1:10, 15) Bidi bikebesha njiwu. Tudi ne bua kulonda kondo ketu ka muoyo kalongesha kudi Bible. Tuetu tulekela bakuabu batuangatshila mapangadika, bidi bileja ne: tudi basungule bua kubalonda. Disungula edi didi mua kutufikisha ku njiwu.

10. Mbualu kayi buvua Paulo mudimuije bena Galatiya?

10 Mupostolo Paulo wakadimuija bena Galatiya bua kubenga kulekela bakuabu babangatshila mapangadika. (Bala Galatiya 4:17.) Bamue bena Kristo ba mu Galatiya bavua basue kuangatshila bakuabu mapangadika mu tshisumbu. Dijinga diabu divua tshinyi? Bena budinangi aba bavua basue bua bena Kristo nabu babalonde bobu pamutu pa kulonda bapostolo. Kabavua ne budipuekeshi, ne kabavua nansha banemeka bukenji bua bena Kristo nabu bua kudiangatshila mapangadika to.

11. Mmunyi mutudi mua kuambuluisha bakuabu padibu bakeba kuangata mapangadika?

11 Tshilejilu tshimpe tshia mupostolo Paulo tshidi mua kutulongesha tuetu bonso. Uvua mumanye ne: bena Kristo nende bavua ne bukenji bua kudiangatshila mapangadika, ne uvua unemeka bukenji abu. (Bala 2 Kolinto 1:24.) Lelu, bakulu badi mua kuidikija tshilejilu tshiende padibu bafila mubelu mu bualu budi muntu  nkayende ne bua kudiangatshila dipangadika. Badi ne disanka dia kuambila bena Kristo nabu malu adi mimanyine mu Dîyi dia Nzambi. Kadi bakulu badi ne budimu, badi balekela muena Kristo yonso udiangatshila mapangadika bualu yeye ke wakungamangana ne bipeta biamueneka. Muaba eu dilongesha dinene ndia ne: tudi mua kuambuluisha bakuabu bua bumvue mubelu wa mu Bible udi utangila nsombelu wabu. Kadi bena Kristo netu badi ne bukenji ne bujitu bua kudiangatshila mapangadika. Padibu badiangatshila mapangadika mimpe, badi bapatula bipeta bimpe. Mbiumvuike bimpe ne: katuena ne bua kuela meji ne: tudi ne bukokeshi bua kusunguila bena Kristo netu tshia kuenza to.

Bakulu bimpe batu bambuluisha bakuabu bua kumanya mua kudiangatshila mapangadika (Tangila tshikoso tshia 11)

KULEKEDI MEJI EBE ALOMBOLA MAPANGADIKA EBE TO

12, 13. Bua tshinyi kuangata mapangadika patudi ne tshiji anyi batekeshibue mu mikolo kudi ne njiwu?

12 Lelu, bantu ba bungi batu balonda muoyo wabu patubu bangata mapangadika. Kadi abi bidi mua kukebesha njiwu. Bible udi utudimuija bua kubenga kulonda muoyo wetu anyi meji etu a bantu bapange bupuangane patudi tusua kuangata mapangadika. (Nsumuinu 28:26) Katuena mua kueyemena muoyo wetu to, bualu ‘mutshima udi upita bintu bionso kudinga muntu, ne udi utamba kunyanguka.’ (Yelemiya 17:9) Kudi bilejilu bia bungi bia mu Bible bidi bileja bipeta bibi bia dieyemena muoyo wetu wa bantu bapange bupuangane. (1 Bakelenge 11:9; Yelemiya 3:17; 13:10) Nunku, ntshinyi tshidi mua kuenzeka tuetu balonde muoyo wetu patudi tuangata mapangadika?

13 Yehowa mmutulombe bua kumunanga ne muoyo wetu mujima ne kunanga muntu netu bu mutudi badinange. (Matayi 22:37-39) Kadi tudi ne bua kuikala badimuke. Mifundu minsantu mmileje mu bikoso bia ntuadijilu ne: kulekela muoyo wetu ulombola ngelelu wetu wa meji ne bienzedi bietu kudi ne njiwu. Tshilejilu, mbikole bua muntu udi ne tshiji kuangataye dipangadika dimpe. (Nsumuinu 14:17; 29:22) Mbikole kabidi bua muntu udi mutekeshibue mu mikolo kuenzaye disungula dimpe. (Nomba 32:6-12; Nsumuinu 24:10) Tudi ne bua kulekela mikenji ya Nzambi ilombola ngelelu wetu wa meji. (Lomo 7:25) Patudi tusua kuangata mapangadika manene, katuena ne bua kulekela meji etu alombola tshitudi tuenza to.

PADIBI BIKENGELA KUSHINTULULA MAPANGADIKA

14. Mmunyi mutudi bamanye ne: mbimpe kushintulula amue mapangadika?

14 Tudi ne bua kuangata mapangadika a meji. Kadi muntu udi ne meji mmumanye ne: udi imue misangu mua kutangilula dipangadika dikavuaye muangate ne udi pamuapa mua kudishintulula. Yehowa Nzambi mmutushile tshilejilu tshimpe. Mona tshivuaye muenzele bena Niniwe mu matuku a Yona: ‘Nzambi wakamona bienzedi biabu, bu muakalekelabu njila wabu mubi; ne Nzambi wakakudimuna mutshima wende bua muanda mukole wakambaye diambedi ne: nembenzele; yeye kakawenza nansha.’ (Yona 3:10) Pakamona Yehowa ne: bena Niniwe bavua bashintuluke ne mbalekele kuenza malu mabi, wakashintulula dipangadika diende. Bidi bileja ne: kavua muena malu makole to, uvua ne budipuekeshi ne luse. Yehowa mmushilangane ne bantu ba bungi, bualu katu wangata mapangadika kayi muele meji to, nansha yeye ne tshiji.

15. Bua tshinyi tudi mua kushintulula dipangadika kampanda?

15 Kudi mua kufika bikondo bitudi mua kumona ne: mbimpe kutangilula mapangadika etu, bu mudi padi nsombelu ushintuluka. Vuluka ne: kuvua bikondo bivua Yehowa mushintulule mapangadika ende. (1 Bakelenge 21:20, 21, 27-29; 2 Bakelenge 20:1-5) Tudi kabidi mua kushintulula dipangadika dietu, padibu batumanyisha ngumu kampanda.  Tuangate tshilejilu tshia Mukalenge Davidi. Bua lumu lubi luvuabu bambile Davidi bua Mefiboshete muikulu wa Shaula, David wakangata dipangadika kampanda. Pashishe, pakapeta Davidi lumu lulelela, wakashintulula dipangadika diende. (2 Samuele 19:24-29) Imue misangu mbia meji bua tuetu petu kuenza bia muomumue.

16. a) Nngenyi kayi idi mua kutuambuluisha patudi tuangata mapangadika? b) Bua tshinyi tudi ne bua kutangilula mapangadika atukavua bangate? Mmunyi mutudi mua kuenza nunku?

16 Bible udi wamba ne: katuena ne bua kuangata mapangadika manene ne lukasa to. (Nsumuinu 21:5) Tudi ne bua kuangata dîba dia bungi bua kuela meji bimpe menemene bua malu onso adi akengedibua bua kushisha kuangata dipangadika dia meji. (1 Tesalonike 5:21) Kumpala kua kupangadija tshia kuenza, mfumu wa dîku udi ne bua kuangata dîba dia kuenza makebulula mu Bible ne mu mikanda yetu. Mbimpe ateleje kabidi ngenyi ne mmuenenu ya bena mu dîku bakuabu. Vuluka ne: Nzambi wakambila Abalahama bua kuteleja mukajende. (Genese 21:9-12) Bakulu badi pabu ne bua kuangata dîba dia kuenza makebulula. Padi malu mapiamapia aleja ne: bidi bikengela kushintulula dimue dia ku mapangadika mangata, kabena ne buôwa bua ne: bantu bakuabu nebapange kubanemeka to. Bakulu badi ne bupuekele ne kabayi bena malu makole, badi ne bua kuikala pabuipi bua kushintulula ngelelu wabu wa meji ne mapangadika abu padibi bikengela. Mbimpe tuetu buonso tulonde tshilejilu tshiabu. Kuenza nunku kudi mua kuambuluisha bena mu tshisumbu bua kuikala mu ditalala ne mu buobumue.—Bienzedi 6:1-4.

ENZA TSHIUVUA MUPANGADIJE BUA KUENZA

17. Ntshinyi tshidi mua kutuambuluisha bua kupatula bipeta bimpe mu mapangadika atudi tuangata?

17 Amue mapangadika neikale manene kupita makuabu. Tshilejilu, kupangadija bua kusela anyi kubenga kusela anyi bua muntu wa kubuela nende mu dibaka ndipangadika dinene ditambe. Dipangadika dikuabu dinene ndia patudi tukeba kutuadija mudimu wa ku dîba ne ku dîba. Kumpala kua kuangata mapangadika a nunku, bidi bikengela kuela meji bimpe bua nsombelu wetu ne kulomba Yehowa diambuluisha. Bidi mua kuangata dîba, kadi tuetu basue kuangata dipangadika dia meji, tudi ne bua kueyemena Yehowa, kuteleja mibelu yende ne kulonda buludiki buende. (Nsumuinu 1:5) Yehowa mmutupeshe mibelu mitambe buimpe mu Dîyi diende. Ke bua tshinyi mbimpe kuenza makebulula ne kusambila bua kupeta buludiki bua Yehowa. Udi mua kutupesha ngikadilu itudi nayi dijinga bua kuangata mapangadika adi mu diumvuagana ne disua diende. Kumpala kua kuangata mapangadika manene, tudi ne bua kudiebeja misangu yonso ne: ‘dipangadika edi nedileje ne: ndi munange Yehowa anyi? Nedipeteshaku bena mu dîku dietu ditalala ne disanka anyi? Nedilejaku ne: ndi ne lutulu ne bulenga anyi?’

18. Bua tshinyi Yehowa mmusue bua tudiangatshile mapangadika?

18 Yehowa kena utuenzeja bua kumunanga anyi kumuenzela mudimu to. Kadi mmutupeshe budikadidi bua kuenza disungula edi. Udi unemeka bujitu ne bukenji buetu bua kusungula bituikala basue kumuenzela mudimu anyi katuyi basue. (Yoshua 24:15; Muambi 5:4) Kadi mmusue bua tuenze tshitudi bapangadije bua kuenza bilondeshile Dîyi diende. Patudi tueyemena buludiki bua Yehowa ne tulonda mêyi manene adiye mutupeshe, tudi mua kuangata mapangadika a meji. Netuleje ne: tudi bashindame mu njila yetu yonso.—Yakobo 1:5-8; 4:8.