Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 3 2017

Asa, Yehoshafata, Hezikiya, Yoshiya

Enzela Yehowa mudimu ne muoyo mujima

Enzela Yehowa mudimu ne muoyo mujima

‘Yehowa wanyi, uvulukaku mundi muende kumpala kuebe ne lulamatu luonso ne muoyo mujima.’—2 BAKELENGE 20:3, NWT.

MISAMBU: 52, 65

1-3. Kuenzela Yehowa mudimu ne ‘muoyo mujima’ kudi kumvuija tshinyi? Fila tshilejilu.

TUETU bonso tudi bapange bupuangane ne tutu tuenza bilema. Diakalenga, Yehowa mmutupeshe tshia kupikula natshi bantu, ne udi pabuipi bua kutufuila luse. Nunku tuetu ne budipuekeshi ne banyingalale, tudi mua kumulomba bua atubuikidile. Tuikale batuishibue ne: Yehowa kakutuenzela malu “bu mudi mibi yetu” to. (Misambu 103:10) Kadi tudi ne bua ‘kumukuatshila mudimu ne muoyo mujima.’ (1 Kulondolola 28:9NWT) Mmunyi mutudi mua kuenza nunku nansha mutudi bapange bupuangane?

2 Bua kutuambuluisha, tudi mua kufuanyikija nsombelu wa mukalenge Asa ne wa mukalenge Amasaya. Bakalenge babidi aba bakenza malu mimpe, kadi bakenza kabidi bilema bualu bavua bapange bupuangane. Nansha nanku Bible udi wamba ne: ‘Mutshima wa Asa wakadi muakane matuku ende onso.’ (2 Kulondolola 15:16, 17; 25:1, 2; Nsumuinu 17:3) Uvua udienzeja misangu yonso bua kusankisha Yehowa, ne uvua ne ‘mutshima mutoke ne dikokela kudiye’ anyi ne muoyo mufila wonso kudiye. (1 Kulondolola 28:9) Kadi Amasaya kavua muenzele Yehowa mudimu ne “mutshima mutoke” anyi ne muoyo mujima to. Yeye mumane kutshimuna baluishi ba  Nzambi, wakapingana ne mpingu yabu ya dishima, kutuadijaye kuyitendelela. (2 Kulondolola 25:11-16)

3 Muntu udi wenzela Nzambi mudimu ne “mutshima mutoke” anyi ne muoyo mujima, mmunange Yehowa bikole ne mmusue kumutendelela bua kashidi. Mu Bible, muaku “mutshima” anyi muoyo utu pa tshibidilu uleja tshitudi munda muetu. Udi kabidi ukonga mushindu utudi tuela meji, bitudi banange, bitudi basue kuenza mu nsombelu wetu, ne tshidi tshitusaka bua kuenza malu kampanda. Nansha mutudi bapange bupuangane, tudi mua kutendelela Yehowa ne muoyo mujima. Tudi tumuenzela mudimu bualu ndijinga dietu menemene, kadi ki mbualu tudi ne bua kuenza nanku to, anyi bualu mbualu bua pa tshibidilu to.—2 Kulondolola 19:9.

4. Ntshinyi tshituakonkonona mpindieu?

4 Tudi mua kumvua bimpe menemene tshidi kuenzela Nzambi mudimu ne muoyo mujima kumvuija patudi tukonkonona nsombelu wa Asa ne wa bakalenge bakuabu basatu ba lulamatu ba Yuda. Bakalenge abu ke Yehoshafata, Hezikiya ne Yoshiya. Nansha muvua bakalenge banayi aba benze bilema, batshivua anu basankisha Yehowa. Wakamona ne: bavua bamuenzela mudimu ne muoyo mujima. Bua tshinyi Nzambi uvua ubamona mushindu eu? Mmunyi mutudi mua kubidikija?

MUTSHIMA WA ASA “WAKADI MUAKANE KUDI YEHOWA”

5. Ntshinyi tshiakenza Asa pakaluaye mukalenge?

5 Asa uvua mukalenge muisatu wa Yuda panyima pa ditapulula dia tshisamba tshia Isalele mu bukalenge bua Isalele ne bua Yuda. Pakalua Asa mukalenge wa Yuda, wakadisuika bua kumbusha ntendelelu wa dishima ne kubenga malu a masandi mu bukalenge buende. Wakabutula mpingu ivua bantu batendelela, kuipataye bandumba ku ntempelo. Asa wakumbusha too ne kakuende wa bakaji mu muanzu wa ‘mukalenge mukaji, bualu bua yeye wakenza lupingu lua bundu.’ (1 Bakelenge 15:11-13) Asa wakakankamija kabidi bantu bua ‘kukebabu Yehowa’ ne kutumikila ‘mikenji ne mêyi ende.’ Asa wakenza tshionso tshivuaye mua kuenza bua kuambuluisha bakuabu bua kutendelelabu Yehowa.—2 Kulondolola 14:4.

6. Ntshinyi tshiakenza Asa pavua bena Etshiopi balue kuluisha Yuda?

6 Mu bidimu dikumi bia ntuadijilu bia bukokeshi bua Asa, kakuvua mvita mu bukalenge bua Yuda to. Pashishe bena Etshiopi bakalua ne basalayi muliyo umue ne makalu a mvita 300 bua kuluisha Yuda. (2 Kulondolola 14:1, 6, 9, 10) Ntshinyi tshiakenza Asa? Uvua mutuishibue ne: Yehowa uvua ne bua kuambuluisha bantu bende. Ke bua tshinyi wakalomba Yehowa bua abambuluishe bua kutshimuna mvita. (Bala 2 Kulondolola 14:11.) Kuvua misangu ivua Yehowa muambuluishe bantu bende bua kutshimuna baluishi babu nansha pavua bakalenge bapanga lulamatu kudiye. Wakenza nunku bua kuleja ne: uvua Nzambi mulelela. (1 Bakelenge 20:13, 26-30) Kadi bua musangu eu, Yehowa wakambuluisha bantu bende bualu Asa uvua mumueyemene. Yehowa wakandamuna disambila dia Asa, ne kutshimunabu mvita. (2 Kulondolola 14:12, 13) Panyima pa matuku, Asa wakenza tshilema tshinene tshia kulomba diambuluisha kudi mukalenge wa Sulia pamutu pa kulomba Yehowa. (1 Bakelenge 15:16-22) Nansha nanku Yehowa wakamona ne: Asa uvua mumunange. Mutshima wende ‘wakadi muakane kudi Yehowa matuku ende onso.’ Mmunyi mutudi mua kuidikija tshilejilu tshimpe tshia Asa?—1 Bakelenge 15:14.

7, 8. Mmunyi muudi mua kuidikija Asa?

7 Mmunyi mutudi mua kumanya ne: tudi badifile kudi Yehowa ne muoyo mujima? Tudi mua kudiebeja ne: ‘Nentumikilaku Yehowa nansha biobi bikole anyi? Ndiku mudisuike ne muoyo mujima bua kulama tshisumbu tshiende tshikezuke anyi?’ Elabi  meji bungi bua dikima divua Asa ukengela bua kumbusha kakuende muntu mukaji mu muanzu wende wa mukalenge mukaji. Kudi misangu idibi mua kukulomba bua kuikala ne dikima bu Asa. Tshilejilu, newenze tshinyi bobu bipate muena mu dîku dienu mu tshisumbu anyi mulunda webe wa pa muoyo udi muenze mpekatu kayi munyingalale? Neudisuike bua kubenga kulamakanangana nende anyi? Muoyo webe neukusake bua kuenza tshinyi?

8 Anu bu Asa, kudi misangu itudi mua kumona bu ne: bantu bonso mbatubenge. Pamuapa balongi benu anyi balongeshi benu badi bakuseka bualu udi Ntemu wa Yehowa. Anyi pamuapa bantu banudi nuenza nabu mudimu badi mua kukumona bu mutatakane bualu udi wangata dikisha bua kuya mu mpuilu, anyi bualu misangu ya bungi kutu wenza mudimu upitshisha pa mêba adibu bakulomba to. Mu nsombelu ya nunku, eyemena Nzambi anu bu Asa. Sambila Yehowa, ikala ne dikima, utungunuke ne kuenza malu adi mimpe. Vuluka ne: Yehowa wakakolesha Asa, ne neakukoleshe pebe.

9. Mmunyi mutudi mua kusankisha Yehowa patudi tuyisha?

9 Asa kavua anu muele meji bua bualu buende nkayende to; kadi wakakankamija bakuabu bua ‘kukebabu Yehowa.’ Tuetu petu tudi tuambuluisha bantu bua kutendelela Yehowa. Udi umona patudi tuambila bantu bakuabu malu ende. Elabi meji disanka didiye nadi padiye umona ne: tudi tuenza nunku bualu tudi bamunange ne tutabalela bantu bua matuku abu atshilualua!

YEHOSHAFATA WAKAKEBA YEHOWA

10, 11. Mmunyi mutudi mua kuidikija Yehoshafata?

10 Yehoshafata wakatungunuka ne ‘kuenda mu njila ya Asa tatuende.’ (2 Kulondolola 20:31, 32) Mushindu kayi? Anu bu tatuende, Yehoshafata wakakankamija bantu bua kutungunuka ne kutendelela Yehowa. Wakatuma bantu balume mu bimenga bia Yuda bua kulongesha bantu malu a mu “mukanda wa mikenji ya Yehowa.” (2 Kulondolola 17:7-10) Wakaya too ne mu teritware wa bukalenge bua Isalele bua ku nord, kudi bantu ba ku mikuna ya Efelayima, bua ‘kubapingaja kudi Yehowa.’ (2 Kulondolola 19:4) Yehoshafata uvua mukalenge ‘wakakeba Yehowa ne mutshima wende wonso.’—2 Kulondolola 22:9.

11 Lelu eu, Yehowa mmusue bua bantu ba pa buloba bujima balonge malu ende, ne tuetu bonso tudi mua kuambuluisha mu mudimu eu. Udiku mudifundile tshipatshila tshia kuyisha ngondo yonso anyi? Udiku musue kulongesha bantu bakuabu malu a mu Bible bua kutuadijabu pabu kutendelela Yehowa anyi? Utuku usambila bua bualu ebu anyi? Wewe mudienzeje, Yehowa neakuambuluishe bua kutuadija dilonga dia Bible ne muntu. Udiku witaba bua kulonga ne muntu nansha biobi bikulomba bua kuenza nanku mu mêba ebe a kuikisha anyi? Anu bu muvua Yehoshafata mudienzeje bua kuambuluisha bakuabu bua kutuadijabu kuenzela kabidi Yehowa mudimu, tudi petu mua kudienzeja bua kuambuluisha bantu bakadi balekele kuyisha. Bakulu mu tshisumbu batu kabidi balongolola bua kuya kukumbula bantu badibu bipate mu tshisumbu badi mu teritware wa tshisumbu tshiabu bakadi mua kuikala balekele tshibidilu tshiabu tshia kuenza mpekatu, ne kubapesha diambuluisha.

12, 13. a) Pakumvua Yehoshafata buôwa, ntshinyi tshia kenzaye? b) Bua tshinyi tudi ne bua kuidikija tshilejilu tshia Yehoshafata?

12 Anu bu tatuende Asa, Yehoshafata wakeyemena Yehowa pakalua tshiluilu tshinene kampanda bua kuluisha Yuda. (Bala 2 Kulondolola 20:2-4.) Uvua ne buôwa, ke kulombaye Yehowa diambuluisha. Mu disambila diende wakitaba ne: kabavua mua kutshimuna baluisha babu to. Wakamba kabidi ne: yeye ne bantu bende kabavua bamanye tshia kuenza to. Yehoshafata uvua mutuishibue ne: Yehowa uvua ne bua kubambuluisha. Wakamba ne: ‘Mêsu etu adi kuudi.’—2 Kulondolola 20:12.

 13 Anu bu Yehoshafata, imue misangu tudi mua kupanga kamanya tshia kuenza bua lutatu kampanda, ne tudi mene mua kumvua ne buôwa. (2 Kolinto 4:8, 9) Kadi vuluka tshivua Yehoshafata muenze. Wakasambila Yehowa kumpala kua bantu bonso, kumuambilaye muvuabu badiumvua kabayi ne bukole. (2 Kulondolola 20:5) Bamfumu ba mêku badi mua kuidikija tshilejilu tshia Yehoshafata. Lomba Yehowa bua akuambuluishe wewe ne bena mu dîku diebe bua kupita bimpe ne lutatu lunudi nalu, ne bua kumanya tshia kuenza. Kumvu bundu bua bena mu dîku diebe kutelejabu malu audi ulomba mu disambila aa to. Nebamone ne: udi weyemena Yehowa bikole. Wakambuluisha Yehoshafata ne neakuambuluishe pebe.

HEZIKIYA WAKATUNGUNUKA NE KUENZA MALU MIMPE

14, 15. Mmunyi muvua Hezikiya mueyemene Nzambi ne muoyo mujima?

14 Hezikiya ke mukalenge mukuabu “wakalamata Yehowa.” Wakenza nunku nansha muvua tatuende mushiye tshilejilu tshibi ne mutendelele mpingu. Hezikiya ‘wakumbusha bitendelelu biakadi ku mikuna, wakashimbula makunji akatendelelabu, wakatapila Bashela panshi, wakabutula nyoka wa tshiamu tshia mitaku wakenza Mose.’ Wakamubutula nunku bualu bena Isalele bavua bamutendelela. Hezikiya wakalamata Yehowa ne muoyo mujima. ‘Wakatungunuka ne kulama mêyi avua Yehowa mupeshe Mose.’—2 Bakelenge 18:1-6NWT.

15 Pavua Hezikiya mukalenge, tshiluilu tshia bukole tshia bena Ashû tshiakakuata Yuda ne kufunatshi bua kubutula Yelushalema. Saneheliba mukalenge wa Ashû wakaseka Yehowa, kukebaye bua Hezikiya apuekeshe maboko ne adifile. Mu tshikondo tshikole atshi, Hezikiya wakeyemena Yehowa ne muoyo mujima, kumulombaye diambuluisha. Uvua mumanye ne: Nzambi uvua ne bukole bua bungi kupita bena Ashû, ne uvua mua kusungila bantu bende. (Bala Yeshaya 37:15-20.) Nzambi wakandamuna disambila diende pakatumaye muanjelu wakashipa basalayi bena Ashû 185 000.—Yeshaya 37:36, 37.

16, 17. Mmunyi muudi mua kuidikija Hezikiya?

16 Panyima pa matuku, Hezikiya wakasama bikole wamba kufua. Mu tshikondo tshikole atshi wakasengelela Yehowa bua avuluke lulamatu luende ne bua amuambuluishe. (Bala 2 Bakelenge 20:1-3.) Yehowa wakateleja disambila dia Hezikiya ne kumuondapa. Bilondeshile Bible, lelu katuena mua kutekemena bua Nzambi kuondopa masama etu mu tshishima anyi kulepesha matuku etu a muoyo to. Kadi anu bu Hezikiya, tudi mua kulomba Yehowa bua atuambuluishe. Tudi mua kumuambila ne: ‘Ndi nkusengelela ne: uvuluke bu mungakuenda ku mpala kuebe mu bushuwa ne mutshima mutoke.’ Udiku witaba ne: Yehowa neakutabalele misangu yonso nansha paudi usama anyi?—Misambu 41:3.

17 Mmunyi muudi kabidi mua kuidikija Hezikiya? Pamuapa kudi bualu kampanda budi bunyanga malanda etu ne Yehowa anyi budi butupangisha dîba dia kumuenzela mudimu. Tshilejilu, lelu bantu ba bungi badi bangata bantu nabu bu bintu bia kutendelela. Badi banyisha bikole bantu bende lumu ne bantu bakuabu badibu kabayi bamanye. Ba bungi badi bapitshisha dîba dia bungi, babala malu a bantu aba ne batangila foto yabu. Misangu ya bungi batu benza mudimu ne site ya kupetelangana ne bantu bakuabu ku Enternete anyi ne biamu bikuabu bua kuyukidilangana ne bantu ku Enternete. Bushuwa, mbimpe bua kuyukila ne bena mu dîku dietu anyi ne balunda betu ba pa muoyo ku diambuluisha dia biamu ebi. Kadi tudi mua kujimija dîba dia bungi anu mu site ya dipetelangana ne bantu bakuabu eyi. Tudi mene mua kupeta lutambishi bantu ba bungi bobu batuambila ne: mbanange foto itudi bele anyi malu atudi bafunde ku Enternete. Peshi tuetu balue kumona ne: bamue bantu kabatshiena bayitangila kabidi, bidi mua kututonda. Tshilejilu tshia mupostolo Paulo ne Akila ne Pisikila tshidi  mua kutulongesha. Udiku wela meji ne: bavua bapitshisha dîba dituku dionso edi bua kumanya kalu konso kavua bantu benza, nangananga aba bavua kabayi benzela Yehowa mudimu anyi? Bible udi wamba ne: Paulo “wakadifila bikole mu mudimu wa dîyi.” Pisikila ne Akila bavua bapitshisha dîba diabu mu diyisha ne mu diumvuija bantu bakuabu “njila wa Nzambi bimpe menemene.” (Bienzedi 18:4, 5, 26) Tudi mua kudiebeja ne: ‘Ntuku ne budimu bua kubenga kuangata bantu bu bintu bia kutendelela anyi? Ntuku mbenga kupitshisha dîba dia bungi mu dienza malu adi kayi ne mushinga menemene anyi?’—Bala Efeso 5:15, 16.

YOSHIYA WAKATUMIKILA MIKENJI YA YEHOWA

18, 19. Mmunyi mutudi mua kufuana Yoshiya?

18 Mukalenge Yoshiya, wakatumikila pende mikenji ya Yehowa ‘ne mutshima wende wonso.’ (2 Kulondolola 34:31) Yoshiya uvua munkana wa Hezikiya. Pavuaye ne bidimu muinshi mua 20, “wakabanga kukeba Yehowa, Nzambi wa Davidi.” Pakakumbajaye bidimu 20, wakabanga kumbusha mpingu mu Yuda. (Bala 2 Kulondolola 34:1-3.) Yoshiya wakadienzeja bikole bua kusankisha Yehowa kupita bakalenge bakuabu ba bungi ba Yuda. Pashishe dituku kampanda, muakuidi munene wakasangana mukanda wa mikenji ya Nzambi mu ntempelo. Uvua pamuapa mukanda uvua Mose mudifundile nkayende. Pavua mufundi uwubadila Yoshiya, Yoshiya wakajingulula ne: uvua ne bua kuenza malu a bungi bua kukuatshilaye Yehowa mudimu ne muoyo mujima. Wakakankamija kabidi bakuabu bua kuenza bia muomumue. Bu tshipeta, bantu “kabakalekela kulonda Yehowa” patshivua Yoshiya ne muoyo to.—2 Kulondolola 34:27, 33.

19 Wewe muikale nsonga, udi mua kuidikija Yoshiya ne kukeba bua kumanya Yehowa bimpe. Yoshiya uvua mua kuikala mulonge kudi Mukalenge Manashe, kakuende uvua munyingalale bua mibi yende ne: Yehowa utu ufuila bantu luse ne muoyo mujima. Wewe pebe udi mua kulonga malu kudi bantu bakulakaje ba mu dîku dienu ne ba mu tshisumbu. Badi mua kukuambila malu mimpe a bungi adi Yehowa mubenzele. Vuluka kabidi muvua Yoshiya mumvue pakamanyaye tshivua Mifundu minsantu yamba. Uvua ne dijinga dikole dia kusankisha Yehowa, ke kuakajaye diakamue amue malu. Paudi ubala Mifundu minsantu, udi pebe mua kudiumvua ne dijinga dikole dia kutumikila Yehowa. Dîba adi malanda ebe nende neakole ne neudiumvue ne disanka. Pashishe neujinge bua kuambila bantu bakuabu malu a Yehowa. (Bala 2 Kulondolola 34:18, 19.) Paudi ulonga Bible, udi kabidi mua kumona ne: kudi malu audi mua kuakaja mu mudimu uudi wenzela Nzambi. Biobi nanku, enza muebe muonso bua kuakaja malu au anu bu Yoshiya.

ENZELA YEHOWA MUDIMU NE MUOYO MUJIMA!

20, 21. a) Mmalu kayi a muomumue avua bakalenge banayi batudi bakuile aba benze? b) Ntshinyi tshituakonkonona mu tshiena-bualu tshialonda?

20 Bilejilu bia bakalenge banayi ba Yuda bavua benzele Yehowa mudimu ne muoyo mujima bidi bitulongesha tshinyi? Bantu balume aba bakadisuika bua kusankisha Yehowa ne kumutendelela matuku abu onso a muoyo. Bakamueyemena pakalua baluishi ba bukole kubaluisha. Bualu bua mushinga budi ne: bakenzela Yehowa mudimu bualu bavua bamunange.

21 Nansha muvua bakalenge aba bapange bupuangane ne benza bilema, Yehowa uvua ubanyisha. Wakamona tshivua mu muoyo wabu, kumanyaye ne: bavua bashuwa bamunange. Tuetu petu tudi bapange bupuangane ne tutu tuenza bilema. Kadi Yehowa neatuanyishe padiye umona ne: tudi tumuenzela mudimu ne muoyo mujima. Mu tshiena-bualu tshialonda netukonkonone tshidi bilema bia bakalenge aba bitulongesha.