Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 7 2016

Tuikalayi ne dianyisha bua ngasa wa Nzambi

Tuikalayi ne dianyisha bua ngasa wa Nzambi

‘Tuetu bonso tuvua bapete ngasa wa Nzambi pa ngasa wa Nzambi.’—YONE 1:16.

MISAMBU: 95, 13

1, 2. a) Umvuija tshilejilu tshia Yezu tshia muena budimi bua tumuma tua mvinyo. b) Mmunyi mudi muyuki eu wambuluisha bua kumona ngikadilu bu mudi muoyo muimpe ne ngasa?

DITUKU kampanda mu dinda, muena budimi bua tumuma tua mvinyo wakaya kukeba bena mudimu mu tshisalu. Wakumvuangana nabu mushinga wa kubafuta, ne bobu kuitaba. Kadi, bu muvua muena budimi dijinga ne bena mudimu bakuabu, wakaya mu tshisalu bua kukeba kabidi bena mudimu. Wakenza nanku njila ya bungi dituku adi. Wakumvuangana nabu bonso bua kubafuta mushinga wa muomumue. Ku ndekelu kua dituku, muena budimi wakabikila bena mudimu bua kubafuta. Wakafuta bena mudimu bende bavua benze mudimu dituku dijima ne bavua benze mudimu dîba dimue difutu dia muomumue. Kadi, pavua bantu bavua benze mudimu dituku dijima batuadije kuakula bibi bua muena budimi, wakabambila ne: ‘Mushinga undi munupeshe ki ngutuvua bumvuangane anyi? Tshiena mua kuenza tshindi musue ne bintu bianyi anyi? Nudi bumvue mukawu bualu ndi muntu muimpe anyi?’—Matayi 20:1-15.

 2 Muyuki wa Yezu eu udi utupetesha dilongesha dia mushinga bua “ngasa” wa Yehowa. [1] (Tangila note ku ndekelu.) (Bala 2 Kolinto 6:1.) Mushindu kayi? Bamue badi mua kuela meji ne: bantu bavua benze mudimu dituku dijima bavua bakumbane kupeta makuta a bungi kupita bakuabu. Kadi muena budimi wakaleja bena mudimu bavua benze anu dîba dimue ngasa. Mumanyi kampanda wa malu mupiluke wakamba mêyi adi alonda aa bua muaku “ngasa” udibu bakuile mu Bible ne: “Lungenyi lunene ludi mu muaku eu ndua tshintu tshidibu bapesha muntu tshianana kayi mutshienzele mudimu anyi mutshikumbanyine.”

DIPA DIA LUSE DIA YEHOWA

3, 4. Bua tshinyi Yehowa mmuleje bantu bonso ngasa? Mmubaleje ngasa eu mushindu kayi?

3 Bible udi utuambila ne: ngasa wa Nzambi ‘ndipa dia tshianana.’ (Efeso 3:7) Bu mutudi katuyi mua kutumikila Yehowa mu malu onso, katuena bakumbanyine bua kupeta tshintu tshimpe tshia kudi Nzambi nansha tshimue to. Bushuwa, tudi bakumbanyine lufu. Mukalenge Solomo wakamba ne: ‘Kakuena muntu muakane pa buloba utu wenza malu makane, kayi wenza malu mabi.’ (Muambi 7:20) Mupostolo Paulo wakalua kuamba pashishe ne: “Bantu bonso bakenza bubi ne kabena bafika ku butumbi bua Nzambi to” ne “difutu dia bubi ndufu.”—Lomo 3:23; 6:23a.

4 Bu mudi Yehowa munange bantu bikole menemene, wakatuma “Muanende mulela umuepele” bua kutufuila. Etshi tshivua tshienzedi tshitambe bunene tshia ngasa wende. (Yone 3:16) Paulo wakamba ne: ‘Mpindieu mbase Yezu tshifulu tshia butumbi ne bunême bualu uvua mukenge too ne ku lufu, bua ku ngasa wa Nzambi, alabuile muntu yonso lufu.’ (Ebelu 2:9) Eyowa, “dipa didi Nzambi ufila mmuoyo wa tshiendelele mu Kristo Yezu Mukalenge wetu.”—Lomo 6:23b.

5, 6. Mbipeta kayi bidi bimueneka padibu batukokesha a) kudi bubi? b) kudi ngasa?

5 Bua tshinyi tutu tuenza malu mabi ne tufua? Bible udi uleja ne: ‘tshilema tshia muntu umue ntshifikishe lufu ku dikokesha bu mukalenge.’ Nunku, bu mutudi ndelanganyi ya Adama, tudi bapange bupuangane ne tutu tufua. (Lomo 5:12, 14, 17) Kadi, tudi anu mua kusungula bua bubi kabutukokeshi anyi kabutulombodi. Mmunyi mutudi mua kufika ku dienza nunku? Patudi tuleja ditabuja mu mulambu wa tshia kupikula natshi wa Kristo, tudi tupeta masanka adi afumina ku ngasa wa Yehowa. Bible udi wamba ne: “Muaba udi bubi buvulangane, ngasa mmuvulangane kupita. Mbua bualu kayi? Bualu anu bu muakakokesha bubi pamue ne lufu bu mukalenge, bia muomumue kabidi, ngasa udi ne bua kukokesha bu mukalenge ku diambuluisha dia buakane budi bufikisha ku muoyo wa tshiendelele ku butuangaji bua Yezu Kristo.”—Lomo 5:20, 21.

6 Nansha mutudi bena mibi, katuena ne bua kulekela bubi butukokesha to. Ke bualu kayi, patudi tuenza bualu kampanda bubi, tudi tulomba Yehowa bua atufuile luse. Paulo wakatudimuija ne: “Bubi kabuena ne bua kunukokesha bualu kanuena ku bukokeshi bua mikenji to, kadi nudi ku bukokeshi bua ngasa.” (Lomo 6:14) Nunku mmunyi mudi ngasa wa Nzambi mua kutupetesha masanka? Paulo wakamba ne: ‘Ngasa wa Nzambi udi utulongesha bua kulekela malu adi abengangana ne disua dia Nzambi ne majinga a pa buloba ne bua kuikala ne meji mimpe,  ne buakane ne dilamata Nzambi munkatshi mua ndongoluelu wa malu udiku eu.’—Tito 2:11, 12.

NGASA ‘MUMUENESHIBUE MU MISHINDU YA BUNGI’

7, 8. Kuamba ne: ngasa wa Yehowa ‘mmumueneshibue mu mishindu ya bungi’ kudi kumvuija tshinyi? (Tangila bimfuanyi bia ntuadijilu bia tshiena-bualu.)

7 Mupostolo Petelo wakafunda ne: “Bilondeshile mudi muntu yonso mupete tshipedi, nukuate natshi mudimu bua kuambuluishangana bu balami bimpe ba ngasa wa Nzambi udi mumueneshibue mu mishindu ya bungi.” (1 Petelo 4:10) Kuamba ne: ngasa wa Yehowa ‘mmumueneshibue mu mishindu ya bungi’ kudi kumvuija tshinyi? Kudi kumvuija ne: nansha tuetu batuilangane ne ntatu ya mushindu kayi mu nsombelu wetu, Yehowa neatupeshe tshitudi natshi dijinga bua kunanukila. (1 Petelo 1:6) Neatupeshe misangu yonso anu tshitudi natshi dijinga menemene bua kutantamena lutatu luonso.

Nansha tuetu batuilangane ne ntatu anyi nsombelu mikole ya mushindu kayi, Yehowa neatupeshe misangu yonso tshitudi natshi dijinga menemene bua kuyitantamena

8 Mupostolo Yone wakafunda ne: “Tuetu bonso tuvua bapete tshiuwidi tshiende, ngasa wa Nzambi pa ngasa wa Nzambi.” (Yone 1:16) Bu mudi Yehowa uleja ngasa wende mu mishindu ya bungi, tudi tupeta masanka a bungi. Amue a kudiwu mmasanka kayi?

9. a) Mmunyi mudi ngasa wa Yehowa utupetesha masanka? b) Mmunyi mutudi mua kuleja dianyisha dietu bua ngasa eu?

9 Yehowa udi utubuikidila mibi yetu. Ku diambuluisha dia ngasa wende, Yehowa udi utubuikidila mibi yetu. Kadi utu wenza nunku anu patudi tunyingalala ne tutungunuka ne kuluangana ne majinga etu mabi. (Bala 1 Yone 1:8, 9.) Paulo wakumvuija bena Kristo bela manyi ba mu tshikondo tshiende mudi Yehowa utubuikidila mibi yetu. Wakamba ne: “[Nzambi] wakatusungila ku bukokeshi bua mîdima, kutubuejaye mu Bukalenge bua Muana wa dinanga diende, utudi tupikudibua ku butuangaji buende ku diambuluisha dia tshia kupikula natshi, ndibuikidibua dia mibi yetu.” (Kolosayi 1:13, 14) Tudi ne dianyisha dia bungi bua luse lua Nzambi, ne dianyisha edi didi ditusaka bua kumutumbisha. Bu mudi Yehowa utubuikidila mibi yetu, tudi kabidi mua kupeta malu makuabu a bungi mimpe.

10. Ntshinyi tshitudi tupeta bua ngasa wa Nzambi?

10 Tudi mua kuikala mu ditalala ne Nzambi. Tudi bapange bupuangane, nunku tudi bena lukuna ba Nzambi katshia anu ku diledibua dietu. Kadi, Paulo wakamba ne: “Patutshivua bena lukuna ba Nzambi tuakalengejangana nende ku diambuluisha dia lufu lua Muanende.” (Lomo 5:10) Ku diambuluisha dia tshia kupikula natshi, tudi mua kulengejangana ne Nzambi, mbuena kuamba ne: kuikala nende mu ditalala ne kulua balunda bende. Paulo wakumvuija bualu ebu ne kuleja mudibu bupetangana ne ngasa wa Yehowa  pakambilaye bena Kristo nende bela manyi ne: “Bu mutudi babadibue bakane bua ditabuja, tuikale mu ditalala ne Nzambi ku butuangaji bua Mukalenge wetu Yezu Kristo; kudiye ke kutudi kabidi tubuelela mu ngasa wende mutudi bimane mpindieu ku diambuluisha dia ditabuja; nanku tusankile mu ditekemena dia butumbi bua Nzambi.” (Lomo 5:1, 2) Tudi ne dianyisha bua mutudi mu ditalala ne Yehowa ne badie nende bulunda!

Mudi Nzambi uleja ngasa: Diakalenga dia kuteleja lumu luimpe (Tangila tshikoso tshia  11)

11. Mmunyi mudi bela manyi balombola “mikoko mikuabu” ku buakane?

11 Tudi mua kulua bakane ku mêsu kua Nzambi. Muprofete Danyele wakafunda ne: mu tshikondo tshia ku nshikidilu, “badi ne meji,” mbuena kuamba ne: bela manyi, bavua ne bua kulombola “bantu ba bungi ku buakane.” (Bala Danyele 12:3.) Mmunyi mudi bela manyi benza bualu ebu? Badi bayisha lumu luimpe ne balongesha “mikoko mikuabu” miliyo ya bungi mikenji ya Yehowa. (Yone 10:16) Badi babambuluisha bua kuluabu bakane ku mêsu kua Nzambi, ne bualu ebu budi buenzeka anu bua ngasa wa Yehowa. Paulo wakumvuija ne: “Mbenze anu bu badi bangata dipa dia tshianana padibu babadibua bakane bua ngasa [wa Nzambi] ku dipikudibua ku diambuluisha dia tshia kupikula natshi tshivua Kristo Yezu mufile.”—Lomo 3:23, 24.

Diakalenga dia kusambila (Tangila tshikoso tshia 12)

12. Mmunyi mudi disambila dipetangana ne ngasa wa Nzambi?

12 Tudi mua kusemena pabuipi ne Nzambi mu disambila. Ku diambuluisha dia ngasa wa Yehowa, tudi mua kusambila Nzambi. Paulo udi ubikila nkuasa wa bukalenge wa Yehowa ne: “nkuasa wa bukalenge wa ngasa” ne udi utulomba bua kusemena pabuipi ne nkuasa eu “ne dikima dia kuakula.” (Ebelu 4:16a) Tudi mua kusambila  Yehowa dîba kayi dionso ku butuangaji bua Yezu. Edi didi bushuwa diakalenga dinene! Paulo wakamba ne: “Tudi tuakula ne dikima, tudi ne budikadidi bua kusemena pabuipi bikale ne dishindika ku diambuluisha dia ditabuja ditudi nadi kudiye.”—Efeso 3:12.

Diambuluisha pa dîba dikumbane (Tangila tshikoso tshia 13)

13. Mmunyi mudi ngasa mua “kutuambuluisha pa dîba dikumbane”?

13 Tudi mua kupeta diambuluisha pa dîba dikumbane. Paulo mmutukankamije bua kusambila Yehowa dîba dionso ditudi nende dijinga, “bua tupete luse ne ngasa bua kutuambuluisha pa dîba dikumbane.” (Ebelu 4:16b) Dîba dionso ditudi tupeta ntatu anyi ditudi mu nsombelu mikole, tudi mua kulomba Yehowa diambuluisha. Udi wandamuna masambila etu nansha mudiye kayi muenzejibue bua kuandamuna. Utu misangu ya bungi wenza mudimu ne bana betu ba balume ne ba bakaji bua kutuambuluisha. Yehowa udi wandamuna masambila etu “bua tuikale ne dikima dikole ne tuambe ne: ‘Yehowa mmuambuluishi wanyi; tshiakutshina nansha. Muntu udi mua kungenzela tshinyi?’”—Ebelu 13:6.

14. Mmunyi mudi ngasa wa Yehowa wambuluisha mioyo yetu?

14 Tudi mua kupeta busambi mu mioyo yetu. Ndibenesha dinene bua mudi Yehowa utusamba dîba dionso ditudi ne kanyinganyinga. (Musambu 51:17) Pavuabu bakengesha bena Kristo ba mu Tesalonike, Paulo wakabafundila ne: “Mukalenge wetu Yezu Kristo yeye nkayende ne Nzambi Tatu wetu uvua mutunange ne mutupeshe busambi bua tshiendelele ne ditekemena dimpe ku diambuluisha dia ngasa wende, basambe mioyo yenu ne banukoleshe.” (2 Tesalonike 2:16, 17) Bidi bitukolesha patudi tumanya ne: bua ngasa wende, Yehowa mmutunange ne udi ututabalela!

15. Nditekemena kayi ditudi bapete ku diambuluisha dia ngasa wa Nzambi?

15 Tudi ne ditekemena dia muoyo wa tshiendelele. Bu mutudi benji ba mibi, katuena mua kupeta ditekemena bikala Yehowa kayi mutuambuluishe. (Bala Musambu wa 49:7, 8.) Kadi Yehowa mmutupeshe ditekemena ditambe buimpe. Nditekemena kayi adi? Yezu wakamba ne: “Disua dia Tatu wanyi didi nunku: Muntu yonso udi umona Muana ne uleja ditabuja kudiye, ikale ne muoyo wa tshiendelele.” (Yone 6:40) Nunku, tudi ne ditekemena dia kupeta muoyo wa tshiendelele bua ngasa wa Yehowa. Paulo wakamba ne: “Ngasa wa Nzambi mmumueneke, mmutuadile bantu ba mishindu yonso lupandu.”—Tito 2:11.

KUVUIJI NGASA WA NZAMBI BU TSHIA KUDIBINGISHA NATSHI BUA KUENZA MALU MABI

16. Mmunyi muvua bamue bena Kristo ba mu bidimu lukama bia kumpala bapepeje ngasa wa Nzambi?

16 Tudi tupeta masanka a bungi bua ngasa wa Nzambi. Kadi, katuena ne bua kupepeja buimpe bua Nzambi, mbuena kuamba ne: kubuvuija bu tshintu tshia kudibingisha natshi bua kuenza mpekatu to. Munkatshi mua bena Kristo ba mu bidimu lukama bia kumpala, kuvua bamue bavua ‘bakudimuna ngasa wa Nzambi bu tshia kudibingisha natshi bua kuikala ne bikadilu bibi bia dikamakama.’ (Yuda 4) Bidi bimueneka ne: bena Kristo bavua kabayi ne ditabuja aba bavua bela meji ne: bavua mua kuenza malu mabi, ne Yehowa uvua misangu yonso mua kubafuila luse. Bavua mene basaka bena Kristo bakuabu bua kuenzabu pabu malu mabi. Nansha lelu, muntu yonso udi wenza  malu mushindu eu ‘mmupende bibi nyuma wa ngasa.’—Ebelu 10:29.

17. Mmubelu kayi mukole uvua Petelo mufile?

17 Satana mmushime bamue bena Kristo lelu, mubafikishe ku diela meji ne: badi mua kuenza mpekatu kadi Yehowa neikale anu ne bua kubafuila luse. Bulelela, Yehowa mmusue kufuila benji ba mpekatu badi banyingalala luse, kadi mmusue bua tuluangane ne majinga etu mabi. Yehowa uvua musake Petelo bua kufunda ku diambuluisha dia nyuma muimpe ne: “Nunku nuenu bananga, bu munudi badianjile kumanya malu aa, nudimuke bua kanupambuki nabu ku dipanga dia bashipi ba mikenji ne bua kanulu kupangila mua kushindama. Kadi tungunukayi ne kukola mu ngasa ne dimanya dia Mukalenge ne Musungidi wetu Yezu Kristo.”—2 Petelo 3:17, 18.

NGASA UDI UTUPETESHA MIDIMU MIKUABU

18. Mmajitu kayi atudi bapete ku diambuluisha dia ngasa wa Yehowa?

18 Tudi ne dianyisha dia bungi bua ngasa wa Yehowa. Ke bualu kayi tudi ne bua kuenza mudimu ne bipedi bietu bua kutumbisha Yehowa ne kuambuluisha bantu bakuabu. Tudi ne dibanza dia kumutumbisha ne kuambuluisha bantu. Mmunyi mutudi mua kuenza mudimu ne bipedi ebi? Paulo udi wamba ne: ‘Nunku mutudi ne bipedi bishilangane bilondeshile ngasa udiye mutupeshe, bikala tshipedi etshi tshia mudimu wa Nzambi, tudifile mu mudimu eu; anyi muntu udi ulongesha, adifile mu dilongesha diende; anyi muntu udi ukoleshangana ne mibelu, adifile ku dikoleshangana diende; muntu udi ufuilangana luse, afuilangane luse ne disanka.’ (Lomo 12:6-8) Nunku, ku diambuluisha dia ngasa wa Yehowa, tudi bapete bujitu bua kuenza mudimu wa Nzambi bikole, kulongesha bantu Bible, kukolesha bena Kristo netu ne kufuila muntu yonso udi utuenzela bibi luse.

19. Mu tshiena-bualu tshidi tshilonda, netuakule bua mudimu kayi udibu batupeshe?

19 Bu mudi Yehowa mutubeneshe ne ngasa wende, bualu ebu budi ne bua kutusaka bua kudifila ne muetu muonso bua “kuyisha bikole menemene lumu luimpe lua ngasa wa Nzambi.” (Bienzedi 20:24) Netuakule bua mudimu eu mu tshiena-bualu tshidi tshilonda.

^ [1] (tshikoso 2) Tangila tshiena-bualu tshia ne: “Ngasa” mu tshitupa tshia ne: “Diumvuija dia miaku ya mu Bible” mu Bible wa Nkudimuinu wa bulongolodi bupiabupia muakajilula mu 2013 mu Anglais.