Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 7 2016

Bua tshinyi tudi ne bua ‘kushala batabale’?

Bua tshinyi tudi ne bua ‘kushala batabale’?

“Nushale batabale, bualu kanuena bamanye dituku didi Mukalenge wenu ulua.”—MATAYI 24:42.

MISAMBU: 136, 129

1. Fila tshilejilu tshidi tshileja mudibi ne mushinga bua kumanya tshikondo tshitudi ne tshidi tshienzeka muaba utudi. (Tangila tshimfuanyi tshia ntuadijilu tshia tshiena-bualu.)

MPUNGILU ukadi pa kutuadija. Mulombodi wa mpungilu udi upita ku tshiakuidi ne ujingila bantu bonso difika dilenga. Mizike idi ituadija. Bantu mbamanye ne: edi ndîba dia bobu kusomba. Mbasue kuteleja mizike mimpe eyi ne mbindile ne muoyo kuulu kuulu bua kulonda miyuki yenzabu. Kadi pamuapa kudi bamue bantu badi kabayi batume ntema yabu kudi mulombodi wa mpungilu anyi kabayi bamanye ne: mizike ikadi mituadije. Nunku ki mbamanye ne: mpungilu ukadi mutuadije, ne batshidi batua eku ne eku anyi bayukila ne balunda babu. Bualu ebu budi buleja tshidi mua kuenzeka tuetu katuyi bamanye tshikondo tshitudi anyi tshidi tshienzeka muaba utudi. Edi ndilongesha dinene kutudi bualu mu katupa kîpi emu, bualu kampanda bunene nebutuadije ne tudi ne bua kudilongolola bua bualu abu. Mbualu kayi abu?

2. Bua tshinyi Yezu uvua muambile bayidi bende bua ‘kushala batabale’?

 2 Yezu Kristo wakadimuija bayidi bende bua bashale batabale ne badilongolole bua ‘nshikidilu wa ndongoluelu wa malu eu.’ Wakabambila ne: “Nuikale badimuke, nutabale, bualu kanuena bamanye dîba diakumbana tshikondo tshijadika.” Pashishe wakamba misangu ya bungi ne: “Nushale batabale.” (Matayi 24:3; bala Mâko 13:32-37.) Muyuki wa mu Matayi udi kabidi uleja ne: Yezu uvua mudimuije bayidi bende bua bualu ebu. Wakabambila ne: “Nushale batabale, bualu kanuena bamanye dituku didi Mukalenge wenu ulua.” Wakabadimuija kabidi ne: “Nuikale badilongolole, bualu Muana wa muntu udi ulua pa dîba dinudi kanuyi nuelela meji to.” Pashishe wakabambuluila ne: “Nunku nushale batabale, bualu kanuena bamanye dituku ne dîba.”—Matayi 24:42-44; 25:13.

3. Bua tshinyi tutu tuteya ntema ku didimuija dia Yezu?

3 Bantemu ba Yehowa badi bateya ntema ku didimuija divua Yezu mufile. Tudi bamanye ne: tudi mu ‘tshikondo tshia ku nshikidilu’ ne “dikenga dinene” nedituadije mu katupa kîpi emu! (Danyele 12:4; Matayi 24:21) Anu bu mukavua Yezu muambe, bantu ba Yehowa badi bayisha lumu luimpe lua Bukalenge pa buloba bujima. Ku lukuabu luseke, tudi tumona mvita, masama, dikanka dia buloba ne nzala mu miaba ya bungi. Kudi tshibuejakaji mu malu a ntendelelu, malu a tshinyangu ne a tshikisu adi enzeka bikole kupita ne kumpala. (Matayi 24:7, 11, 12, 14; Luka 21:11) Mpindieu tudi bindile ne muoyo kuulu kuulu tshikondo tshikala Yezu mua kulua bua kukumbaja malu adi Tatuende mulongolole.—Mâko 13:26, 27.

DITUKU DIDI DIENDA DISEMENA PABUIPI!

4. a) Bua tshinyi tudi tuamba ne: Yezu ukadi mumanye dîba diatuadija mvita ya Armagedone? b) Nansha mutudi katuyi bamanye dîba diatuadija dikenga dinene, ntshinyi tshitudi ne bua kuikala bajadike?

4 Patutu tuya mu mpungilu, tutu bamanye dîba didi tshitupa tshionso tshituadija. Kadi mbikole bua tuetu kumanya dîba menemene diatuadija dikenga dinene. Pavua Yezu pa buloba, wakamba ne: “Bua dituku adi ne dîba adi, kakuena muntu udi mumanye, nansha banjelu ba mu diulu, nansha Muana; kadi anu Tatu nkayende ke udi mumanye.” (Matayi 24:36) Bushuwa, bu mudi Yezu mulombodi wa mvita ya Armagedone, udi mua kuikala ukadi mumanye dîba diatuadija mvita eyi. (Buakabuluibua 19:11-16) Kadi, tuetu katuena anu banji kumanya dituku anyi dîba dialua nshikidilu to. Ke bualu kayi bidi ne mushinga bua tuetu kushala batabale. Yehowa ukadi mujadike dituku dikala dikenga dinene mua kutuadija, ne dituku edi didi dienda disemena pabuipi dituku dionso edi. ‘Kadiena dipanga kulua,’ mbuena kuamba ne: kadiakujanguluka nansha! (Bala Habakuka 2:1-3.) Bua tshinyi tudi ne bua kuitaba bualu ebu?

Yehowa ukadi mujadike dituku dikala dikenga dinene mua kutuadija

5. Fila tshilejilu tshidi tshileja ne: milayi ya Yehowa itu misangu yonso ikumbana pa dîba diayi.

5 Milayi ya Yehowa itu ikumbana misangu yonso anu pa dîba diayi! Tshilejilu, ela meji bua dituku divuaye mupikule bantu bende mu Ejipitu. Bivua mu dia 14 ngondo wa Nisana mu 1513 kumpala kua Kristo.  Mose wakalua kufunda bua dituku adi ne: ‘Pakalepa bidimu nkama inayi ne makumi asatu, mu dituku adi menemene, bisumbu bionso bia bantu ba Yehowa bakapatuka mu buloba bua Ejipitu.’ (Ekesode 12:40-42) Mulayi wa Yehowa wa kubenesha ndelanganyi ya Abalahama wakatuadija kukumbana mu dia 14 ngondo wa Nisana mu 1943 kumpala kua Kristo, mbuena kuamba ne: bidimu 430 kumpala kua bena Isalele kupatuka mu bupika anu muvua Nzambi muambe. (Galatiya 3:17, 18) Bidimu ndambu pashishe, Yehowa wakambila Abalahama ne: ‘Umanye biebe bimpe ne: tunkanunuina tuebe netuikale bendakanyi mu buloba budi kabuyi buabu, netukuatshile bena buloba mudimu, nebatukengeshe too bidimu nkama inayi.’ (Genese 15:13; Bienzedi 7:6) Bidimu 400 biakatuadija mu 1913 kumpala kua Kristo pavua Yishimaele mutuadije kukengesha Izaka. Biakajika dituku divua Yehowa mupatule bena Isalele mu bupika mu Ejipitu. (Genese 21:8-10; Galatiya 4:22-29) Eyowa, Yehowa ukavua mudianjile kusungula bidimu nkama ya bungi kumpala dituku disunguluke divuaye ne bua kupatula bantu bende mu bupika!

6. Bua tshinyi tudi ne bua kuikala bashindike ne: Yehowa neasungile bantu bende?

6 Yoshua uvua umue wa ku bena Isalele bavuabu bapatule mu bupika mu Ejipitu. Bidimu bia bungi pashishe, wakavuluija bena Isalele ne: ‘Nudi bamanye mu mitshima yenu yonso ne mu mioyo yenu yonso ne: kanuakapanga tshintu tshimpe tshimue tshiakanulaya Yehowa, Nzambi wenu; nuakapeta bintu bionso, kanuakapanga tshintu tshimue.’ (Yoshua 23:2, 14) Yehowa mmulaye bua kusungila bantu bende mu dikenga dinene ne kubapesha muoyo wa tshiendelele mu bulongolodi bupiabupia. Tuikale bashindike ne: mulayi eu neukumbane. Nunku, tuetu basue kuikala mu bulongolodi bupiabupia, tudi ne bua kushala batabale.

NUSHALE BATABALE BUA KUPANDUKA

7, 8. a) Nsentedi wa mu bikondo bia kale uvua ne mudimu kayi? b) Bualu ebu budi butulongesha tshinyi? c) Fila tshilejilu tshidi tshileja tshivua mua kufika pavua bansentedi balala ku mudimu wabu.

7 Tudi mua kupeta dilongesha ku tshilejilu tshia bansentedi bavua balama bimenga mu bikondo bia kale. Bimenga bia bungi, pamue ne tshia Yelushalema, bivua binyunguluka kudi bimanu bile bua kupangisha baluishi bua kubuelabu. Bansentedi bavua bimana pa bimanu ebi ne bavua mua kumona nseka yonso ya tshimenga. Bansentedi bakuabu bavua bimana ku biibi bia tshimenga. Bavua ne bua kushala batabale butuku ne munya, ne pavuabu bamona baluishi balua, bavua badimuija bantu mu tshimenga. (Yeshaya 62:6) Bavua bamanye muvuabi ne mushinga bua kushala batabale ne kumona bimpe malu avua enzeka. Bobu kabayi benze nanku, bantu ba bungi bavua mua kufua.—Yehezekele 33:6.

8 Josèphe, uvua mufunde muyuki wa bena Yuda wakumvuija muvua bena Lomo bafike ku dibuela mu Yelushalema mu tshidimu tshia 70 panyima pa Yezu. Bansentedi bavua balama tshimue tshitupa tshia tshimenga bavua balale. Ke bualu kayi, basalayi ba bena Lomo bakapeta mushindu wa kubuela mu tshimenga. Bakaya ku ntempelo, kumutua mudilu ne kubutula Yelushalema mujima. Etshi tshivua tshitupa tshia ndekelu tshia dikenga dinene divua bena Yuda katshia kabayi banji kupeta.

9. Ntshinyi tshidi bantu ba bungi lelu kabayi bamanye?

9 Mbulamatadi ya bungi lelu itu iteka basalayi  anyi biamu kampanda bua kulama matunga ayi. Mbulamatadi eyi idi itangila muntu yonso anyi tshintu tshionso tshidi mua kukebesha njiwu mu matunga ayi. Kadi ki mmimanye ne: kudi mbulamatadi mukuabu mu diulu udi ne bukole udibu balombola kudi Kristo Yezu to. Mbulamatadi eu neele mbulamatadi yonso ya pa buloba mvita mu katupa kîpi emu. (Yeshaya 9:6, 7; 56:10; Danyele 2:44) Tudi bindile ne muoyo kuulu kuulu bua dituku adi dilue ne tudi basue kuikala badilongolole. Nunku, tudi tuteya ntema ku milayi ya mu Bible ne tutungunuka ne kuenzela Yehowa mudimu ne lulamatu.—Musambu 130:6.

KATUIKADI MU DITANAJI NANSHA

10, 11. a) Ntshinyi tshitudi mua kudimukila? Bua tshinyi? b) Ntshinyi tshidi tshikujadikila ne: Diabolo udi usaka bantu bua kubenga kuteya ntema ku milayi ya mu Bible?

10 Elabi meji nsentedi kampanda mushale mutabale butuku bujima. Mu mêba makese a ku ndekelu a mudimu wende, mbikole bua kushalaye mutabale bualu mmutshioke bikole. Mu mushindu wa muomumue, tudi mu matuku a ku nshikidilu wa bulongolodi ebu. Padi nshikidilu wenda usemena, nebikale bikole bua tuetu kushala batabale. Nebikale bibi be tuetu katuyi bashale batabale! Tukonkononayi malu asatu adi mua kutupangisha bua kushala batabale.

11 Diabolo udi ushima bantu. Yeye ke “mukokeshi wa buloba ebu.” Matuku makese kumpala kua Yezu kufua, wakavuluija bayidi bende bualu ebu misangu isatu. (Yone 12:31; 14:30; 16:11) Diabolo udi wenza mudimu ne bitendelelu bia dishima bua kushima bantu. Ke bualu kayi bantu ba bungi lelu kabena bateya ntema ku milayi ya mu Bible idi ileja patoke ne: nshikidilu wa bulongolodi ebu ukadi pabuipi menemene. (Sefanya 1:14) Bidi bimueneka patoke ne: Satana “mmufofomije mêsu a meji a badi kabayi bitabuja.” (2 Kolinto 4:3-6) Ke bualu kayi patudi tuambila bantu ne: nshikidilu wa ndongoluelu eu ukadi pabuipi ne Kristo ukadi ukokesha, ba bungi ba kudibu kabatu batuteleja to. Batu pa tshibidilu bandamuna ne: “Kabiena binsankisha to.”

12. Bua tshinyi katuena ne bua kulekela Diabolo utushima?

12 Nansha mudi bantu ba bungi kabayi  bateya ntema ku milayi ya mu Bible, katuena mua kulekela mmuenenu wabu eu ututekesha to. Tudi bamanye bua tshinyi bidi ne mushinga bua kushala batabale. Paulo wakambila bena Kristo nende ne: “Nuenu nkayenu nudi bamanye bimpe ne: dituku dia Yehowa didi dilua.” Wakasakidila ne: “Anu bu mutu muivi ulua butuku.” (Bala 1 Tesalonike 5:1-6.) Yezu mmutudimuije ne: “Nuikale badilongolole, bualu Muana wa muntu udi ulua pa dîba dinudi kanuyi nuelela meji.” (Luka 12:39, 40) Mu katupa kîpi emu, Satana neashime bantu pa kubasaka bua kuela meji ne: kudi “ditalala, ne kakuena bualu bua kutshina” mu bulongolodi ebu. Dîba adi dituku dia Yehowa nedilue diakamue ne nebibatonde bikole. Netuambe tshinyi buetu tuetu? Tuetu basue kuikala pabuipi bua dituku adi ne kubenga kushimibua bu bantu bakuabu, tudi ne bua ‘kushala batabale ne kulama bieledi bietu bia meji bimpe.’ Ke bua tshinyi tudi ne bua kubala Dîyi dia Nzambi dituku dionso ne kuelangana meji pa tshidi Yehowa utuambila.

13. a) Mmunyi mudi nyuma wa pa buloba unyanga bantu? b) Mmunyi mutudi mua kuepuka njiwu eyi?

13 Nyuma wa pa buloba udi ulombola mushindu udi bantu bela meji. Bantu ba bungi lelu badi bela meji ne: kabena dijinga ne kumanya Nzambi. (Matayi 5:3) Kadi badi bafila dîba diabu dia bungi ne makanda abu bua kupeta bintu bia bungi bia mu bulongolodi ebu. (1 Yone 2:16) Lelu kupita ne kumpala kudi mishindu ya bungi ya dijikija lutetuku idi ikoka bantu ne ibasaka bua kunanga masanka ne kukumbaja dijinga dionso didibu nadi. (2 Timote 3:4) Bintu ebi bidi bibueja bantu mu ditanaji bua kubenga kumanya malu adi ne mushinga wa bungi ne kabena bela meji bua malanda abu ne Nzambi. Ke bualu kayi Paulo wakavuluija bena Kristo ne: badi ne bua “kubika ku tulu,” mbuena kuamba ne: kubenga kudifila ku disankisha majinga abu.—Lomo 13:11-14.

Tudi basue bua nyuma wa Nzambi alombole ngelelu wetu wa meji, kadi ki nnyuma wa pa buloba to

14. Ndidimuija kayi didi mu Luka 21:34, 35?

14 Tudi basue bua nyuma wa Nzambi alombole ngelelu wetu wa meji, kadi ki nnyuma wa pa buloba to. Ku butuangaji bua nyuma wende, Yehowa udi utuambuluisha bua kumanya bimpe malu adi enzeka. (1 Kolinto 2:12) [1] (Tangila note ku ndekelu.) Kadi tudi ne bua kuikala badimuke. Nansha malu a pa tshibidilu a mu nsombelu adi mua kutubueja mu ditanaji bua kuenzela Yehowa mudimu. (Bala Luka 21:34, 35.) Bantu bakuabu badi mua kutuamba ne: tudi batatakane bualu tudi tuitaba ne: tudi mu matuku a ku nshikidilu wa ndongoluelu eu. (2 Petelo 3:3-7) Kadi katuena mua kubalekela batutekesha mu mikolo. Tudi ne bijadiki bilelela bia ne: nshikidilu ukadi pa kulua mu katupa kîpi emu. Tuetu basue bua nyuma wa Nzambi atulombole, tudi ne bua kudisangisha pa tshibidilu ne bena Kristo netu.

Udiku wenza muebe muonso bua ‘kushala mutabale’ anyi? (Tangila tshikoso tshia 11-16)

15. a) Ntshinyi tshivua tshifikile Petelo, Yakobo ne Yone? b) Mmunyi mudi bualu ebu mua kutufikila petu?

15 Matekete etu adi enza bua bitukolele bua kushala batabale. Yezu uvua mumanye ne: bantu mbapange bupuangane ne batu ne matekete. Ela meji bua tshivua tshienzeke  butuku kumpala kua yeye kufua. Nansha muvua Yezu mupuangane, uvua mumanye ne: bua kushala ne lulamatu, uvua dijinga ne kulomba Tatuende diambuluisha mu disambila. Yezu wakalomba bapostolo aba: Petelo, Yakobo ne Yone bua kushalabu batabale pavuaye usambila. Kadi bapostolo aba kabavua bajingulule muvuabi ne mushinga bua kushalabu batabale to. Bu muvuabu batshioke, bakalala. Kadi nansha muvua Yezu pende mutshioke, wakashala mutabale ne usambila Tatuende. Bapostolo bavua pabu ne bua kusambila tshikondo atshi.—Mâko 14:32-41.

16. Bilondeshile Luka 21:36, mmunyi muvua mutulongeshe bua ‘kushala batabale’?

16 Ntshinyi tshiatuambuluisha bua ‘kushala batabale’ ne badilongolole bua dituku dia Yehowa? Tudi ne bua kuikala ne dijinga dikole dia kutungunuka ne kuenza malu makane. Kadi kudi bualu bukuabu kabidi. Matuku makese kumpala kua Yezu kufua, wakambila bayidi bende ne: bavua ne bua kutungunuka ne kusambila bua kulomba Yehowa diambuluisha. (Bala Luka 21:36.) Bua tuetu kushala batabale mu tshikondo etshi tshia ku nshikidilu, tudi ne bua kusambila Yehowa misangu yonso.—1 Petelo 4:7.

TUSHALE BATABALE

17. Mmunyi mutudi mua kumanya ne: tudi badilongolole bua tshikala mua kuenzeka mu katupa kîpi emu?

17 Yezu wakamba ne: nshikidilu nealue “pa dîba dinudi kanuyi nuelela meji to.” (Matayi 24:44) Nunku tudi ne bua kuikala badilongolole misangu yonso. Mpindieu ki ntshikondo tshia kuikala ne nsombelu udi bulongolodi bua Satana buamba ne: ke udi upetesha muntu disanka. Etshi ntshilota patupu. Kadi ku diambuluisha dia Bible, Yehowa ne Yezu mbatuambile mutudi mua kushala batabale. Nunku tuteyayi ntema ku milayi ya mu Bible ne mudiyi yenda yikumbana. Tutungunukayi ne kusemena pabuipi ne Yehowa ne kuteka Bukalenge buende pa muaba wa kumpala mu nsombelu wetu. Dîba adi, netuikale badilongolole padi nshikidilu ulua. (Buakabuluibua 22:20) Muoyo wetu mmusuikakajilaku!

^ [1] (tshikoso tshia 14) Tangila nshapita wa 21 mu mukanda wa Bukalenge bua Nzambi budi bukokesha.