Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2016

‘Tudi basue kuya nenu’

‘Tudi basue kuya nenu’

‘Tudi basue kuya nenu, bualu tudi bumvue ne: Nzambi udi nenu.’—ZEKÂYA 8:23, NWT.

MISAMBU: 65, 122

1, 2. a) Ntshinyi tshivua Yehowa muambe tshivua ne bua kuenzeka mu matuku etu aa? b) Nnkonko kayi ituandamuna mu tshiena-bualu etshi? (Tangila tshimfuanyi.)

YEHOWA uvua muambe ne: mu matuku etu aa ‘bantu dikumi ba mu muaku ne mu muaku nebakuate ku luzemba lua tshivualu tshia muena Yuda, bamuambila ne: tudi basue kuya nenu, bualu tudi bumvue ne: Nzambi udi nenu.’ (Zekâya 8:23, NWT) Muena “Yuda” eu udi tshimfuanyi tshia bantu badi Nzambi muele manyi a nyuma muimpe. Badi bababikila kabidi ne: “Isalele wa Nzambi.” (Galatiya 6:16) “Bantu dikumi” badi tshimfuanyi tshia bantu badi ne ditekemena dia kupeta muoyo wa kashidi pa buloba. Mbamanye ne: Yehowa mmubeneshe kasumbu ka bela manyi aka ne mbamone ne: badi ne diakalenga dia kutendelela Nzambi pamue nabu.

2 Anu bu muprofete Zekâya, Yezu wakamba ne: bantu ba Nzambi bavua ne bua kuikala mu buobumue. Wakabikila bantu badi ne ditekemena dia kupeta muoyo mu diulu ne: “kasumbu kakese ka mikoko” ne aba badi ne ditekemena dia kupeta muoyo pa buloba ne: “mikoko mikuabu.” Kadi Yezu wakamba ne: buonso  buabu bavua ne bua kuikala “tshisumbu tshimue” ne bavua ne bua kumulonda yeye ‘mulami wabu umue.’ (Luka 12:32; Yone 10:16) Bu mudiku bisumbu bibidi, bamue bantu badi mua kudiebeja ne: 1) Bidiku ne mushinga bua mikoko mikuabu kumanyayi mêna a bela manyi ba lelu bonso anyi? 2) Mmunyi mudi bela manyi ne bua kudimona? 3) Muena mu tshisumbu tshietu yeye mutuadije kudia diampa ne kunua mvinyo mu Tshivulukilu, mmunyi mundi ne bua kumumona? 4) Bidiku ne bua kuntonda pandi mmona bungi bua bantu badi badia diampa ne banua mvinyo mu Tshivulukilu buenda buvula anyi? Netuandamune nkonko eyi mu tshiena-bualu etshi.

BIDIKU NE MUSHINGA BUA TUETU KUMANYA MÊNA A BELA MANYI BA LELU BONSO ANYI?

3. Bua tshinyi mbikole bua tuetu kumanya bantu bikala munkatshi mua bela manyi 144000?

3 Bidiku ne mushinga bua mikoko mikuabu kumanyayi mêna a bela manyi bonso badi pa buloba lelu anyi? Tòo. Bua tshinyi? Bualu mbikole bua muntu kumanya bikala bela manyi aba mua kupeta difutu diabu. [1] (Tangila note ku ndekelu.) Nansha mudi Nzambi mubabikile bua kuya mu diulu, nebapete difutu diabu anu bobu bashale ne lulamatu. Satana mmumanye bualu ebu, ne udi wenza mudimu ne “baprofete ba dishima” bua “kupambuisha” bela manyi aba. (Matayi 24:24) Muela manyi nansha umue kena mua kumanya bikalaye mua kupeta difutu diende mu diulu to, anu pamujadikila Yehowa ne: mmukumbane bua kuya mu diulu bua lulamatu luende. Yehowa udi umutua tshitampi tshia ndekelu etshi anyi umuanyisha bua musangu wa ndekelu kumpala kua kufuaye peshi katupa kîpi kumpala kua “dikenga dinene” kutuadija.—Buakabuluibua 2:10; 7:3, 14.

Yezu udi Mulombodi wetu, tudi ne bua kumulonda anu yeye

4. Bu mudibi bikole bua kumanya mêna a bela manyi bonso badi pa buloba lelu, mmunyi mutudi mua “kuya” nabu?

4 Bu mudibi bikole bua kumanya mêna a bela manyi bonso badi pa buloba lelu, mmunyi mudi mikoko mikuabu mua “kuya” nabu? Bible udi wamba ne: “Bantu dikumi” bavua ne bua ‘kukuata ku luzemba lua tshivualu tshia muena Yuda, bamuambila ne: tudi basue kuya nenu, bualu tudi bumvue ne: Nzambi udi nenu.’ Mvese eu udi wakula bua muena Yuda umue. Kadi muaku ‘nenu’ udi uleja bantu ba bungi. Ebi bidi biumvuija ne: muena Yuda udi uleja kasumbu kajima ka bela manyi, kadi ki mmuela manyi umue to. Mikoko mikuabu mmimanye bualu ebu ne idi yenzela Yehowa mudimu pamue ne kasumbu aka. Kayena dijinga ne kumanya dîna dia muena mu kasumbu aka yonso ne kumulonda to. Yezu ke Mulombodi wetu, ne Bible udi utuambila ne: tudi ne bua kumulonda anu yeye.—Matayi 23:10.

MMUNYI MUDI BELA MANYI NE BUA KUDIMONA?

5. Ndidimuija kayi didi bela manyi ne bua kuelela meji bikole? Bua tshinyi?

5 Bela manyi badi ne bua kuela meji bikole bua didimuija didi mu 1 Kolinto 11:27-29. (Bala.) Mmunyi mudi muela manyi mua kudia diampa ne kunua mvinyo “mu mushindu udi kawuyi muakanyine” mu Tshivulukilu? Muntu yeye kayi mu malanda mimpe ne  Yehowa ne kayi ne lulamatu kudiye, padiye udia diampa ne unua mvinyo, udi uleja mudiye kayi ne kanemu. (Ebelu 6:4-6; 10:26-29) Didimuija dikole edi didi divuluija bela manyi ne: badi ne bua kuikala ne lulamatu bobu basue kupeta “difutu dia dibikila dia muulu dia Nzambi ku butuangaji bua Kristo Yezu.”—Filipoyi 3:13-16.

6. Mmunyi mudi bena Kristo bela manyi ne bua kudimona?

6 Paulo wakambila bena Kristo bela manyi ne: “Meme muena buloko mu Mukalenge, ndi nnusengelela bua kuenda biakanangane ne dibikila divuabu banubikile.” Mmunyi muvuabu ne bua kuenza nunku? Paulo wakumvuija wamba ne: “Ne didipuekesha dionso ne bupole buonso, ne lutulu, nulekelelangana bilema mu dinanga, nudienzeja ne muoyo umue bua kulama buobumue bua kudi nyuma mu tshisuikidi tshia ditalala.” (Efeso 4:1-3) Nyuma muimpe wa Yehowa udi wambuluisha batendeledi bende bua kuikala ne budipuekeshi, kadi ki mbua kuikala ne lutambishi to. (Kolosayi 3:12) Nunku bela manyi kabena bela meji ne: mbapite bakuabu to. Mbamanye ne: Yehowa kena upesha bela manyi nyuma muimpe wa bungi kupita mudiye upesha batendeledi bende bakuabu to. Kabena bela meji ne: badi bumvua malongesha malelela a mu Bible bikole kupita bakuabu to. Kabena kabidi mua kuambila muntu mukuabu ne: mmuedibue pende manyi ne udi ne bua kutuadija kudia diampa ne kunua mvinyo mu Tshivulukilu to. Kadi badi ne budipuekeshi ne mbamanye ne: anu Yehowa ke udi mua kubikila bantu bua kuya mu diulu.

7, 8. Ntshinyi tshidi bela manyi kabayi ne bua kutekemena kudi bantu bakuabu? Bua tshinyi?

7 Nansha mudi bela manyi bamona ne: badi ne diakalenga dia kuya mu diulu, kabena mua kutekemena bua bantu bakuabu babenzele malu mu mushindu wa pa buawu to. (Efeso 1:18, 19; bala Filipoyi 2:2, 3.) Mbamanye kabidi ne: pavua Yehowa mubele manyi, kavua muambile muntu mukuabu bualu ebu to. Nunku kabiena ne bua kukemesha muela manyi padi bantu bakuabu bamba ne: ki mmuedibue manyi to. Mmumanye ne: Bible udi utulomba bua kubenga kuitaba ne lukasa muntu udi wamba ne: Nzambi mmumupeshe mudimu kampanda wa pa buawu. (Buakabuluibua 2:2) Bu mudi muela manyi kayi ujinga kukoka ntema ya bantu bakuabu bikole kudiye, kena mua kuambila bantu badiye upetangana nabu bua musangu wa kumpala ne: mmuela manyi to. Mu bulelela, kena mua kuambila muntu mukuabu bualu ebu to. Kena mua kuditambisha kabidi bua malu mimpe enzaye mu diulu to.—1 Kolinto 1:28, 29; bala 1 Kolinto 4:6-8.

8 Bena Kristo bela manyi kabena bela meji ne: badi ne bua kupitshisha dîba dia bungi anu ne bela manyi nabu to, bienze bu ne: mbena mu dingumba kampanda. Kabena bakeba bua kutuilangana ne bela manyi bakuabu bua kuyukila bua diedibua diabu dia manyi anyi kutuilangana mu tusumbu bua kulonga Bible to. (Galatiya 1:15-17) Buobumue bua mu tshisumbu budi mua kunyanguka bobu benza nanku. Dîba adi badi benza malu adi abengangana ne nyuma muimpe udi wambuluisha bantu ba Nzambi bua kuikala mu ditalala ne mu buobumue.—Bala Lomo 16:17, 18.

MMUNYI MUUDI NE BUA KUBAMONA?

9. Bua tshinyi udi ne bua kuikala ne budimu bua mushindu uudi umona bantu badi badia diampa ne banua mvinyo mu Tshivulukilu? (Bala kazubu ka ne: “Dinanga ‘kadiena dienza malu a bundu.’”)

9 Mmunyi muudi mua kumona bena Kristo  bela manyi balume ne bakaji? Yezu wakambila bayidi bende ne: “Nuenu bonso nudi bana ba muntu.” Wakatungunuka wamba ne: “Muntu yonso udi udibandisha; nebamupuekeshe, muntu yonso udi udipuekesha, nebamubandishe.” (Matayi 23:8-12) Nunku mbibi bua kuanyisha muntu kunekesha nansha yeye muikale muena Kristo muela manyi. Padi Bible wakula bua bakulu, udi utukankamija bua kuidikija ditabuja diabu, kadi kena utuambila bua tuvuije muntu nansha umue mulombodi wetu to. (Ebelu 13:7) Bulelela Bible udi wamba ne: bamue bakulu ‘mbakumbane bua kupeshibua bunême misangu ibidi.’ Bidi nanku bualu badi “balombola mu mushindu muimpe” ne “benza mudimu mukole mu dîyi ne mu dilongesha,” kadi ki mbualu mbela manyi to. (1 Timote 5:17) Tuetu tutamba kutumbisha bela manyi ne tutuma ntema yetu bikole kudibu, tudi mua kubatondesha nsombelu. Tudi mene mua kubasaka bua kulua bena lutambishi, bualu budi bubi menemene. (Lomo 12:3) Muntu nansha umue wa kutudi ki mmusue bua kuenza bualu kampanda budi mua kufikisha muena Kristo muela manyi ku dienza bualu bubi bua nunku to.—Luka 17:2.

Mmunyi muudi ne bua kumona muntu udi udia diampa ne unua mvinyo mu Tshivulukilu? (Tangila tshikoso tshia 9-11)

10. Mmunyi muudi mua kuleja ne: udi unemeka bena Kristo bela manyi?

10 Mmunyi mutudi mua kuleja ne: tudi tunemeka bantu badi Yehowa muele manyi? Katuena ne bua kubebeja bua kumanya mudibu balue bela manyi to. Ebu mbualu bua muntu nkayende, ne katuena ne bukenji bua kubumanya to. (1 Tesalonike 4:11; 2 Tesalonike 3:11) Katuena ne bua kuela meji ne: babayabu anyi bakaji babu peshi baledi babu ta bena mu dîku diabu badi pabu bela manyi to. Muntu kena upiana ditekemena diende mu dîku diabu to. (1 Tesalonike 2:12) Tudi kabidi ne bua kuepuka bua kuela nkonko idi mua kunyingalaja bakuabu. Tshilejilu, katuena mua kuebeja mukaji wa muela manyi mudiye udiumvua bua muikalaye mua kushala pa buloba bua kashidi kayi ne bayende to. Mu kuamba bulelela, tudi bajadike ne: mu bulongolodi bupiabupia, Yehowa ‘neukutshishe tshintu tshionso tshidi ne muoyo ne diakalengele.’—Musambu 145:16.

11. Mmunyi mutudi tudikuba patudi tuepuka bua ‘kulabidila bantu’ anyi kubanyisha kunekesha?

11 Tuetu katuyi tumona bela manyi bu bapite bakuabu, tudi tudikuba. Mushindu kayi? Bible udi utuambila ne: nekuikale “bana betu ba dishima” mu tshisumbu badi mene mua kudiamba ne: mbela manyi. (Galatiya 2:4, 5; 1 Yone 2:19) Bualu bukuabu, bamue bela manyi kabakushala ne lulamatu to. (Matayi 25:10-12; 2 Petelo 2:20, 21) Kadi tuetu tuepuka bua ‘kulabidila bantu’ anyi kubanyisha kunekesha, katuakubalonda to. Katuakulonda nansha aba badi bela manyi anyi badi bamanyike bikole peshi aba bakadi benzele Yehowa mudimu bidimu bia bungi to. Nunku, bobu bapange lulamatu anyi bumbuke mu tshisumbu, katuakujimija ditabuja dietu kudi Yehowa anyi kulekela kumuenzela mudimu to.—Yuda 16.

BIDI NE BUA KUTUTONDA BUA BUNGI BUABU ANYI?

12, 13. Bua tshinyi kabiena ne bua kututonda bua bungi bua bantu badi badia diampa ne banua mvinyo mu Tshivulukilu?

12 Munkatshi mua bidimu bia bungi, bungi bua bantu bavua badia diampa ne banua mvinyo mu Tshivulukilu buvua buenda bupueka. Kadi matuku aa, bungi ebu budi buenda buvula tshidimu tshionso. Bidi ne bua kututonda anyi? Tòo. Tumonayi bua tshinyi tudi tuamba nanku.

13 “Yehowa mmumanye badi bende.” (2 Timote 2:19) Bana betu badi babala bungi bua bantu badi badia diampa ne banua mvinyo mu Tshivulukilu mbashilangane ne Yehowa bualu bobu ki mbamanye muela manyi mulelela to. Nunku, mu bungi buabu mudi aba badi bela meji ne: mbela manyi pabu kabayi bela manyi to. Tshilejilu, bamue bavua badia diampa ne banua mvinyo bakalekela pashishe. Bakuabu badi mua kuikala ne masama a mitu ne bela meji ne: nebaye kukokesha ne Kristo mu diulu. Bidi bimueneka ne: katuena bamanye menemene bungi bua bela manyi badi bashale pa buloba to.

14. Ntshinyi tshidi Bible wamba bua bungi bua bela manyi bikala pa buloba patuadija dikenga dinene?

14 Nekuikale bela manyi miaba ya bungi pa buloba palua Yezu kubangata bua kuya nabu mu diulu. Bible udi wamba ne: Yezu “neatume banjelu bende ne muadi mukole wa mpungi, nebasangishe bantu bende basungula kaba kamue bafumine ku mpepele inayi, kutuadijila ku ditengu dia diulu too ne ku dikuabu.” (Matayi 24:31) Bible udi uleja kabidi ne: mu matuku a ku nshikidilu, nekuikale bela manyi bakese pa buloba. (Buakabuluibua 12:17) Kadi kena uleja bungi bua bela manyi bikala pa buloba patuadija dikenga dinene to.

15, 16. Ntshinyi tshitudi ne bua kumanya bua bantu 144000 badi Yehowa musungule?

15 Yehowa mmumanye dîba didiye usungula bela manyi. (Lomo 8:28-30) Yehowa wakatuadija kusungula bela manyi panyima pa dibishibua dia Yezu ku lufu. Bidi bimueneka ne: mu bidimu lukama bia kumpala, bena Kristo balelela bonso bavua bela manyi. Munkatshi mua bidimu bia bungi pashishe,  ba bungi ba ku bantu aba bavua badiamba ne: mbena Kristo kabavua bushuwa balonde Kristo to. Nansha nanku, mu bidimu abi, Yehowa wakela bakese ba kudibu bavua bena Kristo balelela manyi. Bavua bu mponda ivua Yezu muambe ivua ne bua kukola munkatshi mua lupela. (Matayi 13:24-30) Mu matuku a ku nshikidilu aa, Yehowa mmutungunuke ne kusungula bantu bua kukumbaja bungi bua bantu 144000. [2] (Tangila note ku ndekelu.) Nunku padi Nzambi wangata dipangadika dia kusungula bamue ba ku bantu aba kumpala kua nshikidilu kuluaye, mbimpe tuitabe ne: tshidiye wenza ntshimpe. (Yeshaya 45:9; Danyele 4:35; bala Lomo 9:11, 16.) [3] (Tangila note ku ndekelu.) Tudi ne bua kuikala ne budimu bua kubenga kuenza malu bu bena mudimu bavua badiabakene bua mushindu uvua mfumu muenzele aba bavua batuadije kuenza mudimu mu dîba dia ndekelu malu.—Bala Matayi 20:8-15.

16 Ki mbonso badi ne ditekemena dia kupeta muoyo mu diulu badi benza “mupika wa lulamatu udi mudimuke”to. (Matayi 24:45-47) Anu bu mu bidimu lukama bia kumpala, Yehowa ne Yezu badi benza mudimu ne bantu bakese bua kudisha anyi kulongesha bantu ba bungi lelu. Bena Kristo bakese bela manyi ba mu bidimu lukama bia kumpala ke bavuabu benze nabu mudimu bua kufunda Mifundu ya tshiena Greke ya bena Kristo. Lelu kabidi, bena Kristo bela manyi bakese ke badi ne mudimu wa kupesha bantu ba Nzambi “biakudia biabu pa dîba diabi.”

17. Ntshinyi tshitudi balonge mu tshiena-bualu etshi?

17 Ntshinyi tshitudi balonge mu tshiena-bualu etshi? Yehowa mmuangate dipangadika dia kupesha bantu ba bungi muoyo wa tshiendelele pa buloba ne kupesha bantu bakokesha ne Yezu muoyo mu diulu. Yehowa udi ufuta batendeledi bende bonso, mmumue ne: “muena Yuda” ne “bantu dikumi,” ne udi ubalomba bua batumikile mikenji ya muomumue ne bua bashale ne lulamatu. Bantu aba bonso badi ne bua kuikala ne budipuekeshi. Bonso badi ne bua kuenzela Nzambi mudimu pamue ne kuikala mu buobumue. Bonso badi ne bua kuenza bua ditalala dikale mu tshisumbu. Bu mudi nshikidilu pabuipi, tuetu bonso tutungunukayi ne kuenzela Yehowa mudimu ne kulonda Kristo bu tshisumbu tshimue tshia mikoko.

^ [1] (tshikoso 3) Bilondeshile Musambu wa 87:5, 6, mu matuku atshilualua, Nzambi udi mua kuleja mêna onso a bantu bakokesha ne Yezu mu diulu.—Lomo 8:19.

^ [2] (tshikoso tshia 15) Nansha mudi Bienzedi 2:33 uleja ne: Yezu udi ne tshidiye wenza padi muntu wedibua manyi, Yehowa ke udi usungula muntu au.

^ [3] (tshikoso tshia 15) Bua kumanya malu makuabu, bala “Nkonko ya babadi” mu Tshibumba tshia Nsentedi tshia 1/5/2007, dibeji dia 30-31.