Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2016

Kuenza mudimu pamue ne Nzambi kudi kufila disanka

Kuenza mudimu pamue ne Nzambi kudi kufila disanka

“Bu mutudi tuenza mudimu pamue nende, tudi kabidi tunusengelela bua kanuitabi ngasa wa Nzambi bua kupangila tshipatshila tshiende nansha.”—2 KOLINTO 6:1.

MISAMBU: 75, 74

1. Nansha mudi Yehowa Mukalenge Mutambe bunene, ntshinyi tshidiye mulombe bantu bakuabu bua kuenza?

YEHOWA mMukalenge Mutambe bunene. Mmufuke bintu bionso, ne udi ne meji ne bukole kabiyi mikalu. Pavuaye muambuluishe Yobo bua kumvuaye bualu ebu, Yobo wakamuambila ne: ‘Ndi mumanye ne: wewe udi ne bukole bua kuenza malu onso, ne kakuena muntu udi mua kukanda bualu buwakupangadija.’ (Yobo 42:2) Yehowa udi mua kuenza tshintu tshionso tshidiye upangadija bua kuenza kayi dijinga ne diambuluisha dia muntu mukuabu. Kadi udi uleja mudiye ne dinanga padiye ulomba bantu bakuabu bua kuenza mudimu pamue nende bua kukumbaja malu adiye mulongolole.

2. Mmudimu kayi munene uvua Yehowa mupeshe Yezu?

2 Nzambi wakafuka Muanende Yezu kumpala kua kufukaye  muntu anyi tshintu kayi tshionso. Pashishe, Yehowa wakanyishila Muanende bua amuambuluishe bua kufuka bintu bikuabu bionso. (Yone 1:1-3, 18) Mupostolo Paulo wakafunda bua Yezu wamba ne: “Ku butuangaji buende bintu bikuabu bionso biakafukibua mu diulu ne pa buloba, bintu bidi bimueneka ne bintu bidi kabiyi bimueneka, nansha biobi bikale nkuasa ya makalenge anyi mamfumu anyi mbulamatadi anyi makokeshi. Bintu bikuabu bionso biakafukibua ku butuangaji buende ne bua bualu buende.” (Kolosayi 1:15-17) Nunku Yehowa uvua mupeshe Muanende mudimu munene, ne wakambila kabidi bantu bakuabu bualu ebu. Edi ndiakalenga dinene be!

3. Ntshinyi tshivua Yehowa mulombe Adama bua kuenza? Bua tshinyi?

3 Yehowa uvua kabidi mulombe bantu bua kuenzabu mudimu pamue nende. Tshilejilu, uvua muambile Adama bua kuinyika nyama mêna. (Genese 2:19, 20) Fuanyikijabi disanka divua Adama nadi pavuaye wenza mudimu eu! Wakalonga ne ntema yonso tshimuenekelu tshia nyama ne muvuaye yenza malu, ne pashishe wakapesha nyama ne nyama yonso dîna. Yehowa uvua mufuke nyama yonso, nunku yeye ke uvua ne bua kuyinyika mêna. Kadi, wakaleja muvuaye munange Adama bikole pakamuanyishilaye bua kuinyika nyama mêna. Nzambi wakapesha kabidi Adama mudimu wa kuvuija buloba bujima mparadizu. (Genese 1:27, 28) Kadi ndekelu wa bionso Adama wakalekela kuenza mudimu pamue Nzambi, ne bualu ebu buakamukebela yeye ne ndelanganyi yende ntatu ya bungi.—Genese 3:17-19, 23.

4. Mmunyi muvua bantu bakuabu benze mudimu pamue ne Nzambi bua kukumbaja disua diende?

4 Panyima pa matuku, Nzambi wakalomba bantu bakuabu bua kuenzabu mudimu pamue nende. Noa wakenza buatu buakamulama yeye ne bena mu dîku diende ne muoyo ku Mvula wa kabutu. Mose wakapatula tshisamba tshia Isalele mu bupika mu Ejipitu. Yoshua wakalombola bena Isalele mu Buloba bulaya. Solomo wakibaka ntempelo mu Yelushalema. Mariya wakalua mamuende wa Yezu. Bena lulamatu aba bonso ne bakuabu ba bungi bakenza mudimu pamue ne Yehowa bua kukumbaja disua diende.

5. Mmudimu kayi utudi mua kuenza? Yehowa uvuaku dijinga anu ne: tumuenzeje mudimu eu anyi? (Tangila tshimfuanyi tshia ntuadijilu.)

5 Lelu, Yehowa udi utulomba bua kuenza muetu muonso bua kutua Bukalenge buende nyama ku mikolo. Kudi mishindu ya bungi itudi mua kuenzela Nzambi mudimu. Nansha mutudi tuetu bonso katuyi mua kumuenzela mudimu mu mushindu wa muomumue, tudi bonso mua kuyisha lumu luimpe lua Bukalenge. Yehowa uvua mua kudienzela nkayende mudimu eu. Uvua mua kuakula ne bantu buludiludi anu mu diulu mudiye amu. Yezu wakamba ne: Yehowa uvua mua kuenza bua mabue ambile bantu bua Mukalenge wa Bukalenge buende. (Luka 19:37-40) Kadi Yehowa mmutuanyishile bua tuikale ‘benzejanganyi nende ba mudimu.’ (1 Kolinto 3:9) Mupostolo Paulo wakafunda ne: “Bu mutudi tuenza mudimu pamue nende, tudi kabidi tunusengelela bua kanuitabi ngasa wa Nzambi bua kupangila tshipatshila tshiende nansha.” (2 Kolinto 6:1) Tudi ne diakalenga dinene dia kuenza mudimu pamue ne Nzambi. Tumonayi amue malu adi enza bua mudimu eu utupeteshe disanka dia bungi.

KUENZA MUDIMU PAMUE NE NZAMBI KUDI KUTUPETESHA DISANKA

6. Mmunyi muvua Muanabute wa Nzambi muleje muvuaye udiumvua bua dienza mudimu ku luseke lua Tatuende?

6 Kuenza mudimu pamue ne Nzambi kutu anu kupetesha batendeledi ba Yehowa disanka.  Kumpala kua Muanabute wa Nzambi kuluaye pa buloba, wakamba ne: ‘Yehowa wakamfuka bu tshibangidilu tshia njila wende. Mvua ku luseke luende bu muena mudimu mupiluke. Mvua muntu uvuaye munange bikole ku dituku ne ku dituku; mvua nsanka kumpala kuende bikondo bionso.’ (Nsumuinu 8:22, 30, NWT) Pavua Yezu wenza mudimu pamue ne Tatuende, uvua ne disanka bualu uvua muenze malu a bungi, ne uvua mumanye ne: Yehowa uvua mumunange. Kadi netuambe tshinyi buetu tuetu?

Ntshinyi tshidi mua kutupetesha disanka kupita kulongesha muntu bulelela? (Tangila tshikoso tshia 7)

7. Bua tshinyi mudimu wa kuyisha udi utupetesha disanka?

7 Yezu wakamba ne: tudi tupeta disanka patudi tupesha bakuabu bintu ne padi bakuabu batupeshabi. (Bienzedi 20:35) Tudi tupeta disanka patudi tupeta bulelela, kadi bua tshinyi kumanyisha bakuabu bulelela kudi kabidi kutupetesha disanka? Bualu tudi tubamona bapeta disanka dilelela padibu bumvua tshidi Bible ulongesha ne batuadija kudia malanda ne Nzambi. Tudi tusanka bikole patudi tubamona bashintulula ngelelu wabu wa meji ne nsombelu wabu. Mudimu wa kuyisha mmudimu wa mushinga mukole, ne mmudimu udi utupetesha disanka dia bungi utudi ne bua kuenza. Udi upetesha bantu badi balua balunda ba Nzambi mushindu wa kupeta muoyo wa tshiendelele.—2 Kolinto 5:20.

8. Ntshinyi tshidi bamue bambe bua disanka didibu bapeta padibu benza mudimu pamue ne Yehowa?

8 Tudi bamanye ne: patudi tuambuluisha bantu bakuabu bua kumanya Nzambi, tudi tusankisha Yehowa, ne udi wangata ne mushinga bionso bitudi tuenza bua kumuenzela mudimu. Bualu ebu budi kabidi butupetesha disanka. (Bala 1 Kolinto 15:58.) Marco udi musombele mu Italie udi wamba ne: “Ndi ne disanka dia bungi mundi mumanye ne: ndi ngenzela Yehowa mudimu ne muanyi muonso, tshiyi ngenzela muntu udi mua kulua kupua muoyo bionso bindi muenze.” Bia muomumue, Franco udi pende wenzela Nzambi mudimu mu Italie udi wamba ne: “Yehowa udi utuvuluija dituku dionso ku diambuluisha dia Dîyi diende ne dia biakudia bia mu nyuma bidiye utupesha ne: mmutunange, ne tshionso  tshitudi tumuenzela tshidi ne mushinga nansha tuetu tumona bitudi tuenza bu bidi tshianana. Ke bualu kayi kuenza mudimu pamue ne Nzambi kudi kumpetesha disanka ne kumpetesha nsombelu wa nsongo.”

KUENZA MUDIMU PAMUE NE NZAMBI KUDI KUTUSEMEJA PABUIPI NENDE NE BANTU BAKUABU

9. Mmalanda a mushindu kayi avua pankatshi pa Yehowa ne Yezu? Bua tshinyi?

9 Patudi tuenza mudimu pamue ne bantu batudi banange, tudi tusemena pabuipi nabu. Tudi tufika ku dimanya malu a bungi adi atangila bumuntu buabu ne ngikadilu yabu. Tudi tumanya bipatshila biabu ne tshidibu benza bua kubikumbaja. Yezu wakenza mudimu pamue ne Yehowa pamuapa munkatshi mua bidimu miliyare ya bungi. Dinanga divua pankatshi pabu diakakola bikole ne kakuvua tshintu tshivua mua kukosa malanda abu nansha. Yezu wakumvuija mushindu uvua malanda abu makole pakambaye ne: “Meme ne Tatu tudi tshintu tshimue.” (Yone 10:30) Bavua bushuwa mu buobumue, ne bavua bambuluishangana bikole pavuabu benza mudimu pamue.

Mudimu wa kuyisha udi ukolesha ditabuja dietu bualu udi utuvuluija milayi ya Nzambi ne mikenji yende mimpe

10. Bua tshinyi mudimu wa kuyisha udi utusemeja pabuipi ne Nzambi ne bantu bakuabu?

10 Yezu wakalomba Yehowa bua kukubaye bayidi bende. Bua tshinyi? Wakasambila ne: “Bua bikale tshintu tshimue anu bu mutudi nebe.” (Yone 17:11) Patudi tutumikila mikenji ya Nzambi ne tuyisha, tudi tumvua bimpe menemene ngikadilu yende mimpe. Tudi tumanya bua tshinyi mbimpe kumueyemena ne kulonda buludiki buende. Patudi tusemena pabuipi ne Nzambi, udi usemena pabuipi netu. (Bala Yakobo 4:8.) Tudi kabidi tusemena pabuipi ne bena Kristo netu balume ne bakaji bualu tudi tupeta ntatu ne masanka bia muomumue ne bualu tudi ne bipatshila bia muomumue. Tudi tuenza mudimu pamue, tusanka pamue ne tutantamena ntatu pamue. Octavia, muanetu wa bakaji udi musombele mu Grande-Bretagne udi wamba ne: “Kuenza mudimu pamue ne Yehowa kudi kunsemeja pabuipi ne bantu bakuabu.” Udi umvuija ne: bidi nanku bualu bulunda buabu mbuimanyine mpindieu pa “bipatshila ne buludiki bia muomumue.” Bushuwa, tudi tudiumvua mushindu wa muomumue. Patudi tumona mudi bana betu badienzeja bua kusankisha Yehowa, bidi bitusemeja pabuipi nabu.

11. Bua tshinyi netutambe kusemena pabuipi menemene ne Yehowa ne bena Kristo netu mu bulongolodi bupiabupia?

11 Dinanga dietu bua Nzambi ne bua bena Kristo netu ndikole mpindieu, kadi neditambe kukola mu bulongolodi bupiabupia. Elabi meji bua midimu yonso mimpe ituenza mu matuku atshilualua! Netuakidile bantu babishibua ku lufu ne netubalongeshe malu a Yehowa. Netuenze kabidi mudimu bua kuvuija buloba mparadizu. Netuikale ne disanka dia kuenza mudimu pamue ne dia kulua bapuangane ku kakese ku kakese mu bukokeshi bua Kristo. Bantu bonso nebatambe kusemena pabuipi menemene ne bakuabu ne nebasemene pabuipi menemene ne Yehowa, wikala mua ‘kukumbaja dijinga dia tshintu tshionso tshidi ne muoyo.’—Musambu 145:16, NWT.

 KUENZA MUDIMU PAMUE NE NZAMBI MBUKUBI

12. Mmunyi mudi mudimu wa kuyisha utukuba?

12 Bidi ne mushinga bua tuetu kulama malanda etu ne Yehowa. Tudi mu ndongoluelu wa Satana ne tudi bapange bupuangane, ke bualu kayi mbipepele bua tuetu kutuadija kuela meji ne kuenza malu anu bu bena panu. Bidi anu bu kuowela mu musulu udi ne muenji wa mâyi udi utusaka bua kuya ku luseke lutudi katuyi basue. Nunku, tudi ne bua kudienzeja bikole bua kuowela ne kuya ku luseke lukuabu. Bia muomumue, tudi ne bua kudienzeja bikole bua kubenga kuidikija bena mu bulongolodi bua Satana. Kadi mmunyi mudi mudimu wa kuyisha utukuba? Patudi tuakula bua Yehowa ne bua Bible, tudi tutuishila mêsu pa malu adi ne mushinga ne adi mimpe, kadi ki mpa malu adi mua kutekesha ditabuja dietu to. (Filipoyi 4:8) Mudimu wa kuyisha udi ukolesha ditabuja dietu bualu udi utuvuluija milayi ya Nzambi ne mikenji yende mimpe. Udi kabidi utuambuluisha bua kulama ngikadilu itudi nayi dijinga bua kudikuba kudi Satana ne bulongolodi buende.—Bala Efeso 6:14-17.

Patudi tuyisha bikole, katuena ne dîba dia kutamba kuela meji bua ntatu itudi nayi to

13. Mmunyi mudi Ntemu kampanda wa mu Australie udiumvua bua mudimu wa kuyisha?

13 Patudi tuyisha bikole, tulonga Bible, ne tuambuluisha bakuabu mu tshisumbu, tudi mu bukubi bualu katuena ne dîba dia kutamba kuela meji bua ntatu itudi nayi to. Joel udi musombele mu Australie udi wamba ne: “Mudimu wa kuyisha udi ungambuluisha bua kumanya malu adi afikila bantu. Udi umvuluija ntatu idi nayi bantu ne malu mimpe andi mupete pandi mutumikile mikenji ya mu Bible mu nsombelu wanyi. Mudimu wa kuyisha mmungambuluishe bua kuikala ne budipuekeshi; udi umpetesha mushindu wa kueyemena Yehowa ne bena Kristo nanyi.”

14. Bua tshinyi tshisumi tshietu mu mudimu wa buambi tshidi tshileja ne: nyuma wa Nzambi udi netu?

14 Kuyisha kudi kutujadikila kabidi ne: nyuma wa Nzambi udi netu. Tshilejilu, ela meji ne: udi ne mudimu wa kupesha bantu mampa muaba uudi musombele. Kabena bakufuta bua mudimu eu anyi bakupingajila makuta audi mutule to. Bantu ba bungi ki mbasue mampa ne bamue badi mene bakukina bua muudi ubatuadilawu. Neutungunuke ne kuenza mudimu wa nunku munkatshi mua matuku bungi kayi? Diakamue neutekete mu maboko, ne pamuapa ­neuwulekele ne lukasa. Kadi, ba bungi ba kutudi badi batungunuka ne kuyisha tshidimu tshionso nansha mudi mudimu eu ulomba dîba ne makuta, ne nansha mudi bantu batuseka anyi batufiikila munda. Bualu ebu budi buleja ne: nyuma wa Nzambi udi utuambuluisha.

KUENZA MUDIMU PAMUE NE NZAMBI KUDI KULEJA MUTUDI BAMUNANGE NE BANANGE BANTU

15. Mmunyi mudi kuyisha lumu luimpe kupetangana ne malu adi Nzambi mulongolole bua bantu?

15 Mmunyi mudi mudimu wa buambi upetangana ne malu adi Yehowa mulongolole bua bantu? Nzambi uvua mulongolole bua bantu bikale ne muoyo wa kashidi, ne dijinga diende edi kadivua dishintuluke pavua Adama muenze bubi to. (Yeshaya 55:11) Nzambi wakalongolola bua kutupikula ku bubi ne ku lufu. Mushindu  kayi? Yezu wakalua pa buloba ne kulambulaye muoyo wende. Kadi bua mulambu eu kuambuluishawu bantu, bavua ne bua kutumikila Nzambi. Ke bualu kayi Yezu wakalongesha bantu tshivua Nzambi ubalomba bua kuenza ne kutuminaye bayidi bende dîyi bua kuenzabu pabu mudimu eu. Patudi tuyisha, tudi tuambuluisha bantu bakuabu bua kuluabu balunda ba Nzambi lelu, tudi tuenza mudimu pamue ne Nzambi buludiludi mu malu mimpe adiye mulongolole bua kusungila bantu ku bubi ne ku lufu.

16. Mmunyi mudi mudimu wa kuyisha upetangana ne mikenji minene ya Nzambi?

16 Patudi tuambuluisha bantu bakuabu bua kupeta njila udi ufikisha ku muoyo wa tshiendelele, tudi tuleja ne: tudi babanange ne banange Yehowa. ‘Mmusue bua bantu ba mishindu yonso basungidibue ne bafike ku dimanya dijalame dia bulelela.’ (1 Timote 2:4) Pavua Mufalese kampanda muebeje Yezu bua kumanya mukenji udi mutambe mikuabu, Yezu wakamba ne: “‘Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso.’ Eu ke mukenji munene ne wa kumpala. Muibidi udi mufuanangane nawu udi ne: ‘Udi ne bua kunanga muntu nebe bu muudi mudinange.’” (Matayi 22:37-39) Patudi tuyisha lumu luimpe, tudi tutumikila mikenji eyi.—Bala Bienzedi 10:42.

17. Mmunyi muudi udiumvua bua diakalenga dia kuyisha lumu luimpe?

17 Tudi ba diakalenga! Yehowa mmutupeshe mudimu udi utupetesha disanka, udi utusemeja pabuipi nende ne bena Kristo netu, ne udi ukuba malanda etu nende. Udi utupesha kabidi mushindu wa kuleja mutudi banange Nzambi ne bantu. Yehowa udi ne batendeledi bende miliyo ya bungi pa buloba bujima, ne buonso buabu badi ne nsombelu mishilangane. Kadi nansha tuetu tutshidi bansonga anyi tukadi bakulakaje, babanji anyi bapele, bikale ne makanda a mubidi anyi katuyi nawu, tudi tudienzeja bua kuambila bantu bakuabu malu atudi tuitabuja. Tudi tudiumvua anu bu Chantel wa mu France udi wamba ne: “Muntu mutambe bunene wa diulu ne buloba, Mufuki wa bintu bionso, Nzambi wa disanka udi ungambila ne: ‘Ndaku! Akula! Akula bua bualu buanyi, amba malu adi afumina mu muoyo webe. Ndi nkupesha bukole buanyi, Bible Dîyi dianyi, diambuluisha dia mu diulu, benzejanganyi nebe ba mudimu pa buloba, nenkulongeshe ku kakese ku kakese, ne nenkuleje malu masunguluke a kulonda mu tshikondo tshiakanyine.’ Edi ndiakalenga dinene dia kuenza malu adi Yehowa utulomba ne dia kuenza mudimu pamue ne Nzambi wetu!”