Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2016

‘Dipa didi Nzambi mufile tshianana didi kadiyi kuamba’ dinuenzeje

‘Dipa didi Nzambi mufile tshianana didi kadiyi kuamba’ dinuenzeje

“Tudi tuela Nzambi tuasakidila bua dipa diende difila tshianana didi kadiyi kuamba.”—2 KOLINTO 9:15.

MISAMBU: 121, 63

1, 2. a) ‘Dipa didi Nzambi mufile tshianana didi kadiyi kuamba’ didi dikongoloja malu kayi? b) Nnkonko kayi ituandamuna mu tshiena-bualu etshi?

YEHOWA wakatupesha dipa ditambe bunene didi dileja mudiye mutunange pakatumaye Muanende wa mushinga mukole Yezu pa buloba. (Yone 3:16; 1 Yone 4:9, 10) Mupostolo Paulo wakabikila dipa edi ne: ‘Dipa difila tshianana didi kadiyi kuamba.’ (2 Kolinto 9:15) Bua tshinyi mmudibikile mushindu eu?

2 Paulo uvua mumanye ne: mulambu wa Yezu udi tshijadiki tshia ne: milayi mimpe yonso ya Nzambi neyikumbane bulelela. (Bala 2 Kolinto 1:20.) Ebi bidi biumvuija ne: ‘dipa didi Nzambi mufile tshianana didi kadiyi kuamba’ didi dikongoloja mulambu wa Yezu ne buimpe buonso ne dinanga dia lulamatu bidi Yehowa utuleja. Mbikole bua kumvuija dipa dia mushinga mukole edi mu mushindu utudi mua kumvua bimpe menemene. Dipa dia pa buadi edi didi ne bua kutusaka bua kudiumvua mushindu kayi? Ntshinyi tshidi dipa edi ditusaka bua kuenza patudi tudilongolola bua Tshivulukilu tshia  lufu lua Yezu tshienzeka mu Disatu dia 23 ngondo 3 mu 2016?

DIPA DIA NZAMBI DIA PA BUADI

3, 4. a) Utu umvua bishi patu muntu ukupesha tshintu kampanda? b) Mmunyi mudi tshienzedi tshia pa buatshi mua kushintulula nsombelu webe?

3 Tutu tusanka bikole padi muntu utupesha tshintu kampanda. Kadi bimue bintu bidibu batupesha bitu ne mushinga wa bungi anyi bia pa buabi, bifika too ne ku dishintulula nsombelu wetu. Tshilejilu, elabi meji ne: udi muenze bualu kampanda bubi. Badi bakukosela tshibawu tshia lufu. Diakamue, muntu uudi kuyi mumanye udi witaba bua bamunyoke pa muaba webe. Udi witaba bua kufua pa muaba webe! Mmunyi muudi mua kudiumvua bua tshienzedi tshia pa buatshi etshi?

4 Tshienzedi tshia dinanga ne tshia pa buatshi etshi netshikusake bua kushintulula nsombelu webe. Pamuapa udi kabidi mua kudiumvua muenzejibue bua kupesha bakuabu bintu, kubananga ne kufuila muntu yonso udi mukuenzele bualu kampanda bubi luse. Mu nsombelu webe yonso mujima, neujinge kuleja ne: udi ne dianyisha bua mulambu uvuabu bafile bua bualu buebe au.

5. Mmunyi mudi dipa dia Nzambi dia tshia kupikula natshi ditambe bunene kupita dipa kayi dikuabu dionso?

5 Dipa dia Nzambi dia tshia kupikula natshi nditambe bunene kupita dipa dia mu tshilejilu etshi. (1 Petelo 3:18) Elabi meji bua bualu ebu, tuetu bonso tudi bapiane bubi kudi Adama, ne dinyoka dia bubi ebu ndufu. (Lomo 5:12) Dinanga diakasaka Yehowa bua kutumaye Yezu pa buloba bua kufuila bantu bonso, bua “alabuile muntu yonso lufu.” (Ebelu 2:9) Kadi mulambu wa Yezu newenze malu makuabu a bungi. Neujimije lufu bua kashidi. (Yeshaya 25:7, 8; 1 Kolinto 15:22, 26) Muntu yonso udi uleja ditabuja kudi Yezu neasombe mu ditalala ne neikale ne disanka bua kashidi. Bamue nebikale bakalenge pamue ne Kristo mu diulu ne bakuabu nebikale pa buloba babakokesha kudi Bukalenge bua Nzambi. (Lomo 6:23; Buakabuluibua 5:9, 10) Mmasanka kayi makuabu adi dipa dia Yehowa dikongoloja?

6. a) Mmasanka kayi adi dipa dia Yehowa dikupetesha audi muindile ne muoyo kuulu kuulu? b) Tela malu asatu adi dipa dia Nzambi ditusaka bua kuenza.

6 Mu malu adi dipa dia Nzambi dikongoloja mudi kabidi dilua dia buloba mparadizu, dijikija masama ne dibishibua dia bantu ku lufu. (Yeshaya 33:24; 35:5, 6; Yone 5:28, 29) Tudi banange Yehowa ne Muanende munanga bua mudibu batupeshe ‘dipa difila tshianana didi kadiyi kuamba’ edi. Dipa edi neditusake bua kuenza tshinyi? Neditusake bua 1) kuidikija Yezu Kristo bimpe bimpe, 2) kunanga bena Kristo netu ne 3) kufuila bakuabu luse ne muoyo mujima.

“DINANGA DIA KRISTO DIDI DITUENZEJA”

7, 8. Mmunyi mutudi ne bua kudiumvua bua dinanga dia Kristo? Didi ne bua kutusaka bua kuenza tshinyi?

7 Tshia kumpala, tudi ne bua kudiumvua basakibue bua kuenza malu adi aleja ne: tudi tunemeka Yezu. Mupostolo Paulo wakamba ne: “Dinanga dia Kristo didi dituenzeja.” (Bala 2 Kolinto 5:14, 15.) Paulo uvua mumanye ne: tuetu bitabe dinanga dikole dia Yezu, nedituenzeje anyi neditusake bua kunanga Yezu ne kumunemeka. Eyowa, patudi tumvua menemene malu adi Yehowa mutuenzele, dinanga diende neditusake bua kuikala ne nsombelu udi uleja ne: tudi tunemeka Yezu. Mmunyi mutudi mua kuenza nanku?

8 Dinanga ditudi nadi bua Yehowa neditusake bua kuidikija tshilejilu tshia Yezu ne kulonda mu makasa ende bimpe bimpe. (1 Petelo 2:21; 1 Yone 2:6) Patudi tutumikila Nzambi ne Kristo, tudi tuleja mutudi babanange. Yezu wakamba ne: “Muntu udi ne mikenji yanyi, uyitumikila, yeye ke udi munnange. Muntu udi  munnange nebamunange kudi Tatu wanyi, nemmunange kabidi, ne nendileje patoke kudiye.”—Yone 14:21; 1 Yone 5:3.

9. Tudi mua kudimona benzejibue bua kuenza tshinyi?

9 Mu tshikondo etshi tshia Tshivulukilu, mbimpe tuelangane meji bua malu atudi tuenza mu nsombelu wetu. Nunku diebeja ne: ‘Mmalu kayi ankadi ngenza bua kuidikija Yezu? Mmalu kayi andi ne bua kuakaja?’ Mbimpe tuetu kudiela nkonko eyi bualu bena panu mbasue bua tuenze malu bu mudibu benza. (Lomo 12:2) Tuetu katuyi badimuke, tudi mua kudimona benzejibue bua kutuadija kuidikija bena malu a nkindi ba pa buloba ebu, bantu bende lumu ne badi batumbe mu malu a manaya. (Kolosayi 2:8; 1 Yone 2:15-17) Ntshinyi tshidi mua kutuambuluisha bua kubenga kulonda bantu aba?

10. Nnkonko kayi itudi mua kudiela mu tshikondo tshia Tshivulukilu? Mandamuna a nkonko eyi adi mua kutusaka bua kuenza tshinyi? (Tangila tshimfuanyi tshia ntuadijilu.)

10 Mbimpe bua tuetu kukeba dîba mu tshikondo tshia Tshivulukilu bua kutangila bimpe bilamba bitudi nabi, filme itudi tumona, mizike itudi tuteleja ne kabidi malu adi mu ordinatere wetu, mu telefone anyi mu tablete wetu. Diebeja ne: ‘Bu Yezu muikale muaba eu ne mumone bilamba bindi mvuala, mvuaku mua kudiumvua bundu anyi?’ (Bala 1 Timote 2:9, 10.) ‘Bilamba bianyi bivuaku mua kuleja ne: ndi muyidi wa Kristo anyi? Yezu uvuaku mua kujinga bua kutangila filme indi nayi anyi? Uvuaku mua kuteleja mizike indi nayi anyi? Bu Yezu mundombe bua kuanji kumupesha telefone anyi tablete wanyi, mvuaku mua kumvua bundu bua bivuaye mua kumonamu anyi? Bivuaku mua kunkolela bua kumvuija Yezu bua tshinyi ntu munange kunaya manaya a video anyi?’ Dinanga ditudi nadi bua Yehowa didi ne bua kutusaka bua kulekela tshintu tshionso tshidi katshiyi tshikumbanyine muena Kristo nansha tshiotshi tshia mushinga kayi. (Bienzedi 19:19, 20) Patuvua badilambule kudi Yehowa, tuvua bamulaye bua kuenza malu adi aleja mutudi tunemeka Kristo. Nunku, katuena ne bua kulama tshintu kayi tshionso tshidi mua kutupangisha bua kuidikija Yezu to.—Matayi 5:29, 30; Filipoyi 4:8.

11. a) Dinanga ditudi nadi bua Yehowa ne bua Yezu didi ditusaka bua kuenza tshinyi mu mudimu wa kuyisha? b) Mmunyi mudi dinanga ditudi nadi ditusaka bua kuambuluisha bena Kristo netu mu tshisumbu?

11 Dinanga ditudi nadi bua Yezu didi ditusaka bua kuyisha bantu ne kubalongesha ne tshisumi. (Matayi 28:19, 20; Luka 4:43) Mu tshikondo tshia Tshivulukilu, kuenaku mua kulongolola malu bua kulua mpanda-njila muambuluishi bua kuenza mêba 30 peshi 50 anyi? Tatu kampanda wa bidimu 84 ukadi mufuishe mukajende wakela meji ne: kavua ne mushindu wa kulua mpanda-njila to, bualu ukavua mukulakaje ne muikale ne tusamasama. Kadi, bampanda-njila ba muaba uvuaye bakajinga bua kumuambuluisha. Bavua bamufutshila njila ne bakamupesha teritware uvuaye mua kuyisha bimpe. Bu tshipeta, muanetu eu wakakumbaja tshipatshila tshiende tshia mêba 30. Udiku mua kuambuluisha muanetu kampanda mu tshisumbu tshienu bua kuluaye mpanda-njila muambuluishi mu ngondo 3 peshi 4 anyi? Bushuwa, ki mmuntu yonso udi mua kulua mpanda-njila to, kadi tudi mua kuenza mudimu ne dîba dietu ne makanda etu bua kuvudija mudimu utudi tuenzela Yehowa. Tuetu benze nunku, netuleje anu bu Paulo ne: dinanga dia Yezu didi dituenzeja. Dinanga dia Nzambi neditusake bua kuenza kabidi tshinyi?

TUDI BENZEJIBUE BUA KUNANGANGANA

12. Dinanga dia Nzambi didi ditusaka bua kuenza tshinyi?

12 Tshibidi, dinanga dia Nzambi didi ne bua kutusaka bua kunanga bena Kristo netu. Mupostolo Yone wakafunda ne: “Bananga, bikala Nzambi mutunange mushindu eu, nunku tuetu petu tudi benzejibue bua  kunangangana.” (1 Yone 4:7-11) Ke bualu kayi, tuetu basue bua Yehowa atunange, tudi ne bua kunanga bena Kristo netu. (1 Yone 3:16) Mmushindu kayi utudi ne bua kubaleja dinanga?

13. Ntshilejilu kayi tshivua Yezu mushiye tshia kunanga bakuabu?

13 Tshilejilu tshia Yezu tshidi tshituleja mushindu utudi mua kunanga bakuabu. Pavuaye pa buloba, wakambuluisha bantu nangananga bantu bapuekele. Wakuondopa masama, bulema, kutabeja mpofu, kujukula matshi a bampudi matshi ne kuakuisha tumama. (Matayi 11:4, 5) Yezu uvua mushilangane ne bamfumu ba bitendelelu bualu uvua musue kulongesha bantu bavua basue kulonga malu a Nzambi. (Yone 7:49) Uvua munange bantu bapuekele abu, kudienzejaye bikole bua kubambuluisha.—Matayi 20:28.

Kuenaku mua kuyisha ne muanetu ukadi mukulakaje bua kumuambuluisha anyi? (Tangila tshikoso tshia 14)

14. Ntshinyi tshiudi mua kuenza bua kuleja bena Kristo nebe dinanga?

14 Tshikondo tshia Tshivulukilu tshidi kabidi tshikondo tshimpe tshia kuela meji bua muudi mua kuambuluisha bena Kristo nebe balume ne bakaji ba mu tshisumbu tshienu, nangananga bakulakaje. Kuenaku mua kuya kutangila bana betu aba anyi? Kuenaku mua kubatuadila tshiakudia, kubenzeja midimu ya ku nzubu, kubambuluisha bua kufika mu bisangilu anyi kuyisha nabu anyi? (Bala Luka 14:12-14.) Mbimpe dinanga dia Nzambi dikusake bua kunanga bena Kristo nebe.

TULEJAYI BENA KRISTO NETU LUSE

15. Mbualu kayi butudi ne bua kuitaba?

15 Tshisatu, dinanga didi ditusaka bua kufuila bana betu ba balume ne ba bakaji luse. Tuetu bonso tudi bapiane bubi ne lufu kudi Adama, nunku muntu nansha umue kena mua kuamba ne: “Tshiena dijinga ne mulambu wa tshia kupikula natshi to.” Nansha mutendeledi wa Nzambi udi ne lulamatu lukole udi dijinga ne dipa dia tshia kupikula natshi. Mbalekeele yonso wa kutudi dibanza dinene divuaye nadi. Bua tshinyi bidi ne mushinga bua kuitaba bualu ebu? Tudi tupeta diandamuna mu tshimue tshia ku bilejilu bia Yezu.

16, 17. a) Tshilejilu tshia Yezu tshia mfumu ne bapika bende tshidi tshitulongesha tshinyi? b) Dielangana meji bua tshilejilu tshia Yezu ndikusake bua kuenza tshinyi?

16 Yezu wakafila tshilejilu tshia mfumu uvua mulekeele mupika wende uvua ne dibanza dinene dia ndenaliyo miliyo 60. Kadi pashishe, mupika eu wakabenga kulekeela mupika nende uvua ne dibanza diende dikese menemene dia ndenaliyo 100. Luse luvua mfumuende mumumvuile luvua ne bua kumusaka bua kufuilaye pende mupika nende luse. Mfumuende wakafiika munda bikole pakumvuaye ne: mupika uvuaye mulekeele dibanza au kavua mulekeele pende muinende dibanza dikese divuaye nadi to. Wakamba ne: “Wewe mupika mubi, mvua mukulekeele dibanza dionso diuvua nadi pauvua mundombe. Kuvuaku mua kumvuila mupika nebe luse bu mumvua mukumvuile pebe luse anyi?” (Matayi 18:23-35, note) Anu bu mfumu eu, Yehowa mmutulekeele dibanza dinene. Dinanga dia Yehowa ne luse luende bidi ne bua kutusaka bua kuenza tshinyi?

17 Patudi tudilongolola bua Tshivulukilu, mbimpe  tudiebeje ne: ‘Kudiku muanetu udi munnyingalaje anyi? Mbinkolele bua kumufuila luse anyi?’ Biobi nanku, etshi ke tshikondo tshimpe tshia kuidikija Yehowa, Nzambi udi ‘musue kubuikidila bantu mibi yabu.’ (Nehemiya 9:17; Musambu 86:5) Tuetu ne dianyisha bua mudi Yehowa ne luse lua bungi, netufuile bakuabu luse ne muoyo mujima. Tuetu katuyi banange bana betu ne katuyi tubafuila luse, Yehowa kakutunanga ne kutufuila petu luse to. (Matayi 6:14, 15) Patudi tufuila bakuabu luse, malu adibu batuenzele adi anu mua kutusama ku muoyo, kadi kuenza nunku nekutuambuluishe bua kuikala ne disanka mu matuku atshilualua.

18. Mmunyi muvua dinanga dia Nzambi diambuluishe muanetu wa bakaji kampanda bua kubenga kuimanyina pa bilema bia muanetu wa bakaji mukuabu?

18 Bidi mua kutukolela bua kubenga kuimanyina pa bilema bia bana betu ba balume ne ba bakaji. (Bala Efeso 4:32; Kolosayi 3:13, 14.) Ke tshivua tshifikile muanetu wa bakaji kampanda diende Lily. [1](Tangila note ku ndekelu.) Uvua muambuluishe mukaji mukamba kampanda diende Carol. Tshilejilu, uvua wambula Carol mu mashinyi bua kuya kumufila muaba wonso uvuaye musue kuya, uya kumusumbila bintu bionso bivuaye nabi dijinga ne umuenzela malu makuabu a bungi. Nansha muvua Lily wenza bionso ebi, Carol uvua anu ubipisha bivua wenza, ne imue misangu kabivua bipepele bua kumuambuluisha to. Kadi wakimanyina pa ngikadilu mimpe ivua nayi Carol, ne kumuambuluishaye munkatshi mua bidimu ndambu too ne pakasama Carol bikole ne kufua. Nansha muvuabi bikole bua Lily kuambuluisha Carol, udi wamba ne: “Ndi muindile ne muoyo kuulu kuulu bua kumonangana ne Carol pabishabu bantu ku lufu. Ndi musue kumumanya bimpe paluaye mupuangane.” Bushuwa, dinanga dia Nzambi didi mua kutusaka bua kubenga kuimanyina pa bilema bia bana betu ba balume ne ba bakaji ne bua kuindila ne muoyo kuulu kuulu tshikondo tshikala dipanga bupuangane mua kujika kashidi.

19. ‘Dipa dia Nzambi difila tshianana didi kadiyi kuamba’ nedikusake bua kuenza tshinyi?

19 Bushuwa, Yehowa mmutupeshe ‘dipa difila tshianana didi kadiyi kuamba.’ Tuikalayi ne dianyisha misangu yonso bua dipa edi. Tshikondo tshia Tshivulukilu ntshikondo tshimpe tshia kuelangana meji bua malu onso adi Yehowa ne Yezu batuenzele. Dinanga diabu kutudi ditusake bua kuidikija Yezu bimpe bimpe, kunanga bena Kristo netu ne kufuila bana betu ba balume ne ba bakaji luse ne muoyo mujima.

^ [1] (tshikoso tshia 18) Tudi bashintulule amue mêna mu tshiena-bualu etshi.