Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 12 2016

Upuila Yehowa ntatu yebe yonso

Upuila Yehowa ntatu yebe yonso

“Nupuile [Yehowa] ntatu yenu yonso, bualu udi uditatshisha bua bualu buenu.”—1 PETELO 5:7.

MISAMBU: 60, 23

1, 2. a) Bua tshinyi tutu tupeta tunyinganyinga? (Tangila tshimfuanyi tshia ntuadijilu tshia tshiena-bualu.) b) Mmalu kayi atuakonkonona mu tshiena-bualu etshi?

LELU, Satana “udi unyunguluka bu ntambue udi ukungula, ukeba bua kudia muntu.” (1 Petelo 5:8; Buakabuluibua 12:17) Ke bualu kayi, nsombelu mmuwule ne malu adi abungamija, nansha batendeledi ba Nzambi batu bapeta tunyinganyinga. Batendeledi ba Nzambi ba kale bavua pabu bapete tunyinganyinga. Tshilejilu, Bible udi wamba ne: mukalenge Davidi uvua ne kanyinganyinga tshimue tshikondo. (Musambu 13:2) Mupostolo Paulo uvua ‘usamisha lungenyi bua bisumbu bionso.’ (2 Kolinto 11:28) Kadi ntshinyi tshitudi mua kuenza padi tunyinganyinga tutupita bukole?

2 Tatu wetu wa mu diulu udi ne dinanga uvua muambuluishe batendeledi bende ba kale bua kupeta disulakana ku tunyinganyinga tuabu, ne mmusue kutuenzela bia muomumue lelu. Bible udi utuambila ne: “Numupuile ntatu yenu yonso, bualu udi uditatshisha bua bualu buenu.” (1 Petelo 5:7) Kadi mmunyi mutudi mua kuenza nanku? Tukonkononayi mishindu inayi eyi: 1) disambila, 2) kubala Dîyi dia Nzambi ne kuelangana meji, 3) lekela  nyuma muimpe wa Yehowa akuambuluishe ne 4) kuambila muntu uudi weyemena muudi udiumvua. Patudi tukonkonona mishindu inayi eyi, keba bua kumona miaba iudi mua kuakaja.

‘TEKA BUJITU BUEBE PAMBIDI PA YEHOWA’

3. Mmunyi muudi mua ‘kuteka bujitu buebe pambidi pa Yehowa’?

3 Mushindu wa kumpala utudi mua kupuila Yehowa ntatu yetu mpa kuenza disambila ne muoyo mujima. Paudi ne tunyinganyina, Tatu webe wa mu diulu udi ne dinanga mmusue bua umuleje muudi udiumvua mu muoyo webe. Mufundi wa Misambu Davidi wakalomba Yehowa ne: ‘Nzambi, teleja matshi ku kulomba kuanyi.’ Wakamba kabidi mu musambu eu ne: ‘Teka bujitu buebe pambidi pa Yehowa, ne yeye neakukoleshe.’ (Musambu 55:1, 22) Wewe mumane kuenza tshionso tshiudi mua kuenza bua kujikija lutatu luebe, kusambila Yehowa ne muoyo mujima nekukuambuluishe bikole pamutu pa kusamisha mutu. Kadi mmunyi mudi disambila mua kukuambuluisha? Mmunyi mudidi mua kutuambuluisha bua katumvu ne: tunyinganyinga ntutupite bukole?—Musambu 94:18, 19.

4. Bua tshinyi disambila didi ne mushinga wa bungi patudi ne tunyinganyinga?

4 Bala Filipoyi 4:6, 7. Mmunyi mudi Yehowa wandamuna masambila etu atudi tuenza ne muoyo mujima ne dinanukila? Udi mua kutuambuluisha bua kudiumvua bimpe ne kuepuka ngenyi mibi ne meji mabi. Pamutu pa tuetu kuikala ne tunyinganyinga ne buôwa, Nzambi udi utuambuluisha bua kuikala ne ditalala dia mu muoyo ditudi katuyi mua kupeta muaba mukuabu. Bana betu ba bungi ba balume ne ba bakaji mbapete ditalala edi. Udi pebe mua kudipeta. “Ditalala dia Nzambi” didi mua kukuambuluisha bua kutantamena lutatu kayi luonso. Udi mua kueyemena ne muoyo mujima mulayi wa Yehowa eu: ‘Kukenzakanyi bua buôwa nansha, bualu bua ndi Nzambi webe; nenkukoleshe, bulelela, nenkukuatshishe.’—Yeshaya 41:10.

DITALALA DIA MU MUOYO DIDI DIFUMINA MU DÎYI DIA NZAMBI

5. Mmunyi mudi Dîyi dia Nzambi mua kukuambuluisha bua kupeta ditalala dia mu muoyo?

5 Mushindu muibidi wa kupeta ditalala dia mu muoyo nkubala Bible ne kuelangana meji. Bua tshinyi kuenza nunku kudi ne mushinga? Bualu Bible n’Dîyi dia Nzambi. Didi ne mibelu mimpe ya meji ya kudi Mufuki wetu. Nansha wewe ne tunyinganyinga tua mushindu kayi, udi mua kuela meji bikole bua mudi Nzambi umona malu ne kuelangana meji bua mudi mibelu yende mua kukukolesha. Kuenza nunku kudi mua kukuambuluisha bua kutantamena tunyinganyinga, kutukepesha anyi mene kutuepuka. Yehowa uvua muleje mudi kubala Dîyi diende kupetangana ne kuikala “ne bukole ne mutshima wa dikima” kadi kakuyi kupetangana ne ‘kutshina anyi kukuatshika buôwa.’—Yoshua 1:7-9.

6. Mmunyi mudi mêyi a Yezu mua kukuambuluisha?

6 Tudi tubala mu Dîyi dia Nzambi mushindu uvua Yezu uyukila ne bantu. Bavua basue kumuteleja bualu mêyi ende avua akolesha bantu ne abakankamija, nangananga aba bavua batekete anyi bavua babungame. (Bala Matayi 11:28-30.) Yezu uvua uditatshisha bikole bua muvua bakuabu badiumvua. (Mâko 6:30-32) Anu muvua Yezu mulaye bua kuambuluisha bapostolo bavuaye wenza nabu ngendu, neatuambuluishe petu lelu. Katuena dijinga ne kuikala ne Yezu ku buntu bua kupeta diambuluisha edi to. Bu mudi Yezu Mukalenge mu diulu, udi utungunuka ne kutuleja dinanga. Nunku, paudi ne tunyinganyinga, manya ne: neikale pabuipi nebe ne neakuambuluishe mu tshikondo tshiakanyine. Yezu udi utupesha ditekemena ne dikima biatuambuluisha bua kutantamena tunyinganyinga tuetu.—Ebelu 2:17, 18; 4:16.

 NGIKADILU IDI IFUMINA KU NYUMA WA NZAMBI

7. Mmunyi mudi nyuma muimpe wa Nzambi utuambuluisha?

7 Yezu uvua mulaye ne: Tatu wetu neatupeshe nyuma muimpe tuetu bamulombe. (Luka 11:10-13) Mushindu muisatu wa kukepesha tunyinganyinga eu udi mua kutuambuluisha mushindu kayi? Nyuma muimpe wa Nzambi anyi bukole buende buenzeji budi butuambuluisha bua kupeta ngikadilu mimpe idi nayi Nzambi wetu wa bukole buonso. (Kolosayi 3:10) Mu Bible, badi babikila ngikadilu eyi ne: “dimuma dia nyuma.” (Bala Galatiya 5:22, 23.) Patudi tupeta ngikadilu mimpe eyi, malanda etu ne bakuabu adi alengela, ne netuepuke nsombelu idi mua kutukebela tunyinganyinga. Tumonayi mishindu misunguluke idi dimuma dia nyuma mua kutuambuluisha.

8-12. Mmunyi mudi dimuma dia nyuma muimpe wa Nzambi mua kukuambuluisha?

8 “Dinanga, disanka, ditalala.” Paudi unemeka bakuabu, neumone mudi tunyinganyinga tuebe tukepa. Mushindu kayi? Wewe ne dinanga dia bana benu, ne mubanange bikole ne upesha bakuabu bunême, udi mua kuepuka misangu ya bungi nsombelu idi mua kukupetesha tshiji, didiumvua bibi ne dibungama. Ebi nebikuambuluishe bua kuikala mu ditalala ne bakuabu.—Lomo 12:10.

9 “Muoyo mule, bulenga, buimpe.” Bible udi wamba ne: “Nuikale nuenzelangana malu mimpe, nuditeka pa muaba wa bakuabu ne muoyo mujima, nufuilangana luse ne muoyo mujima.” (Efeso 4:32) Patudi tutumikila mubelu eu, netuikale mu malanda mimpe ne bakuabu, ne netuepuke nsombelu idi mua kutukebela tunyinganyinga. Nebikale kabidi bipepele bua kupita bimpe ne nsombelu idi mua kutufikila bua mutudi bapange bupuangane.

10 “Ditabuja.” Lelu, tutu pa tshibidilu tuditatshisha bua makuta ne bintu bia ku mubidi. (Nsumuinu 18:11) Mmunyi mutudi mua kuepuka tunyinganyinga tua mushindu eu? Tudi ne bua kutumikila mubelu wa mupostolo Paulo wa ‘kusanka ne bintu bitudi nabi.’ Tuetu ne ditabuja dikole kudi Yehowa nebituambuluishe bua kuikala bashindike ne: neatupeshe ne dinanga dionso bitudi nabi dijinga. Mmulaye ne: “Tshiakukushiya nansha kakese, tshiakukulekela nansha kakese.” Ke bualu kayi tudi mua kuamba anu bu Paulo ne: “Yehowa mmuambuluishi wanyi; tshiakutshina nansha. Muntu udi mua kungenzela tshinyi?”—Ebelu 13:5, 6.

11 “Bupole, didikanda.” Ela meji mudibi mua kukuambuluisha paudi ne bupole ne didikanda. Ngikadilu eyi neyikuepule bua kuenza anyi kuamba malu adi mua kukukebela tunyinganyinga ne neyikuambuluishe bua kuepuka “dilaminangana munda dia mishindu yonso, tshiji, bumfika munda, dielelangana mbila, bipendu.”—Efeso 4:31.

12 Udi ne bua kuikala ne budipuekeshi bua kueyemena “tshianza tshia bukole tshia Nzambi” ne ‘kumupuila ntatu yebe yonso.’ (1 Petelo 5:6, 7) Wewe ne budipuekeshi, Yehowa neakuambuluishe ne neakutabalele. Wewe mumanye tshiudi mua kuenza ne tshiudi kuyi mua kuenza, kua kudieyemena to. Kuakutamba kupeta tunyinganyinga to, bualu udi mueyemene Nzambi.—Mika 6:8.

“KANUDITATSHISHI”

13. Ntshinyi tshivua Yezu musue kuamba pakambaye ne: “Kanuditatshishi”?

13 Mu Matayi 6:34 (bala), tudi tupeta mubelu wa Yezu eu: “Kanuditatshishi.” Mubelu eu udi mua kumueneka bu mukole bua tuetu kuwutumikila. Kadi ntshinyi tshivua Yezu musue kuamba? Tudi bamone ne: Davidi ne Paulo bavua imue misangu ne tunyinganyinga. Yezu kavua usua kuamba ne: muntu udi wenzela Nzambi mudimu kakupeta tunyinganyinga to. Kadi uvua wambuluisha bayidi bende bua  bamanye ne: tunyinganyinga tua malu a patupu anyi tukole katuena mua kujikija ntatu to. Bu mudiku ntatu dituku dionso, nunku bena Kristo kabena mua kusakidila tunyinganyinga tukuabu pa kuela meji bua ntatu ya kale anyi ya matuku atshilualua to. Mmunyi mudi mubelu wa Yezu mua kukuambuluisha bua kukepesha tunyinganyinga tukole?

14. Anu bu Davidi, mmunyi muudi mua kukepesha tunyinganyinga?

14 Imue misangu bantu batu banyingalala bua bilema bivuabu benze ku kale. Badi mua kuikala badipisha bikole bua bivuabu benze, nansha koku kukadi kupite bidimu bia bungi. Imue misangu Mukalenge Davidi uvua udiumvua bibi menemene bua bilema biende. Wakitaba wamba ne: ‘Ndi ntua mikemu bualu bua dipampakana dia mu mutshima wanyi.’ (Musambu 38:3, 4, 8, 18) Mu nsombelu au, Davidi wakenza bualu bua meji. Wakeyemena luse lua Yehowa ne dibuikidilangana diende dia bilema. Davidi wakasanka pashishe pakamanyaye ne: Nzambi uvua mumufuile luse.—Bala Musambu wa 32:1-3, 5.

15. a) Tshilejilu tshia Davidi tshidi tshitulongesha bualu kayi bukuabu? b) Ntshinyi tshiudi mua kuenza bua kukepesha tunyinganyinga? (Tangila kazubu ka ne: “ Imue mishindu mimpe ya kukepesha tunyinganyinga.”)

15 Misangu mikuabu, udi mua kuikala ne kanyinganyinga bua malu adi akufikila. Tshilejilu, pavua Davidi mufunde Musambu wa 55, uvua ne buôwa bua ne: bavua ne bua kumushipa. (Musambu 55:2-5) Nansha nanku, kavua mulekele kanyinganyinga kende kanyanga dieyemena divuaye nadi kudi Yehowa to. Davidi wakalomba Yehowa bua amuambuluishe mu ntatu yende, kadi uvua mumanye ne: bivua kabidi ne mushinga bua yeye kuenza bualu kampanda mu tshilumbu etshi. (2 Samuele 15:30-34) Udi mua kupeta dilongesha ku tshilejilu tshia Davidi. Pamutu pa wewe kulekela tunyinganyinga tukupita bukole, enza tshiudi mua kuenza bua kujikija lutatu alu, ne ikala mumanye ne: Yehowa neakutabalele.

16. Mmunyi mudi diumvuija dia dîna dia Nzambi dikolesha ditabuja diebe?

16 Imue misangu muena Kristo udi mua kumvua kanyinganyinga bua ntatu idi mua kumufikila mu matuku atshilualua. Kadi kuena ne bua kusamisha mutu bua malu adi kaayi manji kuenzeka to. Bua tshinyi? Bualu misangu ya bungi, malu kaatu anyanguka bu mutuvua tuela meji to. Bualu bukuabu, vuluka ne: kakuena bualu budi mua kupita Nzambi makanda to. Bidi biumvuika ne: dîna diende didi diumvuija “Eu udi uvuija.” (Ekesode 3:14) Nunku, katuena ne bua kuikala ne buôwa bua matuku atshilualua to, bualu diumvuija dia dîna dia Nzambi didi dileja ne: malu onso adiye mulongolole bua bantu neakumbane. Ikala mujadike ne: Nzambi neabeneshe bantu badi ne lulamatu kudiye ne neabambuluishe bua kukepesha tunyinganyinga tudibu natu bua malu akadi menzeke, adi enzeka, ne enzeke mu matuku atshilualua.

YUKILA NE MUNTU UUDI WEYEMENA

17, 18. Mmunyi mudi diyukila bimpe ne bantu dikuambuluisha paudi ne tunyinganyinga?

17 Mushindu muinayi udi mua kukuambuluisha  paudi ne tunyinganyinga nkuyukila ne muoyo mujima ne muntu uudi weyemena ne kumuambila malu mudiwu. Muena dibaka nebe, mulunda webe wa pa muoyo anyi mukulu kampanda mu tshisumbu udi mua kukuambuluisha bua wewe kujingulula lutatu luebe. Bible udi utuambila ne: ‘Lutatu mu mutshima wa muntu ludi lumunemeshila bujitu, kadi dîyi dia luse didi dimusanguluja.’ (Nsumuinu 12:25) Bible udi wamba kabidi ne: ‘Bikalaku kakuyi bulombodi bua meji, malu adi bantu bapangadija adi apumbishibua, kadi bikalaku tshisumbu tshia balombodi, malu aa adi alubuluka.’—Nsumuinu 15:22.

18 Bisangilu bietu bia bena Kristo bidi kabidi bituambuluisha bua kukepesha tunyinganyinga. Mu bisangilu bia lumingu luonso, udi utuilangana ne bana betu ba balume ne ba bakaji badi bakutabalela ne badi basue kukukankamija. (Ebelu 10:24, 25) “Dikankamijangana” dia nunku nedikukoleshe ne nedienze bua bikale bipepele bua wewe kutantamena kanyinganyinga kayi konso.—Lomo 1:12.

MALANDA EBE NE NZAMBI ADI AKUKOLESHA BIKOLE

19. Bua tshinyi udi mutuishibue ne: malanda ebe ne Nzambi neakukoleshe?

19 Mukulu kampanda wa mu Canada wakamanya mudibi ne mushinga bua kupuila Yehowa ntatu. Udi wenza mudimu wa bulongeshi ne wa dipesha balongi mibelu udi umutshiokesha bikole mu lungenyi, ne udi kabidi ne dibungama. Ntshinyi tshidi tshimuambuluishe bua kuikalaye mukankamane? Bualu bua mushinga budi ne: udi udienzeja bikole bua kukolesha malanda ende ne Yehowa. Balunda balelela mbamuambuluishe kabidi bikole mu bikondo bia ntatu ebi, ne mmulondele mukajende ne muoyo mujima mudiye udiumvua. Bualu bukuabu, bakulu nende ne mutangidi wa tshijengu mbamuambuluishe bua kumona nsombelu wende bu mudi Yehowa umumona. Munganga mmuambuluishe kabidi muanetu eu bua kujingulula disama diende, ne uvua mukumbane bua kushintulula programe wende ne kukeba dîba dia kupitshisha kapepe ne kuibidija mubidi. Ku kakese ku kakese, wakamanya mua kutantamena nsombelu wende ne mushindu uvuaye udiumvua. Padiku malu adiye kayi mua kutantamena, udi weyemena Yehowa bua amuambuluishe.

20. a) Mmunyi mutudi mua kupuila Nzambi ntatu yetu? b) Ntshinyi tshituamona mu tshiena-bualu tshidi tshilonda?

20 Mu tshiena-bualu etshi, tudi balonge mudibi ne mushinga bua kuteka bujitu buetu pambidi pa Nzambi pa kuenza disambila kudi Yehowa, kubala Dîyi diende ne kuelangana meji pa malu atudi tubala. Tudi balonge kabidi mudibi ne mushinga bua kulekela nyuma muimpe wa Yehowa utuambuluisha, kuyukila ne muntu utudi tueyemena ne kubuela mu bisangilu bia bena Kristo. Mu tshiena-bualu tshidi tshilonda, netulonge mudi Yehowa utuambuluisha padiye utupesha ditekemena dia kupeta difutu.—Ebelu 11:6.