Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 12 2016

Udi muvuluke anyi?

Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

Mbubi kayi buvua Yezu muakuile pakafilaye mubelu udi mu Matayi 18:15-17?

Uvua wakula bua bilumbu bidi benabi mua kujikija nkayabu. Kadi bubi ebu budi ne bua kuikala bubi bunene budibu mua kuipatshila muntu mu tshisumbu bobu kabayi bajikije tshilumbu atshi. Tshilejilu, budi mua kuikala kushiminyina muntu bualu anyi kuibila.—w16.05, dib. 7.

Ntshinyi tshiudi mua kuenza bua dibala dia Bible dikuambuluishe?

Udi mua kuenza malu adi alonda aa: Kubala ne ntema, kukeba malongesha audi mua kutumikila; kudiela nkonko bu mudi ‘Mmunyi mundi mua kuambuluisha nabu bantu bakuabu?’; ne kuenza mudimu ne bintu bidiku bua kuenza makebulula pa biudi ufuma ku dibala.—w16.05, dib. 28-30.

Mbibi bua muena Kristo kunyingalala padiye mufuishe nansha mudiye ne ditekemena dia dibishibua anyi?

Kuikala ne ditabuja mu mulayi wa ditekemena kakuena kumbusha kanyinganyinga kakole kadi muena Kristo umvua padiye ufuisha to. Abalahama wakabuela mu tshinyongopelu bua lufu lua Sala. (Gen. 23:2) Mu kupita kua matuku, kanyinganyinga nekakepe.—wp16.3, dib. 4.

Muntu udi ne kalondo ka mâyi a mukanda ka mufundi udibu bakuile mu Yehezekele nshapita wa 9 ne bantu basambombo badi ne bia mvita bia kutayisha nabi badi tshimfuanyi tshia banganyi?

Tudi bumvue ne: badi tshimfuanyi tshia biluilu bia mu diulu bivua biambuluishe mu dibutuka dia Yelushalema, ne nebiambuluishe kabidi pabutulabu bulongolodi ebu bubi ku Armagedone. Bua dikumbana dia mulayi eu mu matuku etu aa, muntu udi ne kalondo ka mâyi a mukanda ka mufundi udi tshimfuanyi tshia Yezu Kristo udi utua bantu bapanduka tshimanyinu.—w16.06, dib. 31-32.

Bible mmupanduke ku ntatu ya mushindu kayi?

Mmupanduke ku 1) dibola dia bintu bivuabu benze nabi mudimu bua kumufunda bu mudi: papirise ne biseba bia nyama; 2) buluishi bua bena tshididi ne bamfumu ba bitendelelu bavua badienzeje bua kumujimija; ne 3) dijinga divua nadi bamue bantu dia kushintulula mukenji udimu.—wp16.4, dib. 4-7.

Ngamue malu kayi adi muena Kristo mua kuenza bua kupepeja nsombelu wende?

Funda bintu biudi nabi dijinga, ne kutudi makuta ku bintu biudi kuyi nabi dijinga menemene to. Longolola bungi bua makuta audi mua kutula. Imansha bintu biudi kuyi nabi bualu ne futa mabanza onso. Enza mudimu udi ukuangata mêba makese ne longolola muudi mua kuyisha bikole.—w16.07, dib. 8.

Ntshinyi tshidi Bible uleja tshidi ne mushinga wa bungi kupita or ne argent?

Yobo 28:12, 15 udi uleja ne: meji a Nzambi mmapite or ne argent. Paudi uakeba, dienzeja bua kuikala ne budipuekeshi ne ditabuja dikole.—w16.08-F, dib. 18-19.

Bidiku bimpe bua muanetu wa balume kuikalaye ne muedi lelu anyi?

Mu imue miaba, kabatu bamona kuikala ne muedi mukosa bimpe bu kubi to, ne kuikala nawu kakutu kupangisha bantu bua kuteleja mukenji wa Bukalenge to. Kadi, bamue bana betu ba balume badi mua kusungula bua kukosa muedi. (1 Kol. 8:9) Miaba mikuabu, kabatu bamona bantu badi ne muedi bu bena mudimu ba Nzambi.—w16.09, dib. 18.

Bua tshinyi tudi ne bua kuitaba muyuki udi Bible ulonda wa Davidi ne Goleyata?

Goleyata mmupite muntu mule menemene udi ngumu ileja bua matuku etu aa anu ku santimetre 15. Davidi uvua muntu mulelela, bualu mu mifundu ya pa bintu kampanda bia kale badi batela nzubu wa Davidi, ne Yezu pende wakakula bua bualu buende. Malu adibu baleje bua muaba au adi apetangana ne malu adi mamanyike bimpe.—wp16.5, dib. 13.

Mmunyi mudi dimanya, dijingulula dia malu ne meji bishilangane?

Muntu udi ne dimanya udi ne malu anyi bijadiki bidiye mulame. Muntu udi ne dijingulula dia malu udi ukeba mudi bualu kampanda bupetangana ne bukuabu. Kadi muntu udi ne meji udi wenza mudimu bimpe ne dimanya ne dijingulula dia malu.—w16.10-F, dib. 18.