Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 12 2016

Nuvua bapikudibue ku diambuluisha dia ngasa

Nuvua bapikudibue ku diambuluisha dia ngasa

‘Bubi kabuena ne bua kunukokesha bualu nudi ku bukokeshi bua ngasa.’—LOMO 6:14.

MISAMBU: 2, 61

1, 2. Mmunyi mudi Lomo 5:12 utuambuluisha?

LOMO 5:12 udi wamba ne: “Bu muakalua bubi pa buloba bua muntu umue, ne lufu lulue bua bubi abu, nunku lufu luakakuata bantu bonso, bualu bantu bonso bakenza bubi.” Eu ngumue wa ku mvese itudi bamanye bimpe ne itutu tuenza nayi mudimu patudi tulongesha bantu malu a mu Bible.

2 Mvese eu mbamutele misangu ya bungi mu mukanda wa Bible utu ulongesha tshinyi menemene? ne wa Mmalu kayi adi Bible utulongesha? Patudi tulonga nshapita 35 ne 6 ne bana mu dîku anyi ne bantu bakuabu, tudi mua kubala imue misangu Lomo 5:12. Tudi mua kuenza mudimu ne mvese eu bua kubambuluisha bua bumvue bua tshinyi buloba kabuena mparadizu, bua tshinyi tudi dijinga ne mulambu udi upikula ne bua tshinyi tudi tufua. Kadi mvese eu udi mua kutuambuluisha kabidi bua kukolesha dianyisha dietu bua malanda atudi nawu ne Yehowa. Udi mua kutuambuluisha bua kuikala badisuike bua kusankisha Nzambi ne kuindila ne muoyo kuulu kuulu malu adiye mutulaye.

3. Ntshinyi tshitudi ne bua kuvuluka bua nsombelu wetu?

 3 Bia dibungama, tuetu bonso tudi bena mpekatu. Tutu tuenza bilema dituku dionso. Kadi Yehowa mmubanji mu luse. Mmumanye ne: tudi bena mapanga ne udi wanyisha bua kutufuila luse. (Musambu 103:13, 14) Yezu wakatuambila ne: tudi ne bua kulomba Nzambi bua atubuikidile mpekatu yetu. (Luka 11:2-4) Padi Yehowa utubuikidila bilema bituvua benze ku kale, katuena ne bua kutungunuka ne kuelela bilema abi meji to. Tukonkononayi mudi Yehowa utufuila luse.

MUDI YEHOWA UTUFUILA LUSE

4, 5. a) Ntshinyi tshidi tshituambuluisha bua kumvua Lomo 5:12? b) “Ngasa” udi umvuija tshinyi?

4 Mukanda wa Lomo, nangananga nshapita 6, udi utuambuluisha bua kumvua mudi Yehowa utubuikidila mpekatu yetu. Mu nshapita 3 badi batuambila ne: “bantu bonso bakenza bubi.” Pashishe, Paulo udi uleja ne: “Mbenze anu bu badi bangata dipa dia tshianana padibu babadibua bakane bua ngasa wende ku dipikudibua ku diambuluisha dia tshia kupikula natshi tshivua Kristo Yezu mufile.” (Lomo 3:23, 24) Muaku wa mu tshiena Greke udibu bakudimune ne: “ngasa” udi ne lungenyi lua kuenza bualu kampanda buimpe kuyi utekemena difutu, anyi kupeta tshintu kampanda tshiudi kuyi mukumbanyine.

5 Mumanyi kampanda wa malu a mu Bible wakaleja ne: muaku wa mu tshiena Greke eu utu misangu ya bungi uleja tshidi Nzambi ne Kristo benze bua kusungila bukua bantu ku mpekatu ne ku lufu. Nunku Bible wa Nkudimuinu wa bulongolodi bupiabupia wa mu Tshiluba mmukudimune muaku wa mu tshiena Greke eu ne: “ngasa.” Tumonayi tshidi Nzambi mutuenzele ne mudi ngasa wende utuambuluisha lelu ne utupesha ditekemena bua matuku atshilualua.

6. Ngasa wa Nzambi udi mua kuambuluisha nganyi? Mushindu kayi?

6 Bu muvua Adama muenze mpekatu, mpekatu ne lufu bivua bikuate muntu yonso wa pa buloba mupange bupuangane. Ke bualu kayi Bible udi wamba ne: ‘Tshilema tshia muntu umue ntshifikishe lufu ku dikokesha bu mukalenge.’ Kadi Yehowa wakaleja ngasa wa bungi ne kulongolola mushindu wa kusungila bukua bantu buonso ku butuangaji bua “muntu umue Yezu Kristo.” (Lomo 5:12, 15, 17) “Ditumikila dia muntu umue nedivuije bantu ba bungi bakane.” Badi kabidi mua kutekemena bua kupeta “muoyo wa tshiendelele ku butuangaji bua Yezu Kristo.”—Lomo 5:19, 21.

7. Bua tshinyi dipa dia Nzambi dia mulambu udi upikula divua dimpe ne diakanyine?

7 Elabi meji bua bualu ebu: Yehowa kavua muenzejibue bua kufila Muanende bu mulambu wa kupikula nawu bantu to. Kadi wakaleja bulenga bua bungi pa kulongolola mushindu wa kutusungila ku mpekatu ne ku lufu. Kakuena muntu nansha umue wa kutudi uvua mukumbanyine tshivua Nzambi ne Yezu batuenzele etshi to. Tudi ne dianyisha dia bungi bua mudibu benze bua tufuidibue luse ne tupete muoyo wa kashidi! Tulejayi mutudi ne dianyisha kudi Nzambi mu ngenzelu wetu wa malu.

TUIKALE NE DIANYISHA BUA NGASA WA NZAMBI

8. Mmuenenu kayi utudi ne bua kuepuka?

8 Tudi bamanye ne: Nzambi mmusue kutubuikidila mpekatu yetu nansha yoyi minene. Kadi katuena ne bua kuangata ngasa wa Yehowa bu tshia kudibingisha natshi bua kuenza malu mabi, tuela meji  ne: ‘Yehowa neamfuile luse.’ Mu bidimu lukama bia kumpala, patshivua bamue bapostolo ne muoyo, kuvua bamue bena Kristo bavua ne mmuenenu eu. (Bala Yuda 4.) Lelu tudi ne bua kuikala badimuke bua bantu bakuabu kabatufikishi ku kakese ku kakese ku diela meji mushindu eu.

9, 10. Mmunyi muvua Paulo ne bena Kristo bakuabu bapikudibue ku mpekatu ne ku lufu?

9 Paulo wakaleja bena Kristo ne: lungenyi lua ne: Nzambi uvua mua kutungunuka ne kubafuila luse nansha bobu batungunuke ne kuenza mpekatu kaluvua luimpe to. Paulo wakamba ne: bavua ne bua kuepuka ngelelu wa meji wa nunku bualu bavua “bafue pa bidi bitangila bubi.” (Bala Lomo 6:1, 2.) Uvua usua kuamba tshinyi?

10 Mu bidimu lukama bia kumpala, Nzambi wakabuikidila Paulo ne bena Kristo bakuabu mpekatu yabu ku diambuluisha dia mulambu udi upikula. Yehowa wakabela manyi a nyuma muimpe bua bikale bana bende. Pavuabu bashala ne lulamatu, bavua ne bua kuya mu diulu bua kukokesha ne Kristo. Kadi bu mutshivuabu ne muoyo pa buloba, mmunyi muvuabu “bafue pa bidi bitangila bubi”? Paulo wakafila tshilejilu bua kuleja ne: ngenzelu wabu wa malu uvua mushintukuke bikole menemene. Wakamba ne: Yezu mumane kufua, wakabishibua ku lufu bu nyuma udi kayi mua kufua. Ke bualu kayi lufu kaluvua “ne bukokeshi kudiye.” Mu mushindu wa muomumue, bivua bienze bu ne: bena Kristo aba bavua pabu bafue. Nsombelu wabu uvua mushintuluke bikole menemene bualu kabavua balekele majinga mabi a mpekatu abalombola to. Katshia balua bena Kristo, bavua benza muabu muonso bua kuenza malu mu mushindu uvua usankisha Nzambi. Bavua ‘bafue pa bidi bitangila bubi, kadi bikale ne muoyo pa bidi bitangila Nzambi mu Kristo Yezu.’—Lomo 6:9, 11.

11. Mmunyi mudi bena Kristo lelu “bafue pa bidi bitangila bubi”?

11 Netuambe tshinyi buetu tuetu? Mmunyi mutudi “bafue pa bidi bitangila bubi”? Tuvua mua kuikala benze malu mabi a bungi ku kale katuyi bamanye muvua Yehowa umona bienzedi bietu. Tuvua balue bu “bapika ba malu a bukoya ne ba malu mabi,” mmumue ne: “bapika ba bubi.” (Lomo 6:19, 20) Kadi patuakalonga mu Bible mushindu udi Nzambi musue bua tuenze malu, tuakashintulula nsombelu wetu, kudilambula kudiye ne kutambula. Tuvua ne dijinga dikole dia kutumikila Yehowa ne kuenza malu mu mushindu uvua umusankisha. Tuvua ‘bapikudibue ku bubi’ ne ‘balue bapika ba buakane.’—Lomo 6:17, 18.

12. Ndisungula kayi didi yonso wa kutudi ne bua kuenza?

12 Nansha nanku, tutshidi anu ne disungula dia kuenza. Paulo wakamba ne: “Kanulekedi bubi butungunuka ne kukokesha bu mukalenge mu mibidi yenu idi ifua bua nuenu kutumikila majinga ayi nansha.” (Lomo 6:12) Tudi mua kusungula bua kulonda ngenyi mibi ne majinga mabi anyi kubikandamena. Diebeja ne: ‘Ndiku ndekela majinga anyi mabi akola amfikisha too ne ku dienza bualu bubi anyi? Peshi ndi nguumbusha diakamue?’ Tuetu ne dianyisha dia bungi bua ngasa wa Nzambi, netuenze muetu muonso bua kumusankisha.

UDI MUA KULUANGANA NE BUBI

13. Ntshinyi tshidi tshitujadikila ne: tudi mua kuenza malu mimpe?

13 Mu bidimu lukama bia kumpala, bamue bena mu Kolinto bavua bivi, balume badibu balala nabu bu bakaji anyi balume badi balala ne balume, bena masandi, batendeledi  ba mpingu ne bakuatshiki ba maluvu bakafika ku dimanya Yehowa, kumunangabu ne kushintulukabu. Bakumvua bundu bua malu avuabu benza. (Lomo 6:21; 1 Kolinto 6:9-11) Bena Kristo ba mu Lomo bavua pabu dijinga ne kuenza mashintuluka a muomumue. Paulo wakabambila ne: “Kanufidi bitupa bia mubidi wenu ku bubi bu bia mvita bia malu adi kaayi makane to, kadi nudifile kudi Nzambi bu bantu bavua bafue kadi mpindieu bikale ne muoyo; nufile kabidi bitupa bienu bia mubidi kudi Nzambi bu bia mvita bia malu makane.” (Lomo 6:13) Paulo uvua mutuishibue ne: bavua mua kuenza malu mimpe, ne ngasa wa Nzambi uvua ne bua kutungunuka ne kubambuluisha.

14, 15. Nnkonko kayi itudi ne bua kudiela?

14 Malu adi mushindu wa muomumue lelu. Bamue bana betu ba balume ne ba bakaji bavua mua kuikala ne nsombelu bu wa bena mu Kolinto. Kadi pakamanyabu Yehowa, bakashintuluka. Bivua bienze anu bu bavua ‘basukudibue.’ Bua kusankisha Yehowa, tuetu bonso tuvua bashintulule amue malu mu nsombelu wetu. Too ne mpindieu, tudi basue kuleja mutudi ne dianyisha bua ngasa wa Nzambi. Tudi badisuike bua kuluangana ne majinga etu mabi ne kufila muoyo wetu bua kuenzela Yehowa mudimu.

15 Bushuwa, tudi ne bua kuepuka dienza mpekatu minene ivua bamue bena mu Kolinto benze. Katuena ne bua kutungunuka ne kuenza mpekatu eku tutekemena bua Nzambi atuleje ngasa wende ne atufuile luse. Kadi netuambe tshinyi bua mpekatu idi bamue bamona bu mikese? Tudiku badisuike bua kuenza muetu muonso bua kutumikila Yehowa mu kalu ne kalu kuonso anyi?—Lomo 6:14, 17.

16. Mmunyi mutudi bamanye ne: tudi ne bua kuepuka mpekatu idibu kabayi batele mu 1 Kolinto 6:9-11?

16 Tuangate tshilejilu tshia mupostolo Paulo. Wakafunda ne: “Meme ndi muntu wa mubidi, musumbisha ku bubi. Bualu tshiena ngumvua tshindi ngenza. Bualu tshindi musue, tshiena ntshienza to; kadi tshindi mukine ke tshindi ngenza.” (Lomo 7:14, 15) Nansha muvua Paulo kayi wenza malu adibu batele mu 1 Kolinto 6:9-11, wakitaba ne: uvua muena mibi. Uvua musue kusankisha Yehowa, ke bualu kayi uvua uluangana bua kubenga kuenza malu mabi. (Bala Lomo 7:21-23.) Tuidikijayi tshilejilu tshiende ne tuenzayi muetu muonso bua kutumikila Yehowa.

17. Bua tshinyi udi musue kuikala muena bululame?

17 Tshilejilu, tudi bamanye ne: bua kuenzela Yehowa mudimu, tudi ne bua kuikala bena bululame. (Bala Nsumuinu 14:5; Efeso 4:25.) Katuena basue kuikala bu Satana udi “tatu wa dishima” to. Tudi bamanye ne: Ananiya ne mukajende bakafua bualu bavua bashime. Ke bualu kayi katuena ne bua kushima to. (Yone 8:44; Bienzedi 5:1-11) Kadi kuikala muena bululame kakuena kumvuija anu kubenga kushima to. Tuetu bushuwa ne dianyisha bua ngasa wa Nzambi, netuikale kabidi bena bululame mu malu makuabu.

18, 19. Kuikala muena bululame kudi kumvuija tshinyi?

18 Muntu udi mua kupanga bululame nansha kayi mushime. Tshilejilu, Yehowa wakambila bena Isalele ne: ‘Kanuibi, kanudingianganyi, kanushimianganyi.’ Bua tshinyi kabavua ne bua kuenza malu aa? Yehowa wakamba ne: “Nuikale bantu ba tshijila bualu bua meme Yehowa, Nzambi wenu, ndi wa tshijila.” (Lewitiki 19:2, 11) Nansha mutudi katuyi mua kushima, tuetu bafikishe bakuabu ku ditaba bualu  budi kabuyi bulelela, katuakuikala bena bululame to.

Tudiku badisuike bua kubenga kushima anyi kudingangana anyi? (Tangila tshikoso tshia 19)

19 Tshilejilu, muntu udi wambila mfumuende wa mudimu anyi bena mudimu nende ne: udi ne bua kumbuka ku mudimu kumpala kua dîba bua kumonangana ne munganga. Pabi ebu ki mbualu budiye umbukila to. Mmusue kumbuka kumpala kua dîba bua kuya kudiolola miaba mikuabu. “Tshipungidi tshiabu ne munganga” tshivua tshia minite mikese bua kusumba patupu manga ku lupitadi anyi kuya kufuta makuta. Muntu eu mmuena bululame anyi? Peshi mmushime bakuabu? Mmufikishe bakuabu ku ditaba bualu budi kabuyi bulelela. Imue misangu, bantu batu bashima bakuabu bua kupeta tshintu kampanda tshidibu basue anyi bua kuepuka dinyoka. Kadi tudi tutumikila Yehowa bualu mmuambe ne: ‘Kanudingianganyi.’ Tudi basue kuenza tshidiye wamba ne: ntshiakane ne ntshinsantu.—Lomo 6:19.

20, 21. Tuetu ne dianyisha bua ngasa wa Nzambi, mmalu kayi makuabu atudi ne bua kuepuka?

20 Bulelela, tudi tuepuka dienda dia masandi, dikuatshika dia maluvu ne mpekatu mikuabu minene. Kadi pa kumbusha malu aa, tudi ne bua kuepuka bualu buonso budi kabuyi busankisha Yehowa. Tshilejilu, katuena anu ne bua kuepuka malu a masandi, kadi tudi kabidi ne bua kuepuka dijikija lutetuku didi ne malu a bukoya. Katuena anu ne bua kuepuka dikuatshika dia maluvu, kadi tudi kabidi ne bua kuepuka bua kunua maluvu kupitshisha. Tudi mua kuikala tudienzeja bikole bua kukandamena mateta a nunku, kadi kudi mushindu wa kuakandamena.

21 Tudifundilayi tshipatshila tshia buena tshia Paulo wakamba ne: “Kanulekedi bubi butungunuka ne kukokesha bu mukalenge mu mibidi yenu idi ifua bua nuenu kutumikila majinga ayi nansha.” (Lomo 6:12; 7:18-20) Bulelela budi ne: katuena mua kuepuka mpekatu yonso to. Kadi patudi tuluangana ne mpekatu ya mishindu yonso, tudi tuleja ne: tudi bushuwa ne dianyisha bua ngasa udi Nzambi ne Kristo batuleje.

22. Ndifutu kayi dituapeta tuetu ne dianyisha bua ngasa wa Yehowa?

22 Yehowa mmutubuikidile mpekatu yetu ne neatungunuke ne kutubuikidilayi. Tudi ne dianyisha dia bungi bua ngasa wende. Nunku, tudienzejayi bua kubenga kuenza malu adiye wamba ne: mmabi, nansha bantu bakuabu kabayi baamona bu mpekatu. Ndifutu kayi dituapeta tuetu benze nunku? Paulo wakamba ne: “Mpindieu, bualu nuvua bapikudibue ku bubi, nudi balue bapika ba Nzambi, dimuma dienu, mmuoyo wa bunsantu, ne ku ndekelu: muoyo wa tshiendelele.”—Lomo 6:22.