Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 11 2016

Utuku wangata Mukanda wa Yehowa ne mushinga wa bungi anyi?

Utuku wangata Mukanda wa Yehowa ne mushinga wa bungi anyi?

‘Panuvua bapete dîyi dia Nzambi, nuvua baditabe, anu bu mudidi dîyi dia Nzambi bulelela.’—1 TESALONIKE 2:13.

MISAMBU: 114, 113

1-3. a) Ntshinyi tshivua mua kuikala tshienzeke pankatshi pa Evodi ne Sentishe? b) Mmunyi mutudi mua kuepuka bilumbu bia mushindu eu? (Tangila tshimfuanyi tshia ntuadijilu tshia tshiena-bualu.)

TUTU tuangata Bible ne mushinga wa bungi bualu tudi bamanye ne: mMukanda wa Nzambi. Bible udi ne mibelu idi mua kutuambuluisha bua kuepuka bilumbu, ne udi mua kutubela patudi tuenza bilema. Nunku, ntshinyi tshitudi tuenza padibu batupesha mibelu ya mu Bible? Ela meji bua bana betu ba bakaji babidi bela manyi ba mu bidimu lukama bia kumpala aba: Evodi ne Sentishe. Bible udi wamba ne: bakakokangana, kadi kena utuambila tshivuabu bafuila to. Tutetayi kuela meji tshivua mua kuikala tshienzeke.

2 Pamuapa Evodi uvua mubikile bana betu ba balume ne ba bakaji kuende bua kudia. Kadi kavua mubikile Sentishe to. Pashishe pakumvua Sentishe muvua bakuabu bamba muvua biakudia abi bibasankishe, wakanyingalala bikole. Uvua mua kuikala mudiambile  ne: ‘Tshivua ngela meji ne: Evodi kavua mua kumbikila to! Mvua mumanye ne: tuvua balunda ba pa muoyo.’ Sentishe uvua mumone ne: Evodi kavua mumunange ne uvua umuepuka. Nunku Sentishe wakabikidisha pende bana betu bamue bamue abu bua kudia nabu, kadi kayi mubikile Evodi to. Bualu ebu buvua mua kuikala butonde bamue bantu mu tshisumbu. Bible udi uleja ne: Paulo wakabela bana betu ba bakaji babidi aba ne kubakankamija bua kukeba ditalala. Bavua mua kuikala bamuteleje ne batungunuke ne kuenzela Yehowa mudimu ne disanka.—Filipoyi 4:2, 3.

3 Mu bisumbu bietu lelu, tudi mua kuikala imue misangu tshilumbu ne muanetu wa balume anyi wa bakaji. Kadi tuetu balonde mibelu ya mu Bible, tudi mua kujikija bilumbu ebi. Tudi mene mua kubiepuka. Patudi tutumikila tshidi Bible wamba, tudi tuleja ne: tudi bulelela tuangata Mukanda wa Yehowa ne mushinga.—Musambu 27:11.

BIBLE UDI UTULONGESHA MUA KUKANDA MUTUDI TUDIUMVUA

4, 5. Mmibelu kayi idi Dîyi dia Nzambi ditupesha bua kukanda mutudi tudiumvua?

4 Kabitu bipepele misangu yonso bua kukanda mutudi tudiumvua. Tudi mua kudiumvua bibi anyi kumvua tshiji padi muntu kampanda utuamba dîyi dibi anyi utuenzela malu mu mushindu mubi bua bibidilu bietu, dikoba dietu anyi bua tshimuenekelu tshietu. Muanetu wa balume anyi wa bakaji yeye mutuambe dîyi dibi anyi mutuenzele malu mu mushindu mubi, bidi mua kututonda bikole. Mmibelu kayi ya mu Dîyi dia Nzambi idi mua kutuambuluisha mu bualu ebu?

5 Yehowa mmumanye tshidi mua kuenzeka padi bantu kabayi bakanda mudibu badiumvua. Patudi ne tshiji, tudi mua kuamba anyi kuenza bualu kampanda budi mua kulua kututonda pashishe. Mu Bible, Yehowa udi utulongesha bua kukanda tshiji tshietu padiye utuambila ne: “Kukuatshi tshiji mu mutshima webe lukasa.” Ela meji bungi bua bilumbu bitudi tuepuka patudi tutumikila mubelu eu wa kubenga kukuata tshiji lukasa! (Bala Muambi 7:9; Nsumuinu 16:32.) Bible udi kabidi utuambila bua kufuila bakuabu luse. Yezu wakamba ne: tuetu katuyi tufuila bakuabu luse, Yehowa kakutufuila petu luse to. (Matayi 6:14, 15) Bidiku bikulomba bua kuikala ne lutulu lua bungi ne kuitaba bua kufuila bakuabu luse anyi?

6. Ntshinyi tshidi mua kuenzeka tuetu katuyi tukanda mutudi tudiumvua?

6 Tuetu katuyi tukanda mutudi tudiumvua, tudi mua kutungunuka ne kuikala ne tshiji ne tudi mene mua kutuadija kukina muntu. Anyi tudi mua kufikisha bamue mu tshisumbu ku dikina pabu muntu au. Nansha tuetu badienzeje bua kusokoka tshiji tshietu anyi lukinu luetu, ndekelu wa bionso bakuabu nebajingulule mutudi tudiumvua. Pashishe bana betu ba balume ne ba bakaji badi mua kutuepuka. (Nsumuinu 26:24-26) Bakulu nebatuambuluishe ne mibelu ya mu Bible bua kumbusha tshiji ne lukinu ne kufuila bakuabu luse. (Lewitiki 19:17, 18; Lomo 3:11-18) Padibu batubela, netulondaku buludiki bua mu Mukanda wa Yehowa anyi?

YEHOWA UDI UTULOMBOLA

7, 8. a) Mmunyi mudi Yehowa ulombola bantu bende? b) Mbuludiki kayi butudi tupeta mu Bible? c )Bua tshinyi tudi ne bua kubulonda?

7 Lelu Yehowa udi ulombola bantu badi mu tshitupa tshia bulongolodi buende tshia pa buloba ne ubalongesha. Mushindu kayi? Mmusungule Kristo bua kuikala “ku mutu kua tshisumbu,” ne Kristo mmuteke ‘mupika wa lulamatu udi mudimuke’ bua kulongesha ne kuludika bantu ba Nzambi. (Efeso 5:23; Matayi 24:45-47) Anu bu kasumbu kaludiki ka mu bidimu lukama bia kumpala, mupika eu udi bushuwa wangata Bible ne mushinga bualu  nDîyi dia Nzambi. (Bala 1 Tesalonike 2:13.) Mbuludiki kayi butudi tupeta mu Bible?

8 Bible udi utulomba bua kubuela mu bisangilu pa tshibidilu. (Ebelu 10:24, 25) Udi utukankamija tuetu bonso bua kuitabuja malongesha a muomumue a mu Bible. (1 Kolinto 1:10) Udi utuambila kabidi bua kutungunuka “tshia kumpala ne kukeba Bukalenge.” (Matayi 6:33) Bible udi utulongesha bua kuyisha ku nzubu ne ku nzubu, miaba idi bantu ba bungi ne muaba kayi wonso utudi mua kupeta bantu. (Matayi 28:19, 20; Bienzedi 5:42; 17:17; 20:20) Udi ulomba bakulu bua kulama tshisumbu tshikezuke. (1 Kolinto 5:1-5, 13; 1 Timote 5:19-21) Udi utuambila ne: tudi ne bua kulama mubidi wetu mukezuke ne kuepuka ngenyi ne bibidilu bidi Yehowa mukine.—2 Kolinto 7:1.

9. Nnganyi udi Yezu muteke bua kutuambuluisha bua kumvua Dîyi dia Nzambi?

9 Bamue badi mua kuela meji ne: kabena dijinga ne muntu bua abumvuije Bible to. Kadi katshia ku tshidimu tshia 1919, Yezu udi wenza mudimu ne ‘mupika wa lulamatu udi mudimuke’ bua kuambuluisha bantu ba Nzambi bua kumvuabu tshidi Bible ulongesha ne kutumikilabu tshidiye wamba. Patudi tutumikila tshidi Bible wamba, tudi tulama tshisumbu tshikezuke, mu ditalala ne mu buobumue. Diebeja ne: ‘Nentungunuke ne kuikala ne lulamatu kudi Yezu ne kulonda buludiki bua mupika wa lulamatu anyi?’

DITEMPU DIA YEHOWA DIDI MU LUBILU LUKOLE!

10. Mmunyi mudi mukanda wa Yehezekele umvuija mudi tshitupa tshia bulongolodi bua Yehowa tshia mu diulu?

10 Ku diambuluisha dia Bible, tudi bamanye ne: batendeledi ba Yehowa ba mu diulu badi pabu balongolola. Tshilejilu, Yehezekele wakamona mu tshikena kumona Yehowa mubande pa ditempu divua mua kuya lubilu lukole mu luseke luonso luvua Yehowa musue. (Yehezekele 1:4-28) Ditempu edi didi dileja tshitupa tshia bulongolodi bua Nzambi tshia mu diulu, tshidi tshilonda ne lukasa buludiki buende. Tshidi ne buenzeji kudi tshitupa tshia bulongolodi bua Nzambi tshia pa buloba. Ela meji bua mashintuluka a bungi adi menzeke mu bulongolodi bua Nzambi mu bidimu dikumi bishale ebi. Manya ne: Yehowa ke udi wenza bua mashintuluka aa enzeke. Mu katupa kîpi emu, Kristo ne banjelu bende nebabutule bulongolodi bubi ebu. Kakuyi mpata, kakuakuila kabidi muntu wabenga kunemeka Yehowa ne dîna diende anyi wapetula mushindu wende wa kulombola!

Tudi ne dianyisha dia bungi bua mudi bana betu ba bungi bena budisuile benza mudimu mukole wa kuibaka! (Tangila tshikoso tshia 11)

11, 12. Mmalu kayi adi bulongolodi bua Yehowa buenze mu matuku a ku nshikidilu aa?

11 Tukonkonone malu adi bulongolodi bua Yehowa buenze mu matuku a ku nshikidilu aa. Mudimu wa luibaku. Bana betu ba balume ne ba bakaji nkama ya bungi mbenze mudimu mukole wa kuibaka biro bipiabipia bidi bilombola mudimu wa Bantemu ba Yehowa pa buloba bujima mu Warwick, mu tshimenga tshia New York, mu États-Unis. Bena budisuile bakuabu binunu bia bungi badi bibaka Nzubu ya Bukalenge ne biro bia filiale pa buloba bujima.  Tshibambalu tshidi tshitangila mudimu wa luibaku pa buloba bujima ke tshidi tshilombola bena budisuile aba. Tudi ne dianyisha dia bungi bua mudi bana betu ba bungi benze mudimu mukole wa kuibaka nzubu ya nunku! Batendeledi ba Yehowa ba miaba yonso badi bafila tshionso tshidibu natshi bua kusumba bia kuibaka nabi nzubu eyi. Yehowa udi ubenesha bantu bende bua budipuekeshi ne lulamatu bidibu baleja.—Luka 21:1-4.

12 Dilongesha. Yehowa mmusue kulongesha bantu bende. (Yeshaya 2:2, 3) Elabi meji bua bungi bua tulasa tutudi natu. Kudi Kalasa ka bampanda-njila, Kalasa ka bamanyishi ba Bukalenge, kalasa ka Gilada, Kalasa ka bantu bapiabapia ku Betele, Kalasa ka batangidi ba bijengu ne bakaji babu, Kalasa ka bakulu ba mu bisumbu, Kalasa ka Mudimu wa Bukalenge, ne Kalasa ka bena mu komite ya filiale ne bakaji babu. Tudi mua kupeta Bible ne mikanda mikuabu mu miakulu mipite bungi mu site wetu wa jw.org. Site eu udi kabidi ne biena-bualu bia pa buabi bua bana ne bua mêku ne tshitupa tshia malu mapiamapia. Utuku wenza mudimu ne site wa jw.org mu buambi ne mu ntendelelu wenu wa mu dîku anyi?

IKALA NE LULAMATU KUDI YEHOWA NE AMBULUISHA BULONGOLODI BUENDE

13. Mbujitu kayi budi nabu bantu ba Yehowa?

13 Tudi ne diakalenga dia kuikala mu tshitupa tshia bulongolodi bua Yehowa ne kumanya malu adiye utulomba. Bushuwa, bu mutudi bamanye malu adi asankisha Nzambi, tudi ne bujitu bua kumutumikila ne kuenza tshidi tshimpe. Nansha mudi bantu ba bungi basue kuenza malu mabi, tudi ne bua kuikala ne “malu mabi lukuna” anu bu Yehowa. (Musambu 97:10) Katuena ne bua kuikala bu bantu badi bela meji ne: ‘bualu bubi, mbualu buakane ne bualu buakane, mbubi.’ (Yeshaya 5:20) Bu mutudi basue kusankisha Yehowa, nunku tudisuikayi bua kuikala bakezuke mu mishindu yonso. (1 Kolinto 6:9-11) Malu adi Yehowa utuambila mu Bible adi bua diakalenga dietu. Tudi bamunange ne tudi basue kuikala ne lulamatu kudiye. Ke bualu kayi tudi tulonda buludiki buende kumbelu, mu tshisumbu, ku mudimu, mu kalasa anyi muaba wonso utudi tusanganyibua. (Nsumuinu 15:3) Ela meji bua imue nsombelu itudi dijinga ne kuikala ne lulamatu kudi Nzambi.

14. Mmunyi mudi baledi mua kuikala ne lumamatu kudi Yehowa?

14 Mutudi mua kulongesha bana. Yehowa udi upesha baledi buludiki mu Bible bua mudibu mua kulongesha bana babu. Bena Kristo badi ne bua kuikala ne budimu bua kubengabu kulonda ngelelu wa meji udi mutangalake mu bulongolodi ebu. (Efeso 2:2) Tshilejilu, mu imue miaba tatu udi mua kuela meji ne: ‘Kuetu kunu bamamu ke batu balongesha bana.’ Kadi Bible udi ulomba batatu bua kulongesha bana babu malu a Yehowa. (Efeso 6:4) Batatu ne bamamu badi banange Yehowa mbasue bua bana babu bikale nende mu malanda makole, anu bu Samuele patshivuaye muana.—1 Samuele 3:19.

15. Mmunyi mutudi mua kuikala ne lulamatu kudi Yehowa patudi tuangata mapangadika manene?

15 Mutudi mua kuangata mapangadika. Kumpala kua tuetu kuangata mapangadika manene mu nsombelu wetu, tudi ne bua kumanya mudi Yehowa wela meji bua tuetu kuikala ne lulamatu kudiye. Bible ne bulongolodi bua Nzambi bidi mua kutuambuluisha. Tshilejilu, lelu bamue baledi badi bumbuke mu ditunga diabu mbangate dipangadika dia kupingaja muanabu mutekete mu ditunga diabu bua kusombaye ne balela babu. Mu mushindu eu, tatu ne mamu badi mua kutungunuka ne kuenza mudimu bua kupeta makuta a bungi. Bulelela, edi ndipangadika dia muntu nkayende, kadi bena dibaka badi ne bua kudiebeja ne: ‘Mmunyi mudi Yehowa umona dipangadika dietu?’ (Bala Lomo 14:12.)  Mbimpe kuanji kuela meji ku tshidi Bible wamba kumpala kua kuangata mapangadika manene adi atangila dîku dietu ne mudimu wetu. Tudi basue bua Tatu wetu atuambuluishe bualu katuena mua kulombola biendedi bietu.—Yelemiya 10:23.

16. a) Pavua mamu kampanda mulele muanende wa balume, ndipangadika kayi divuaye ne bua kuangata? b) Ntshinyi tshivua tshimuambuluishe bua kuangata dipangadika dimpe?

16 Bena dikaba kampanda bamane kuya mu ditunga dikuabu, bakalela muanabu wa balume, ne kulongololabu bua kumutuma kudi baledi babu. Kadi mu tshikondo atshi, mamu uvua mutuadije kulonga Bible ne Ntemu wa Yehowa mukuabu. Wakalonga ne: yeye ke uvua ne bujitu bua kulongesha muanende malu a Yehowa. (Musambu 127:3; Nsumuinu 22:6) Anu bu mutu Bible utulomba bua kuenza, mamu eu wakasambila Yehowa, ne kumulomba bua amuambuluishe bua kuenza tshidi tshimpe. (Musambu 62:7, 8) Wakambila kabidi muanetu wa bakaji uvua ulonga nende Bible bualu ebu ne kuyukila ne bana betu bakuabu mu tshisumbu. Nansha muvua balela bende ne balunda bende batungunuka ne kumuambila ne: uvua ne bua kupingaja muana kudi baledi bende, wakangata dipangadika dia kubenga kuenza nanku. Bayende wakamona muvua bana betu ba balume ne ba bakaji bambuluishe mukajende ne muanabu. Biakamukemesha, kutuadijaye kulonga Bible ne kubuela mu bisangilu ne bena mu dîku diende. Ela meji bua disanka divua nadi mamu eu pakamonaye ne: Yehowa uvua muandamune disambila diende!

17. Patudi tulonga Bible ne muntu, mbuludiki kayi butudi ne bua kulonda?

17 Mutudi mua kulonda buludiki. Tuetu ne lulamatu kudi Nzambi, netulonde buludiki budi bulongolodi buende butupesha. Tshilejilu, tukonkonone tshitudi ne bua kuenza patudi tutuadija kulonga ne muntu mukanda wa Bible utu ulongesha tshinyi menemene? Mbatuambile bua kuangata minite mikese panyima pa dilonga dionso bua kuambuluisha mulongi bua kumanya bimpe bulongolodi bua Yehowa. Tudi mua kumuleja kabidi filme wa ne: Tshitu tshienzeka ku Nzubu wa Bukalenge ntshinyi? ne kulonga nende broshire wa ne: Badi benza disua dia Yehowa lelu mbanganyi? Tuetu bamane kujikija mukanda wa Bible ulongesha, tudi mua kuambuluisha mulongi bua ‘ajalame bikole mu ditabuja’ pa kulonga nende mukanda wa “Nudilame mu dinanga dia Nzambi” nansha yeye mumane kutambula. (Kolosayi 2:7) Utuku ulonda buludiki budi bulongolodi bua Yehowa bufile ebu anyi?

18, 19. Ngamue malu kayi atudi ne bua kuelela Yehowa tuasakidila?

18 Kudi malu a bungi atudi ne bua kuelela Yehowa tuasakidila. Bumue bua kudiwu budi ne: “tudi ne muoyo, tudi tuenda, ne tudiku bua bualu buende.” (Bienzedi 17:27, 28) Mmutupeshe kabidi Bible, Mukanda wende. Anu bu bena Kristo ba mu Tesalonike, tudi tuanyisha dipa edi bualu mmukenji udi ufumina kudiye.—1 Tesalonike 2:13.

19 Bible mmutuambuluishe bua kusemena pabuipi ne Yehowa ne mmusemene pabuipi netu. (Yakobo 4:8) Tudi ne dianyisha dia bungi bua mudi Tatu wetu mutubikile mu tshitupa tshia bulongolodi buende. Tudi tudiumvua anu bu mufundi wa Misambu wakafunda ne: ‘Sakidilayi Yehowa, bualu bua yeye udi muimpe, bualu dinanga diende dia lulamatu didi dijalame tshiendelele.’ (Musambu 136:1NWT) Mu mvese yonso wa Musambu eu, mufundi wa Misambu mmuambulule mêyi aa: ‘dinanga diende dia lulamatu didi dijalame tshiendelele.’ Tuetu ne lulamatu kudi Yehowa ne tulonda buludiki budiye utupesha ku diambuluisha dia bulongolodi buende, neatupeshe muoyo wa tshiendelele ne neikale ne lulamatu kutudi bua kashidi ne tshiendelele!