Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2017

“Malu aa uapeshe balume ba lulamatu”

“Malu aa uapeshe balume ba lulamatu”

“Malu aa uapeshe balume ba lulamatu balua kuikala pabu bakumbane bimpe bua kulongesha bakuabu.”—2 TIMOTE 2:2.

MISAMBU: 123, 53

1, 2. Mmunyi mudi bantu ba bungi bamona mudimu wabu?

BANTU ba bungi badi bela meji ne: mudimu udibu benza ke udi ubavuija ne mushinga anyi kabayi nawu. Mu imue miaba patu bantu bakeba kumanyangana, batu misangu ya bungi bebejangana ne: “Utu wenza mudimu kayi?”

2 Imue misangu Bible utu utela mudimu uvua bantu benze bua kuleja tshivuabu. Tshilejilu, udi wakula bua “Matayi mulambuishi wa bitadi,” “Simona mukonyi wa biseba” ne “Luka munganga munangibue.” (Matayi 10:3; Bienzedi 10:6; Kolosayi 4:14) Misangu mikuabu, Bible utu utela midimu ivua nayi bantu mu mudimu wa Yehowa. Tuakule bua Mukalenge Davidi, muprofete Eliya ne mupostolo Paulo. Bantu aba bavua bangata midimu ivua Yehowa mubapeshe ne mushinga. Bia muomumue, tuetu petu tudi ne bua kuangata mudimu wonso udibu batupesha mu mudimu wa Yehowa ne mushinga.

3. Bua tshinyi bakulakaje badi ne bua kulongesha bansongalume? (Tangila tshimfuanyi tshia ntuadijilu tshia tshiena-bualu.)

3 Tudi basue kuenzela Yehowa mudimu ne tudi tuangata midimu idibu batupesha ne mushinga wa bungi. Ba bungi ba kutudi mbanange mudimu wetu bikole ne mbasue kutungunuka ne kuwenza  matuku a bungi. Kadi bia dibungama, padi bantu bakulakaja kabena mua kuenza bionso bivuabu benza patshivuabu bansonga to. (Muambi 1:4) Bualu ebu budi bukebela bantu ba Yehowa ntatu ya pa buayi. Lelu mudimu wa kuyisha udi anu wenda uvula, bulongolodi bua Yehowa budi buenza mudimu ne biamu bidi bantu bapatule bua kuyisha bantu ba bungi lumu luimpe. Kadi misangu mikuabu bidi mua kukolela bakulakaje bua kulonga mishindu mipiamipia ya kuenza nayi mudimu. (Luka 5:39) Bualu bukuabu, patu bantu bakulakaja, bukole buabu ne makanda abu bitu bikepela. (Nsumuinu 20:29) Nunku, mbimpe ne mbia meji bua bakulakaje kulongeshabu bansongalume bua kuambula majitu makuabu mu bulongolodi bua Yehowa.—Bala Misambu 71:18.

4. Bua tshinyi bitu bikolela bamue bua kupesha bakuabu imue midimu idibu nayi? (Bala kazubu ka ne: “ Bua tshinyi bidi mua kutukolela bua kupesha bakuabu midimu.”)

4 Kabitu bipepele misangu yonso bua bantu badi ne bukokeshi kupeshabu bansongalume imue midimu idibu nayi to. Padi bana betu ba balume bela meji bua dijimija mudimu udibu banange bikole, bidi mua kubabungamija. Bidi mua kubasama ku muoyo padibu bela meji bua kulekela mudimu wa pa buawu udibu banange. Anyi bidi mua kubatonda ne: muntu mukuabu yeye mulombole mudimu au kawakuenda bimpe to. Pamuapa badi bela meji ne: kabena ne dîba diakulongesha bakuabu to. Nansha nanku, bansonga badi ne bua kuikala ne lutulu buobu kabayi babapeshe majitu makuabu.

5. Nkonko kayi ituandamuna mu tshiena-bualu etshi?

5 Kadi bua tshiyi bidi ne mushinga bua bakulakaje kuambuluishabu bansongalume bua kuambulabu majitu makuabu? Mmunyi mudibu mua kuenza nanku? (2 Timote 2:2) Bua tshinyi bansongalume badi ne bua kuikala ne meji mimpe padibu benza mudimu ne mukulakaje, bana betu bakadi ne dimonamona dia malu dia bungi ne padibu balonga malu kudibu? Bua kutuadija, tumonayi muvua Davidi mulongolole muanende bua mudimu wa mushinga mukole.

DAVIDI WAKALONGOLOLA SOLOMO

6. Ntshinyi tshivua mukalenge Davidi musue kuenza? Ntshinyi tshivua Yehowa mumuambile?

6 Munkatshi mua bidimu bia bungi, bakakengesha  Davidi, ne uvua utambakana utua eku ne eku. Pashishe, pakaluaye mukalenge wakasombela mu nzubu muimpe mutambe. Ke yeye kuambila muprofete Natana ne: ‘Mona, meme ndi mushikame mu nzubu wa mitshi ya cèdre, kadi mushete wa tshipungidi tshia mêyi a Yehowa udi mushale mu ntenta.’ Davidi uvua ne dijinga dikole dia kuibakila Yehowa Ntempelo mulenga. Natana wakamuambila ne: ‘Wenze malu onso adi mu mutshima webe; bualu bua Nzambi udi nebe.’ Kadi ki ntshivua Yehowa musue to. Uvua muambile Natana bua ambile Davidi ne: ‘Wewe kuena ungibakila nzubu bua meme kushikamamu nansha.’ Nansha muvua Yehowa mulaye Davidi ne: uvua ne bua kuikala nende misangu yonso, Davidi wakamanya ne: umue wa ku bana bende ba balume ke uvua ne bua kuibaka ntempelo. Ntshinyi tshiakenza Davidi?—1 Kulondolola 17:1-4, 8, 11, 12; 29:1.

7. Ntshinyi tshivua Davidi muenze pakapetaye buludiki bua Yehowa?

7 Davidi uvua bushuwa musue kuibakila Yehowa ntempelo, ke bualu kayi bivua mua kuikala bimutonde bikole. Kadi wakatungunuka anu ne kukuatshisha ne muoyo mujima mudimu uvua muanende Solomo ulombola. Davidi wakambuluisha bua kulongolola bena mudimu ne kulongolola tshiamu tshifike, tshiamu tshia mitaku, arjan, or ne mitshi. Kavua musamishe mutu bua muntu uvua mua kupeta lumu lua kuibaka ntempelo wakaluabu kubikila ne: ntempelo wa Solomo to. Kadi wakakankamija Solomo wamba ne: ‘Katataka, muananyi, Yehowa ikale nebe; wikale ne diakalengele, wibakile Yehowa, Nzambi webe, nzubu bu muakuambaye bualu buebe.’—1 Kulondolola 22:11, 14-16.

8. Bua tshinyi Davidi uvua mua kuikala muele meji ne: Solomo kavua mukumbane bua kuibaka ntempelo? Kadi Davidi wakenza tshinyi?

8 Bala 1 Kulondolola 22:5. Davidi uvua mua kuikala muele meji ne: Solomo kavua mukumbane bua kulombola mudimu wa mushinga eu to. Ntempelo uvua ne bua kuikala “muakane wa butumbi” ne Solomo utshivua “nsongalume udi mutekete.” Kadi Davidi wakamanya ne: Yehowa uvua ne bua kuambuluisha Solomo bua kuenza mudimu wa pa buawu eu. Ke bualu kayi Davidi wakenza muende muoyo bua kumuambuluisha bua adilongolole bua mudimu mutambe bunene eu.

SANKA BUA KULONGESHA BAKUABU

Tudi ne disanka patudi tumona bansongalume bambula majitu makuabu (Tangila tshikoso tshia 9)

9. Mmunyi mudi bakulakaje mua kudiumvua padibu bapesha bakuabu majitu? Fila tshilejilu.

9 Bana betu bakulakaje kabena ne bua kuteketa mu mikolo padibu ne bua kupesha bansongalume amue majitu to. Tuetu bonso tudi bamanye ne: mudimu wa Yehowa ke bualu bua mushinga mukole menemene lelu. Kulongesha bansongalume bua kuambula majitu nekuambuluishe bua mudimu eu wende bimpe. Ela meji bua bualu ebu. Pautshivua muana uvua pamuapa umona muvua papa webe wendesha mashinyi. Pauvua ukola, wakakumvuija tshivuaye wenza. Mu kupita kua matuku, wakapeta mikanda yebe ya dikuanyishila bua kuendesha mashinyi ne wakatuadija kudiendeshelawu. Nansha nanku, papa webe utshivua anu  ukupesha mibelu. Imue misangu nuvua eu wendesha ushila mukuabu. Kadi bu muakakulakaja papa webe, ukavua wendesha wewe bikole. Bivuaku bitonde papa webe anyi? Tòo, uvua pamuapa ne disanka bua muuvua umuabula. Bia muomumue, bana betu bakulakaje badi ne disanka bua kumona bansongalume badibu balongeshe bafike ku dikumbana bua kuambula majitu mu bulongolodi bua Yehowa.

10. Mmunyi muvua Mose mumvue bua dikala ne butumbi ne bukokeshi?

10 Tudi ne bua kuikala badimuke bua katumvuidi bakuabu mukawu bua midimu idibu nayi. Mushindu uvua Mose muenze malu pavua bamue bena Isalele batuadije kuenza malu bu baprofete udi mua kutulongesha. (Bala Nomba 11:24-29.) Yoshua wakakeba kubimanyika, kadi Mose wakamba ne: ‘Wewe udi ne mukawu ku bualu buanyi anyi? Ngakadi kusua bua bantu ba Yehowa bonso bikale baprofete, ne Yehowa ateke Nyuma wende kudibu.’ Mose uvua mumanye ne: Yehowa uvua ulombola mudimu. Pamutu pa Mose kudikebela butumbi buende nkayende, uvua musue bua batendeledi bonso ba Yehowa bapete midimu ya kuenza. Kadi tuetu? Tutuku tusanka patu bakuabu bapeta majitu mu mudimu wa Yehowa anyi?

11. Ntshinyi tshivua muanetu kampanda muambe bua dipesha bakuabu majitu?

11 Kudi bana betu ba bungi badi benze bia bungi mu mudimu wa Yehowa munkatshi mua bidimu bia bungi ne mbalongeshe bansongalume bua kuambulabu majitu makuabu. Tshilejilu, tuakulayi bua muanetu Peter. Mu bidimu 74 bidiye muenze mu mudimu wa ku dîba ne ku dîba, wakenza bidimu 35 mu Betele wa ku Mputu. Uvua mutangidi wa mudimu ku biro bia mudimu ku Betele munkatshi mua bidimu bia bungi. Pashishe, bakapesha Paul nsonga uvuaye mulongeshe mudimu uvuaye wenza. Peter wakabungama anyi? Tòo, wakamba ne: “Ndi ne disanka dia bungi bua mudiku bana betu badibu balongesha bua kuitaba midimu minene ne bayenza bimpe menemene.”

TUAKU BAKULAKAJE MUSHINGA

12. Tshilejilu tshia Lehabama tshidi tshitulongesha tshinyi?

12 Pakalua Lehabama muana wa Solomo mukalenge, wakalomba bantu bakulakaje mibelu ya mua kukumbaja mudimu wende mupiamupia bimpe. Kadi pashishe wakabenga mibelu ayi! Kulondaye yeye mibelu ya bansonga bavuaye mukole nabu. Bipeta bivua bibi menemene. (2 Kulondolola 10:6-11, 19) Bidi bitulongesha tshinyi? Mbimpe tulombe mibelu kudi bakulakaje ne kudi bantu bakadi ne dimonamona dia malu dia bungi kutupita tuetu. Bansonga ki mbenzejibue anu bua kutungunuka ne kuenza malu anu muvuabu baenza kale to. Kadi badi ne bua kulonda ne kanemu konso ngenyi ya bakulakaje ne kubenga kuamba diakamue ne: wabu mushindu wa kuenza malu ki mmuimpe to.

13. Bansonga badi ne bua kuenza mudimu ne bakulakaje mushindu kayi?

13 Imue misangu badi mua kupesha bansongalume bujitu bua kutangila mudimu udibu benza kudi bakulakaje ne bana betu bakadi ne dimonamona dia malu dia bungi. Mbimpe bansongalume balonge malu kudi bana betu aba. Mu tshilejilu tshitukadi bakuile, Paul mumane kupingana pa muaba wa Peter bu mutangidi wa biro bia mudimu ku Betele, wakamba ne: “Mvua nkeba dîba dia kulomba Peter mibelu ne ntu nkankamija bana betu bakuabu ba mu tshibambalu atshi bua kuenza bia muomumue.”

14. Mushindu uvua Paulo ne Timote benza mudimu pamue udi utulongesha tshinyi?

14 Timote uvua muana bikole kudi mupostolo Paulo, kadi wakenza nende mudimu pamue bidimu bia bungi. (Bala Filipoyi 2:20-22.) Paulo wakambila bena Kolinto ne: “Ndi nnutumina Timote, bualu mmuananyi munanga udi ne lulamatu  mu Mukalenge; ne neanuvuluije mishindu yanyi ya kuenza malu mu mudimu wa Kristo Yezu anu bu mundi ndongesha miaba yonso mu tshisumbu tshionso.” (1 Kolinto 4:17) Mêyi aa adi atuleja patoke ne: Paulo ne Timote bavua benza mudimu bimpe pamue ne bambuluishangana. Paulo uvua ne dîba dia kulongesha Timote ‘mishindu yende ya kuenza malu mu mudimu wa Kristo,’ ne Timote wakayilonga bimpe. Paulo uvua munange Timote bikole ne uvua mutuishibue ne: uvua ne bua kutabalela bimpe bena Kristo ba mu Kolinto. Bakulu badi mua kuidikija mupostolo Paulo padibu balongesha bantu balume bakuabu bua kulombola malu mu tshisumbu.

YONSO WA KUTUDI UDI NE MUDIMU MUNENE

15. Mmunyi mudi Lomo 12:3-5 utuambuluisha bua kupita bimpe ne mashintuluka?

15 Tudi mu tshikondo tshimpe tshitambe. Tshitupa tshia bulongolodi bua Yehowa tshidi pa buloba tshidi tshienda tshidiunda mu mishindu ya bungi. Bualu ebu budi buleja ne: malu neatungunuke ne kushintuluka. Amue a ku mashintuluka aa adi mua kutulenga ne ki mmapepele mua kupita nawu to. Nebituambuluishe anu tuetu ne budipuekeshi ne bimanyine pa malu mimpe a mu mudimu wa Bukalenge bua Nzambi pamutu pa kuimanyina pa bitudi tuetu basue. Patudi tuenza nunku tudi tushala mu buobumue. Paulo wakafundila bena Kristo ba mu Lomo ne: “Ndi ngambila muntu yonso wa munkatshi muenu bua kedi meji ne: mmupite tshidiye atshi.” Wakumvuija pashishe ne: anu mudi tshitupa tshionso tshia mubidi tshikale ne watshi mudimu, muena mu tshisumbu yonso udi ne wende mudimu.—Lomo 12:3-5.

16. Ntshinyi tshidi muena Kristo yonso mua kuenza bua kulama ditalala ne buobumue mu bulongolodi bua Yehowa?

16 Bantu ba Yehowa bonso mbasue kutua Bukalenge bua Nzambi mpanda ne badi benza tshionso tshidibu babalomba. Bana betu bakulakaje badi mua kulongesha bansonga. Bana betu ba balume badi bansonga badi mua kuambula majitu makuabu ne kanemu ne bupuekele buonso. Bana betu ba balume batu basanka padi bakaji babu babatua nyama ku mikolo nansha padi nsombelu ushintuluka. Bana betu ba bakaji aba badi mua kuidikija Pisikila uvua wenza mudimu ne lulamatu pamue ne bayende Akila.—Bienzedi 18:2.

17. Ntshinyi tshivua Yezu mulongesha bayidi bende bua kuenza?

17 Yezu mmushiye tshilejilu tshimpe tshia muvuaye musue kulongesha bakuabu. Yezu uvua mumanye ne: bakuabu bavua ne bua kutungunuka ne kuenza mudimu wende. Bushuwa, uvua mumanye ne: bayidi bende mbantu bapange bupuangane. Kadi uvua mushindike ne: bavua ne bua kumuangalaja lumu luimpe too ne miaba ya kule ivuaye kayi muye. (Yone 14:12) Wakabalongesha bimpe, ne bakakumbana bua kuyisha mu ditunga dionso divuabu mua kuya.—Kolosayi 1:23.

18. Mmudimu kayi utuikala nawu mu matuku atshilualua? Mmudimu kayi utudi nawu lelu?

18 Yezu mumane kufua, Yehowa wakamubisha ne kumupeshaye mudimu mukuabu wa kuenza bua kukokesha “ku mutu menemene kua mbulamatadi yonso ne bukokeshi buonso ne bukole buonso ne bumfumu buonso.” (Efeso 1:19-21) Bu mutudi batendeledi ba Yehowa, tuetu bafue ne lulamatu kumpala kua Armagedone, netupetulule muoyo ne netuikale ne mudimu wa mushinga mukole mu bulongolodi bupiabupia. Lelu, buonso buetu tudi ne mudimu muimpe menemene wa kuyisha lumu luimpe ne kuvuija bantu bayidi. Nunku, nansha tuetu bansonga anyi bakulumpe, yonso wa kutudi udi mua kutungunuka ne kuikala ne “bia bungi bia kuenza mu mudimu wa Mukalenge.”—1 Kolinto 15:58.