Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2017

‘Eyemena Yehowa ne enza malu adi mimpe’

‘Eyemena Yehowa ne enza malu adi mimpe’

‘Eyemena Yehowa ne enza malu adi mimpe ne enza malu ne lulamatu.’—MISAMBU 37:3NWT.

MISAMBU: 133, 63

1. Yehowa wakafuka bantu ne bipedi kayi bia pa buabi?

YEHOWA wakafuka bantu ne bipedi bia pa buabi. Wakatupesha tshipedi tshia kuela meji tshidi tshituambuluisha bua kujikija bilumbu ne kulongolola malu bua matuku atshilualua. (Nsumuinu 2:11) Wakatupesha bukole bua tuikale ne mushindu wa kuenza malu atudi balongolole bua kuenza ne kukumbaja bipatshila bietu. (Filipoyi 2:13) Wakatupesha kabidi kondo ka muoyo, mmumue ne: dimanya dia tshidi tshimpe ne tshidi tshibi didi munda muetu. Kondo ketu ka muoyo kadi katuambuluisha bua kulongolola bilema bietu ne kubenga kuenza mpekatu.—Lomo 2:15.

2. Mmunyi mudi Yehowa mmusue bua tuenze mudimu ne bipedi bietu?

2 Yehowa mmusue bua tuenze mudimu bimpe ne bipedi bietu. Bua tshinyi? Bualu mmutunange ne mmumanye ne: tuetu benze mudimu ne bipedi bidiye mutupeshe netuikale ne disanka. Tshilejilu, mu Mifundu ya tshiena Ebelu tudi tubala ne: ‘Meji adi muena mutshima wa mudimu upangadija adi amuvudijila lupetu luvule,’ ne “malu onso  audi wenza wenze ne bukole buebe buonso.” (Nsumuinu 21:5; Muambi 9:10) Mu Mifundu ya tshiena Greke tudi tubala ne: “Nunku, patutshidi ne mushindu, tuenzelayi bantu bonso malu mimpe,” ne “bilondeshile mudi muntu yonso mupete tshipedi, nukuate natshi mudimu bua kuambuluishangana.” (Galatiya 6:10; 1 Petelo 4:10) Kakuyi mpata, Yehowa mmusue bua tuenze tshitudi mua kuenza bua kudiambuluisha ne kuambuluisha bakuabu.

3. Mmikalu kayi idi nayi bantu?

3 Yehowa mmusue bua tuenze mudimu ne bipedi bietu, kadi mmumanye ne: tudi ne mikalu. Tshilejilu, katuena mua kujikija dipanga bupuangane, bubi ne lufu to. (1 Bakalenge 8:46) Katuena kabidi mua kulombola bantu bakuabu to, bualu muntu yonso udi ne budikadidi bua kudisunguila malu. Nansha tuetu ne dimanya bungi kayi anyi ne dimonamona dia malu dia mushindu kayi, katuakukumbana Yehowa to.—Yeshaya 55:9.

Paudi mu ntatu, ‘Eyemena Yehowa ne enza malu adi mimpe’

4. Ntshinyi tshituakonkonona mu tshiena-bualu etshi?

4 Tudi ne bua kulekela Yehowa utulombola misangu yonso, bashindike ne: neatukuatshishe ne neatuenzele bitudi tukengela kadi katuyi tukokesha bua kudienzelabi nkayetu. Kadi Yehowa mmusue kabidi bua tuele meji bua tshitudi mua kuenza bua kujikija bilumbu ne bua kuambuluisha bakuabu. (Bala Misambu 37:3.) Tudi ne bua ‘kueyemena Yehowa ne kuenza malu adi mimpe.’ Tudi ne bua ‘kuenza malu ne lulamatu.’ Mmunyi mutudi mua kuenza nunku? Tukonkononayi tshilejilu tshia Noa, Davidi ne tshia batendeledi bakuabua ba Nzambi ba lulamatu bavua beyemene Yehowa. Netumone ne: kuvua malu avuabu kabayi mua kuenza kadi basungule bua kuimanyina pa malu avuabu mua kuenza.

PATUDI BANYUNGULUKA KUDI MALU MABI

5. Umvuija muvua nsombelu wa Noa.

5 Buloba buvua Noa musombele buvua ‘buwule ne tshinyangu’ ne buenzavi. (Genese 6:4, 9-13) Nansha muvua Noa mumanye ne: ndekelu wa bionso Yehowa uvua ne bua kubutula buloba bubi abu, malu avua bantu benza avua ne bua kuikala mamunyingalaje. Mu nsombelu au, Noa wakajingulula ne: kuvua malu avuaye kayi mua kuenza to, kadi wakajingulula kabidi ne: kuvua malu avuaye mua kuenza.

Diluisha mudimu wetu (Tangila tshikoso 6-9)

6, 7. a) Ntshinyi tshivua Noa kayi mua kuenza? b) Mmunyi mudi nsombelu wetu mufuanangane ne wa Noa?

6 Tshivua Noa kayi mua kuenza: Noa wakayisha  mukenji wa Yehowa wa didimuija ne lulamatu luonso, kadi kavua mua kuenzeja bantu bua kuwitaba to. Kavua mua kuenza bua Mvula wa kabutu aloke lukasa lukasa to. Noa uvua ne bua kumanya ne: Yehowa uvua ne bua kukumbaja mulayi wende wa kujikija malu mabi, mutuishibue ne: Nzambi neenze nanku mu tshikondo tshiakane.—Genese 6:17.

7 Tuetu petu tudi mu buloba budi buwule ne malu mabi butudi bamanye ne: Yehowa mmulaye bua kububutula. (1 Yone 2:17) Mu dindila tshikondo atshi, katuena mua kuenzeja bantu bua kuitaba “lumu luimpe lua Bukalenge” to. Katuena ne tshitudi mua kuenza bua “dikenga dinene” kutuadijadi anu mpindieu to. (Matayi 24:14, 21) Anu bu Noa, tudi ne bua kuikala ne ditabuja dikole, batuishibue ne: Nzambi neajikije malu mabi onso mu katupa kîpi emu. (Misambu 37:10, 11) Tudi batuishibue ne: Yehowa kakulekela bua bulongolodi bubi ebu bushale kabidi nansha bua dituku dimue to.—Habakuka 2:3.

8. Noa uvua muimanyine pa malu kayi? (Tangila tshimfuanyi tshia ntuadijilu tshia tshiena-bualu.)

8 Tshivua Noa mua kuenza: Pamutu pa kuteketa bua malu avuaye kayi mua kuenza, Noa wakimanyina pa malu avuaye mua kuenza. Noa wakayisha mukenji wa Yehowa wa didimuija ne lulamatu luonso. (2 Petelo 2:5) Mudimu eu uvua ne bua kuikala mumuambuluishe bua kulama ditabuja diende dikole. Pa kumbusha mudimu wa kuyisha, wakatumikila malu avua Yehowa mumuambile bua kuenza buatu.—Bala Ebelu 11:7.

9. Mmunyi mutudi mua kuidikija tshilejilu tshia Noa?

9 Anu bu Noa, tudi ne bia bungi bia kuenza “mu mudimu wa Mukalenge.” (1 Kolinto 15:58) Tshilejilu, tudi mua kuambuluisha mu mudimu wa luibaku ne wa dilama Nzubu yetu ya Bukalenge ne ya mpuilu, kuikala bena budisuile mu mpuilu ne mu mpungilu, anyi kuenza mudimu ku Betele peshi ku biro bia dikudimuna. Bualu bua mushinga menemene budi ne: tudi ne bia bungi bia kuenza mu mudimu wa kuyisha udi ukolesha ditekemena dietu bua matuku atshilualua. Muanetu wa bakaji kampanda udi ne lulamatu wakamba ne: patuye wambila bakuabu masanka a Bukalenge bua Nzambi, utu umona ne: bantu kabena ne ditekemena nansha dimue, ne buabu bobu ntatu yabu kayakujika to. Anu mudi muanetu wa bakaji eu muleje, tudi ne ditekemena, ne didi dikola menemene patudi  tudiambila bakuabu. Ditekemena edi didi dituambuluisha bua kushala mu lubilu bua kupeta muoyo.—1 Kolinto 9:24.

PATUDI TUENZA MPEKATU

10. Umvuija muvua nsombelu wa Davidi.

10 Mukalenge Davidi uvua muntu wa lulamatu, ne Yehowa uvua mumunange bikole menemene. (Bienzedi 13:22) Nansha nanku, Davidi wakenda masandi ne Beta-sheba, tshivua bubi bunene. Bualu bubi menemene budi ne: wakakeba bua kusokoka mpekatu wende pakalongololaye bua bashipe Uliya, bayende wa Beta-sheba mu mvita. Davidi wakenza too ne bua Uliya aye kudifidila mukanda uvua ne malu avuaye mufunde bua lufu luende! (2 Samuele 11:1-21) Ndekelu wa bionso, mibi ya Davidi yakamanyika. (Mâko 4:22) Tshiakenza Davidi ntshinyi?

Mpekatu ya kale (Tangila tshikoso tshia 11-14)

11, 12. a) Davidi mumane kuenza mpekatu, ntshinyi tshivuaye kayi mua kuenza? b) Ntshinyi tshiatuenzela Yehowa tuetu banyingalale?

11 Tshivua Davidi kayi mua kuenza: Davidi kavua mua kushintulula tshivuaye muenze to. Kadi uvua ne bua kukenga bua bipeta bibi bia mpekatu wende mu matuku a muoyo avua mamushadile. (2 Samuele 12:10-12, 14) Ke bualu kayi uvua dijinga ne ditabuja. Uvua ne bua kuikala mutuishibue ne: yeye munyingalale bulelela, Yehowa uvua ne bua kumufuila luse ne kumuambuluisha bua kutantamena bipeta bibi bia bienzedi biende.

12 Bu mutudi bapange bupuangane, tuetu bonso tutu tuenza mpekatu. Kadi bimue bilema bitu binene kupita bikuabu, ne mu imue nsombelu katuena mua kushintulula bilema bietu to. Tudi petu pamuapa mua kukenga bua bipeta bibi bia bienzedi bietu. (Galatiya 6:7) Kadi tudi beyemene mulayi wa Nzambi wa ne: tuetu banyingalale, neatukuatshishe mu bikondo bikole abi nansha bikala ntatu ayi mitukuate bua tshilema tshietu nkayetu.—Bala Yeshaya 1:18, 19; Bienzedi 3:19.

13. Mmunyi muvua Davidi muakaje malanda ende ne Yehowa?

13 Tshivua Davidi mua kuenza: Davidi wakajinga kuakaja malanda ende ne Yehowa. Mmunyi muakenzaye nanku? Davidi wakalekela Yehowa bua amuambuluishe. Tshilejilu, wakitaba mubelu uvua Natana, muprofete wa Yehowa mumupeshe. (2 Samuele 12:13) Davidi wakasambila kabidi Yehowa ne kumutondelaye mibi yende, kulejaye ne: uvua bushuwa musue bua Yehowa amuanyishe kabidi. (Misambu 51:1-17) Pamutu pa Davidi kulekela didipisha dimupita makanda, wakapeta dilongesha ku diambuluisha dia bilema biende. Kakenza kabidi mpekatu minene ayi musangu nansha umue to. Bidimu bia bungi pashishe, wakafua ne lulamatu, ne ke mudi Yehowa umumona.—Ebelu 11:32-34.

14. Tshilejilu tshia Davidi tshidi mua kutulongesha tshinyi?

14 Tshilejilu tshia Davidi tshidi tshitulongesha tshinyi? Tuetu benze bubi bunene, tudi ne bua kunyingalala ne muoyo mujima, kutondela Yehowa bubi buetu ne kumulomba bua atufuile luse. (1 Yone 1:9) Tudi kabidi ne bua kuambila bakulu bualu badi mua kutuambuluisha bua kuakaja malanda etu ne Yehowa. (Bala Yakobo 5:14-16.) Patudi tuitaba diambuluisha dia Yehowa, tudi tuleja ne: tudi beyemene mulayi wende wa ne: neatufuile luse. Bualu bukuabu, bilema bietu bidi ne bua kutulongesha, ne tudi ne bua kutungunuka ne kuenzela Yehowa mudimu ne muoyo mujima.—Ebelu 12:12, 13.

MU NSOMBELU MIKUABU

Masama (Tangila tshikoso tshia 15)

15. Tshilejilu tshia Hana tshidi tshitulongesha tshinyi?

15 Udi pamuapa mua kuela meji bua batendeledi bakuabu ba lulamatu ba mu Bible bavua beyemene Yehowa pavuabu benza muabu muonso bua kutantamena nsombelu mikole. Tshilejilu, kuvua tshikondo kampanda tshivua Hana kayi mua kulela bana to. Kavua mua kushintulula nsombelu au to. Kadi uvua mushindike ne: Yehowa uvua ne bua kumusamba. Ke bualu kayi wakatungunuka  ne kutendelela ku ntenta wa tshitendelelu, usambila Yehowa ne umuambila muvuaye udiumvua. (1 Samuele 1:9-11) Etshi ntshilejilu tshimpe be buetu tuetu! Patudi tusama anyi bikale ne ntatu mikuabu bitudi katuyi mua kushintulula, tupuile Yehowa kanyinganyinga ketu bashindike ne: udi uditatshisha bua bualu buetu. (1 Petelo 5:6, 7) Tudi tuenza ne muetu muonso bua bisangilu bietu bia bena Kristo ne ndongamu mikuabu idi bulongolodi bua Yehowa bulongolola bituambuluishe.—Ebelu 10:24, 25.

Bana badi balekele kuenzela Yehowa mudimu (Tangila tshikoso tshia 16)

16. Ntshinyi tshidi tshilejilu tshia Samuele tshilongesha baledi?

16 Netuambe tshinyi bua baledi ba lulamatu badi bana babu balekele kuenzela Yehowa mudimu? Muprofete Samuele kavua mua kuenzeja bana bende bakavua bantu bakole bua kushalabu ne lulamatu kudi Nzambi to. (1 Samuele 8:1-3) Uvua ne bua kuteka tshilumbu mu bianza bia Yehowa. Kadi Samuele wakenza ne muende muonso bua kushala ne lulamatu kudi Nzambi ne kusankisha Tatu wende wa mu diulu. (Nsumuinu 27:11) Lelu, baledi bena Kristo ba bungi badi mu nsombelu wa muomumue. Mbashindike ne: anu bu tatu wa mu tshilejilu tshia Yezu tshia muana mujimine, Yehowa utu misangu yonso pabuipi bua kuakidila benji ba mpekatu badi banyingalala. (Luka 15:20) Mu tshikondo atshi, baledi badi mua kudienzeja bua kushala ne lulamatu kudi Yehowa, batekemene ne: tshilejilu tshiabu netshisake bana babu bua kupingana kudiye.

Ntatu ya makuta (Tangila tshikoso tshia 17)

17. Bua tshinyi tshilejilu tshia mukaji mukamba tshidi tshitukolesha?

17 Tshilejilu tshikuabu tshimpe ntshia mukaji mukamba wa mu tshikondo tshia Yezu. (Bala Luka 21:1-4.) Kavua ne tshivuaye mua kuenza bua dikosa mishiku divua ku ntempelo, ne kavua mua kushintulula nsombelu wende wa bupele to. (Matayi 21:12, 13) Kadi dieyemena divuaye nadi kudi Yehowa diakamusaka bua kutua ntendelelelu mulelela mpanda. Uvua ne muoyo wa kupa ne wakela “tukuta tubidi,” tuonso tuvuaye pende natu. Mukaji wa lulamatu eu wakaleja muvuaye mueyemene Yehowa ne muoyo mujima. Uvua mumanye ne: yeye muteke mudimu uvuaye wenzela Yehowa pa muaba wa kumpala, Yehowa uvua ne bua kuenza bua apete bivuaye nabi dijinga. Bia muomumue, tudi batuishibue ne: tuetu bateke Bukalenge bua Nzambi pa muaba wa kumpala, Yehowa neenze bua tupete bitudi nabi dijinga.—Matayi 6:33.

18. Fila tshilejilu tshia muanetu wa balume uvua ne mmuenenu muimpe?

18 Bana betu ba bungi lelu badi pabu baleja mudibu beyemene Yehowa padibu batamba kuimanyina pa malu adibu mua kuenza pamutu pa kuimanyina pa adibu kabayi mua kuenza. Tuangate tshilejilu tshia muanetu Malcolm, uvua mushale ne lulamatu too ne pakafuaye mu 2015. Mu bidimu bia bungi bivuaye yeye ne mukajende benzele Yehowa mudimu, bavua bapitshile mu bikondo bimpe ne bibi. Wakamba ne: “Nsombelu utu ushintuluka imue misangu, katuyi tumanya tshia kuenza, tupanga ne mua kupita nende. Kadi Yehowa udi ubenesha bantu badi bamueyemena.” Mmubelu kayi uvua Malcolm mufile? Udi ne: “Bikengela kusambila bua kupatula bipeta bimpe ne kuikala ne tshisumi mu mudimu wa Yehowa. Mbimpe kuimanyina pa malu audi mua kuenza, kadi ki mpa audi kuyi mua kuenza to.” *—Tangila note.

19. a) Bua tshinyi mvese wetu wa tshidimu tshia 2017 mmukumbane menemene? b) Mmunyi muwatumikila mvese wa tshidimu tshia 2017 mu nsombelu webe?

19 Bulongododi bubi ebu budi buenda anu ‘bunyanguka bibi menemene,’ nunku tumanye ne: netuikale ne ntatu mipite bungi. (2 Timote 3:1, 13) Mbia mushinga bua katulekedi ntatu yetu itutekesha to. Kadi tudi ne bua kuikala ne ditabuja ne dieyemena dikole kudi Yehowa ne kuimanyina pa malu atudi mua kukokesha bua kuenza. Ke bualu kayi mvese wetu wa tshidimu tshia 2017 wa ne: ‘Eyemena Yehowa ne enza malu adi mimpe,’ Mmukumbane!—Misambu 37:3.

Mvese wa tshidimu tshia 2017: ‘Eyemena Yehowa ne enza malu adi mimpe’—MISAMBU 37:3NWT.

^ tshik. 18 Bala Tshibumba tshia Nsentedi tshia 15/10/2013, dibeji dia 17 too ne dia 20.