Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2017

Bua tshinyi bupuekele butshidi anu ne mushinga?

Bua tshinyi bupuekele butshidi anu ne mushinga?

‘Meji adi kudi bantu bapuekele.’—NSUMUINU 11:2.

MISAMBU: 38, 69

1, 2. Bua tshinyi Nzambi wakabenga Shaula? (Tangila tshimfuanyi tshia ntuadijilu tshia tshiena-bualu.)

PAVUA Yehowa musungule Shaula bua kuikalaye mukalenge, Shaula uvua ne bupuekele. (1 Samuele 9:1, 2, 21; 10:20-24) Kadi yeye mumane kulua mukalenge, wakalua muena didibandisha. Musangu kampanda, bena Peleshete binunu bia bungi bakalua kuela bena Isalele mvita. Muprofete Samuele wakambila Shaula ne: uvua ne bua kulua kulambula Yehowa mulambu. Kadi kumpala kua Samuele kufika, bena Isalele bakumvua buôwa, ba bungi bakudibu bakalekela Shaula. Wakapanga lutulu ne kulambula mulambu pamutu pa kuindila bua Samuele adilambuile yeye nkayende. Shaula kavua ne bukenji bua kuenza nunku nansha, ne Yehowa kakasanka to.—1 Samuele 13:5-9.

2 Pakafika Samuele, wakatandisha Shaula bua muvuaye kayi mutumikile Yehowa. Kadi Shaula kavua mumone ne: uvua muenze bualu bubi to. Wakakeba bua kudibingisha, kuelaye bakuabu tshilumbu pa mbidi bua tshilema tshiende. (1 Samuele 13:10-14)  Katshia anu ku tshikondo atshi, Shaula wakenza malu makuabu a bungi ne didibandisha. Ke bualu kayi Yehowa wakabenga bua kuikalaye mukalenge. (1 Samuele 15:22, 23) Shaula wakatuadija bimpe kadi kujikija bibi menemene.—1 Samuele 31:1-6.

3. a) Ntshinyi tshidi bantu ba bungi bamba bua bupuekele? b) Nkonko kayi ituandamuna?

3 Bantu ba bungi lelu badi bela meji ne: bupuekele kabuena mua kubapetesha nsombelu muimpe anyi mudimu muimpe to. Badi baditumbisha badimona bapite bakuabu. Tshilejilu, munayi kampanda wa manaya muena tshididi muende lumu wakamba ne: “Muaku bupuekele ki mmunkumbanyine nansha kakese, kawakunkumbanyina nansha.” Kadi bua tshinyi bidi ne mushinga bua muena Kristo kuikalaye ne bupuekele? Bupuekele budi bumvuija tshinyi? Ntshinyi tshidibu kabuyi bumvuija? Mu tshiena-bualu etshi netuandamune nkonko eyi. Mu tshialonda, netumone mutudi mua kushala ne bupuekele nansha padibi bikole.

BUA TSHINYI BUPUEKELE BUDI NE MUSHINGA?

4. Kuenza malu ne didibandisha kudi kumvuija tshinyi?

4 Bible udi uleja ne: didibandisha kadiena dipetangana ne bupuekele to. (Bala Nsumuinu 11:2.) Davidi wakasengelela Yehowa ne: ‘Ukande muntu webe kabidi bua kenji malu mabi mu tshitshiu tshiende.’ (Misambu 19:13) Kuenza malu ne didibandisha kudi kumvuija tshinyi? Nkuenza bualu butudi katuyi ne bukenji anyi ne bukokeshi bua kuenza pamuapa bualu katuena ne lutulu anyi bua lutambishi. Yonso wa kutudi ukadi pamuapa muenze bualu kampanda ne didibandisha bualu tudi bapange bupuangane. Kadi anu bu mutudi bamone mu tshilejilu tshia mukalenge Shaula, didibandisha diodi dilue tshibidilu kutudi, Yehowa kakusanka to. Mu Misambu 119:21 badi bamba ne: Yehowa ‘neatandishe badi badisue.’ Bua tshinyi udi wenza nanku?

5. Bua tshinyi kuenza malu ne didibandisha ntshilema tshinene?

5 Tshia kumpala, tuetu benze malu ne didibandisha, tudi tuleja mutudi katuyi tunemeka Yehowa Nzambi wetu ne mukokeshi wetu. Tshibidi, tuetu tuenza malu atudi katuyi ne bukokeshi bua kuenza, tudi mua kutandangana ne bantu anyi kubenga kumvuangana nabu. (Nsumuinu 13:10) Tshisatu, tuetu benze bualu kampanda ne didibandisha, tudi mua kumueneka batatakane kumpala kua bantu. (Luka 14:8, 9) Bushuwa tudi tumona bua tshinyi Yehowa mmusue bua tuikale bena bupuekele.

BUPUEKELE BUDI BUMVUIJA TSHINYI?

6, 7. Mmunyi mudi bupuekele bupetangana ne budipuekeshi?

6 Bupuekele budi bupetangana bikole ne budipuekeshi. Muena Kristo udi ne budipuekeshi kena ne lutambishi to, kadi udi umona bakuabu bamutambe yeye. (Filipoyi 2:3) Muena budipuekeshi utu kabidi misangu yonso muena bupuekele. Mmumanye ne: udi ne mikalu ne utu witaba bilema biende ne budipuekeshi buonso. Mmusue kuteleja ngenyi ya bakuabu ne kulonga malu kudibu. Muena budipuekeshi utu usankisha Yehowa bikole.

7 Bible udi uleja ne: muena bupuekele mmudimanye ne mmumanye ne: kudi malu adiye kayi mua kuenza anyi adibu kabayi bamuanyishile bua kuenza. Dimanya edi didi dimuambuluisha bua kunemeka bakuabu ne kubenzela malu mu mushindu muimpe.

8. Bua kushala ne bupuekele, ngelelu kayi wa meji utudi ne bua kuepuka?

8 Kadi tudi mua kutuadija kuela meji a kuenza  malu ne didibandisha katuyi nansha bajingulule. Mmunyi mudibi mua kuenzeka? Tudi mua kutuadija kudimona ne mushinga wa bungi kupita bakuabu bualu tudi ne majitu kampanda anyi bualu tudi bamanyangana bimpe ne bantu badi ne majitu kansanga mu tshisumbu. (Lomo 12:16) Anyi tudi mua kutuadija kuenza malu bua batumone batuambe. (1 Timote 2:9, 10) Tudi mene mua kutuadija kuambila bakuabu malu adibu ne bua kuenza ne adibu kabayi ne bua kuenza.—1 Kolinto 4:6.

9. Bua tshinyi bamue mbalue bena didibandisha? Fila tshilejilu tshia mu Bible.

9 Tudi mua kutuadija kuenza malu ne didibandisha tuetu katuyi tukanda majinga etu mabi. Ba bungi mbalue bena didibandisha bualu bavua basue bua babatumbishe, bavua bumvuila bakuabu mukawu anyi kabavua bakanda tshiji tshiabu. Bualu ebu buakafikila bamue bantu badibu batele mu Bible bu mudi: Abashaloma, Uziya ne Nebukadenesa. Yehowa wakabaleja patoke ne: bavua ne bua kuikala bena budipuekeshi.—2 Samuele 15:1-6; 18:9-17; 2 Kulondolola 26:16-21; Danyele 5:18-21.

10. Bua tshinyi katuena ne bua kubipisha meji a munda mua muntu adi amusaka ku malu kampanda? Fila tshilejilu tshia mu Bible.

10 Kudi mua kuikala tukuabu tubingila tutu tupangisha bantu bua kuikala ne bupuekele. Vuluka tshilejilu tshia Abimeleke ne Petelo. (Genese 20:2-7; Matayi 26:31-35) Bantu aba bavuaku ne didibandisha anyi? Anyi bivuaku mua kuikala ne: kabavua bamanye malu onso, peshi bavua benza malu kabayi bela meji anyi? Bu mutudi katuyi mua kubala mu mioyo ya bantu, katuena ne bua kubipisha meji a munda muabu adi abasaka ku malu kampanda to.—Bala Yakobo 4:12.

MUDIMU UUDI NAWU MU MALU ADI NZAMBI MULONGOLOLE

11. Ntshinyi tshitudi ne bua kumanya?

11 Muena bupuekele mmumanye mudimu udiye nawu mu malu adi Nzambi mulongolole. Yehowa n’Nzambi wa bulongame. Mmupeshe muena mu tshisumbu yonso mudimu kampanda. Yonso wa kutudi udi ne mushinga. Yehowa mmupeshe yonso wa kutudi bipedi ne mamanya mashilashilangane, ne udi utulekela tudisunguila mushindu wa kuenza nabi mudimu. Tuetu ne bupuekele, netuenze mudimu ne bipedi bietu mu mushindu udi Yehowa musue. (Lomo 12:4-8) Tudi tumona ne: Yehowa mmusue bua tuenze nabi mudimu bua kumutumbisha ne kuambuluisha bakuabu.—Bala 1 Petelo 4:10.

Tshilejilu tshia Yezu tshidi tshitulongesha tshinyi padi mudimu udibu batupeshe ushintuluka? (Tangila tshikoso tshia 12-14)

12, 13. Ntshinyi tshitudi ne bua kuvuluka tuetu bapete mashintuluka mu mudimu wa Yehowa?

12 Malu atudi tuenza mu mudimu wa Yehowa adi mua kushintuluka mu kupita kua matuku. Tshilejilu, vuluka mashintuluka a bungi avua Yezu mupete. Kumpala uvua nkayende ne Tatu wende. (Nsumuinu 8:22) Pashishe wakambuluisha Yehowa bua kufuka banjelu, diulu ne buloba ne bantu. (Kolosayi 1:16) Panyima pa matuku bakamutuma pa buloba. Uvua muledibue bu muana wetu muena dîna eu pashishe kuluaye muntu mukole. (Filipoyi 2:7) Yezu wakapingana mu diulu panyima pa lufu luende, ne mu tshidimu tshia 1914 wakalua Mukalenge wa Bukalenge bua Nzambi. (Ebelu 2:9) Mu matuku atshilualua, panyima pa bidimu tshinunu bia bukokeshi bua Yezu, neapingajile Yehowa Bukalenge, bua ‘Nzambi ikale bintu bionso kudi muntu yonso.’—1 Kolinto 15:28NWT.

13 Tuetu petu tudi mua kupeta mashintuluka a bungi mu nsombelu wetu. Imue misangu majitu etu adi mua kushintuluka bua mapangadika atudi tuangata. Tshilejilu, pamuapa  tuvua bajike kadi balue kuangata dipangadika dia kubuela mu dibaka, anyi tudi mua kulela bana. Panyima pa matuku tudi mua kupangadija bua kuenza amue mashintuluka bua kuenzela Yehowa mudimu wa ku dîba ne ku dîba. Misangu mikuabu majitu etu adi mua kushintuluka bua nsombelu kampanda utudi nende. Tudi mua kuikala bakumbane bua kuenza bia bungi anyi bikese. Kadi nansha tuetu bansonga anyi bakulumpe, bikale ne makanda a mubidi mimpe anyi katuyi nawu, Yehowa mmumanye ne: yonso wa kutudi udi mua kumuenzela mudimu bimpe. Kena utulomba bua tuenze bia bungi kupita mutudi mua kuenza to. Udi usanka bikole bua tshionso tshitudi tumuenzela.—Ebelu 6:10.

14. Mmunyi mudi bupuekele butuambuluisha bua kuikala ne disanka mu nsombelu yonso?

14 Yezu uvua usanka bua mudimu wonso uvua Yehowa umupesha, tudi petu mua kusanka ne utudi petu nau. (Nsumuinu 8:30, 31) Muena bupuekele udi usanka ne midimu idibu bamupesha ne majitu adiye nawu mu tshisumbu. Kena wimanyina pa bidi bantu bakuabu benza to. Kadi udi usanka ne mudimu udiye nawu mu bulongolodi bua Nzambi. Udi uwumona bu udi ufumina kudi Yehowa. Muntu udi ne bupuekele udi kabidi unemena bakuabu ne udi usanka bua kubakuatshisha. Mmumanye ne: Yehowa mmubapeshe pabu mudimu kampanda.—Lomo 12:10.

MMUENENU MUIMPE WA BUPUEKELE

15. Tshilejilu tshia Gideona tshidi tshitulongesha tshinyi?

15 Bu muvua Gideona ne bupuekele, udi tshilejilu tshimpe tshitambe. Pavua Yehowa mumupeshe mudimu wa kusungila bena Isalele  kudi bena Midiyana, Gideona wakamba ne: ‘Ba mu dîku dianyi badi bapita bena Manashe bonso bupele, ne meme ndi mutambe bupuekele mu nzubu wa tatu wanyi.’ (Balumbuluishi 6:15) Kadi Gideona wakeyemena Yehowa ne kuitaba mudimu uvuabu bamupeshe. Pashishe Gideona wakadienzeja bua kumvua bimpe tshivua Yehowa umulomba, kusambilaye bua kupeta buludiki. (Balumbuluishi 6:36-40) Gideona uvua muntu wa bukole ne wa dikima, kadi uvua kabidi ne meji ne budimu. (Balumbuluishi 6:11, 27) Panyima pa matuku, pakajinga bantu bua abakokeshe, wakabenga. Yeye mumane kuenza tshivua Yehowa mumulombe, wakapingana ku mbelu.—Balumbuluishi 8:22, 23, 29.

16, 17. Mmunyi mudi muena bupuekele mua kulubuluka?

16 Muntu yeye muitabe bua kuenza mudimu mupiamupia anyi musue kuenza bia bungi mu tshisumbu, kabiena biumvuija ne: kena ne bupuekele to. Bible udi wamba ne: mbimpe bua mutendeledi wa Yehowa kujingaye bua kuenzela bena Kristo nende mudimu bikole menemene ne kuya kumpala, anyi kulubuluka. (1 Timote 4:13-15) Kadi bua tuetu kulubuluka, bidi bikengela anu batupeshe mudimu mupiamupia anyi? Tòo. Tuetu bonso tudi mua kutungunuka ne kuakaja bumuntu buetu bua bena Kristo ne bipedi bidi Yehowa mutupeshe bua tuetu kumuenzela mudimu bimpe ne kuambuluisha bakuabu.

17 Kumpala kua muena bupuekele kuitaba mudimu, udi ukeba bua kumanya tshiamulombabu bua mudimu au. Udi usambila bua mudimu au ne wela meji ne ntema yonso bua kumona ni wakumbana bua kuwenza. Neikalaku ne dîba dikumbane ne makanda a kuenza malu makuabu a mushinga anyi? Biobi kabiyi nanku, udiku mua kuitaba bua bakuabu kuenzabu imue midimu idiye wenza anyi? Muntu mupuekele yeye mumane kuela meji bua bualu ebu, udi mua kumona ne: kakukumbaja mudimu mupiamupia eu bimpe to. Muntu yeye ne bupuekele neambe anu ne: tshiena nkumbana to.

18. a) Ntshinyi tshienza muena bupuekele padibu bamupesha mudimu mupiamupia? b) Mmunyi mudi Lomo 12:3 utuambuluisha bua kuikala bena bupuekele?

18 Yehowa mmusue bua tuende nende ne ‘mutshima mupuekele.’ (Mika 6:8) Nunku padibu batupesha mudimu mupiamupia, anu bu Gideona, tukebayi buludiki bua Nzambi ne tumulombe bua atuambuluishe. Tudi ne bua kuela meji bikole bua malu adi Yehowa utuambila ku diambuluisha dia Bible ne bulongolodi buende. Tumanyayi ne: tshionso tshitudi bakokeshe bua kuenza mu mudimu wende ki mbua dimanya ditudi nadi to, kadi mbualu Yehowa udi ne budipuekeshi ne mmusue kutuambuluisha. (Misambu 18:35) Muena bupuekele kena wela “meji ne: mmupite tshidiye atshi” to.—Bala Lomo 12:3.

19. Bua tshinyi tudi ne bua kuikala ne bupuekele?

19 Muntu mupuekele mmumanye ne: Yehowa nkayende ke udi mukumbanyine butumbi buonso bualu udi Mufuki ne Mutambe Bunene wa diulu ne buloba. (Buakabuluibua 4:11) Tuetu ne bupuekele, netusanke bua tshionso tshitudi mua kuenza mu mudimu wa Yehowa. Netunemeke mudi bakuabu badiumvua ne ngenyi ya bena Kristo netu, ne bu tshipeta, netuikale bonso mu buobumue. Muena bupuekele udi wela meji bikole kumpala kua kuenza bualu kampanda, kuenza nunku kudi kumuambuluisha bua kuepuka bilema binene. Yehowa udi wanyisha bikole bantu bena bupuekele. Bua tubingila etu, bupuekele budi ne mushinga wa bungi kudi bantu ba Nzambi. Mu tshiena-bualu tshialonda, netumone mutudi mua kushala ne bupuekele nansha padibi mua kutukolela.