Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2017

Bakadifila nkayabu ku budisuile

Bakadifila nkayabu ku budisuile

MUNKATSHI mua Bantemu ba tshisumi badi benza mudimu miabu ivuabu dijinga ne bamanyishi ba bungi ba Bukalenge mudi bana betu ba bakaji bajike ba bungi. Bamue ba kudibu badi benzela Nzambi mudimu ku babende munkatshi mua bidimu bia bungi. Ntshinyi tshivua tshibambuluishe bua kuenza bidimu bia bungi nunku mu ditunga dienyi? Mmalongesha kayi avuabu bapete bua dienzela Nzambi mudimu mu ditunga dikuabu? Mmunyi muvua nsombelu wabu mushintuluke? Tuvua bele ba bungi ba ku bana betu ba bakaji bavua ne dimononamona dia malu aba nkonko. Wewe muikale nsongakaji mujike udi ne dijinga dikole dia kuenzela Nzambi mudimu udi usankisha bikole, tudi batuishibue ne: malu adi bana betu aba bambe neakuambuluishe. Bushuwa tshilejilu tshiabu tshidi mua kuambuluisha bantu ba Nzambi bonso.

WAKATANTAMENA DIELAKANA

Anita

Udiku udiebeja ni udi bulelela ne bidi bikengela bua kuikala pebe mpanda-njila mujike mu ditunga dikuabu anyi? Anita, udi mpindieu ne bidimu 75 uvua ne dielakana dikole bua tshivuaye. Uvua mukolele mu Angleterre muaba uvuaye mutuadije kuenza bumpanda-njila pavuaye ne bidimu 18. Udi wamba ne: “Mvua munange kuyisha bantu malu a Yehowa, kadi tshivua mumanye ne: mvua mua kuenzela Nzambi mudimu ku babende to. Tshivua muanji kulonga muakulu muenyi ne mvua mutuishibue ne: tshivua mua kumanya nansha umue to. Ke bualu kayi biakantonda bikole pangakapeta dibikila dia kubuela mu Kalasa ka Gilada. Ngakakema bikole bua muntu wa tshianana bu meme eu bambikila panyi ku Gilada. Kadi ngakela meji ne: ‘Bikala Yehowa mumone ne: ndi mukumbane, nenye.’” Bualu ebu mbuenzeke kukadi bidimu bipite pa 50. Anita udi wamba ne: “Katshia anu ku tshikondo atshi, ndi misionere mu Japon. Kutu misangu intu ngambila bansongakaji ne musangelu ne: ‘ambulayi bibuta bienu panyima ne nundonde bua tuenze mudimu munene wa katshia ne katshia eu.’ Ndi ne disanka bua mudi ba bungi bandonde.”

BAVUA NE DIKIMA

Bana betu ba bakaji ba bungi bavua benze mudimu ku babende bavua kumpala belakana bua kuya mu ditunga dikuabu. Mmunyi muvuabu bapete dikima?

Maureen

Maureen udi mpindieu ne bidimu 65 udi wamba ne: “Mu dikola dianyi, mvua ne dijinga dikole dia kuikala ne nsombelu muimpe wa disanka uvua mua kuambuluisha bantu bakuabu.” Pakakumbajaye bidimu 20, wakaya mu Québec, mu Canada, miaba ivuabu dijinga ne bampanda-njila ba bungi. Udi wamba kabidi ne: “Panyima pa matuku, ngakapeta dibikila dia kuya mu Kalasa ka Gilada, kadi mvua ne buôwa bua kuya muaba umvua tshiyi mumanye, tshiyiku nansha ne balunda. Bivua kabidi bintonde bikole bua kushiya mamu uvua utabalela papa uvua katshiyi wenda bua bukole bua disama. Ngakenza matuku a bungi tshiyi ndala ndila anu kudila ndomba Yehowa bua malu aa. Pangakayukila ne  baledi banyi bua malu avua antonda aa, bakankankamija bua kuitaba dibikila adi. Ngakamona kabidi muvua tshisumbu tshietu tshiambuluishe baledi banyi. Kumona diambuluisha dia Yehowa kuakangambuluisha bua kuikala ne dishindika dia ne: Yehowa neantabalele. Bu muvuabi nanku, mvua pabuîpi bua kuya.” Kutuadijila mu 1979, Maureen mmuenze mudimu wa bumisionere munkatshi mua bidimu bipite pa 30 ku Ouest kua Afrike. Lelu, nansha mudi Maureen utabalela mamuende mu Canada, utshidi anu mpanda-njila wa pa buende. Padiye wela meji bua bungi bua bidimu bidiye muenzele Nzambi mudimu ku babende, udi wamba ne: “Yehowa uvua misangu yonso umpesha tshionso tshimvua natshi dijinga ne dîba dimvua ntshikengela.”

Wendy

Wendy udi mpindieu ne bidimu 65 wakatuadija bumpanda-njila mu Australie pavuaye ne bidimu 14. Udi uvuluka ne: “Mvua ne bundu bua bungi ne bivua binkolela bua kuyukila ne bantu bamvua tshiyi mumanye. Kadi bumpanda-njila buakangambuluisha bua kuyukila ne bantu ba mishindu yonso, ke meme kupeta muoyo mukole. Panyima pa matuku, tshivua kabidi ne bundu to. Bumpanda-njila mbundongeshe bua kueyemena Yehowa, tshiakatshina kabidi bua kuya kuenzela Nzambi mudimu mu matunga a kule to. Bualu bukuabu, muanetu wa bakaji mukuabu mujike uvua misionere mu Japon munkatshi mua bidimu bipite pa 30 wakambikila bua kuya kuyisha mu Japon bua ngondo isatu. Kuenza nende mudimu kuakakolesha dijinga dianyi dia kuya ku babende.” Mu 1986, Wendy wakaya mu Vanuatu, tshidiila tshidi mutantshi wa Kilometre 1770 ku est kua Australie.

Wendy utshidi anu mu Vanuatu, mpindieu udi wenza mudimu ku biro bia dikudimuna. Udi wamba ne: “Kumona mudibu benze tusumbu ne bisumbu miaba idi biro bia dikudimuna kudi kunsankisha bikole. Malu makese andi muenze mu mudimu wa Yehowa mu bidiila ebi ndiakalenga dinene.”

Kumiko (pankatshi)

Kumiko, udi mpindieu ne bidimu 65 uvua mpanda-njila wa pa tshibidilu mu Japon pavua mpanda-njila nende mumuambile bua kuya mu Nepal. Kumiko udi wamba ne: “Uvua anu ungambila misangu ne misangu bua kuyamu, kadi meme mvua anu mbenga. Bivua bintonda bua kulonga muakulu mupiamupia ne kuibidilangana ne muaba mupiamupia. Lutalu lukuabu luvua lua kupeta makuta avua akengela bua kuya mu ditunga dikuabu. Mu lupuolo lumvua nkeba bua kuangata dipangadika, ngakapeta njiwu ne moto, kuyabu nanyi mu lupitadi. Mu lupitadi amu, ngakela meji ne: ‘Udi mumanye tshivua mua kumfikila nnganyi? Mvua mua kupeta disama dikole ne kupangila mushindu wa kuya kuenza mudimu wa bumpanda-njila mu matunga a kule. Tshienaku mua kuya kuenzela Nzambi mudimu mu ditunga dikuabu nansha bua tshidimu tshimue anyi?’ Ngakasambila Yehowa ne muoyo mujima bua angambuluishe bua nye.” Kumiko mumane kupatuka mu lupitadi, wakaya bua kumona ditunga dia Nepal, panyima pa matuku yeye ne mpanda-njila nende au bakayamu.

 Padi Kumiko wela meji bua bidimu bitue ku 10 bia mudimu bivuaye muenze mu Nepal, udi wamba ne: “Ntatu imvua nayi kumpala yakanshila muaba anu muvua Mbuu mukunze mupanduluke. Ndi ne disanka dia bungi bua mumvua muye kuenza mudimu muaba udibu dijinga ne bamanyishi ba bungi. Misangu ya bungi pantu nyisha ku nzubu kampanda mukenji wa mu Bible, bena mutumba batanu anyi basambombo batu balua bua kuteleja. Nansha bana batu bandomba ne kanemu kuonso trakte udi wakula bua Bible. Kuyisha mu teritware udi bantu bateleja kudi kuenza disanka dia bungi.”

BAKATANTAMENA NTATU

Kakuyi mpata, bana betu ba bakaji batshivua bajike batuvua bele nkonko aba bavua batuilangane ne ntatu. Mmunyi muvuabu bayitantamene?

Diane

Diane wa mu Canada udi wamba ne: “Kumpala mvua mmona bikole bua kuya kule, kushiya dîku dianyi.” Mpindieu udiye ne bidimu 62, udi misionere mu Côte d’Ivoire mukadiye muenze bidimu 20. Udi wamba kabidi ne: “Mvua mulombe Yehowa bua angambuluishe kabidi bua kunanga bantu ba muaba undi ngenzela mudimu. Muanetu wa balumue Jack Redford, umue wa kubalongeshi banyi ba mu Gilada wakatumvuija ne: kumpala nsombelu ya miaba ituaya neyanji kututatshisha ne kututonda bikole, nangananga bupele bukole butuvua mua kutuilangana nabu. Kadi wakamba ne: ‘Kanutangidi bupele to. Tangilayi bantu, nutangile mpala yabu ne mêsu abu. Tangilayi tshidibu benza padibu bateleja malongesha a mu Bible.’ Ke tshimvua muenze, ne kuenza nunku kuakampetesha disanka dia bungi. Pantu nyisha bantu mukenji wa mu Bible udi ukolesha eu, ntu mmona mutu bantu basanka bikole!” Mbualu kayi bukuabu buvua buambuluishe Diane bua kuibidilangana ne nsombelu wa mu ditunga dikuabu muvuaye wenzela Nzambi mudimu? Udi wamba ne: “Ngakadia bulunda ne balongi banyi ba Bible ne ngakasanka bikole bua muvuabu balue batendeledi ba Yehowa ba lulamatu. Muaba umvua ngenzela mudimu wakalua bu kuetu. Ngakapeta bamamu ne batatu, bana betu ba balume ne ba bakaji ba mu nyuma anu muvua Yezu muambe.”—Mâko 10:29, 30.

Anne udi mpindieu ne bidimu 46 udi wenza mudimu mu Asie, mu ditunga divuabu bakandike mudimu wetu mu imue miaba. Udi wamba ne: “Mu bungi bua bidimu pamvua ngenza mudimu miaba mishilashilangane ya ku babende, tuvua tusomba ne bana betu ba bakaji bavua ne bilele ne bumuntu bishilangane ne bianyi bikole menemene. Kuvua bikondo bituvua tubungamijangana, katuyi tupetangana. Pavuabi bienzeka nanku, mvua ndienzeja bua kulamatangana ne batuvua nabu mu nzubu umue ne bua kumvua bilele bia kuabu bimpe. Mvua kabidi ndienzeja bikole bua kubananga ne kubenga kuikala muena malu makole kudibu. Ndi ne disanka bua mudi bionso bindi muenze bingambuluishe bua kudia nabu bulunda bukole ne busheme budi bungambuluisha bua kunanukila mu mudimu wanyi.”

Ute

 Mu 1993, Ute wa mu Allemagne udi mpindieu ne bidimu 53, bavua bamutume bu misionere mu Madagascar. Udi wamba ne: “Kumpala mvua nduangana bua kulonga muakulu wa muntu amu, kuibidilangana ne bikondo bia mashika ne bia luya, ne ndienzeja bua kupita bimpe ne disama dia malaria, dia amibe ne misanda. Kadi ngakapeta diambuluisha dia bungi. Bana betu ba bakaji, bana babu balela ne balongi banyi ba Bible ba muntu amu bakangambuluisha ne lutulu luonso bua kumanya muakulu bimpe. Misionere nanyi mukuabu wakantabalela ne dinanga dionso pamvua nsama. Kadi Yehowa ke uvua nangananga mungambuluishe. Mvua ne tshibidilu tshia kumuambila tunyinganyinga tuanyi tuonso mu disambila. Pashishe mvua ngindila ne lutulu, matuku ne ngondo bipita bua Nzambi kushisha kuandamuna masambila anyi. Yehowa wakandamuna masambila anyi onso.” Ute utshidi anu wenzela Nzambi mudimu mu Madagascar kukadi bidimu 23.

BAKAPETA MASANKA A BUNGI

Anu bu miaba mikuabu ivuabu dijinga ne bamanyishi ba bungi, bana betu ba bakaji bajike badi basombele mu matunga a kule batu misangu ya bungi bamba ne: kuenzela Nzambi mudimu ku babende nkubapeteshe masanka a bungi. Ngamue masanka kayi avuabu bapete?

Heidi

Heidi, wa mu Allemagne udi mpindieu ne bidimu 73, udi musionere mu Côte d’Ivoire katshia ku 1968, udi wamba ne: “Disanka dinene dindi mupete ndia kumona mudi bana banyi ba mu nyuma ‘batungunuka ne kuenda mu bulelela.’ Bamue ba ku balongi banyi ba Bible ba kale badi mpindieu bampanda-njila ne bakuabu bakulu mu tshisumbu. Ba bungi ba kudibu batu bambikila ne: maman anyi kaku. Umue wa ku bakulu aba ne mukajende ne bana bende batu bammona bu muena mu dîku diabu. Bushuwa, Yehowa mmumpeshe muana wa balume, mukaji wa muananyi ne bikulu banyi basatu.”—3 Yone 4.

Karen (pankatshi)

Karen wa mu Canada udi mpindieu ne bidimu 72, uvua muenze mudimu munkatshi mua bidimu 20 ku Ouest kua Afrike. Udi wamba ne: “Bumisionere bungambuluishe bua kuikala ne lungenyi lua kudipangisha malu, kunanga bantu ne kuikala ne lutulu. Bualu bukuabu, kuenza mudimu pamue ne bena Kristo nanyi ba mu matunga mashilashilangane nkualabaje mushindu wanyi wa kumona malu. Ngakamanya ne: kudi mishindu mishilangane ya kuenza malu. Ndisanka kayipu dia kuikala ne balunda ba kunanga pa buloba bujima! Nansha muvua nsombelu wetu ne midimu ituvua tuenzela Nzambi bishintuluke, bulunda buetu butshi anuku.”

Margaret wa mu Angleterre udi mpindieu ne bidimu 79 udi misionere mu Laos. Udi wamba ne: “Kuenzela Nzambi mudimu ku babende nkungambuluishe bua kudimuenena mudi Yehowa ukoka bantu ba makoba onso ne ba miaba mishilashilangane mu bulongolodi buende. Bualu ebu buakakolesha ditabuja dianyi bikole. Budi bunshindikila ne: Yehowa udi ulombola bulongolodi buende ne malu adiye mulongolole neakumbane.”

Bulelela, bana betu ba bakaji badi benza mudimu ku babende mbenze mudimu wa dikema mu mudimu wa kuyisha. Mbakumbane bua kubela kalumbandi ne muoyo mujima. (Bal. 11:40) Bualu buimpe mbua ne: bungi buabu budi buenda anu buvula. (Mis. 68:11) Udiku pebe mua kuakaja nsombelu webe ne kulonda dikasa dia bana betu ba bakaji ba tshisumi batudi bele nkonko mu tshiena-bualu etshi anyi? Biobi nanku, kakuyi mpata ‘neutete, ulabule, umvue ne: Yehowa udi muakane.’—Mis. 34:8.