Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 8 2016

Nkonko ya babadi

Nkonko ya babadi

Bua tshinyi diowa mâyi ku bianza divua tshilumbu tshinene kudi baluishi ba Yezu?

Ebu buvua bumue bua ku malu buvua baluishi ba Yezu bamubanda nabu yeye ne bayidi bende. Mikenji ya Mose ivua ileja tshivua mua kuvuija muntu mukoya, tshilejilu dipatuka dia tufina mu mubidi, nsudi anyi dilenga tshitalu tshia muntu anyi tshia nyama. Mikenji ivua kabidi ileja tshivua muntu mua kuenza bua kuluaye kabidi mukezuke. Uvua mua kulua mukezuke pa kufila milambu, kuowa mâyi anyi kumiamina mashi.—Lewitiki, nshapita wa 11-15; Nomba, nshapita wa 19.

Balongeshi bena Yuda bavuabu babikila kabidi ne: balabi bakasakidila yabu mikenji ku mikenji eyi. Mukanda kampanda udi uleja ne: balabi bavua basakidile tukenjikenji tukuabu tua bungi bua tshivua mua kuvuija muntu mukoya ne muvuaye mua kuvuija bantu bakuabu bakoya. Balabi bavua kabidi bele mikenji bua mishindu ya malonga ne bintu bivua mua kulua bikoya anyi kubenga kulua bikoya, ne bilele bivua bantu mua kulonda bua kuluabu kabidi bakezuke.

Baluishi ba Yezu bakamuebeja ne: “Bua tshinyi bayidi bebe kabena balonda bilele bia bantu ba kale, kadi badi badia biakudia ne bianza manyanu?” (Mâko 7:5) Bafalese abu kabavua bakula bua mankenda etu mena dîna aa, mmumue ne: bua kuowa mâyi ku bianza kumpala kua kudia to. Bafalese bavua bele mukenji ne: kumpala kua muntu kudia, bavua bamuela mâyi ku bianza bu tshilele kampanda. Mukanda utukadi bakuile udi usakidila ne: balabi “bavua kabidi baleje malonga avuabu mua kuelela mâyi, mâyi avua makumbane, muntu uvua mua kuelangana ku bianza ne bitupa bia bianza bivuabu ne bua kuela mâyi.”

Ntshinyi tshivua Yezu muenze bua mikenji yonso ivuabu basakidile kudi bantu eyi? Wakambila bamfumu ba bitendelelu bena Yuda ne: “Yeshayi wakambilamu bua bualu buenu, nuenu bena lubombo, anu mudibu bafunde ne: ‘Bantu aba badi bannemeka anu ne mishiku yabu, kadi mioyo yabu kayena kundi [Yehowa], idi kule. Badi batungunuka ne kuntendelela tshianana, bualu badi balongesha anu malongesha a bantu.’ Nudi balekele mikenji ya Nzambi, balamate bilele bia bantu.”—Mâko 7:6-8.