Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 4 2016

Mudimu webe wa diyisha udiku bu lumuma anyi?

Mudimu webe wa diyisha udiku bu lumuma anyi?

Mudimu wetu wa diyisha mmudimu wa mushinga mukole. Kadi, ki mbantu bonso batutu tuyisha batu bamanye bualu ebu to. Nansha bantu bobu basue kumanya tshidi Bible wamba, kabatu misangu yonso bamona ne: bidi ne mushinga bua tuetu kubalongesha Dîyi dia Nzambi to.

Tuangate tshilejilu tshia Gavin. Uvua ubuela mu bisangilu ku Nzubu wa Bukalenge, kadi kavua musue kulonga Bible to. Gavin udi uleja ne: uvua mumanye malu makese a mu Bible ne kavua musue bua bantu bakuabu bamanye bualu ebu to. Uvua utshina bua kabalu kumulomba bua kubuela mu tshitendelelu kampanda to, ne kavua musue bua bamushime to. Kadi wewe udi wela meji kayi? Kuvuaku mushindu wa kuambuluisha Gavin anyi? Ela meji bua mushindu udi malongesha a mu Bible mua kuambuluisha muntu. Yehowa wakambila bena Isalele ne: ‘Mêyi anyi akudimuke bu lumuma; bu mvula mukese pa mashinde a nseku.’ (Dutelonome 31:19, 30; 32:2) Tumonayi amue malu adi atangila lumuma ne tulufuanyikije ne mudimu wetu wa diyisha bua kuambuluisha “bantu ba mishindu yonso” bimpe.—1 Timote 2:3, 4.

 MMUNYI MUDI MUDIMU WETU WA DIYISHA MUA KUIKALA BU LUMUMA?

Lumuma lutu lutekete. Lumuma lutu luenzeka ku kakese ku kakese padi kapepe ka luya kadikuma ku dibungi ne dikudimuka mamata makese a mâyi. Mmunyi muvua mêyi a Yehowa ‘makudimuke bu lumuma’? Wakambila bantu bende malu ne bulenga, ne lutulu ne ubatabalela. Tudi tuidikija Nzambi patudi tuleja kabuabu kanemu bua malongesha abu. Tudi tubakankamija bua kuelanganabu meji ne kudiangatshilabu mapangadika. Patudi tutabalela bantu mushindu eu, nebitabe bitudi tubambila, ne mudimu wetu wa diyisha neupatule bipeta bimpe.

Lumuma lutu lufila tshitalela. Mudimu wetu neufile tshitalela kudi bantu bakuabu patudi tuela meji bua mishindu mishilangane ya kubambuluisha bua kumanya malu a bungi pa bidi bitangila bulelela. Chris, muanetu wa balume uvua mulombe Gavin bua musangu wa kumpala bua kulonga Bible kavua mumuenzeje ku bukole bua kuitabaye to. Kadi, wakakeba mayele mashilashilangane bua Gavin adiumvue bimpe pavuabu bayukila nende malu a mu Bible. Chris wakambila Gavin ne: kudi mukenji wa mushinga udibu bakuile mu Bible, ne kulonga malu adi atangila mukenji eu kuvua mua kumuambuluisha bua kumvua bimpe bisangilu. Pashishe Chris wakumvuija ne: milayi ya buprofete ya mu Bible ivua mimujadikile ne: malu adi mu Bible mmalelela. Bu tshipeta, bakayukila misangu ya bungi bua muvua milayi ya buprofete ya mu Bible mikumbane. Diyukidilangana edi diakapetesha Gavin tshitalela anyi kumuambuluisha, ne ndekelu wa bionso wakitaba dilonga dia Bible.

Lumuma ludi ne mushinga bua muoyo. Mu tshikondo tshia mushipu mu Isalele, mvula kayitu iloka munkatshi mua ngondo ya bungi to. Padiku kakuyi tshitalela tshidi tshifumina ku lumuma, mitshi idi yuma ne ifua. Yehowa ukavua muambe ne: mu matuku etu aa, kuvua ne bua kuikala minanga, mmumue ne: bantu bavua ne bua kuikala ne nyota ya ‘kumvua mêyi a Yehowa.’ (Amosa 8:11) Wakalaya ne: bela manyi bavua ne bua kuikala bu ‘lumuma lufuma kudi Yehowa’ pavuabu bayisha lumu luimpe lua Bukalenge, babambuluisha kudi “mikoko mikuabu.” (Mika 5:7; Yone 10:16) Mukenji utudi tuyisha udi munkatshi mua bintu bidi Yehowa mulongolole bua kupesha bantu badi ne nyota ya bulelela muoyo. Utuku wangata mukenji eu ne mushinga anyi?

Lumuma ndibenesha dia kudi Yehowa. (Dutelenome 33:13) Mudimu wetu wa diyisha udi mua kuikala bu dibenesha anyi dipa kudi bantu badi bitaba mukenji wetu. Dilonga dia Bible divua dibenesha kudi Gavin bualu diakamuambuluisha bua kupeta mandamuna a nkonko yende yonso. Wakalubuluka ne lukasa, kutambulaye ne mpindieu udi ne disanka dia kuyisha lumu luimpe lua Bukalenge pamue ne mukajende Joyce.

Bantemu ba Yehowa mbuwuje buloba ne lumu luimpe lua Bukalenge bua Nzambi

ANGATA MUDIMU WEBE WA DIYISHA NE MUSHINGA

Kufuanyikija mudimu wetu wa diyisha ne lumuma kudi mua kutuambuluisha kabidi bua kujingulula ne: madikolela adi yonso wa kutudi wenza mu mudimu wa diyisha adi ne mushinga. Mushindu kayi? Dimata dia mâyi dimue didi ne diambuluisha dikese, kadi padiku mamata a mâyi miliyo ya bungi, buloba budi buwula ne tshitalela. Bia muomumue, tudi mua kumona malu adi yonso wa kutudi wenza pa nkayende mu mudimu wa diyisha bu makese. Kadi patudi tusangisha madikolela adi batendeledi ba Yehowa miliyo ya bungi benza, bidi bienza bua bujadiki budi bufidibua “kudi bisamba bionso.” (Matayi 24:14) Mudimu wetu wa diyisha newikalaku dibenesha dia kudi Yehowa kudi bantu bakuabu anyi? Eyowa, mukenji wetu newikale anu bu lumuma ludi lutekete, lufila tshitalela ne luikale ne mushinga bua muoyo.