Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 4 2016

“Dinanukila dikumbaje mudimu wadi”

“Dinanukila dikumbaje mudimu wadi”

“Dinanukila dikumbaje mudimu wadi, bua nuenu nuikale bakumbane kanuyi kalema mu malu onso, kanuyi nupangila mu bualu nansha bumue.”—YAKOBO 1:4.

MISAMBU: 135, 139

1, 2. a) Mmalongesha kayi atudi tupeta ku dinanukila dia Gideona ne bantu bende 300? (Tangila tshimfuanyi tshia ntuadijilu tshia tshiena-bualu.) b) Bilondeshile Luka 21:19, bua tshinyi dinanukila didi ne mushinga?

TETABI kumona mu lungenyi mvita mikole idi itshiokesha ivua basalayi ba bena Isalele balombola kudi mulumbuluishi Gideona baluangana ne baluishi babu. Gideona ne bantu bende bakipata bena Midiyana ne bena diabu butuku bujima ntanta wa kilometre 32. Bible udi utuambila tshiakenzeka pashishe ne: ‘Gideona ne bantu bende nkama isatu bakadi nende bakalua ku Yadene, bakasabukaku, bapungile.’ Kadi kabavua banji kutshimuna to, kutshivua basalayi 15000 ba bobu kuluangana nabu. Baluishi aba bavua bakengeshe bena Isalele munkatshi mua bidimu bia bungi, nunku bena Isalele kabavua mua kubalekela to. Ke bualu kayi, Gideona ne bantu bende bakatungunuka ne kubipata too ne muakatshimunabu!—Balumbuluishi 7:22; 8:4, 10, 28.

2 Tuetu petu tudi tuluangana mvita mikole idi itshiokesha. Baluishi betu ke Satana, bulongolodi buende ne dipanga dietu dia bupuangane. Bamue ba kutudi mbaluangane ne baluishi aba  munkatshi mua bidimu bia bungi. Tudi batshimune mvita ya bungi ne diambuluisha dia Yehowa. Kadi, katuena banji kupeta ditshimuna dia ndekelu to. Imue misangu tudi mua kudiumvua bapungile bua kuluangana mvita eyi. Anyi tudi mua kutshioka bua kuindila nshikidilu wa ndongoluelu wa malu eu. Yezu wakadimuija ne: tuvua ne bua kupeta ntatu ne buluishi bukole mu matuku a ku nshikidilu. Kadi wakamba kabidi ne: tuetu bananukile, netutshimune. (Bala Luka 21:19.) Dinanukila ntshinyi? Ntshinyi tshiatuambuluisha bua kunanukila? Mmalongesha kayi atudi tupeta mu bilejilu bia bantu bavua bananukile? Ntshinyi tshitudi mua kuenza bua “dinanukila dikumbaje mudimu wadi”?—Yakobo 1:4.

DINANUKILA NTSHINYI?

3. Dinanukila ntshinyi?

3 Mu Bible, dinanukila didi diumvuija malu a bungi kupita kuitaba anyi kuanyisha nsombelu kampanda mukole. Didi dileja kabidi mushindu utudi tuela meji ne utudi tudiumvua bua ntatu yetu. Dinanukila didi dituambuluisha bua kuikala ne dikima, lulamatu ne lutulu. Mukanda kampanda udi wamba ne: dinanukila nngikadilu udi utuambuluisha bua kuikala ne ditekemena dikole ne kubenga kutshioka patudi mu ntatu. Didi dituambuluisha bua kushala bashindame katuyi tunyungishibua nansha mu ntatu mikole menemene. Didi kabidi dituambuluisha bua kutshimuna ntatu ayi ne kutuishila mêsu pa tshipatshila tshietu, kadi ki mpa tunyinganyinga tuetu to.

4. Bua tshinyi tudi tuamba ne: dinanga ke didi diambuluisha bua kunanukila?

4 Dinanga didi dituambuluisha bua kunanukila. (Bala 1 Kolinto 13:4, 7.) Mu nsombelu kayi? Dinanga ditudi nadi bua Yehowa didi dituambuluisha bua kutantamena bualu kayi buonso budiye mulekele butufikila. (Luka 22:41, 42) Dinanga ditudi nadi bua bana betu didi dituambuluisha bua kutantamena mateketa abu. (1 Petelo 4:8) Dinanga ditudi nadi bua muena dibaka netu didi dituambuluisha bua kutantamena “makenga” atu afikila nansha bena dibaka badi ne disanka ne didi dituambuluisha bua kukolesha dibaka dietu.—1 Kolinto 7:28.

NTSHINYI TSHIATUAMBULUISHA BUA KUNANUKILA?

5. Bua tshinyi anu Yehowa ke udi mukumbane bua kutuambuluisha bua kunanukila?

5 Lomba Yehowa bukole. Yehowa udi “Nzambi udi ufila bukole bua kunanukila ne busambi.” (Lomo 15:5) Anu Yeye nkayende ke udi umvua bimpe malu adi atufikila, meji etu ne nsombelu wetu. Nunku mmumanye bimpe menemene tshitudi natshi dijinga bua kunanukila. Bible udi wamba ne: ‘Udi ukumbaja dijinga dia bonso badi bamutshina; udi uteleja muadi wabu wa dilomba diambuluisha, ne udi ubasungila.’ (Musambu 145:19, NWT) Kadi mmunyi mudi Nzambi wandamuna masambila etu patudi tumulomba bukole bua kunanukila?

Yehowa udi utumvua bimpe, mmumanye bimpe menemene tshitudi natshi dijinga bua tuetu kunanukila

6. Bilondeshile Bible, mmunyi mudi Yehowa mua ‘kutulongoluela njila wa kupatuka’ mu ntatu yetu?

6 Patudi tulomba Yehowa bua atuambuluishe bua kutantamena ntatu, udi utulaya bua ‘kutulongoluela njila wa kupatukamu.’  (Bala 1 Kolinto 10:13.) Mmunyi mudiye wenza nanku? Imue misangu, udi mua kutumbushila lutatu alu. Kadi misangu ya bungi, neatupeshe bukole bua “kutantamena malu onso ne lutulu ne disanka.” (Kolosayi 1:11) Bu mudi Yehowa mumanye bimpe mikalu itudi nayi ku mubidi, mu meji ne mu lungenyi, kakulekela nsombelu utukolela, bitufikisha ku dijimija lulamatu luetu kudiye to.

7. Fila tshilejilu tshidi tshileja mudi biakudia bia mu nyuma ne mushinga bua kunanukila.

7 Biakudia bia mu nyuma bikoleshe ditabuja diebe. Bua tshinyi biakudia bia mu nyuma bidi ne mushinga? Tuangate tshilejilu etshi: Bua kubanda mukuna wa Everest, muntu udi dijinga ne kudia dituku dionso biakudia bidi bimupetesha kalori 6000. Kalori eyi nya bungi menemene kupita itu mubidi wa muntu nayi dijinga. Bua muntu udi ubanda mukuna kunanukila ne kukumbaja tshipatshila tshiende, udi ne bua kudia biakudia bidi bipetesha kalori ya bungi menemene, mmumue ne: bidi bipetesha makanda a bungi. Bia muomumue, tudi dijinga ne biakudia bia bungi bia mu nyuma bua kunanukila ne kukumbaja tshipatshila tshietu. Tudi ne bua kudisuika bua kukeba dîba dia kudilongela ne kubuela mu bisangilu. Malu aa neatupeteshe tshitudi natshi dijinga bua kulama ditabuja dietu dikole.—Yone 6:27.

8, 9. a) Bilondeshile Yobo 2:4, 5, ntshinyi tshidi tshitetshibua patudi mu ntatu? b) Paudi mu ntatu, mbualu kayi budi kabuyi bumueneka buudi mua kufuanyikija mu lungenyi luebe?

8 Vuluka lulamatu luebe kudi Nzambi. Patudi ne ntatu, tutu tukenga ne lulamatu luetu kudi Nzambi ludi palu lutetshibua bikole. Mushindu utudi tuenza malu patudi ne ntatu udi uleja bituikala tumona Yehowa bu Mukokeshi mulelela wa diulu ne buloba. Mushindu kayi? Muluishi wa Nzambi Satana udi uluisha bumfumu bua Yehowa, umupenda padiye wamba ne: bantu badi benzela Nzambi mudimu anu bua kupeta masanka. Satana wakamba ne: ‘Bionso bidi muntu nabi yeye neabifile bua kusungila muoyo wende.’ Pashishe Satana wakamba bua Yobo ne: ‘Kadi anji kolola tshianza tshiebe, ulenge mifuba yende ne misunyi yende, ne yeye neakudiule ku mêsu kuebe.’ (Yobo 2:4, 5) Satana mmushintulukaku katshia wamba mêyi aa anyi? Tòo. Bidimu bia bungi pashishe, pavuabu bipate Satana mu diulu, utshivua anu utungunuka ne kubanda bena lulamatu ba Nzambi misangu yonso. (Buakabuluibua 12:10) Lelu, Satana utshidi anu wamba ne: bantu badi batendelela Nzambi anu bua kupeta masanka. Udi usanka bua kutumona tubenga bukenji bua Nzambi bua kukokesha ne tulekela kumuenzela mudimu.

9 Paudi mu lutatu ukenga, teta kufuanyikija bualu budi kabuyi bumueneka ebu mu lungenyi luebe. Satana ne bademon badi ku luabu luseke. Mbashale batangile bua kumona tshiwikala mua kuenza, bamba ne: neutshioke. Ku lukuabu luseke kudi Yehowa, Mukalenge wetu Yezu Kristo, bela manyi bakadi babishibue, ne binunu bia banjelu. Badi pabu bamona muudi udienzeja, kadi badi bakuela mbila bua kukukolesha. Badi basanka bua kumona ne: udi mukumbane bua kunanukila ne kushala ne lulamatu kudi Yehowa. Pashishe udi umvua Yehowa ukuambila ne: “Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.”—Nsumuinu 27:11.

Yezu uvua mutuishile mêsu ku difutu divuaye ne bua kupeta bua dinanukila diende

10. Mmunyi muudi mua kuidikija Yezu pa kutuishila mêsu ku difutu diwapeta bua dinanukila diebe?

 10 Tuishila mêsu ku difutu. Fuanyikija ne: udi wenza luendu lule. Mu luendu luebe, udi ulonda njila mule wa muinshi mua buloba. Muaba wonso uudi utangila udi mîdima. Kadi udi mumanye ne: wewe mutungunuke ne luendu too ne ku ndekelu kua njila au, neumone kabidi butoke. Nsombelu wetu udi anu bu luendu elu. Udi mua kupitshila mu bikondo bikole, ne udi mua kudiumvua bu ne: ntatu yebe mmikupite makanda. Nansha Yezu wakadiumvua pende mushindu eu. Pavuabu bamukudike ku mutshi wa makenga, uvua mupuekeshibue milongo ne uvua ne bisama bia bungi. Tshikondo atshi tshivua ne bua kuikala tshikondo tshikole menemene tshia mu nsombelu wende. Ntshinyi tshivua tshimuambuluishe bua kunanukila? Bible udi wamba ne: wakatangila “disanka divua dimutekela kumpala.” (Ebelu 12:2, 3) Yezu uvua mutuishile mêsu ku difutu divuaye ne bua kupeta bua dinanukila diende, ne bualu bua mushinga mukole buvua ne: dinanukila diende divua dimuambuluisha bua kutumbisha dîna dia Nzambi ne kutua bukenji bua Nzambi bua kukokesha nyama ku mikolo. Uvua mumanye ne: ntatu ivua ya tshitupa tshîpi, kadi difutu diende mu diulu divua dia kashidi. Lelu, ntatu iudi utuilangana nayi idi mua kukupita makanda ne kukusama ku muoyo, kadi uvuluke ne: nya tshitupa tshîpi.

“BANTU BADI BATANTAMENE NTATU”

11. Bua tshinyi tudi ne bua kukonkonona malu avua mafikile ‘bantu bavua batantamene ntatu’?

11 Katuena nkayetu badi bananukila to. Bua kukankamija bena Kristo bua kutantamena ntatu ya bungi ya kudi Satana, mupostolo Petelo wakafunda ne: “Numukandamene, bashindame mu ditabuja, bamanye ne: tshisumbu tshijima tshia bana benu badi pa buloba tshidi tshitantamena makenga a muomumue.” (1 Petelo 5:9) Malu adi mafikile “bantu badi batantamene ntatu” adi atulongesha mutudi mua kushala ne lulamatu, atujadikila ne: tudi mua kutshimuna ne atuvuluija ne: netupete difutu bua lulamatu luetu. (Yakobo 5:11) Tukonkononayi bilejilu bikese patupu. [1]—Tangila note ku ndekelu.

12. Tshilejilu tshia bakeluba bavuabu bateke mu budimi bua Edene tshidi tshitulongesha tshinyi?

12 Bakeluba mbanjelu badi mu mulongo mubandile. Adama ne Eva bamane kuenza bubi, Yehowa wakapesha bamue bakeluba mudimu mupiamupia pa buloba. Mudimu eu uvua mushilangane bikole ne uvuabu nawu mu diulu. Tshilejilu tshiabu tshidi mua kutulongesha mutudi mua kunanukila padibu patupesha mudimu udi mutukolele. Bible udi wamba ne: Yehowa ‘wakateka bakeluba ku esete kua budimi bua Edene ne muele wa mvita wa kapia wakadi utshinguluka ku nseke yonso, bua kulamabu njila wa ku mutshi wa muoyo.’ [2] (Tangila note.) (Genese 3:24) Bible kena wamba ne: bakeluba bavua badiabakena bua mudimu  wabu anyi ne: bavua badiangata ne mushinga wa bungi, bamona ne: mudimu mupiamupia eu kauvua mubakumbanyine to. Kabakatshioka anyi kuulekela to. Kadi, bakenza mudimu wabu too ne ku ndekelu, pamuapa too ne mu tshikondo tshia Mvula wa kabutu, bidimu bipite pa 1600 pashishe.

13. Ntshinyi tshivua tshiambuluishe Yobo bua kutantamena ntatu yende?

13 Muena lulamatu Yobo. Imue misangu bidi mua kukusama ku muoyo padi mulunda webe anyi muena mu dîku dienu ukuamba dîyi didi dikutekesha. Anyi udi mua kuikala usama bikole peshi ukenga bua muudi mufuishe muntu uudi munange. Kadi nansha wewe ne lutatu lua mushindu kayi, tshilejilu tshia Yobo tshidi mua kukukolesha. (Yobo 1:18, 19; 2:7, 9; 19:1-3) Yobo kavua mumanye bua tshinyi uvua mupete makenga a bungi musangu umue to, nansha nanku, kavua mupingane tshianyima to. Ntshinyi tshivua tshimuambuluishe bua kunanukila? Tshia kumpala, uvua munange Yehowa ne kavua musue kumunyingalaja to. (Yobo 1:1) Yobo uvua musue kusankisha Nzambi mu bikondo bimpe ne bibi. Bualu bukuabu, Yehowa wakambuluisha Yobo bua amone bukole buende pakamuambilaye bua bintu bia dikema bivuaye mufuke. Bualu ebu buakajadikila Yobo bikole ne: Yehowa uvua mua kumujikijila ntatu yende mu tshikondo tshiakanyine. (Yobo 42:1, 2) Ke tshiakenzeka. Bible udi wamba ne: ‘Yehowa wakakudimuna dikenga dia Yobo, wakamupingajila diakalengele. Wakavudija bintu bia Yobo bipite bia diambedi misangu ibidi.’ Yobo wakashala ne muoyo ‘matuku ende muwule tente ne disanka.’—Yobo 42:10, 17.

14. Bilondeshile 2 Kolinto 1:6, mmunyi muvua dinanukila dia Paulo diambuluishe bantu bakuabu?

14 Mupostolo Paulo. Udiku ne buluishi bukole anyi ukengeshibua anyi? Udi mukulu mu tshisumbu anyi mutangidi wa tshijengu, udiumvua ne: majitu ebe mmakupite bungi anyi? Bikalabi nanku, tshilejilu tshia Paulo tshidi mua kukuambuluisha. Bavua bakengeshe Paulo ne tshikisu tshikole ne uvua misangu yonso  usamisha lungenyi bua bena Kristo nende mu tshisumbu. (2 Kolinto 11:23-29) Kadi Paulo kavua mutshioke to, tshilejilu tshiende tshivua tshikoleshe bantu bakuabu. (Bala 2 Kolinto 1:6.) Dinanukila diebe didi padi mua kusaka bakuabu bua kunanukilabu.

DINANUKILA ‘NEDIKUMBAJE MUDIMU WADI’ KUUDI ANYI?

15, 16. a) ‘Mmudimu’ kayi udi dinanukila ne bua kukumbaja? b) Fila bilejilu bidi bileja mutudi mua kuenza bua “dinanukila dikumbaje mudimu wadi.”

15 Muyidi Yakobo wakafunda ku diambuluisha dia nyuma muimpe ne: “Dinanukila dikumbaje mudimu wadi, bua nuenu nuikale bakumbane kanuyi kalema mu malu onso, kanuyi nupangila mu bualu nansha bumue.” (Yakobo 1:4) Mmunyi mudi dinanukila mua kukumbaja “mudimu wadi” kutudi? Patudi mu lutatu kampanda, tudi mua kumona ne: tudi dijinga ne lutulu lua bungi, dianyisha anyi dinanga. Patudi tutantamena lutatu elu, netulonge mua kuleja ngikadilu eyi bikole, nunku netuakaje buena Kristo buetu.

Patudi tutantamena ntatu, buena Kristo buetu budi bulue bukumbane bimpe menemene (Tangila tshikoso tshia 15 ne tshia 16)

16 Bu mudi dinanukila dituvuija bena Kristo bimpe, katuena basue kushipa mikenji ya Yehowa anu bua kujikija lutatu luetu to. Tshilejilu, wewe uluangana ne ngenyi mibi ya tshiendenda, kulekedi diteta dikupita makanda to. Lomba Yehowa bua akuambuluishe bua kumbusha ngenyi mibi. Kudiku muena mu dîku dienu udi ukuluisha anyi? Kulekedi to! Ikala mudisuike bua kutungunuka ne kuenzela Yehowa mudimu. Wewe muenze nunku, neukoleshe dieyemena diebe kudi Yehowa. Vuluka ne: Bua tuetu kuanyishibua kudi Nzambi, tudi ne bua kunanukila.—Lomo 5:3-5; Yakobo 1:12.

17, 18. a) Fila tshilejilu tshidi tshileja mudi kunanukila too ne ku ndekelu ne mushinga. b) Bu mutukadi basemene ku nshikidilu, ndishindika kayi ditudi mua kuikala nadi?

17 Tudi ne bua kunanukila too ne ku ndekelu, kadi ki nganu bua tshikondo kampanda to. Fuanyikijabi ne: mazuwa kampanda adi enda adina mu mâyi. Bua bena luendu kupandukabu, badi ne bua kuowela too ne ku mukuna. Muntu udi ulekela kowela padiye utuadijilaku, neadine mu mâyi. Bia muomumue, muntu udi ulekela kowela kumpala kua kufika ku mukuna, neadine pende. Tuetu basue kubuela mu bulongolodi bupiabupia, tudi ne bua kutungunuka ne kunanukila. Mbimpe tuikale ne mmuenenu wa buena wa mupostolo Paulo wakamba ne: “Katuena tulekela.”—2 Kolinto 4:1, 16.

18 Anu bu Paulo, tudi bashindike ne muoyo mujima ne: Yehowa neatuambuluishe bua kunanukila too ne ku ndekelu. Paulo wakafunda ne: “Tudi tutshimuna too ne ku ndekelu ku diambuluisha dia yeye uvua mutunange. Bualu ndi mutuishibue ne: ni ndufu, ni mmuoyo, ni mbanjelu, ni mbulamatadi, ni mmalu a mpindieu anyi malu atshilualua, ni mmakokeshi, ni mbutumbuke, ni ndondo, ni ntshifukibua kayi tshikuabu tshionso, katshiena mua kutumbusha ku dinanga dia Nzambi didi mu Kristo Yezu Mukalenge wetu nansha.” (Lomo 8:37-39) Mu bulelela, imue misangu tudi mua kushioka. Kadi tuidikijayi Gideona ne bantu bende. Bakatshioka, kadi kabakalekela to. ‘Bakakutungunuka ne dilondakaja baluishi babu.’—Balumbuluishi 8:4MMV.

^ [1] (tshikoso tshia 11) Nebikukankamije kabidi wewe mukonkonone mudi bantu ba Nzambi ba matuku etu aa bananukile. Tshilejilu, mu Annuaire wa mu 1992, wa mu 1999, ne wa mu 2008 mudi malu adi akolesha a bana betu ba mu Ethiopie, mu Malawi, ne mu Russie.

^ [2] (tshikoso tshia 12) Bible kena uleja bungi bua bakeluba bavuabu bapeshe mudimu eu to.