Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2017

Nkonko ya babadi

Nkonko ya babadi

Mupostolo Paulo wakafunda ne: Yehowa “kakulekela bua nutetshibue ne diteta dinudi kanuyi mua kutantamena.” (1 Kolinto 10:13) Bidiku bimvuija ne: Yehowa utu udianjila kupangadija malu atudi mua kutantamena ne pashishe usungula ntatu itudi mua kutuilangana nayi anyi?

Bu biobi nanku, ela meji muvua nsombelu wetu mua kuikala. Tshilejilu, muana wa balume wa muena Kristo kampanda wakadishipa. Tatuende wakanyingalala bikole. Uvua udiebeja bikala Yehowa uvua mudianjile kumona lutatu alu ne mulongolole bua yeye ne mukajende balutantamene. Mu ndongoluelu wa malu eu, ba bungi ba kutudi nebatuilangane ne ntatu mikole. Nunku tudi ne bua kuitaba ne: Yehowa udi ulombola bualu buonso budi butufikila anyi?

Patuakonkonona 1 Kolinto 10:13, netumone ne: Bible kena witaba lungenyi lua ne: Yehowa utu udianjila kumanya malu atudi mua kutantamena ne usungula ntatu ituatuilangana nayi to. Bua tshinyi tudi tuamba nanku? Tukonkononayi tubingila tunayi.

Ka kumpala, Yehowa wakapesha bantu budikadidi bua kudisunguila malu anyi bua kudiangatshila mapangadika. Mmusue bua tudiangatshile mapangadika etu tuetu nkayetu. (Dutelonome 30:19, 20; Yoshua 24:15) Patudi tukeba kuangata mapangadika adi asankisha Yehowa, tudi mua kumueyemena bua atulombole. (Nsumuinu 16:9) Kadi patudi tuangata mapangadika mabi, netupete anu bipeta bibi. (Galatiya 6:7) Nunku bu Yehowa usungula ntatu itudi tupeta, tuvuaku bushuwa mua kuamba ne: tudi ne budikadidi bua kudisunguila malu anyi?

Kibidi, Yehowa katu utukuba ku “malu adi kaayi matekemena” to. (Muambi 9:11NWT) Muntu udi mua kupeta njiwu ya lufu anu bualu udi muaba mubi ne mu dîba dibi. Yezu wakakula bua njiwu ivua bantu 18 bafue pavua tshibumba tshibupukile. Wakaleja patoke ne: Nzambi kavua mukebeshe lufu luabu to. Ki mbia meji bua kuamba ne: kumpala kua njiwu kuenzekayi, Nzambi udi usungula udi ufua ne udi ushala ne muoyo to.

Kisatu, yonso wa kutudi udi ne mushindu wa kulama muoyo wende mutoke kudi Yehowa. Satana wakamba ne: batendeledi ba Yehowa badi  bamuenzela mudimu bua bidiye ubapesha. Satana uvua usua kuamba ne: ntatu yoyi mitukuate, katuakushala ne lulamatu kudi Yehowa to. (Yobo 1:9-11; 2:4; Buakabuluibua 12:10) Bu Yehowa utukuba ku imue ntatu, bivua mua kumueneka bu ne: Satana uvua muambe bulelela.

Kinayi, Yehowa katu usungula bua kudianjila kumanya bualu buonso buatufikila to. Bulelela, Yehowa udi mua kumanya malu adi mua kuenzeka mu matuku atshilualua yeye musue. (Yeshaya 46:10) Kadi Bible udi uleja ne: katu udianjila kusungula bua kumanya bualu buonso to. (Genese 18:20, 21; 22:12) Yehowa udi ne dinanga ne buakane, nunku katu udiatakaja budikadidi buetu bua kudisunguila malu to.—Dutelonome 32:4; 2 Kolinto 3:17.

Kadi mpindieu ntshinyi tshivua Paulo usua kumvuija pakambaye ne: Yehowa “kakulekela bua nutetshibue ne diteta dinudi kanuyi mua kutantamena”? Paulo uvua umvuija tshidi Yehowa wenza patudi mu ntatu, kadi ki nkumpala kua kutukuatayi to. * (Tangila note.) Tuetu beyemene Yehowa, neatuambuluishe mu lutatu kayi luonso luatufikila. (Misambu 55:22) Tukonkononayi mpindieu tubingila tubidi tuvua tusake Paulo bua kuamba bualu ebu.

Kabingila ka kumpala kadi ne: ntatu itudi tutuilangana nayi itu ikuata “bantu bonso.” Bu mututshidi mu bulongolodi bua Satana, tuetu bonso netutuilangane ne ntatu mikole, pamuapa too ne ya lufu. Kadi tuetu beyemene Yehowa tudi mua kutantamena ntatu eyi ne kushala ne lulamatu. (1 Petelo 5:8, 9) Mu mvese ya ntuadijilu ya mu 1 Kolinto nshapita wa 10, Paulo wakakula bua imue ntatu ivua nayi bena Isalele mu tshipela. (1 Kolinto 10:6-11) Bena Isalele bavua beyemene Yehowa bakatantamena ntatu ayi. Kadi bamue bena Isalele kabakatumikila Yehowa to. Kabakashala ne lulamatu bualu kabavua bamueyemene to.

Kabingila kibidi kadi ne: “ Nzambi udi ne lulamatu.” Bidi biumvuija tshinyi? Patudi tumona mushindu udi Yehowa mutabalele batendeledi bende ba kale, tudi tumona ne: udi wambuluisha ne lulamatu luonso ‘bantu badi bamusue ne batu batumikila mikenji yende.’ (Dutelonome 7:9) Tudi tupeta dikongesha dia ne: Yehowa utu misangu yonso ukumbaja milayi yende. (Yoshua 23:14) Tudi bashindike ne: 1) Yehowa kakuanyisha bua ntatu itukolele menemene, tupanga mua kuyitantamena to, ne 2) ‘neatulongoluele njila wa kupatukila.’

Yehowa “udi utusamba mu makenga etu onso”

Mmunyi mudi Yehowa ‘ulongolola njila wa kupatukila’ bua bantu badi bamueyemena? Bulelela, udi mua kujikija lutatu. Kadi vuluka, Paulo wakamba ne: Yehowa ‘nealongolole njila wa kupatukilamu, bua numone mua kulutantamena.’ Nunku Yehowa utu misangu ya bungi utulongoluela njila wa kupatukila padiye utukolesha bua tushale ne lulamatu. Tuakulayi bua imue mishindu idiye wenza nunku.

  • Yehowa “udi utusamba mu makenga etu onso.” (2 Kolinto 1:3, 4) Ku diambuluisha dia Bible, nyuma muimpe ne mupika wa lulamatu, Yehowa udi mua kutupetesha ditalala mu lungenyi, mu muoyo wetu, ne kutuyisha mutudi tudiumvua.—Matayi 24:45; Yone 14:16; Lomo 15:4.

  • Yehowa udi mua kuenza mudimu ne nyuma wende bua kutulombola. (Yone 14:26) Nyuma muimpe udi mua kutuambuluisha bua kuvuluka miyuki ne mêyi manene bia mu Bible bua kuangata mapangadika mimpe.

  • Yehowa udi mua kuenza mudimu ne banjelu bende bua kutuambuluisha.—Ebelu 1:14.

  • Yehowa udi mua kuenza mudimu ne bena Kristo netu bua kutuambuluisha. Badi mua kutukolesha ku bidibu bamba ne benza.—Kolosayi 4:11.

Nunku, ntshinyi tshitudi balonge mu mêyi a Paulo adi mu 1 Kolinto 10:13? Yehowa katu usungula ntatu itudi tutuilangana nayi to. Kadi, tudi bashindike ne: tuetu beyemene Yehowa, tudi mua kutantamena lutatu kayi luonso. Tudi bamanye ne: Yehowa utu misangu yonso utulongoluela njila wa kupatukila bua tuetu kushala ne lulamatu kudiye.

^ tshik. 2 Muaku wa mu tshiena Greke udibu bakudimune ne: “diteta” udi kabidi umvuija “dikenga.”