Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2017

Malu adi Yehowa mulongolole neakumbane

Malu adi Yehowa mulongolole neakumbane

‘Ngakuamba dîyi dianyi, nendimane; ngakadipangidijila bualu, nembuenze.’—YESHAYA 46:11.

MISAMBU: 147, 149

1, 2. a) Ntshinyi tshidi Yehowa mutuleje? b) Mmulayi kayi udi mu Yeshaya 46:10, 11 ne mu 55:11?

MÊYI a kumpala a mu Bible a ne: “Kale ku tshibangidilu Nzambi wakafuka diulu ne buloba” adi amueneka mapepele, kadi adi ne bujitu bua bungi. (Genese 1:1) Tudi tumona anu bintu bikese mu bintu bia bungi bivua Nzambi mufuke mu diulu ne pa buloba, ne tudi ne dimanya dikese menemene dia bintu bu mudi tshibuashibuashi, butoke, ne bukole budi bukoka bintu bua bimate panshi. (Muambi 3:11) Kadi Yehowa mmutuleje tshidiye mulongolole bua buloba ne bua bantu. Wakafuka bantu mu tshimfuanyi tshiende, ne mmusue bua bikale ne muoyo pa buloba. (Genese 1:26) Bavua ne bua kuikala bana bende, ne yeye uvua ne bua kuikala Tatu wabu.

2 Mu nshapita muisatu wa mukanda wa Genese, tudi tumona ne: bakaluisha tshivua Yehowa mulongolole. (Genese 3:1-7) Nansha nanku kakuena bualu budi Yehowa kayi mua kuenza to. Muntu nansha umue kena mua kumupangisha bua kuenza bualu. (Yeshaya 46:10, 11; 55:11) Tudi bashindike ne: tshivua Yehowa mulongolole ku ntuadijilu netshikumbane anu ku kumbana mu tshikondo tshiakane!

3. a) Mmalongesha kayi a mushinga adi atuambuluisha bua kumvua mukenji wa mu Bible? b) Bua tshinyi tudi tukonkonona mpindieu malongesha aa? c) Nnkonko kayi ituandamuna?

 3 Kakuyi mpata, tudi bamanye malu adi Nzambi mulongolole bua buloba ne bua bantu, ne mudimu udi nawu Yezu mu malu aa. Aa mmalongesha a mu Bible a mushinga mukole, ne adi pamuapa malongesha a kumpala atuakamanya patuakatuadija kulonga Dîyi dia Nzambi. Mpindieu tudi basue kuambuluisha bakuabu bua kumanyabu malongesha a mushinga mukole aa. Tudi ne mpunga wa pa buende wa kuenza nunku tshidimu etshi patuikala tubikila bantu bua kubuela mu Tshivulukilu tshia lufu lua Kristo. (Luka 22:19, 20) Bobu balue mu tshibilu tshia mushinga etshi, nebamanye malu mimpe a bungi adi Nzambi mulongolole. Nunku etshi ntshikondo tshimpe tshitudi mua kuela meji bua nkonko misunguluke itudi mua kuenza nayi mudimu bua kulomba bantu bua kuluabu mu tshibilu etshi. Mu tshiena-bualu etshi netuandamune nkonko isatu eyi: Ntshinyi tshidi Nzambi mulongolole bua buloba ne bua bantu? Tshiakenzeka ntshinyi? Bua tshinyi mulambu wa Yezu udi upikula ntshintu tshidi tshiambuluisha bua malu adi Nzambi mulongolole kukumbanawu?

NTSHINYI TSHIVUA MUFUKI MULONGOLOLE?

4. Mmunyi mudi bifukibua ‘biamba butumbi bua Nzambi’?

4 Yehowa m’Mufuki wa kunemeka bikole. Bintu bionso bidiye mufuke mbimpe be! (Genese 1:31; Yelemiya 10:12) Ntshinyi tshidi bulengele bua bifukibua ne bulongame buabi bitulongesha? Bidi bitulongesha ne: bintu bionso bidi Yehowa mufuke, kumbukila ku tuntu tukese too ne ku binene bidi bituambuluisha. Paudi wela kabidi meji bua selile wa muntu udi ukemesha, anyi umona muana wa katoto, peshi utangila mudi kuulu kulengela pakadi dîba dibuela, utu udiumvua munyi? Tudi tuanyisha bintu ebi bualu Yehowa mmutufuke ne tshipedi tshia kumanya tshintu tshidi bulelela tshimpe.—Bala Misambu 19:1; 104:24.

5. Ntshinyi tshidi Yehowa muenze bua bifukibua biende bionso bienze mudimu bimpe pamue?

5 Yehowa wakelela bifukibua biende bionso mikalu bimpe menemene. Wakelela bintu bidiye mufuke mikenji, kuelaye kabidi mikenji ya bikadilu bilenga. Wakela mikenji eyi bua bintu bionso bidi mu diulu ne pa buloba bienze mudimu bimpe pamue. (Misambu 19:7-9) Bintu bionso bidi mu diulu ne pa buloba bidi ne muaba wabi ne mudimu wabi. Tshilejilu, mukenji wa bukole budi bukoka bintu bua bimate panshi udi ulama kapepe pabuipi ne buloba ne udi ulombola mbuu mialabale ne dibanda ne dipueka dia mâyi. Bu mukenji eu kawuyiku, kakuvua mua kuikala muoyo pa buloba to. Mikalu idi Yehowa muelele bintu bidiye mufuke, mmienze bua bulongame buimpe buikalaku mu diulu ne pa buloba. Bidi bileja ne: Nzambi udi ne malu adiye mulongolole bua buloba ne bantu. Patudi tuyisha, tudi mua kuambuluisha bakuabu bua bafike ku dimanya Mufuki wa diulu ne buloba bidi bitukemesha ebi.—Buakabuluibua 4:11.

6, 7. Mbimue bintu kayi bivua Yehowa mupeshe Adama ne Eva?

6 Yehowa uvua mulongolole bua bantu basombe kashidi pa buloba. (Genese 1:28; Misambu 37:29) Utu ne muoyo wa kupa, wakapesha Adama ne Eva bintu bia mushinga bishilashilangane. (Bala Yakobo 1:17.) Yehowa wakabapesha budikadidi bua kudisunguila malu ne tshipedi tshia kuela meji, kunanga ne kuikala ne balunda. Mufuki wetu wakakula ne Adama, kumulongeshaye mua kuenza tshidi tshimpe. Adama pende uvua mumanye mua kudikuba, kulama nyama ne buloba. (Genese 2:15-17, 19, 20) Yehowa wakapesha Adama ne Eva mushindu wa kulabula, kulenga, kumona, kumvua ne kununkila bintu bimpe bivuaye mubenzele. Bintu  ebi bivua mua kubambuluisha bua kuanyishabu muoyo uvuabu nawu muaba mulenga uvuabu babateke. Adama ne Eva bavua ne mudimu muimpe wa kuenza. Bavua ne bua kutungunuka ne kulonga bua kumanya malu mapiamapia bua kashidi.

7 Mmalu kayi makuabu avua Nzambi mulongolole? Yehowa wakapesha Adama ne Eva bukole bua kulela bana papuangane. Bana babu bavua pabu ne bua kulela bana too ne pavua buloba buwula tente ne bantu. Yehowa uvua musue bua baledi banange bana babu anu bu muvuaye munange bende bana, Adama ne Eva. Wakapesha bantu buloba ne bintu bionso bimpe bidipu. Buloba buvua ne bua kuikala wabu muaba, ne kakuvua uvua mua kubumbushapu.—Misambu 115:16.

TSHIAKENZEKA NTSHINYI?

8. Bua tshinyi Nzambi wakelela Adama ne Eva mukenji udi mu Genese 2:16, 17?

8 Malu kaakenzeka diakamue muvua Yehowa musue to. Tshiakenzeka ntshinyi? Yehowa uvua muelele Adama ne Eva mukenji mupepele bua bamanye mikalu ya budikadidi buabu. Wakamba ne: ‘Udi mua kudia mamuma a mitshi yonso ya mu budimi, bu muudi musue; kadi mamuma a mutshi wa lungenyi lua kujingulula malu mimpe ne malu mabi kuadi nansha; bualu bua mu dituku diudi wadia wewe neufue bulelela.’ (Genese 2:16, 17) Mukenji eu kawuvua mukole bua bobu kuwumvua to. Kabivua bikole bua bobu kuwutumikila to, bualu kuvua biakudia bimpe bitule bipuwe.

9, 10. a) Satana uvua mubande Yehowa ne malu kayi? b) Ndipangadika kayi divua Adama ne Eva bangate? (Tangila tshimfuanyi tshia ntuadijilu tshia tshiena-bualu.)

9 Satana Diabolo wakenza mudimu ne nyoka bua kushima Eva bua katumikidi Tatu wende Yehowa to. (Bala Genese 3:1-5; Buakabuluibua 12:9) Satana wakajula tshilumbu tshia ne: kabavua banyishile bana ba Nzambi, Adama ne Eva bua kudia “mamuma a mitshi yonso idi mu budimi” to. Bivua bienze anu bu uvua ubambila ne: ‘Nudi nusua kuamba ne: kanuena mua kuenza tshinudi basue anyi?’ Kuambilaye kabidi Eva ne: “Kanuena nufua bulelela.” Tshivua dishima. Pashishe kukebaye bua kuitabijija Eva ne: kavua dijinga ne kuteleja Nzambi to. Satana wakamba ne: ‘Nzambi udi mumanye ne: panuadia mamuma au, mêsu enu neabululuke.’ Satana uvua usua kuamba ne: Yehowa kavua musue bua Adama ne Eva badie bimuma to, bualu kubidia kuvua mua kubapesha dimanya dia pa buadi. Ndekelu wa bionso, wakabalaya bualu bua dishima ebu: “Nenuikale bu Nzambi, nenumanye malu mimpe ne malu mabi.”

10 Adama ne Eva bavua kumpala kua dipangadika dia kuangata. Bavuaku ne bua kutumikila Nzambi anyi bavua ne bua kuteleja nyoka? Bia dibungama, bakasungula bua kubenga kutumikila Nzambi. Bakabenga Yehowa bua kikadi Tatu wabu, kadi kulondabu Satana. Mpindieu bakavua badienzela malu, kabayi ku bukubi bua Yehowa to.—Genese 3:6-13.

11. Bua tshinyi Yehowa kavua mua kulengulula mpekatu uvua Adama ne Eva benze?

11 Pavua Adama ne Eva bashipe mukenji wa Nzambi, kabavua kabidi bapuangane to. Bualu bukuabu, bakalua baluishi ba Nzambi bualu mmukine malu mabi. ‘Udi ne mêsu mapite buakane adi kaayi mua kutangila malu mabi.’ (Habakuka 1:13) Bu Yehowa kayi muenze bualu nansha bumue bua mpekatu wa Adama ne Eva, bifukibua biende bionso bivua mua kunyanguka. Banjelu ne bantu bavua mua kudiebeja ni bavua mua kuteleja kabidi dîyi diende. Kadi Yehowa utu ulamata ku mikenji yende; katu uyishipa to. (Misambu 119:142) Nansha muvua Adama ne Eva ne budikadidi bua kudisunguila malu, kabavua mua kupanga kupeta bipeta bibi bua muvuabu batombokele Yehowa to. Kamanakamana bavua ne bua kufua ne  kupingana ku lupuishi luvuabu babafuke nalu.—Genese 3:19.

12. Ntshinyi tshiakafikila bana ba Adama?

12 Pavua Adama ne Eva badie tshimuma, Yehowa kakitaba bua bikale kabidi bena mu dîku diende to. Wakabipata mu budimi bua Edene, kabavua mua kupinganamu kabidi to. (Genese 3:23, 24) Yehowa wakalekela bua bapete bipeta bibi bia dipangadika diabu. (Bala Dutelonome 32:4, 5.) Bu tshipeta, kabavua kabidi mua kuidikija ngikadilu ya Nzambi anu muvuabi bikengela to. Adama wakajimija malu mimpe avua mamuindile kumpala, yeye ne bana bende kabidi. Wakasambulujila bana bende dipanga bupuangane, mpekatu ne lufu. (Lomo 5:12) Adama wakabapangisha bua kuikala ne muoyo kashidi. Adama ne Eva kabavua mua kulela bana bapuangane, ne bana babu kabavua pabu mua kulela bana bapuangane to. Katshia anu ku tshikondo tshivua Satana Diabolo musake Adama ne Eva bua kutombokela Yehowa, mmutete bua kusaka bantu bonso bua kuenza bia muomumue.—Yone 8:44.

TSHIA KUPIKULA NATSHI TSHIDI TSHIAMBULUISHA BUA KUDIA BULUNDA NE NZAMBI

13. Ntshinyi tshidi Yehowa musue bua bantu?

13 Yehowa utshivua anu munange bantu. Nansha muvua Adama ne Eva bamubenge, utshivua anu musue bua bantu nende bulunda buimpe. Kavua musue bua nansha umue wabu afue to. (2 Petelo 3:9) Ke bua tshinyi Nzambi wakalongolola malu diakamue bua bantu badie kabidi nende bulunda. Mmunyi muvuaye mua kuenza nanku kayi utupakana ku mikenji yende. Tumonayi bualu ebu.

14. a) Bilondeshile Yone 3:16, ntshinyi tshivua Nzambi muenze bua kupikula bantu ku bubi ne ku lufu? b) Ndukonko kayi lutudi mua kukonkonona ne bantu?

14 Bala Yone 3:16. Bantu ba bungi batudi tubikila mu Tshivulukilu mbamanye mvese eu mu mutu. Kadi mmunyi mudi mulambu wa Yezu wambuluisha bantu bua kupeta muoyo wa tshiendelele? Tudi ne mpunga wa kuambuluisha bantu bua kupeta diandamuna dia lukonko elu patudi tubabikila bua kulua mu Tshivulukilu, patukadimu nabu, ne patuaya kubakumbula panyima pa Tshivulukilu. Padibu bamanya tshidi tshia kupikula natshi bantu tshiumvuija, nebamone mudi Yehowa munange bantu bikole ne mudiye ne meji. Mmalu kayi adi atangila tshia kupikula natshi bantu atudi mua kuyukila nabu?

15. Bua tshinyi Yezu uvua mushilangane ne Adama?

15 Yehowa wakafila muntu mupuangane uvua mua kufila muoyo wende bu tshia kupikula natshi bantu. Muntu mupuangane au uvua ne bua kuikala ne lulamatu kudi Yehowa. Uvua ne bua kuitaba bua kufila muoyo wende bua bantu. (Lomo 5:17-19) Yehowa wakangata muoyo wa Yezu, tshifukibua tshiende tshia kumpala katshia mu diulu, kumutumaye pa buloba. (Yone 1:14) Nunku, Yezu wakalua muntu mupuangane anu bu muvua Adama. Kadi Yezu uvua mushilangane ne Adama, bualu wakalonda mikenji ivua Yehowa mutekemene bua muntu mupuangane kutumikila. Nansha mu ntatu mikole menemene, kakashipa mukenji wa Nzambi nansha umue.

16. Bua tshinyi tshia kupikula natshi bantu ndipa dia mushinga mukole?

16 Pavua Yezu ufua muntu mupuangane, uvua mua kusungila bantu ku bubi ne ku lufu. Wakakumbanangana menemene ne tshionso tshivua Adama ne bua kuikala. Yezu uvua mupuangane, uvua ne lulamatu lukole ne uvua utumikila Nzambi ne muoyo mujima. (1 Timote 2:6) Wakatufuila, ne mulambu wende udi upetesha bantu bonso, balume ne bakaji ne bana mushindu wa kuikala ne muoyo kashidi. (Matayi 20:28) Tshia kupikula natshi bantu ntshintu tshidi tshiambuluisha bua  malu adi Nzambi mulongolole kukumbanawu.—2 Kolinto 1:19, 20.

YEHOWA WAKATUNZULUILA TSHIIBI BUA TUPINGANE

17. Ntshinyi tshidi bantu bapeta ku diambuluisha dia tshia kupikula natshi bantu?

17 Biakalomba Yehowa bua kudienzeja bikole menemene bua kufila tshia kupikula natshi bantu. (1 Petelo 1:19) Udi utuangata ne mushinga wa bungi, kumusakabi too ne bua kulekela muanende wa mushinga mukole utufuila. (1 Yone 4:9, 10) Mu mushindu kampanda, Yezu wakalua tatuetu pa muaba wa Adama. (1 Kolinto 15:45) Yezu wakatupesha mushindu wa kupeta muoyo wa tshiendelele ne wa kupingana kabidi mu dîku dia Nzambi dimue dituku. Ku diambuluisha dia tshia kupikula natshi bantu, bantu nebalue bapuangane ne Yehowa udi mua kubakidila kabidi mu dîku diende kayi ushipa mikenji yende. Ela meji muikalabi bimpe palua bantu bonso badi ne lulamatu kudi Yehowa bapuangane! Ndekelu wa bionso, bantu bonso, mu diulu ne pa buloba, nebikale mu buobumue bu bena mu dîku dimue. Tuetu bonso netuikale bana ba Nzambi.—Lomo 8:21.

18. Ndîba kayi dialua Yehowa ‘bintu bionso kudi muntu yonso’?

18 Nansha muvua baledi betu ba kumpala babenge Yehowa, kakalekela kunanga bantu to, kadi wakafila tshia kubapikula natshi. Nansha mutudi bapange bupuangane, Satana kena mua kutupangisha bua kuikala ne lulamatu kudi Yehowa to. Ku diambuluisha dia tshia kupikula natshi bantu, Yehowa neatuambuluishe bua kulua bakane tshishiki. Ela meji muikala nsombelu pikala muntu yonso “udi umona Muana ne uleja ditabuja kudiye” upeta muoyo wa tshiendelele! (Yone 6:40) Tatu wetu wa dinanga ne meji neakumbaje malu adiye mulongolole ne neambuluishe bantu bua kuluabu bapuangane. Pashishe Yehowa nealue ‘bintu bionso kudi muntu yonso.’—1 Kolinto 15:28NWT.

19. a) Dianyisha dietu bua tshia kupikula natshi bantu didi ne bua kutusaka bua kuenza tshinyi? (Tangila kazubu ka ne: “ Tutungunukayi ne kukeba bantu badi bakumbane.”) b) Ntshinyi tshituakonkonona mu tshiena-bualu tshialonda?

19 Dianyisha dietu bua tshia kupikula natshi bantu didi ne bua kutusaka bua kuambila bakuabu malu a dipa dia mushinga edi. Bantu badi ne bua kumanya ne: ku diambuluisha dia tshia kupikula natshi bantu, Yehowa mmupeshe bukua bantu ne dinanga dionso mushindu wa kushala ne muoyo kashidi. Kadi tshia kupikula natshi bantu katshiena tshimanyina apu to. Tshidi tshijikija tshilumbu tshivua Satana mujule mu budimi bua Edene. Mu tshiena-bualu tshialonda, netukonkonone muditshi tshienza bualu ebu.