Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 8 2017

Nkonko ya babadi

Nkonko ya babadi

Bua tshinyi malu adi Matayi ne Luka balonda bua ntuadijilu wa nsombelu wa Yezu mmashilangane?

Muyuki udi Matayi ulonda bua malu avua menzeke ku diledibua dia Yezu ne ntuadijilu wa nsombelu wende mmashilangane kakese ne a mu muyuki wa Luka bualu bafundi ba Evanjeliyo eyi mbalonde bivua bienzeke bimanyine pa malu mashilangane.

Muyuki wa Matayi udi wimanyina pa malu avua menzeke adi atangila Jozefe. Udi uleja tshivua Jozefe muenze pakamanyaye ne: Mariya uvua ne difu, tshilota tshivuaye mulote muanjelu umumvuija muvua malu, ne ditaba diende dia malu avuabu bamumvuije. (Mat. 1:19-25) Matayi udi ulonda kabidi bua tshilota tshia Jozefe tshidi muanjelu umuambila bua kunyemena mu Ejipitu, bua dinyema diende ne dîku diende, bua tshilota tshidi muanjelu umuambila bua kupingana mu buloba bua Isalele, bua dipingana diende, ne bua dipangadika diende dia kusombela ne dîku diende mu Nazaleta. (Mat. 2:13, 14, 19-23) Mu nshapita ya ntuadijilu ya Evanjeliyo wa Matayi, badi batela dîna dia Jozefe misangu muanda mukulu, kadi batela dia Mariya anu misangu inayi.

Kadi Luka yeye mmutambe kuakula bua Mariya mu muyuki wende. Udi ulonda mudi muanjelu Gabaliele uya kumonangana ne Mariya, padiye uya kutangila mulela wende Elizabeta, ne mêyi adi Mariya utumbisha nawu Yehowa. (Luka 1:26-56) Luka udi kabidi utela mêyi adi Simeona wambila Mariya bua makenga avua Yezu mua kulua kupeta. Nansha padi Luka ulonda bua muvua dîku diabu diye ku ntempelo pavua Yezu ne bidimu 12, udi utela mêyi a Mariya, kadi kena utela a Jozefe to. Luka udi usakidila ne: malu onso avua menzeke aa avua alenga Mariya ku muoyo bikole. (Luka 2:19, 34, 35, 48, 51) Mu nshapita ibidi ya ntuadijilu ya Evanjeliyo wa Luka, badi batela dîna dia Mariya misangu 12, kadi batela dia Jozefe anu misangu 3. Nanku Matayi udi utamba kuakula bua malu a Jozefe ne midimu yende, padi Luka yeye uleja malu a bungi adi atangila mudimu udi Mariya nawu ne malu adiye mutuilangane nawu.

Bia muomumue, dilondangana dia bankambua didi bafundi ba Evanjeliyo ibidi eyi baleja ndishilangane. Matayi udi uleja dilondangana dia bankambua ba Jozefe ne uleja ne: Yezu mmuana uvua Jozefe mudiile buledi ne uvua ne bukenji bua kupiana bukokeshi bua Davidi. Bua tshinyi? Bualu Jozefe uvua kankanunuina ka mukalenge Davidi ka mu ndelanganyi ya Solomo, muana wa Davidi. (Mat. 1:6, 16) Kadi, bidi bimueneka ne: Luka yeye udi uleja dilondangana dia bankambua ba Mariya ne uleja ne: Yezu uvua mupianyi mulelela wa bukokeshi bua Davidi “mu mubidi.” (Lomo 1:3) Bua tshinyi? Bualu Mariya uvua kankanunuina ka Davidi ka mu ndelanganyi ya Natana, muana wa Davidi. (Luka 3:31) Kadi bua tshinyi Luka kena utela Mariya bu muana wa bakaji wa Heli, uvua tatuende mu diende dilondangana dia bankambua? Bualu bantu balume ke bavuabu nangananga batela mu dilondangana dilelela dia bankambua. Nanku, padi Luka utela Jozefe ne umuleja mudiye muana wa Heli, bidi biumvuika ne: Jozefe uvua muku wa Heli.—Luka 3:23.

Dilondangana dia bankambua didi Matayi ne Luka batele didi dijadika patoke mudi Yezu muikale Masiya uvuabu balaye. Bushuwa, dilondangana dilelela dia bankambua ba Yezu divua dimanyike bimpe, too ne Bafalese ne basadoke kabavua mua kudielesha mpata to. Lelu, muyuki wa dilondangana dia bankambua ba Yezu didi Matayi ne Luka baleje didi tshitupa tshia nshindamenu wa ditabuja dietu ne tshijadiki tshia mudi milayi ya Nzambi milelela.