Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 7 2017

Tshimuna mvita idibu bela meji ebe

Tshimuna mvita idibu bela meji ebe

UDI mu mvita ya dikema! Muluishi webe munene, Satana, udi ukuluisha ne tshia mvita tshibi menemene. Ntshia mvita kayi atshi? Ngumu idi ipambuishangana! Tshia mvita etshi ntshilongolola nangananga bua kuluisha natshi meji ebe, kadi ki mmubidi webe to.

Mupostolo Paulo uvua mumanye bimpe njiwu idi ngumu idi Satana upambuishangana nayi mua kukebesha, kadi bena Kristo nende bonso kabavua bayimanye to. Tshilejilu, bamue bena Kristo ba mu Kolinto, bavua bamueneka badieyemena bikole, bela meji ne: bavua bashindame mu bulelela ne kabavua mua kukuluka to. (1 Kol. 10:12) Ke bualu kayi Paulo wakabadimuija ne: “Ndi ntshina mu mushindu kampanda ne: anu bu muvua nyoka mushime Eva ne budimu buende bubi, meji enu kaalu kunyanguka, aya kule ne muoyo mutoke ne bukezuke bia Kristo.”—2 Kol. 11:3.

Mushindu uvua Paulo uditatshisha eu udi uleja ne: ki mbimpe kupepeja malu to. Wewe musue kutshimuna mvita idibu bele meji ebe, udi ne bua kumanya njiwu idi ngumu idi ipambuishangana mua kukukebela ne kudikuba kudiyi.

NGUMU IDI IPAMBUISHANGANA IDI NE NJIWU KAYI?

Ngumu idi ipambuishangana ntshinyi? Mu tshiena-bualu etshi, ndienza mudimu ne malu a dishima bua kunyanga mushindu udi bantu bela meji ne benza malu. Bilondeshile mukanda kampanda, bamue bantu badi baleja mudi ngumu idi ipambuishangana mikale mumue ne “mafi, dikonyangaja dia malu, dishimangana, disaka muntu ku dienza bualu kampanda, dikuata lungenyi lua muntu, [ne] dibueja tshibuejakaji mu lungenyi lua muntu” ne badi bayiteka mu mulongo umue ne “mayele mabi, adi akebelangana njiwu ne kaayi manyishibue.”—Propaganda and Persuasion.

Ngumu idi ipambuishangana idi ne njiwu kayi? Kayitu imueneka, idi anu bu kapepe ka mulungu kadi kakayi kamueneka ne kakayi kanunka, ne idi ibuela bitekete bitekete mu meji etu. Bu mutudi  katuyi mua kumona ngumu idi ipambuishangana bua kumanya tshidiyi, mumanyi mupiluke wa malu a bikadilu diende Vance Packard wakamba ne: “Batu benzeja bantu ba bungi ba kutudi malu kabayi bamanye.” Mumanyi wa malu kampanda udi wamba ne: ngumu ya dishima idi isaka balume ne bakaji “ku dipeta bikadilu bibi menemene bipepele” bu mudi: ‘dishipangana, mvita, lungenyi lua bukua ne buena, dikina bena mu bitendelelu bikuabu ne ku dikala ne bikadilu bikuabu bibi.’—Easily Led—A History of Propaganda.

Bikala bantu betu aba mua kutushima ne ngumu idi ipambuisha, ntshinyi tshidi Satana mua kufika ku dienza? Mmulonge bikadilu bia bantu katshia bafukibua. Lelu “buloba bujima” budi ku bukokeshi buende. Udi mua kuenza mudimu ne tshitupa kayi tshionso tshia mu buloba ebu bua kumuangalaja mashimi ende. (1 Yone 5:19; Yone 8:44) Nunku Satana mmupiluke mu ‘difofomija bantu mêsu a meji,’ ne mpindieu udi “upambuisha ba pa buloba bujima.” (2 Kol. 4:4; Buak. 12:9) Mmunyi muudi mua kukandamena ngumu idi ipambuishangana eyi?

KOLESHA BIA MVITA BIEBE BIA KUDIKUBA NABI

Yezu wakafila mukenji mupepele wa mua kutshimuna ngumu idi ipambuishangana wa ne: ‘Numanye bulelela, ne bulelela nebunupeshe budikadidi.’ (Yone 8:31, 32) Kadi bu mudi bulelela buikale tshintu tshia kumpala tshitubu baluisha mu mvita, anu bu musalayi kayi yonso udi munkatshi mua diluangana, udi ne bua kumanya malu malelela a kueyemena bua muluishi webe kapetshi mushindu wa kudingakaja lungenyi luebe. Yehowa mmutuleje malu aa. Mu Bible ke muudi mua kupeta malu onso audi nawu dijinga bua kuluisha ngumu ya Satana idi ipambuisha.—2 Tim. 3:16, 17.

Bushuwa, Satana, mumuangalaji munene wa ngumu idi ipambuishangana mmumanye bualu ebu. Nanku udi wenza mudimu ne ndongoluelu wa malu eu bua kutekesha bantu ku muoyo bua kubala Bible ne kumulonga. Kukuluki mu mayele ende adi apambuishangana to! (Ef. 6:11, dim.) ‘Ikala mukumbane bua kumvua bimpe menemene’ bulelela buonso. (Ef. 3:18) Abi nebikulombe bua wewe kudienzeja bikole. Kadi vuluka bualu bunene buvuabu bambe kudi Noam Chomsky ebu: “Muntu nansha umue kakupuongolola bulelela mu buongo buebe to. Ntshintu tshiudi ne bua kudimanyina wewe nkayebe.” Nunku difila bikole mu ‘dikonkonona mêyi a mu Mifundu minsantu bimpe menemene dituku dionso’ bua “kudimanyina wewe nkayebe.”—Bien. 17:11.

Bua wewe kutshimuna mvita idibu bela meji ebe, udi ne bua kumanya njiwu idi ngumu idi ipambuishangana mua kukukebela ne kudikuba kudiyi

Wikale muvuluke ne: Satana ki mmusue bua wikale wela meji biakane anyi welangane meji a malu bimpe menemene to. Bua tshinyi? Bualu mukanda  kampanda udi wamba ne: ngumu idi ishimangana “idi imueneka ne bukole bua bungi bantu bobu . . . batekete mu maboko bua kukonkonona bimpe tshidiyi.” (Media and Society in the Twentieth Century) Nunku kuitabi tshianana tshianana malu audi umvua to. (Nsu. 14:15) Enza mudimu ne bukole bua kuela meji ne tshieledi tshiebe tshia meji bidi Nzambi mukupeshe bua kumanya bulelela bimpe.—Nsu. 2:10-15; Lomo 12:1, 2.

DIMUKILA LUNGENYI LUA MATAPULUKA NE ULUEPUKE

Bafidi ba mayele ba basalayi badi mua kuenza mudimu ne ngumu idi ipambuishangana bua kunyanga ne kutekesha lungenyi lua kuluangana mvita. Badi mua kusaka basalayi badibu baluangana nabu bua baluishangane bobu nkayabu anyi kubashimakaja bua batapulukangane ne basalayi nabu. Badi baleja ne: munene kampanda wa basalayi wa mu Allemagne wakitaba ne: bumue bualu buvua buenze bua babatshimune mu Mvita ya kumpala ya buloba bujima buvua ne: bantu “bavua batekeshibue mu mikolo bua ngumu idi ipambuishangana ya baluishi anu bu mutu kalulu kumpala kua nyoka.” Satana udi wenza mudimu ne mayele a muomumue bua kukebesha matapuluka ne kutshimuna; tshilejilu udi ukebesha makokianganyi munkatshi mua bena Kristo balume ne bakaji anyi ubasaka ku dipatuka mu bulongolodi bua Yehowa bua amue malu mabi kampanda adibu babenzele anyi adibu bamona enzeka.

Kabakushimi to! Lekela Dîyi dia Nzambi dikulombole. Tshilejilu, mu tshilumbu tshia dilama buobumue pankatshi pebe ne bena Kristo nebe, Bible udi ukukankamija bua kutungunuka ne ‘kufuilangana luse ne muoyo mujima’ ne kujikija bilumbu ne lukasa. (Kolos. 3:13, 14; Mat. 5:23, 24) Bible udi utubela bua kubenga kuditapulula ne bena mu tshisumbu. (Nsu. 18:1) Konkonona bikala bia mvita biebe bia kuluisha nabi ngumu ya Satana idi ipambuishangana bikole. Diebeja ne: ‘Ntshinyi tshivua tshilombole meji anyi musangu mushale umvua mu nsombelu wa nunku? Nnyuma wa pa buloba anyi nnyuma wa Nzambi?’—Gal. 5:16-26; Ef. 2:2, 3.

KUJIMIJI DIEYEMENA DIEBE NANSHA

Musalayi udi ne lulamatu lukese kudi mfumuende kakuluangana bimpe to. Nanku bendeshi ba ngumu idi ipambuishangana batu bajinga kujimija dieyemenangana ditu pankatshi pa musalayi ne mfumuende. Badi mua kuenza mudimu ne ngumu idi ipambuishangana bu mudi: “Kanuena ne bua kueyemena balombodi benu to!” ne “Kanubalekedi banufikisha ku lufu to!” Bua kupesha bidibu bamba ebi bujitu, badi mua kuenza mudimu ne  bilema bia balombodi abu ne budimu buonso. Ke tshitu Satana wenza. Kakulekela kukeba bua kutekesha dieyemena diudi nadi kudi bantu badi Yehowa muteke bua kulombola to.

Ntshinyi tshiwadikuba natshi? Ikala mudisuike bua kulamata bulongolodi bua Yehowa ne kuelesha bantu badiye muteke bua kulombola diboko ne lulamatu, nansha bobu mua kuenza bilema kayi. (1 Tes. 5:12, 13) ‘Kunyungishibu mu meji ebe lukasa’ paudi utuilangana ne bualu budi bumueneka bu buluishi bubi bua kudi batontolodi anyi kudi bantu batu bashimakaja meji a bantu, nansha malu adibu bamba amueneka bu malelela. (2 Tes. 2:2; Tito 1:10) Tumikila mubelu uvuabu bapeshe nsonga Timote. Lamata ku bulelela buuvua mulonge, ne vuluka kuuvua mubulongele. (2 Tim. 3:14, 15) Kudi bijadiki bilelela bidi bileja ne: udi mua kueyemena bantu badi Yehowa wenza nabu mudimu kukadi mpindieu bidimu nkama ya bungi bua kutulombola mu njila wa bulelela.—Mat. 24:45-47; Eb. 13:7, 17.

KULEKEDI MAYELE A KUKUTSHINYISHA NAWU AKUTEKESHA

Ikala mumanye ne: ngumu ya Satana idi ipambuishangana kayitu anu ya muinshi muinshi to. Imue misangu, utu wenza mudimu ne mayele adi atshinyisha, ne bilondeshile mukanda kampanda, “ndimue dia ku mishindu ya ngumu idi ipambuishangana dia kale menemene.” (Easily Led—A History of Propaganda) Tshilejilu, mulongeshi kampanda wa mu Grande-Bretagne diende Philip Tayilor wakafunda ne: bena Ashû bavua bakokesha baluishi babu ne “tshididi tshia ditshinyishangana pamue ne ngumu idi ipambuishangana.” Satana neenze mudimu ne ditshina dia bantu, ditshina dia dikengeshibua, ditshina dia lufu, anyi ne buôwa bubi kayi bukuabu buonso bua kukutshimuna ne kukualuja tshianyima bua kuenzedi Yehowa mudimu.—Yesh. 8:12; Yel. 42:11; Eb. 2:15.

Kulekedi Satana wenza mudimu ne buôwa bua kutekesha lungenyi luebe anyi kunyanga muoyo webe mutoke to. Yezu wakamba ne: “Kanutshinyi badi bashipa mubidi, kadi kabayi ne tshikuabu tshidibu mua kuenza.” (Luka 12:4) Eyemena ne muoyo mujima mulayi wa Yehowa wa kukutabalela, wa kukupesha “bukole budi bupite bua pa tshibidilu” ne wa kukuambuluisha bua kukandamena bualu kayi buonso budibu benza bua kukutshinyisha.—2 Kol. 4:7-9; 1 Pet. 3:14.

Bushuwa, udi mua kutuilangana ne malu adi enza buôwa ne atekesha mu lungenyi. Kadi kupu mêyi avua Yehowa mukoleshe nawu Yoshua aa muoyo: ‘Ikala ne bukole ne mutshima wa dikima; kutshinyi, kukuatshiki buôwa, bualu bua Yehowa, Nzambi webe, udi nebe kuonso kuwaya.’ (Yosh. 1:9) Tunyinganyinga tuotu tukukuate, ndaku diakamue kudi Yehowa umuleje mu disambila malu onso adi akutatshisha. Ikala mutuishibue ne: ‘ditalala dia Nzambi nedilame muoyo webe ne lungenyi luebe’ bua upete bukole bua kukandamena ngumu ya Satana yonso idi ipambuishangana.—Filip. 4:6, 7, 13.

Udiku uvuluka ngumu idi ipambuishangana ivua Labashake, mutumibue wa bena Ashû, muambile bantu ba Nzambi anyi? Uvua anu bu uvua ubambila ne: ‘Kakuena tshidi mua kunukuba kudi bena Ashû to. Nansha Nzambi wenu, Yehowa, kena ne tshidiye mua kuenza bua bualu buenu to.’ Wakasakidila ne dikamakama dionso ne: ‘Yehowa nkayende ke udi mutuambile bua kubutula buloba ebu.’ Ntshinyi tshivua Yehowa mulue kuamba? ‘Kanutshinyi mêyi anuakumvua akumpenda nawu bantu ba mukalenge wa Ashû.’ (2 Bak. 18:22-25; 19:6) Pashishe wakatuma muanjelu wakashipa bena Ashû binunu 185 mu butuku bumue!—2 Bak. 19:35.

IKALA NE MEJI, TELEJA YEHOWA MISANGU YONSO

Ukadiku mumone mu filme kampanda, bilondeshile mmuenenu webe, umona bipepele mudibu bashima muntu kampanda anyi bamutatakaja anyi? Uvua pamuapa wela meji, udiambila ne: ‘Kuitabi to! Badi bakushima!’ Pashishe, fuanyikija ne: banjelu badi bakuela lubila lua muomumue bakuambila ne: “Satana kakushimakaji ne mashimi ende to!”

Jika matshi ebe bua kumvu ngumu ya Satana idi ipambuishangana. (Nsu. 26:24, 25) Teleja Yehowa ne mueyemena mu malu onso audi wenza. (Nsu. 3:5-7) Teleja dilomba dituye ulomba ne dinanga dionso edi: ‘Muananyi, wikale ne meji, usankishe mutshima wanyi.’ (Nsu. 27:11) Pashishe neutshimune mvita idibu baluisha nayi meji ebe!