Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 6 2017

Yehowa udi utusamba mu makenga etu onso

Yehowa udi utusamba mu makenga etu onso

“Nzambi wa busambi buonso . . . udi utusamba mu makenga etu onso.”—2 KOL. 1:3, 4.

MISAMBU: 38, 56

1, 2. Mmunyi mudi Yehowa utusamba mu makenga etu? Mbualu kayi budiye mutulaye mu Dîyi diende?

MUANETU wa balume mukuabu nsonga utshivua mujike uvua wela meji a mêyi adi mu 1 Kolinto 7:28 udi wamba ne: badi babuela mu dibaka “nebikale ne makenga mu mubidi wabu.” Muanetu eu wakayukila ne mukulu kampanda uvua mu dibaka ukavua muntu mukulumpe, kumuebejaye ne: “‘Mmakenga’ kayi adibu bamba aa? Mmunyi mundi mua kupita nawu meme musele?” Kumpala kua mukulu eu kuandamuna lukonko lua muanetu wa balume eu, wakamuambila bua elangane meji a bualu bukuabu buvua mupostolo Paulo mufunde ebu: Yehowa udi ‘Nzambi wa busambi buonso, yeye udi utusamba mu makenga anyi ntatu yetu yonso.’—2 Kol. 1:3, 4.

2 Tudi bamanye ne: Yehowa, Tatu wetu, mmutunange ne udi utusamba patudi ne ntatu. Udi mua kuvuluka bimue bikondo bivua Yehowa mukuambuluishe ne mukulombole ku diambuluisha dia Dîyi diende. Tuikale bashindike ne: mmusue bua tuikale ne  diakalenga, anu bu muvuaye muenzele batendeledi bende ba kale.—Bala Yelemiya 29:11, 12.

3. Nnkonko kayi ituandamuna mu tshiena-bualu etshi?

3 Misangu ya bungi, bitu bipepele bua kutantamena ntatu ne makenga patudi bamanye tshidi tshibikebeshe. Kadi, bua tshinyi tudi mua kupeta ntatu mu dibaka anyi mu dîku dietu? Mbilejilu kayi bia kale ne bia matuku etu aa bidi mua kutuambuluisha bua kupeta busambi butudi tujinga? Tuanji kuandamuna nkonko eyi ne tumone mutudi mua kutantamena ntatu.

NTATU MU DIBAKA

4, 5. Nntatu kayi idi mulume ne mukaji mua kupeta?

4 Yehowa mumane kufuka mukaji wa kumpala, wakaya nende kudi mulume ne kuluaye mukajende. Pashishe Yehowa wakamba ne: ‘Mulume neashiye tatuende ne mamuende, nealamate mukajende; bubidi buabu nebikale mubidi umue.’ (Gen. 2:24) Bushuwa, tuetu bonso lelu tudi bapange bupuangane. (Lomo 3:23) Bua bualu ebu, padi mulume ne mukaji baselangana, badi mua kutekemena bua kupeta ntatu. Tshilejilu, kumpala kua mukaji kusedibua, uvua pamuapa utumikila baledi bende. Kadi Dîyi dia Nzambi didi diamba ne: panyima pa dibaka, mulume udi ulua mutu wa mukajende. (1 Kol. 11:3) Ku ntuadijilu, bidi mua kukolela mulume bua kuambila mukajende tshia kuenza. Bidi mua kukolela mukaji pende bua kuitaba buludiki bua kudi bayende, kadi witaba bua kudi baledi bende. Kabidi, patshidi bena dibaka baselelanganaku, badi mua kupeta bilumbu ne bena mu dîku dia muena dibaka nabu, bualu ebu budi kabidi mua kuikala lutatu.

5 Ela kabidi meji a mudi mulume ne mukaji mua kumvua padibu bajingulula ne: bakadi pa kupeta muana. Nansha mudibu mua kuikala ne disanka dia bungi, batu kabidi misangu ya bungi babungama. Badi mua kudikonka bikala difu mua kukola bimpe, ne badi mua kusamisha mutu bua makanda a mubidi a muana. Mbamanye kabidi ne: bungi bua makuta a kutula nebuvule. Padibu balela muana, nebikengele bua bena dibaka kushintulula amue malu. Mamu udi mua kupitshisha dîba dia bungi bua kutabalela muana. Nunku bidi mua kukolela mulume ne mukaji bua kutabalelangana bikole bu muvuabu benza kumpala. Tatu neikale kabidi ne majitu a bungi. Udi ne bua kuenza bua mukajende ne muanende bikale ne bidibu nabi dijinga.

6-8. Mmunyi mudi bena dibaka mua kudiumvua bobu kabayi mua kulela?

6 Bamue bena dibaka badi ne lutatu lua mushindu mukuabu. Badi bajinga ne muoyo mujima bua kupeta muana, kadi kabayi mua kumupeta to. Padi mukaji kayi wimita, udi mua kupeta kanyinganyinga kakole menemene. (Nsu. 13:12) Mu bikondo bia kale, bivua bualu bua mushinga mukole pavuabu basela mukaji ne ulela bana. Ke bualu kayi Lakele, mukaji wa Yakoba, wakabungama bikole pavuaye kayi mua kuimita nansha muvua muanabu wa bakaji wimita yeye. (Gen. 30:1, 2) Mu amue matunga lelu, bantu ba bungi batu bamba ne: mbia mushinga mukole bua kuikala ne bana ba bungi. Bantu ba mu matunga aa batu batamba kuebeja bamisionere badimu bua tshinyi kabena ne muana nansha umue. Nansha bamisionere badienzeje muabu muonso bua kubumvuija malu mudiwu, bamue batu anu bamba ne: “Ee, netunulombele Nzambi!”

7 Tuangate tshilejilu tshikuabu. Muanetu mukuabu wa bakaji wa mu ditunga dia Angleterre uvua anu ujinga bua kupeta muana. Pakajingululaye ne: kavua mua kupeta muana mu ndongoluelu wa malu eu, malu onso akamutonda. Pashishe yeye ne bayende bakangata dipangadika dia kudiila muana  buledi. Kadi wakashala ne dibungama bua tshikondo kampanda. Wakamba ne: “Mvua mumanye ne: kudiila muana buledi kakuvua menemene muomumue ne kulela webe muana to.”

8 Bible udi wamba ne: mukaji “nealamibue bua dilela dia bana.” (1 Tim. 2:15) Kadi bualu ebu kabuena bumvuija ne: neapete muoyo wa tshiendelele anu bualu udi ne bana to. Kadi, mvese eu udi umvuija tshinyi? Mamu udi ne mudimu wa bungi wa kutabalela bana bende ne nzubu wende. Bualu ebu budi mua kumuambuluisha bua kuepuka malu bu mudi: bijanu anyi dibuelakana mu malu adi kaayi mamutangile. (1 Tim. 5:13) Nansha nanku, udi mua kuikala ne ntatu mu dibaka diende ne mu dîku diende.

Mmunyi muudi mua kupeta busambi padi muena dibaka nebe ufua? (Tangila tshikoso tshia 9, 12)

9. Ndutatu kayi lukuabu ludi bena dibaka mua kupeta?

9 Lumue lua ku ntatu idi bamue bena dibaka mua kupeta ndifua dia muena dibaka nabu. Nansha muvuabu mua kuikala bele meji ne: bualu ebu kabuvua mua kubafikila, ba bungi bavua ne bua kutantamena nsombelu mutambe bukole eu. Bena Kristo batu bitaba ne muoyo mujima mulayi wa dibishibua ku lufu, ne bualu ebu butu bubasamba bikole. (Yone 5:28, 29) Yehowa, Tatu wetu, mmulaye malu a bungi mu Dîyi diende adi atusamba mu bikondo bia ntatu. Tuanji kumona muvua bamue betendeledi ba Yehowa bapete busambi ebu ne mudibu bubambuluishe.

BUSAMBI PATUDI MU MAKENGA

10. Mmunyi muvua Hana musambibue? (Tangila tshimfuanyi tshia ntuadijilu tshia tshiena-bualu.)

10 Tumonayi tshivua tshifikile Hana, mukaji munangibue wa Elekana. Uvua musue kuikala ne bana, kadi kavua mua kulela to. Pende mukenende Penina uvua mulele bana ba bungi. (Bala 1 Samuele 1:4-7.) Bua kunyanga malu bikole, Penina uvua umuseka “ku tshidimu ku tshidimu” bua bualu ebu. Bivua bisama Hana ku muoyo bikole. Wakenza tshinyi bua kupeta busambi? Wakasambila Yehowa. Hana uvua kabidi muye muaba wa ntendelelu wa Yehowa ne musambile mutantshi mule. Wakalomba Yehowa bua amupeshe muana wa balume ne uvua mushindike ne: Yeye uvua mua kumuambuluisha. Pakajikijaye kusambila, wakumvua disulakana dia bungi ne mpala anyi ‘mutshima wende kawuvua unyingalala kabidi.’ (1 Sam. 1:12, 17, 18) Uvua mumanye ne: Yehowa uvua mua kumupesha muana wa balume anyi kumusamba mu mushindu mukuabu.

11. Mmunyi mutudi mua kupeta busambi patudi tusambila?

11 Bu mutudi bantu bapange bupuangane ne bikale mu bulongolodi bua Satana, netutungunuke ne kutuilangana ne makenga. (1 Yone 5:19) Kadi tudi ne diambuluisha. Tudi mua kusambila Yehowa, “Nzambi wa busambi buonso.” Ke tshivua Hana muenze. Wakambila Yehowa muvuaye udiumvua menemene ne kumulombaye diambuluisha. Mu mushindu wa muomumue, patudi tukenga, katuimanyinyi anu pa kuambila Yehowa ntatu yetu to. Tudi kabidi ne bua kumulomba diambuluisha ne kumuambila mutudi tudiumvua menemene.—Filip. 4:6, 7.

12. Ntshinyi tshivua tshiambuluishe Ana bua kuikala ne disanka nansha muvuaye ne ntatu?

12 Tudi mua kumvua kanyinganyinga ka bungi bualu katuena balele bana anyi bualu tudi bafuishe muntu kampanda utudi banange. Kadi tudi anu mua kupeta busambi. Tuangate tshilejilu tshia Ana uvua ne muoyo mu matuku a Yezu. Yeye mumane kuenza bidimu muanda mutekete patupu mu dibaka, bayende wakafua. Bidi bimueneka ne: kavua mulele muana nansha umue to. Kadi ntshinyi tshiakamuambuluisha? “Kavua upangika ku  ntempelo” to. Nansha pakavua Ana ne bidimu 84, uvua anu uya ku ntempelo bua kusambila Yehowa ne kumutendelela. (Luka 2:37) Ke tshivua tshimusambe ne tshimuambuluishe bua kuikala ne disanka nansha muvuaye ne ntatu.

13. Mmunyi mudi balunda balelela mua kutusamba padi balela betu batuela mâyi ku makasa?

13 Tudi kabidi mua kupetela busambi kudi balunda balelela batudi tupeta mu tshisumbu. (Nsu. 18:24) Paula uvua ne bidimu bitanu pavua mamuende mulekele kuenzela Yehowa mudimu. Paula wakabungama bikole, ne nsombelu wende uvua mulue wa lutatu. Kadi muanetu wa bakaji mukuabu mpanda-njila diende Ann wakamukankamija ne kumutabalela ne dinanga. Paula udi umvuija ne: “Nansha muvua Ann kayi mulela wanyi, dintabalela diende ne dinanga divua dingambuluishe. Diakangambuluisha bua kutungunuka ne kuenzela Yehowa mudimu.” Mpindieu mamuende ukadi mupingane mu tshisumbu ne bualu ebu budi busankisha Paula bikole. Ann pende udi ne disanka bua muvuaye muambuluishe Paula bua kutungunuka ne kuenzela Yehowa mudimu.

14. Mmalu kayi mimpe atudi tupeta patudi tusamba bakuabu?

14 Patudi tudifila bikole mu dienzela bakuabu malu mimpe, tutu misangu ya bungi tupua yetu ntatu muoyo. Tshilejilu, bana betu ba bakaji ba bungi, badi mu mabaka anyi  bajike, mbamanye ne: padibu bayisha lumu luimpe lua Bukalenge ne bana betu bakuabu, badi benza mudimu ne Yehowa ne badi benza disua diende. Kuenza nunku kudi kubapetesha disanka. Bushuwa, tuetu bonso tudi mua kutabalela bakuabu patudi tuyisha nabu lumu luimpe. Patudi tuenzela bana betu ba balume ne ba bakaji malu mimpe, tudi tusemena bikole pabuipi nabu. (Filip. 2:4) Ke tshivua mupostolo Paulo muenze. Wakatabalela bakuabu anu bu mudi “mamu udi wamusha utabalela bana bende ne dinanga dionso.” Paulo wakasamba kabidi bana babu ne kubakolesha “anu bu mudi tatu wenza ne bana bende.”—Bala 1 Tesalonike 2:7, 11, 12.

BUSAMBI MU DÎKU

15. Nnganyi udi ne bujitu bua kulongesha bana malu a Yehowa?

15 Mmunyi mutudi mua kusamba mêku adi mu tshisumbu tshietu? Imue misangu, bana betu batshidi bapiabapia badi mua kutulomba bua tubambuluishe bua kulongesha bana babu malu a Yehowa anyi bua kulonga Bible ne bana babu bakadi bansonga. Bible udi uleja ne: Yehowa mmupeshe baledi bujitu bua kulongesha bana babu ne kubakolesha. (Nsu. 23:22; Ef. 6:1-4) Nansha mudi bantu bakuabu mua kuambuluisha mu imue nsombelu, mbia mushinga menemene bua baledi kudilongeshila bana babu. Baledi badi ne bua kuikala ne tshibidilu tshia kuyukila ne bana babu.

16. Ntshinyi tshitudi ne bua kuvuluka patudi tuambuluisha bana?

16 Padi muledi utulomba bua tuetu kulongesha muanende wa balume anyi wa bakaji Bible, mbimpe kuvuluka ne: katuena ne bukokeshi bua muomumue ne bua muledi wende to. Imue misangu tudi mene mua kulonga ne muana udi baledi bende kabayi bena Kristo. Patudi tulonga ne bana badi kabayi betu, mbia meji bua kulongela nabu kuabu padi baledi babu anyi Ntemu mukuabu mushindame muikalapu anyi kulongela nabu muaba udi bantu. Mu mushindu eu, katuakufikisha bantu ku dituelela meji mabi to. Mu bungi bua matuku, pamuapa baledi babu bine nebalue bakumbane bua kudilongeshila bana babu malu a Yehowa.

17. Mmunyi mudi bana mua kusamba bena mu dîku diabu?

17 Bana badi balonge mua kunanga Yehowa badi mua kusamba bena mu mêku abu ne kubakankamija. Mushindu kayi? Mpadibu banemeka baledi babu ne badifila bikole bua kubambuluisha mu mishindu kampanda misunguluke. Kabidi, padi bana bashala ne lulamatu kudi Yehowa, bualu ebu budi bukankamija dîku dijima. Kumpala kua Mvula wa kabutu, Lemeke wakatendelela Yehowa. Wakamba bua muanende Noa ne: ‘Yeye neatusambe mu mudimu wa bianza bietu, bualu bua buloba buakedibua mulawu kudi Yehowa.’ Mulayi eu wakakumbana panyima pa Mvula wa kabutu pavua Yehowa mumbushe mulawu pa buloba. (Gen. 5:29; 8:21) Lelu, bana badi bashala ne lulamatu kudi Yehowa badi pabu mua kusamba dîku diabu. Badi mua kuambuluisha muntu yonso wa mu dîku diabu bua kutantamena makenga mpindieu ne mu matuku atshilualua.

18. Ntshinyi tshidi mua kutuambuluisha bua kutantamena dikenga kayi dionso?

18 Lelu, bantu ba Yehowa badi bapeta busambi ku diambuluisha dia disambila, dielangana meji pa bilejilu bia mu Bible ne dia bulunda buimpe budibu badie ne bena Kristo nabu balume ne bakaji. (Bala Musambu 145:18, 19.) Tudi bamanye ne: Yehowa utu anu pabuipi bua kutusamba, ne neatuambuluishe bushuwa bua kutantamena dikenga kayi dionso ditudi mua kuikala nadi!