Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 6 2017

Udi muvuluke anyi?

Udi muvuluke anyi?

Uvuaku mubale bibejibeji bia Tshibumba tshia Nsentedi bishale ebi bimpe menemene anyi? Nanku, anji tangila ni udi mua kuandamuna nkonko idi ilonda eyi:

Padi bulongolodi bua Nzambi bufila buludiki, ntshinyi tshidi bana betu ba balume bu mudi batangidi ba bijengu ne bakulu mu tshisumbu ne bua kuenza?

Badi ne bua kutumikila ne lukasa luonso. Badi mua kudiebeja ne: ‘Ntuku ngambuluisha bena Kristo nanyi bua kuikalabu bashindame mu nyuma anyi? Ntuku ndonda diakamue buludiki butudi tupeta kudi bulongolodi bua Nzambi anyi?’—w16.11, dib. 11.

Ndîba kayi divua bena Kristo balelela bakuatshibue ku bupika bua bena Babilona?

Bualu ebu buakenzeka katupa kakese panyima pa lufu lua bapostolo. Tshikondo atshi, kasumbu ka bamfumu ba bitendelelu kakatuadija kumueneka. Bitendelelu ne mbulamatadi bakatantshisha bukua buena Kristo butontolodi ne kuenzabu bua kukanga dîyi dia bena Kristo bavua bu mponda. Kadi mu bidimu bia kumpala ku 1914, bela manyi bakatuadija kupeta budikadidi.—w16.11, dib. 23-25.

Bua tshinyi mudimu wa Lefèvre d’Étaples uvua ne mushinga wa bungi?

Mu bidimu bia 1520, Lefèvre wakakudimuna Bible mu muakulu wa Mfualansa bua bantu bakuabu bonso bamupete. Mushindu wende wa kumvuija mvese uvua muambuluishe Martin Luther, William Tyndale, ne John Calvin.—wp16.6, dib. 10-12.

Ndishilangana kayi didi pankatshi pa “kuteka meji ku malu a mubidi” ne “kuteka meji ku malu a nyuma”? (Lomo 8:6)

Muntu udi wenza bualu bua kumpala abu udi utuishila mêsu ende pa malu adiye ujinga ne mmukokibue kudi mubidi mupange bupuangane, udi dîba dionso wakula bua malu a mubidi ne uatumbisha. Muntu udi wenza bualu bua ndekelu abu udi wenza bua nsombelu wende ikale muimanyine pa malu a Nzambi ne meji ende; muena Kristo wa nunku mmulombola kudi nyuma muimpe. Bualu bua kumpala abu budi bufikisha ku lufu ne bua ndekelu bufikisha ku muoyo ne ditalala.—w16.12, dib. 15-17.

Ngimue mishindu kayi mimpe ya kukepesha tunyinganyinga?

Sungula malu a kuteka pa muaba wa kumpala adi makumbane, tekemena malu malelela, keba dituku dionso tshikondo tshia kushala mupuwe, bandila bufuki bua Nzambi, ikala wela bilele, ikala ne tshibidilu tshia kuibidija mubidi ne lala tulu tukumbane.—w16.12, dib. 22-23.

“Bakumbusha Henoka kumuteka muaba mukuabu bua kamonyi lufu.” (Eb. 11:5) Mushindu kayi?

Bidi bimueneka ne: Nzambi wakumbusha Henoka ne bulenga buonso ku muoyo, kuenzaye bua bua afue kayi mumanye ne: uvua ufua.—wp17.1, dib. 12-13.

Bua tshinyi bupuekele butshidi anu ne mushinga?

Kuikala ne bupuekele nkudiangata ne mushinga mukumbanyine ne kumanya mikalu yetu. Mbimpe tuikale bamanye tshidi bikadilu bietu mua kuenzela bakuabu ne kubenga kudiangata ne mushinga mupite bungi.—w17.01, dib. 18.

Ntshijadiki kayi tshidi tshileja ne: Nzambi uvua mulombole kasumbu kaludiki ka mu bidimu lukama bia kumpala anu mudiye ulombola bena mu Kasumbu Kaludiki ka lelu?

Bavua bumvua malu malelela a mu Mifundu ku diambuluisha dia nyuma muimpe. Bavua balombola mudimu wa diyisha ne diambuluisha dia banjelo, ne bavua beyemena Dîyi dia Nzambi pavuabu bafila buludiki. Malu aa ke adi enzeka kabidi lelu eu.—w17.02, dib. 26-28.

Mmalu kayi adi atusaka bua kumona tshiakupikula natshi ne mushinga wa bungi?

Kudi malu anayi aa: Wakatshifila, tshivuabu batshifidile, malu avuabu bitabe bua kutantamena, ne dijinga dinene divuatshi tshikumbaje. Tudi ne bua kuelangana meji a mudi malu aa atangila tshiakupikula natshi.—wp17.2, dib. 4-6.

Muena Kristo yeye mumane kuangata dipangadika dia bualu kampanda, udiku mua kudishintulula anyi?

Tudi ne bua kukumbaja mêyi etu. Nansha nanku, imue misangu bidi mua kutulomba bua kuelulula meji bua dipangadika dituvua bangate. Nzambi wakashintulula dipangadika divuaye muangate bua Niniwe pavua bantu banyingalale bua mpekatu yabu. Ku misangu, nsombelu mipiamipia anyi bualu kampanda bupiabupia budi mua kutulomba bua kushintulula petu dipangadika.—w17.03, dib. 16-17.

Bua tshinyi kuakula bibi bua bakuabu kudi ne njiwu ya bungi?

Kudi mua kunyangakaja tshilumbu bikole kakutshiyi mushindu wa kutshijikija. Nansha tuetu babinge anyi bapile, kuakula mêyi adi atapa kakuena kuakaja malu to.—w17.04, dib. 21.