Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 6 2017

Teka muoyo webe ku biuma bia mu nyuma

Teka muoyo webe ku biuma bia mu nyuma

“Muaba udi biuma bienu ke wikala mioyo yenu kabidi.”—LUKA 12:34.

MISAMBU: 153, 104

1, 2. a) Mbiuma kayi bisatu bia mushinga bidi Yehowa mutupeshe? b) Netukonkonone tshinyi mu tshiena-bualu etshi?

YEHOWA ke Mubanji munene mu diulu ne pa buloba. Bintu bionso mbiende. (1 Kul. 29:11, 12) Kadi Yehowa utu ne tshianza tshilekelela kudi bantu bonso. Bushuwa tudi ne dianyisha bua mudiye mutupeshe biuma bia mu nyuma bia bungi! Bimue bia ku biuma ebi mbinganyi? Tudi ne: 1) Bukalenge bua Nzambi, 2) mudimu wetu wa diyisha, ne 3) malu malelela a mushinga adi mu Dîyi diende. Kadi tuetu katuyi badimuke, mu bule bua matuku tudi mua kupua mushinga udi nawu biuma ebi muoyo. Tudi ne bua kutungunuka ne kuvuluka mushinga wabi ne kukolesha dinanga dietu kudibi, bualu anu bu muvua Yezu muambe: “muaba udi biuma bienu ke wikala mioyo yenu kabidi.”—Luka 12:34.

2 Tukonkononayi mutudi mua kulama dinanga dietu ne dianyisha dietu bikole bua Bukalenge, bua mudimu wa diyisha ne bua bulelela. Patudi tuenda tuenza nunku, ela meji a muudi wewe pa nkayebe mua kukolesha dinanga diebe dia biuma bia mu nyuma ebi.

 BUKALENGE BUA NZAMBI BUDI BU DIBUE DIA BUSANGA DIA MUSHINGA MUKOLE

3. Ntshinyi tshivua muntu wa mu muyiki wa Yezu muenze bua kusumba dibue dia busanga dimue? (Tangila tshimfuanyi tshia ntuadijilu tshia tshiena-bualu.)

3 Bala Matayi 13:45, 46. Yezu wakalonda muyiki wa muntu uvua usumba mabue a busanga, uapanyisha. Dimue dituku, wakapeta dibue dia busanga divua ne mushinga wa bungi kupita mabue a busanga makuabu akavuaye mumone. Muntu eu wakajinga dibue dia busanga adi bikole kufikaye too ne ku dipana bintu biende bionso bua kudisumba. Udiku mua kuela meji muvua dibue dia busanga adi ne mushinga wa bungi kudiye anyi?

4. Netuitabe bua kuenza tshinyi bua Bukalenge?

4 Muyiki wa Yezu eu udi utulongesha tshinyi? Bulelela bua Bukalenge bua Nzambi budi bu dibue dia busanga dia mushinga mukole. Tuetu banange Bukalenge bikole bu muvua muntu au muangate dibue dia busanga ne mushinga, netuitabe bua kulekela bionso bua kulua ne kutungunuka ne kuikala bena dia Bukalenge. (Bala Mâko 10:28-30.) Tumonayi muvua bantu babidi benze bualu ebu.

5. Ntshinyi tshivua Zakayi muitabe bua kuenza bua Bukalenge?

5 Zakayi uvua mulambuishi wa bitadi. Uvua mulue mubanji ku dinyenga dia bantu makuta. (Luka 19:1-9) Kadi dimue dituku, Zakayi wakumvua Yezu wakula bua Bukalenge. Wakananga malu avuaye mumvue bikole kufikaye too ne ku dijinga bua kushintuluka. Wakamba ne: “Tangila Mukalenge, ndi mpesha bapele tshia bibidi tshia bintu bianyi, tshintu tshionso tshimvua munyenge muntu pamvua mumushiminyine, ndi ntshipingaja misangu inayi.” Zakayi wakapingaja makuta avuaye munyenge bantu ne kulekelaye lukuka.

6. Mmalu kayi avua mamu kampanda mushintulule mu nsombelu wende? Bua tshinyi wakenza nanku?

6 Kukadi bidimu ndambu, mamu kampanda uvua muditue mu tshilele tshia diselangana dia bakaji ne bakaji wakumvua bakula bua Bukalenge. Uvua kabidi mulombodi wa bulongolodi kampanda buvua buluila manême a balume badi baselangana ne balume nabu anyi bakaji badi baselangana ne bakaji nabu. Kadi pakalongaye Bible ne kumanyaye mushinga uvua nawu Bukalenge bua Nzambi, wakajingulula ne: uvua ne bua kushintulula nsombelu wende bikole. (1 Kol. 6:9, 10) Bu muvuaye munange Yehowa, wakapatuka mu bulongolodi abu ne kushipaye dibaka ne mukaji mukuabu uvuaye nende mu dibaka. Wakatambula mu 2009, ne tshidimu tshiakalonda wakalua mpanda-njila wa pa tshibidilu. Wakashintulula nsombelu wende bikole bualu dinanga diende kudi Yehowa divua dikole kupita majinga mabi avuaye nawu.—Mâko 12:29, 30.

7. Mmunyi mutudi mua kulama dinanga dietu dia Bukalenge dikole?

7 Bua kulua bena dia Bukalenge bua Nzambi, ba bungi ba kutudi bavua ne bua kushintulula nsombelu wabu bikole. (Lomo 12:2) Kadi mvita yetu ki mmijike to. Katuena mua kulekela tshintu kayi tshionso bu mudi: dinanga dia bintu bia ku mubidi anyi majinga mabi a masandi tshitekesha dinanga dietu dia Bukalenge to. (Nsu. 4:23; Mat. 5:27-29) Bua kutuambuluisha bua kulama dinanga dietu dia Bukalenge bua Nzambi dikole, Yehowa mmutupeshe tshiuma tshikuabu tshia mushinga.

MUDIMU WETU WA DIYISHA UDI USUNGILA MIOYO

8. a) Bua tshinyi mupostolo Paulo wakaleja ne: mudimu wetu wa diyisha udi bu ‘tshiuma mu bivuadi bienza ne buloba’? b) Mmunyi muvua Paulo muleje ne: uvua munange mudimu wa diyisha?

8 Yezu wakatupesha mudimu wa kuyisha ne kulongesha lumu luimpe lua Bukalenge bua Nzambi. (Mat. 28:19, 20) Mupostolo Paulo wakumvuija mudi mudimu wa diyisha muikale tshiuma tshilamina mu tshivuadi tshia buloba anyi mulondo wa diima. (2 Kol. 4:7; 1 Tim. 1:12) Bu mutudi bapange bupuangane, tudi anu bu  milondo ya diima ayi. Kadi mukenji utudi tuyisha udi bu tshiuma tshia mushinga mukole bualu udi mua kutupetesha tuetu ne bantu badi batuteleja muoyo wa tshiendelele. Ke bualu kayi Paulo wakamba ne: “Ndi ngenza malu onso bua lumu luimpe, bua meme kuluyisha bakuabu.” (1 Kol. 9:23NWT) Paulo wakadifila bikole bua kuyisha bakuabu malu a Bukalenge bua Nzambi. (Bala Lomo 1:14, 15; 2 Timote 4:2.) Dinanga dia lumu luimpe divua dimuambuluishe bua kutungunuka ne kuyisha nansha pavuaye utuilangana ne buluishi bukole. (1 Tes. 2:2) Mmunyi mutudi mua kuidikija dinanga divua nadi Paulo bua mudimu wa diyisha?

9. Ngimue mishindu kayi itudi mua kuleja ne: tudi banange mudimu wa diyisha?

9 Umue mushindu uvua Paulo muleje ne: uvua munange mudimu wa diyisha mpavuaye uyikila ne bantu mu mpunga yonso uvuaye upeta. Anu bu Paulo ne bena Kristo ba kumpala, tuetu petu tudi tuyisha bantu lumu luimpe ku nzubu ne ku nzubu, miaba ya binsangansanga ne miaba mikuabu yonso itudi mua kubapeta. (Bien. 5:42; 20:20) Tudi tukeba mishindu ya kuyisha bantu ba bungi menemene. Tuetu ne mushindu, tudi pamuapa mua kulua bampanda-njila bambuluishi anyi bampanda-njila ba pa tshibidilu. Peshi tudi mua kulonga muakulu mukuabu, kuya muaba mukuabu mu ditunga dietu, anyi mene kuya mu ditunga dikuabu.—Bien. 16:9, 10.

10. Mmalu kayi mimpe avua Irene mupete bua muvuaye mudifile bikole bua kuyisha lumu luimpe?

10 Irene, muanetu wa bakaji mujike wa mu États-Unis, wakajinga bua kuyisha bantu bavua bakula tshiena Russie lumu luimpe. Nunku mu 1993, wakaya mu kasumbu ka muakulu wa tshiena Russie ka mu tshimenga tshia New York. Tshikondo atshi, kuvua anu bambi ba lumu luimpe batue ku 20 mu kasumbu aku. Panyima pa bidimu 20, Irene wakamba ne: “Tshiena anu muanji kumanya mua kuakula tshiena Russie bimpe to.” Nansha nanku, Yehowa mmumuambuluishe yeye ne bamanyishi bakuabu bua kuyisha bantu mu muakulu au. Bu tshipeta, lelu kudi bisumbu bia muakulu wa tshiena Russie bisambombo mu tshimenga tshia New York. Irene wakalonga Bible ne bantu ba bungi, ne bantu 15 ba kudibu bakatambula. Bamue ba kudibu badi benza mudimu ku Betele, mbampanda-njila, anyi bakulu. Irene udi wamba ne: “Pandi ngela meji bua bipatshila bikuabu bimvua mua kuikala muipatshile, kakuena nansha tshimue tshindi ngela meji ne: tshivua mua kumpetesha disanka dia bungi to.” Irene udi bushuwa munange mudimu wende wa diyisha bikole!

Udiku munange mudimu wa diyisha ne ukeba dîba dia kuwenza lumingu luonso anyi? (Tangila tshikoso tshia 11, 12)

11. Mbipeta kayi bitudi tupeta patudi tutungunuka ne kuyisha nansha padiku buluishi?

11 Tuetu banange mudimu wetu wa diyisha bikole, netuikale anu bu mupostolo Paulo ne netutungunuke ne kuyisha nansha padibu batukengesha. (Bien. 14:19-22) Tshilejilu, kumbukila mu 1930 too ne mu 1944, bavua bakengeshe bana betu ba mu États-Unis bikole. Kadi bakatungunuka anu ne kuyisha. Pavua bakokeshi batete bua kubakandika, bana betu bakaya ku  kabadi ne kutshimunabu bilumbu bia bungi. Mu 1943, muanetu Knorr wakakula bua tshimue tshia ku bilumbu bivuabu batshimune ku Kabadi kanene ka mu États-Unis. Wakamba ne: kakuvua mua kuikala tshilumbu nansha tshimue tshia kuya natshi ku Kabadi aku bu bana betu balekele kuyisha to. Wakasakidila ne: bu muvua bana betu ba pa buloba bujima batungunuke ne kuyisha, bakafila tshijadiki tshia ne: buluishi kabuvua butshimune to. Bana betu ba mu matunga makuabu mbatshimune pabu bilumbu bia muomumue ku tubadi. Eyowa, dinanga dietu dia mudimu wa diyisha kadiakushila buluishi mpunga bua butupangishe bua kuyisha to.

12. Udi mudisuike bua kuenza tshinyi?

12 Tuetu banange mudimu wetu wa diyisha bikole, katuakuditatshisha anu bua bungi bua mêba atudi tufila mu luapolo luetu to. Netuenze tshionso tshitudi mua kuenza bua “kuyisha bikole menemene lumu luimpe.” (Bien. 20:24; 2 Tim. 4:5) Kadi mmalu kayi atuayisha bakuabu? Tukonkononayi tshiuma tshikuabu tshidi Nzambi mutupeshe.

MALU MALELELA A MUSHINGA ATUDI TULONGA

13, 14. “Tshibutshilu” tshivua Yezu mutele mu Matayi 13:52 ntshinyi? Mmunyi mutudi tutshiuwuja?

13 Tshiuma tshisatu tshidi Yehowa mutupeshe mmalu malelela onso atudi balonge. Yehowa udi Mpokolo wa bulelela. (2 Sam. 7:28; Mis. 31:5) Bu mudiye Tatu mupeshanganyi wa bintu, mmusue kutupesha malu malelela aa. Too ne mpindieu, tudi balonge malu a bungi aa patudi tubala Dîyi diende ne mikanda yetu ne patudi tubuela mu mpuilu ne mpungilu yetu ne mu bisangilu bia ku lumingu. Patudi tuenda tusangisha malu malelela aa, netupete tshivua Yezu mubikile ne: “tshibutshilu” tshia malu malelela, ‘mapiamapia ne a kale.’ (Bala Matayi 13:52.) Yehowa neatuambuluishe bua kuwuja “tshibutshilu” tshietu tuetu bakebe malu malelela mushindu wa muomumue ne utudi tukeba biuma bisokoka. (Bala Nsumuinu 2:4-7.) Mmunyi mutudi tuenza bualu ebu?

14 Tudi ne bua kuikala ne tshibidilu tshia kulonga Bible ne mikanda yetu ne kuenza makebulula ne muoyo mujima. Kuenza nunku nekutuambuluishe bua kupeta malu malelela ‘mapiamapia’ atuvua katuyi bamanye. (Yosh. 1:8, 9; Mis. 1:2, 3) Mu nimero wa kumpala wa Tshibumba tshia Nsentedi uvuabu bapatule mu ngondo wa 7 mu 1879, bakafuanyikija bulelela ne tshilongo tshisokome mu bisonsa bibi bia bungi. Bua kupeta tshilongo tshia nunku, muntu udi ne bua kutshikeba bimpe bimpe. Padiye utshipeta, kakuimanyina anu pa tshimue atshi to. Udi ne bua kutungunuka ne kukeba bua kupeta bilongo bikuabu bia bungi. Mu mushindu wa muomumue, katuena ne bua kuimanyina anu pa bulelela bumue butudi tupeta to. Tudi ne bua kuikala ne dijinga dikole dia kutungunuka ne kukeba malu malelela makuabu a bungi.

15. Bua tshinyi tudi mua kubikila amue malu malelela ne: ‘nga kale’? Ngepi autu wangata nangananga ne mushinga?

15 Patuakatuadija kulonga Bible, tuakalonga amue malu malelela a dikema. Tudi mua kuabikila ne: malu malelela ‘a kale’ bualu owu ke a kumpala atuvua balonge. Ngamue malu kayi a ku malu malelela aa? Ku ntuadijilu tuvua balonge ne: Yehowa ke Mufuki wetu, kabidi ne: udi ne tshidiye mulongolole bua bantu. Tuvua balonge kabidi ne: Nzambi wakatuma Muanende pa buloba bua kufuaye bu mulambu udi upikula bua kutumbusha ku bupika bua mpekatu ne lufu. Tuvua kabidi balonge ne: Bukalenge bua Nzambi nebujikije makenga onso, kabidi ne: tudi mua kushala ne muoyo kashidi pa buloba mu ditalala ne disanka.—Yone 3:16; Buak. 4:11; 21:3, 4.

16. Ntshinyi tshitudi ne bua kuenza padibu bashintulula ngumvuilu wetu wa malu malelela a mu Bible?

16 Imue misangu, badi mua kushintulula ngumvuilu wa mulayi kampanda wa mu Bible anyi  wa mvese kansanga. Padibi bienzeka nanku, mbimpe kukeba dîba dia kulonga malu adibu bashintulule aa ne kuelelanganapu meji. (Bien. 17:11; 1 Tim. 4:15) Katuena anu ne bua kukeba bua kumvua dishilangana dinene didi pankatshi pa ngumvuilu wa kale ne mupiamupia to, kadi tudi kabidi ne bua kuteya ntema ku malu adi umvuija ngumvuilu mupiamupia eu. Dilonga dimpe dia nunku neditujadikile ne: bulelela bupiabupia mbulue bualu butudi basakidile mu malu malelela a mu Bible atudi bapete. Bua tshinyi mbimpe tuetu kudienzeja nunku?

17, 18. Mmunyi mudi nyuma muimpe mua kutuambuluisha?

17 Yezu uvua mulongeshe ne: nyuma wa Nzambi udi mua kutuambuluisha bua kuvuluka malu atuvua balonge kale. (Yone 14:25, 26) Mmunyi mudiye mua kutuambuluisha patudi tuyisha lumu luimpe? Tumone tshivua tshifikile muanetu wa balume kampanda diende Peter. Mu 1970, uvua ne bidimu 19 ne utshivua utuadijilaku kuenza mudimu ku Betele wa mu Grande-Bretagne. Peter uvua uyisha ku nzubu ne ku nzubu, kutuilanganaye ne tatu kampanda wa muedi uvua ne bidimu pankatshi pa 40 ne 60. Wakebeja tatu eu ni uvua wanyisha bua kumvua malu a mu Bible. Tatu au uvua labi muena Yuda, biakamutonda bua muvua muana wa nsongalume wela meji ne: uvua mua kumulongesha Bible. Bua kuteta Peter, labi au wakamuebeja ne: “Muananyi wa balume, mmu muakulu kayi muvuabu bafunde mukanda wa Danyele?” Peter wakamuambila ne: “Tshitupa tshiawu tshivua tshifunda mu tshiena Alama.” Peter udi uvuluka wamba ne: “Labi au wakakema bikole bua mumvua mumanye diandamuna, kadi ki mbu mumvua meme mukeme to. Mmunyi mumvua mumanye diandamuna adi? Pangakapingana kumbelu ne kuenza makebulula mu bibejibeji bia Tshibumba tshia Nsentedi ne Réveillez-vous ! bia ngondo mishale, ngakapeta tshiena-bualu tshivua tshiumvuija ne: mukanda wa Danyele uvua mufunda mu tshiena Alama.” (Dan. 2:4NWT, dimanyisha) Bushuwa, nyuma muimpe udi mua kutuambuluisha bua kuvuluka malu atuvua babale ne babueje mu tshibutshilu tshietu kale.—Luka 12:11, 12; 21:13-15.

18 Tuetu banange malu malelela adi Yehowa utulongesha ne tuetu ne dianyisha bua malu aa, netujinge bua kutungunuka ne kuasakidila mu tshibutshilu tshietu. Patudi tutungunuka ne kuenza nunku, netudiumvue bakumbane bua kulongesha bakuabu.

KUBA BIUMA BIEBE

19. Bua tshinyi tudi ne bua kukuba biuma bietu bia mu nyuma?

19 Mu tshiena-bualu etshi, tudi bamone mudibi ne mushinga bua tuetu kuangata biuma bia mu nyuma ne mushinga. Kadi tudi ne bua kuikala ne budimu bua bungi bua katufiki ku dilekela Satana ne bulongolodi buende bitekesha dinanga ditudi nadi bua biuma ebi. Tuetu katuyi badimuke, bintu bu mudi: ditulaya mudimu wa makuta a bungi, dilota bua kuikala ne biuma bia bungi, anyi dijinga dia kuleja bintu bia ku mubidi bitudi nabi. Mupostolo Yone wakatuvuluija ne: buloba ebu ne bionso bidibu bufila nebipite mu katupa kîpi emu. (1 Yone 2:15-17) Ke bua tshinyi tudi ne bua kutungunuka ne kuikala ne dianyisha bua biuma bia mu nyuma ne kubikuba.

20. Ntshinyi tshiudi mudisuike bua kuenza bua kukuba biuma biebe bia mu nyuma?

20 Ikala mudiakaje bua kulekela tshintu tshionso tshidi mua kutekesha dinanga diebe dia Bukalenge bua Nzambi. Ikala mudisuike bua kuyisha ne tshisumi, ne kujimiji dinanga diebe dia mudimu wa diyisha nansha. Tungunuka ne kukeba malu malelela a mu Bible. Paudi wenza nunku, neudibutshile ‘biuma mu diulu mudi muivi kayi mua kusemena pabuipi anyi bishi kabiyi mua kudia. Bualu bua muaba udi biuma biebe ke wikala muoyo webe kabidi.’—Luka 12:33, 34.