Mvua umue wa ku bana ba bakaji batekete bavuabu basungule bua kupesha Adolf Hitler bilongo panyima pa muyuki uvuaye muenze dituku kampanda. Bavua bansungule bua tshinyi? Papa uvua mudifile bikole mu malu a bena Nazi ne yeye ke uvua wambula munene wa tshisumbu tshia bena Nazi tshia muaba utuvua basombele mu mashinyi. Maman uvua muena Katolike wa dikema ne uvua musue bua ndue mudiambike. Nansha nanku, tshiakalua ni mmuena Nazi ni mmudiambike to. Indilayi nnulondele.

MVUA mukolele mu Graz, mu Autriche. Pamvua ne bidimu muanda mutekete, bakamfundisha mu kalasa bua kulonga malu a Nzambi. Kadi ngakamona badiambike balume ne bakaji benda masandi munkatshi muabu bibi be! Nunku maman wakanganyishila bua kumbuka mu kalasa aku mu tshidimu tshimue.

Dîku dietu, papa muvuale bilamba biende bia basalayi

Pashishe ngakabuela mu kalasa ka Enterna. Dituku kampanda butuku, papa wakalua kungangata bua kuya nanyi muaba uvua kawuyi njiwu bualu bavua benda bela bombe mu Graz mujima. Tuakanyemena mu tshimenga tshia Schladming. Katupa kakese tuetu bamane kusabuka tshilamba, bombe buakatshiupula. Dituku dikuabu, ndeke milembelele yakatuela meme ne kaku mukaji masashi mu lubanza luetu. Pakajika mvita, biakamueneka ne: tshitendelelu ne mbulamatadi bivua bituele mâyi ku makasa.

KUMANYA NZAMBI UDI KAYI UPANGA KUAMBULUISHA BANTU BENDE

Mu 1950, Ntemu wa Yehowa kampanda wakatuadija kulongesha maman malu a mu Bible. Mvua nteleja miyuki yabu ne mfila maman mu bimue bisangilu. Maman wakatuishibua ne: Bantemu ba Yehowa bavua balongesha bulelela, yeye kubatijibua mu 1952.

Tshikondo atshi, tshisumbu tshia muaba utuvua tshivua anu bu dingumba dia bamamu bakulumpe. Kadi tuakalua kuya mu tshisumbu kampanda muvua bansonga ba bungi tshivua katshiyi bu dingumba dia bamamu bakulumpe. Pangakalukila mu Graz, ngakatuadija kubuela mu bisangilu bionso, pashishe meme kutuishibua panyi ne: malu amvua ndonga avua malelela. Ngakalua kumanya kabidi ne: Yehowa nNzambi utu kayi upanga kuambuluisha bantu bende. Udi utukuatshisha nansha patudi tudiumvua nkayetu mu nsombelu mikole menemene.—Mis. 3:5, 6.

Mvua musue kuyisha bantu bakuabu bulelela bikole. Ngakatuadija ne bana betu. Bayayanyi banayi bakavua bumbuke kuetu bu muvuabu benza mudimu wa bulongeshi. Kadi ngakaya kubatangila mu misoko ivuabu, meme  kubakankamija bua balonge Bible. Ndekelu wa bionso, bana betu bonso bakalonga Bible, kuluabu Bantemu ba Yehowa.

Mu lumingu luanyi luibidi lua diyisha ku nzubu ne ku nzubu, ngakapeta mamu mukuabu wa bidimu 30 ne bia mu njila, meme kutuadija kulonga nende Bible. Wakaya kumpala, yeye kubatijibua; pashishe, bayende ne bana babu ba balume babidi bakabatijibua pabu. Dilonga adi diakankolesha mu ditabuja bikole. Mushindu kayi? Kakutu muntu utu mundongeshe Bible to. Bivua bikengela kulongolola dilonga dionso bimpe menemene. Mu mushindu kampanda, mvua ngenza nanku bua kuanji kudilongesha meme nkayanyi, pashishe kumona mua kulongesha mulongi wanyi. Kuenza nanku kuakangambuluisha bua kumvua bulelela bimpe menemene. Mu ngondo 4/1954, ngakabatijibua bua kuleja mumvua mudilambule kudi Yehowa.

‘BATUKENGESHA, KADI KATUYI BALEKELELA’

Mu 1955, ngakabuela mu mpungilu ya bantu bafume mu matunga a bungi mu Allemagne, mu France, ne mu Angleterre. Pamvua mu Londres, ngakatuilangana ne muanetu Albert Schroeder uvua mulongeshi mu kalasa ka Gilada, ne pashishe, wakalua muena mu Kasumbu kaludiki. Tuakaya kuendakana mu nzubu wa dilamina bintu bia kale wa British Museum, muanetu Schroeder kutulejaye imue mifundu ya kale ya Bible mifunda ku tshianza. Mifundu ayi ivua ne dîna dia Nzambi difunda mu maleta a mu tshiena Ebelu, yeye kutuleja mushinga wayi. Bualu ebu buakakolesha dinanga dianyi bua Yehowa ne bua bulelela bua mu Bible, ke meme kudisuika bikole bua kuyisha bulelela bua mu Dîyi dia Nzambi.

Meme ne mpanda-njila nanyi (ku dia balume), patuvua bampanda-njila ba pa buabu mu Mistelbach, mu Autriche

Ngakatuadija mudimu wa bumpanda-njila bua ku dîba ne ku dîba mu dia 1/1/1956. Ngondo inayi pashishe, bakanteka mpanda-njila wa pa buende mu Autriche. Tshikondo atshi, mu tshimenga tshia Mistelbach mumvua ne bua kuenzela mudimu kamuvua Ntemu nansha umue to. Kadi ngakatuilangana ne lutatu lua pa bualu. Tuvua bashilangane ne mpanda-njila nanyi wa bakaji utuvua nende bikole menemene. Meme mvua ne bidimu bitue ku 19 ne mukolele mu tshimenga; kadi yeye uvua ne bidimu 25, mukolele ku musoko. Mvua musue kulala too ne mu dinda; kadi yeye uvua musue kubika pa bitala. Dilolo, meme mvua nshala musombe; kadi yeye uvua musue kulala kumpala kua dîba. Nansha nanku, ditumikila mibelu ya mu Bible diakatuambuluisha bua kusomba bimpe ne kuikala ne disanka mu mudimu wetu wa bumpanda-njila.

Bushuwa, tuakapeta ntatu mikuabu mikole. Tuakapeta too ne dikengeshibua, kadi katuvua “balekelela” to. (2 Kol. 4:7-9) Musangu kampanda, patuvua tuyisha mu musoko mukuabu, bena mu musoko au bakatutumina mbua minene. Yoyi kutunyunguluka meme ne mpanda-njila nanyi yenda ibuluka ne ileja mênu. Tuetu kukuatangana ku tshianza, meme kusambila ne: “Yehowa wetu, padi mbua eyi ifika kutudi, tufue koku lukasa!” Pakasemenayi pabuipi netu menemene, yakimana inyungisha mikila, pashishe yoyi kuya. Tuakamona ne: Yehowa uvua mutukube. Pashishe, tuakayisha mu musoko amu mujima, ne tuvua ne disanka dia bungi bualu bantu bavua bateleja bikole. Pamuapa bavua bakema bua muvua mbua kayiyi mituenzele bibi anyi bua mutuvua bananukile mu diyisha nansha muvua mbua ayi mitutshingishe. Ndekelu wa bionso, bamue ba kudibu bakalua Bantemu.

Tuakatuilangana ne bualu bukuabu buvua butuenze buôwa. Dimue dituku, tatu wa lupangu  lutuvua wakalua mukuatshike maluvu wenda ukana bua kutushipa, wamba ne: tuvua tutatshisha bena mu musoko. Mukajende kuteta kumukanda, kupanga. Tuvua tumvuila malu onso au mu nzubu wa kuulu mutuvua. Tuetu kuteka nkuasa ku tshiibi ne lukasa, kutuadija kuvunga mabuki. Patuakakangula tshiibi, tuakamona tatu au muimane pa tshibandilu mukuate kele kanene. Ke tuetu kunyemena ku tshiibi tshia kumfundu, kulonda kajila ka mu budimi ne mabuki etu, kuya luonso.

Tuetu kuya kutudila ku nzubu wa tshilala benyi. Tuakasombela kuntu aku bu tshidimu tshijima, biakatuambuluisha bikole bua kuenza mudimu wetu bimpe. Mushindu kayi? Nzubu wa tshilala benyi au uvua munkatshi mua tshimenga, ne bamue balongi betu ba Bible bavua basue kulongelamu Bible. Matuku makese pashishe, tukavua tuenza dilonga dia mukanda ne dia Tshibumba tshia Nsentedi mu tshibambalu tshietu tshia mu nzubu wa tshilala benyi ne bantu batue ku 15.

Tuakashala mu Mistelbach tshidimu tshijima ne ndambu. Pashishe bakantuma mu tshimenga tshia Feldbach, ku sud-est kua Graz. Ngakapetamu mpanda-njila nanyi mukuabu wa bakaji, kadi kamuvua pamu tshisumbu to. Tuakasombela mu katshibambalu kakese kavua kuulu kua kazubu ka mitshi. Lupepele luvua lubuelela mu masoso avua pankatshi pa mitshi, ke tuetu kuajika ne bikandakanda. Tuvua tusuna mâyi mu tshîna tshia mâyi. Kadi kabivua anu ne bualu to. Mu ngondo mikese, tuakalua kasumbu ka bamanyishi. Ndekelu wa bionso, bantu batue ku 30 ba mu dîku kampanda batuvua tulonga nabu Bible bakalua Bantemu!

Malu aa akakolesha dianyisha dimvua nadi bua mudi Yehowa kayi upanga kuambuluisha bantu badi bipatshila malu a Bukalenge. Nansha bantu kabayi mua kutuambuluisha, Yehowa udi anu utuambuluisha.—Mis. 121:1-3.

BAMBULUISHA KUDI “TSHIANZA TSHIA BALUME TSHIA BUAKANE” TSHIA NZAMBI

Mu 1958, mpungilu wa bantu bafume mu matunga a bungi uvua ne bua kuenzeka mu New York, mu tshipalu tshia Yankee Stadium ne tshia Polo Grounds. Ngakuwuja dilomba bua kubuelamu, ne Betele wa Autriche wakangebeja ni mvua musue kubuela mu kalasa ka Gilada ka 32. Mmunyi mumvua mua kubenga diakalenga dimpe nunku? Ngakandamuna diakamue ne: “Eyowa, ndi musue!”

Patuvua mu kalasa ka Gilada, mvua nsomba ku luseke lua muanetu Martin Poetzinger. Uvua munanukile ntatu mikole menemene mu maloko a disubishangana a bena Nazi. Yeye pende wakalua muena mu Kasumbu kaludiki. Patuvua  tulonga, kuvua misangu ivua Martin ungebeja ku ditshi ne: “Erika, tshidibu bambe atshi ntshinyi mu tshiena Allemagne?”

Munkatshi mua kalasa, muanetu Nathan Knorr wakatumanyisha miaba ivuabu ne bua kututuma. Meme mvua ne bua kuya mu Paraguay. Bu muntshivua tshitende, bivua bikengela papa anganyishile bua kuyamu. Wakanganyishila, meme kufika mu Paraguay mu ngondo 3/1959. Bakanteka ne muanetu mukuabu wa bakaji ku nzubu wa bamisionere uvua mu tshimenga tshia Asunción.

Matuku makese pashishe, tuakatuilangana ne Walter Bright, misionere uvua mubuele mu kalasa ka Gilada ka 30. Panyima pa matuku, tuakaselangana nende, tuetu kubanga kutantamena ntatu ya mu nsombelu pamue. Misangu yonso ituvua tupeta ntatu, tuvua tubala bualu budi Yehowa mulaye mu Yeshaya 41:10 ne: “Kutshinyi to, bualu ndi nebe. Kupampakanyi to, bualu ndi Nzambi webe. Nenkukoleshe, eyowa, nenkuambuluishe.” Mêyi aa avua atushindikila ne: patuvua tudienzeja bua kushala balamate Nzambi ne tuteka Bukalenge buende pa muaba wa kumpala, kavua mua kutuela mâyi ku makasa nansha kakese.

Ndekelu wa bionso, bakatutuma ku mikalu ya Brésil. Bamfumu ba bitendelelu ba kuntu aku bakasaka bansonga bua kuasa nzubu wetu wa bamisionere mabue, pende ukavua mudianjile kunyanguka. Pashishe, Walter wakatuadija kulonga Bible ne mfumu wa bampulushi. Mfumu au kutekaye bampuluishi pabuipi ne nzubu wetu munkatshi mua lumingu lujima, nunku bavua batukengesha abu kabakatutatshisha kabidi to. Matuku makese pashishe, tuakaya kusombela mu kartshie kimpe mu Brésil. Bualu ebu buvua buimpe bualu biakatuambuluisha bua kuenza bisangilu mu Paraguay ne mu Brésil. Kumpala kua tuetu kumbuka, muaba au ukavua bisumbu bibidi bivua ne bantu bakese.

Meme ne bayanyi, Walter, patuvua bamisionere mu Asunción, mu Paraguay

YEHOWA UDI UTUNGUNUKA NE KUNGAMBULUISHA

Baminganga bakangambila ne: tshivua mua kulela to, kadi bualu bua dikema, mu 1962, ngakimita! Ndekelu wa bionso, tuakaya kusombela pabuipi ne balela ba Walter mu tshimenga tshia Hollywood, mu Floride. Munkatshi mua bidimu bia bungi, meme ne Walter katuvua ne mushindu wa kuenza bumpanda-njila to. Tuvua ne bujitu bua dîku. Kadi tuvua tutungunuka ne kuteka malu a Bukalenge pa muaba wa kumpala.—Mat. 6:33.

Mu ngondo wa 11/1962, patuakafika mu Floride, biakatukemesha bua kumona ne: benamu kabavua basue bua batoke ne bafiike batuilangane kaba kamue to. Nunku bana betu bafiike bavua benza bisangilu ne bayisha wabu muaba, ne batoke pabu wabu muaba. Kadi Yehowa katu musue kansungansunga ka makoba to, nunku matuku makese tshianana, bana betu bafiike ne batoke bakatuadija kudisangisha pamue mu bisumbu. Tshianza tshia Yehowa tshiakamueneka mu bualu ebu, bualu patudi tuakula apa, kudi bisumbu bia bungi momu amu.

Bia dibungama, mu 2015, Walter wakafua disama dia kansere ka mu buongo. Uvua mulume wa nsongo mu bidimu bionso 55 bitudi benze nende; uvua munange Yehowa ne muambuluishe bana betu ba bungi. Ndi muindile ne muoyo kuulu kuulu bua kumumona kabidi padibu bamubisha muikale ne makanda a mubidi mimpe.—Bien. 24:15.

Ndi ne dianyisha bua mundi muenze mudimu wa ku dîba ne ku dîba munkatshi mua bidimu bipite pa 40 ne mupete masanka ne malu mimpe a bungi. Tshilejilu, meme ne Walter tuvua ne diakalenga dia kumona bantu 136 ba mu balongi betu ba Bible babatijibua. Bulelela, tuvua bapete imue ntatu. Kadi katuvua tuyimona bu tubingila tua kulekela kuenzela Nzambi wetu wa lulamatu mudimu to. Pamutu pa kuenza nanku, tuakasemena pabuipi nende, tumueyemena bua ajikije ntatu yetu pa dîba didiye mujadike ne mu mushindu udiye musue. Utu anu wenza nanku!—2 Tim. 4:16, 17.

Walter udi unsamima muoyo bikole be! Kadi mudimu wa bumpanda-njila udi ungambuluisha bua kunanukila. Kulongesha bantu bakuabu, nangananga kubalongesha bua ditekemena dia dibishibua ku lufu, kudi kungambuluisha bikole. Eyowa, mu mishindu kayiyi kubala, Yehowa ki mmungele mâyi ku makasa nansha. Mu diumvuangana ne dilaya diende, mmungambuluishe, mmukoleshe, ne mmukuate ne ‘tshianza tshiende tshia balume tshia buakane.’—Yesh. 41:10.