Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 3 2016

Udi pebe mua kukolesha buobumue buetu bua bena Kristo—Mushindu kayi?

Udi pebe mua kukolesha buobumue buetu bua bena Kristo—Mushindu kayi?

“Kudiye, mbalamakaje mubidi wonso pamue bimpe ne mbenze bua kuikale dikuatshishangana.”—EFESO 4:16.

MISAMBU: 53, 107

1. Katshia anu ku ntuadijilu, nngikadilu kayi utu umueneka mu midimu ya Nzambi ne ya bantu bende?

YEHOWA ne Yezu badi mu buobumue katshia anu ku ntuadijilu wa bufuki. Yehowa wakafuka Yezu kumpala kua bintu bikuabu bionso. Pashishe Yezu wakenza nende mudimu ne uvua ‘ku luseke luende bu muena mudimu mupiluke.’ (Nsumuinu 8:30, NWT) Batendeledi ba Yehowa bavua pabu beleshangana diboko mu mudimu uvuabu ne bua kuenza. Tshilejilu, Noa ne bena mu dîku diende bakenza buatu pamue. Panyima pa matuku, bena Isalele bakenza mudimu pamue bua kuasa ntenta wa tshitendelelu, kumutulakaja, ne bua kumbuka nende muaba kampanda bua kuya nende muaba mukuabu. Ku ntempelo, bavua bimba misambu ne biombelu pamue bua kutumbisha Yehowa ne misambu mimpe. Bantu ba Yehowa bavua bafika ku dikumbaja malu onso aa bualu bavua beleshangana diboko.—Genese 6:14-16, 22; Nomba 4:4-32; 1 Kulondolola 25:1-8.

2. a) Mbualu kayi bua pa buabu buvua mu tshisumbu tshia bena Kristo ba kumpala? b) Nnkonko kayi ituandamuna?

2 Bena Kristo ba mu bidimu lukama bia kumpala bavua pabu beleshangana diboko. Mupostolo Paulo wakumvuija ne: nansha muvuabu ne mamanya ne midimu mishilashilangane, bavua mu buobumue. Buonso buabu bavua balonda Yezu Kristo, Mulombodi wabu. Paulo wakabafuanyikija ne mubidi utu ne bitupa bishilashilangana bitu buonso buabi bienza mudimu pamue. (Bala 1 Kolinto 12:4-6, 12.) Kadi netuambe tshinyi buetu tuetu lelu? Mmunyi mutudi mua kueleshangana diboko mu mudimu wetu wa diyisha, mu tshisumbu, ne mu dîku?

ELESHANGANAYI DIBOKO MU MUDIMU WA KUYISHA

3. Ntshikena kumona kayi tshivua mupostolo Yone mumone?

3 Mu bidimu lukama bia kumpala, mupostolo Yone wakamona mu tshikena kumona banjelu muanda mutekete bela mpungi. Pakela muanjelu muitanu mpungi wende, Yone wakamona “mutoto mukuabu uvua mukuluke pa buloba mufume mu diulu.” “Mutoto” au uvua ne nsapi wa kukangula nende ku tshina tshile tshivua ne mîdima. Muishi mufike bikole wakapatuka mu tshina ne pashishe tshisumbu tshinene tshia mpasu tshiakapatuka patshi. Pamutu pa mpasu eyi kunyanga mitshi ne bisosa, yakaluisha bantu bavua “kabayi ne tshitampi tshia Nzambi pa mpala yabu.” (Buakabuluibua 9:1-4) Yone uvua mumanye ne: tshisumbu tshia mpasu tshidi mua kunyangakaja bintu bia bungi; bualu ke tshivua tshienzeke mu Ejipitu mu tshikondo tshia Mose. (Ekesode 10:12-15) Mpasu ivua Yone mumone ivua tshimfuanyi tshia bena Kristo bela manyi badi bayisha mukenji mukole udi utangila ntendelelu wa dishima. Bantu bakuabu miliyo ya bungi badi ne ditekemena dia kupeta muoyo pa buloba mbadisangishe pamue nabu. Badi benza mudimu wa kuyisha eu pamue mu buobumue. Mudimu eu mmuambuluishe bantu ba bungi bua kupatuka mu ntendelelu wa dishima ne kumbuka ku bukokeshi bua Satana.

Tudi tufika ku diyisha pa buloba bujima bualu tudi tueleshangana diboko

4. a) Mmudimu kayi udi nawu bantu ba Nzambi? b) Ntshinyi tshidi mua kubambuluisha bua kuwukumbaja?

4 Tudi ne mudimu wa kuyisha bantu ba pa buloba bujima “lumu luimpe” kumpala kua nshikidilu kulua. Bushuwa, eu mmudimu munene! (Matayi 24:14; 28:19, 20) Tudi ne bua kubikila bantu bonso badi ne “nyota” bua kunua “mâyi a muoyo,” mmumue ne: kulongesha bantu bonso badi basue kumvua bulelela bua mu Bible. (Buakabuluibua 22:17) Kadi tudi mua kuenza nanku anu bituikala ‘balamakaja pamue bimpe’ ne tueleshangana diboko mu tshisumbu.—Efeso 4:16.

5, 6. Mmunyi mutudi mu buobumue patudi tuyisha lumu luimpe?

5 Bua kuyisha bantu ba bungi menemene, tudi ne bua kuikala balongolola bimpe bua mudimu wetu wa kuyisha. Buludiki butudi tupeta mu tshisumbu budi butuambuluisha bua kuenza mudimu eu. Panyima pa  tshisangilu tshia buambi, tutu tuya kuambila bantu lumu luimpe lua Bukalenge. Tutu kabidi tubapesha mikanda ya malu a mu Bible. Bushuwa, tudi bapeshe bantu mikanda eyi miliyo ya bungi pa buloba bujima. Imue misangu batu batulomba bua kuyisha mu bikondo bia pa buabi. Paudi wenza mudimu eu, udi mu buobumue ne bantu bakuabu miliyo ya bungi badi pa buloba bujima badi bayisha mukenji wa muomumue. Udi kabidi wenza mudimu ne banjelu badi bambuluisha bantu ba Nzambi bua kuyisha lumu luimpe.—Buakabuluibua 14:6.

6 Ndisanka kayipu ditudi nadi patudi tubala mu Annuaire bua bipeta bia mudimu wa kuyisha udi wenzeka pa buloba bujima! Ela kabidi meji bua mutudi mu buobumue pa buloba bujima patudi tubikila bantu mu mpungilu yetu. Mu mpungilu eyi, tuetu bonso tutu tuteleja malu a muomumue. Miyuki, drama ne manaya bitu bitukankamija bua kuenzela Yehowa mudimu ne muetu muonso. Tudi kabidi mu buobumue ne bena Kristo netu pa buloba bujima patudi tubuela mu Tshivulukilu tshidimu tshionso. (1 Kolinto 11:23-26) Tutu tudisangisha bonso mu dituku dia ngondo dia muomumue, dia 14 ngondo wa Nisana, dîba dimane kubuela bua kuleja ne: tudi ne dianyisha bua tshivua Yehowa mutuenzele ne bua kutumikila dîyi dia Yezu. Mu mbingu ya kumpala kua Tshivulukilu, tutu tuenza mudimu pamue bua kubikila bantu ba bungi bua kudisangisha netu mu tshibilu tshia mushinga mukole etshi.

7. Patudi tuenza mudimu pamue, ntshinyi tshitudi tufika ku dikumbaja?

7 Mpasu umue kena mua kunyanga bintu bia bungi nkayende to. Nunku, muntu umue kena mua kuyisha bantu bonso nkayende to. Kadi bu mutudi tuenza mudimu pamue, tudi mua kuambila bantu miliyo ya bungi malu a Yehowa ne kuambuluisha bamue bua kutumbishabu Yehowa ne kumupesha bunême.

ELESHANGANAYI DIBOKO MU TSHISUMBU

8, 9. a) Ntshilejilu kayi tshivua Paulo mufile bua kulongesha bena Kristo bua kuikalabu mu buobumue? b) Mmunyi mutudi mua kueleshangana diboko mu tshisumbu?

8 Paulo wakumvuija bena mu Efeso mushindu udi tshisumbu tshilongolola, ne wakamba ne: bantu bonso ba mu tshisumbu badi ne bua ‘kukola mu malu onso.’ (Bala Efeso 4:15, 16.) Paulo wakafila tshilejilu tshia mubidi bua kumvuija ne: muena Kristo yonso udi mua kuambuluisha tshisumbu bua kushalatshi mu buobumue ne kulonda Yezu, Mulombodi wa tshisumbu. Wakamba ne: bitupa bionso bia mubidi bitu biambuluishangana ku “dikuatshishangana dia manungu onso adi afila bintu bidi bikengedibua.” Nunku nansha tuetu bansonga anyi bakulumpe, bikale ne makanda a mubidi anyi katuyi nawu, ntshinyi tshidi yonso wa kutudi ne bua kuenza?

Ntshinyi tshiudi mua kuenza bua tshisumbu kuikalatshi mu buobumue?

9 Yezu mmuteke bakulu bua balombole malu mu tshisumbu, mmusue bua tubanemeke ne tulonde buludiki budibu batupesha. (Ebelu 13:7, 17) Kadi kuenza nunku kakutu kupepele misangu yonso to. Tudi mua kulomba Yehowa diambuluisha. Nyuma wende udi mua kutuambuluisha bua kutumikila  buludiki buonso budi bakulu batupesha. Ela kabidi meji bua mushindu utudi mua kuambuluisha tshisumbu bikole tuetu ne budipuekeshi ne tueleshangana diboko ne bakulu. Tshisumbu tshietu netshikale mu buobumue, ne netunangangane bikole.

10. Mmunyi mudi basadidi ba mudimu bambuluisha tshisumbu bua kuikalatshi mu buobumue? (Tangila tshimfuanyi tshia ntuadijilu tshia tshiena-bualu.)

10 Basadidi ba mudimu badi pabu mua kuambuluisha bua bena mu tshisumbu bikale mu buobumue. Badi benza mudimu mukole bua kuambuluisha bakulu, ne tudi ne dianyisha bua bionso bidibu benza. Tshilejilu, basadidi ba mudimu badi benza bua kuikale mikanda mikumbane ya kuyisha nayi, ne batu bakidila benyi batu balua mu bisangilu bietu. Badi kabidi benza mudimu mukole bua kulongolola Nzubu wa Bukalenge ne kumulama ne mankenda. Patudi tueleshangana diboko ne bana betu ba balume aba, bidi bileja ne: tudi mu buobumue ne tuenzela Yehowa mudimu mu bulongame.—Fuanyikija ne Bienzedi 6:3-6.

11. Ntshinyi tshidi bansonga mua kuenza bua kuambuluisha tshisumbu bua kuikalatshi mu buobumue?

11 Bamue bakulu bakadi benze mudimu mukole mu tshisumbu munkatshi mua bidimu bia bungi. Pamuapa kabena mua kuenza mudimu wa bungi bu muvuabu benza kumpala to, bualu badi benda bakulakaja. Bansonga badi mua kuambuluisha mu mudimu eu. Bobu babalongeshe, badi mua kuambula majitu makuabu mu tshisumbu. Padi basadidi ba mudimu badifila bikole, badi mua kulua bakulu mu matuku adi alua. (1 Timote 3:1, 10) Bamue bakulu batshidi bansonga mbaye mene kumpala bikole. Badi mpindieu batangidi ba bijengu ne badi bambuluisha bana betu ba balume ne ba bakaji mu bisumbu bia bungi. Tudi ne dianyisha padi bansonga bitaba bua kuenzela bena Kristo nabu mudimu.—Bala Musambu wa 110:3; Muambi 12:1.

ELESHANGANAYI DIBOKO MU DÎKU

12, 13. Ntshinyi tshidi mua kuambuluisha bena mu dîku bonso bua kueleshanganabu diboko?

12 Mmunyi mutudi mua kuambuluisha bena mu dîku dietu bua kueleshangana diboko? Kuenza ntendelelu wa mu dîku lumingu luonso kudi mua kutuambuluisha. Padi baledi ne bana babu bapitshisha dîba pamue bua kulonga malu a Yehowa, nebanangangane bikole. Mu ntendelelu wabu wa mu dîku, badi mua kuenza manaya a muikalabu mua kuyisha, ebi nebibambuluishe bua kuikala badilongolole bimpe. Padibu bumvua mudi yonso wa kudibu wakula bua bulelela, ne ­bamona ne: buonso buabu mbanange Yehowa ne mbasue kumusankisha, malanda abu adi akola menemene.

Padi mulume ne mukaji banange Yehowa ne bamuenzela mudimu pamue, nebikale ne disanka mu dibaka diabu ne nebikale mu buobumue

13 Mmunyi mudi mulume ne mukajende mua kueleshangana diboko? (Matayi 19:6) Padi bonso babidi banange Yehowa ne bamuenzela mudimu pamue, nebikale ne disanka mu dibaka diabu, ne nebikale mu buobumue. Badi kabidi ne bua kunangangana anu bu Abalahama ne Sala, Izaka ne Lebeka,  ne Elekana ne Hana. (Genese 26:8; 1 Samuele 1:5, 8; 1 Petelo 3:5, 6) Padi mulume ne mukaji banangangana nunku, nebikale mu buobumue ne nebasemene pabuipi ne Yehowa.—Bala Muambi 4:12.

Ntendelelu wa mu dîku udi wambuluisha bansonga ne bakulumpe bua kukoleshabu malanda abu (Tangila tshikoso tshia 12 ne tshia 15)

14. Bikala bayebe anyi mukajebe kayi wenzela Yehowa mudimu, ntshinyi tshiudi mua kuenza bua kulama dibaka dienu dikole?

14 Bible udi uleja patoke ne: katuena ne bua kuselangana ne muntu udi kayi mutendeledi wa Yehowa to. (2 Kolinto 6:14) Kadi, kudi bana betu badi baselangane ne muntu udi kayi Ntemu wa Yehowa. Bamue mbalonge bulelela bakadi mu dibaka, kadi muena dibaka nabu kayi mulue Ntemu to. Bakuabu bavua mua kuikala baselangane ne mutendeledi wa Yehowa, kadi mulume anyi mukaji mulue kupatuka mu bulongolodi pashishe. Mu nsombelu ya nunku, bena Kristo badi benza muabu muonso bua dibaka diabu dikale dikole padibu batumikila mibelu ya mu Bible. Kuenza nunku kakutu kupepele misangu yonso to. Tshilejilu, Mary ne bayende David bavua benzela Yehowa mudimu pamue. Pashishe, David wakalekela kubuela mu bisangilu. Kadi Mary uvua anu udienzeja bua kuikala mukaji muimpe ne kuleja ngikadilu ya buena Kristo. Wakalongesha kabidi bana bende basambombo malu a Yehowa ne wakatungunuka ne kubuela mu bisangilu ne mu mpungilu. Bidimu bia bungi pashishe, pakavua bana bende bakole ne baye ku mabu, Mary wakatungunuka ne kuenzela Yehowa mudimu nansha muvuabi bimukolele menemene. Kadi pashishe, David wakatuadija kubala mikanda ivua Mary umushila. Pakapita matuku, wakatuadija kubuela kabidi mu bimue bisangilu. Muikuluende wa balume wa bidimu bisambombo uvua misangu yonso ulamina David muaba, pavuaye kayi ulua, muana eu uvua umuambila ne: “Kaku wanyi, mvua mumvue bibi pauvua kuyi mulue mu bisangilu lelu.” David wakapingana kudi Yehowa panyima pa bidimu 25, yeye ne mukajende badi ne disanka bua mudibu mpindieu benzela kabidi Yehowa mudimu pamue.

15. Mmunyi mudi bena mu dibaka bakadi bakulakaje mua kuambuluisha batshidi bansonga?

15 Satana udi uluisha mêku a bungi lelu. Ke bualu kayi mulume ne mukajende badi batendelela  Yehowa badi ne bua kueleshangana diboko. Nansha wewe ukadi mu dibaka kukadi bidimu bungi kayi, ela meji bua tshiudi mua kuamba anyi kuenza bua kukolesha dibaka dienu. Binuikala bena dibaka bakadi bakulakaje, nudi mua kuikala tshilejilu tshimpe kudi bena mu dibaka batshidi bansonga. Pamuapa nudi mua kubikila bena mu dibaka batshidi bansonga bua kuenza nabu ntendelelu wa mu dîku. Nebamone ne: nansha bantu baselangane kukadi bidimu bungi kayi, badi ne bua kunangangana ne kuikala mu buobumue.—Tito 2:3-7.

“TUBANDE KU MUKUNA WA YEHOWA”

16, 17. Ntshinyi tshidi bantu ba Nzambi badi mu buobumue bindile ne muoyo kuulu kuulu?

16 Pavua bena Isalele baya bua kuenza bibilu mu Yelushalema, bavua beleshangana diboko. Bavua balongolola bintu bionso bivuabu nabi dijinga bua luendu. Pashishe, bavua benza luendu pamue ne bavua bambuluishangana. Ku ntempelo, bavua batumbisha Yehowa ne bamutendelela bonso pamue. (Luka 2:41-44) Lelu, bu mutudi tudilongolola bua kupeta muoyo mu bulongolodi bupiabupia, tudi ne bua kuikala mu buobumue ne kuenza muetu muonso bua kueleshangana diboko. Udiku mua kuela meji bua mishindu iudi mua kutamba kuenza nunku anyi?

17 Bantu ba mu bulongolodi ebu batu bakokangana anyi mene baluangana bua malu a bungi. Kadi tuetu tudi ne dianyisha bua mudi Yehowa mutuambuluishe bua kuikala mu ditalala ne bua kumvua bulelela. Bantu bende pa buloba bujima badi bamutendelela mu mushindu udiye musue. Nangananga mu matuku a ku nshikidilu aa, buobumue bua bantu ba Yehowa mbukole menemene kupita ne kumpala. Anu mukavua muprofete Yeshayi ne Mika bambe, tudi tubanda ku “mukuna wa Yehowa” pamue. (Yeshaya 2:2-4; bala Mika 4:2-4.) Netuikale ne disanka dia bungi mu matuku atshilualua pikala bantu bonso pa buloba ‘balamakaja pamue bimpe’ ne beleshangana diboko bua kutendelela Yehowa.