Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 3 2016

Keba bua kumanya diambuluisha didi dikengela, diambuluisha dia mu lungenyi anyi mibelu ya mu Bible bidi bena Kristo nebe nabi dijinga

Udiku mua kuambuluisha mu tshisumbu tshienu anyi?

Udiku mua kuambuluisha mu tshisumbu tshienu anyi?

KUMPALA kua Yezu kupingana mu diulu, wakambila bayidi bende ne: “Nenuikale bantemu banyi . . . too ne ku ntengu ya buloba.” (Bienzedi 1:8) Mmunyi muvuabu mua kufika ku diyisha pa buloba bujima?

Mulongeshi Martin Goodman wa mu iniversite wa Oxford udi wamba ne: “Mudimu uvuabu bapeshe bena Kristo uvua ubatapulula ne bena mu bitendelelu bikuabu too ne bena Yuda, ku ntuadijilu kua bukokeshi bua bena Lomo.” Yezu uvua uya kuyisha ku muaba ne ku muaba. Bena Kristo balelela bavua ne bua kuidikija tshilejilu tshiende ne kuyisha “lumu luimpe lua Bukalenge bua Nzambi” miaba yonso. Bavua ne bua kukeba bantu badi basue kumanya bulelela. (Luka 4:43) Ke bualu kayi mu bidimu lukama bia kumpala, kuvua “bapostolo,” dîna didi diumvuija bantu badibu batume bua kuenza bualu kampanda. (Mâko 3:14) Yezu wakatumina bayidi bende dîyi ne: “Nunku, ndayi nuvuije bantu ba mu bisamba bionso bayidi.”—Matayi 28:18-20.

Bapostolo ba Yezu 12 kabena kabidi pa buloba to, kadi batendeledi ba Yehowa ba bungi badi bidikija tshilejilu tshiabu mu mudimu wa kuyisha. Padibu babalomba bua kuya kuyisha muaba udibu dijinga dinene ne bamanyishi, batu bamba ne: ‘Ke meme eu, untume meme!’ (Yeshaya 6:8) Bamue mbaye kuyisha mu matunga a kule, bu mudi bana betu binunu bia bungi badi bajikije mu kalasa ka Gilada. Bakuabu mbaye kuyisha mu miaba mikuabu ya mu ditunga diabu. Ba bungi mbalonge muakulu mukuabu bua kuambuluisha tshisumbu kampanda anyi kasumbu kansanga. Misangu yonso kabivua bipepele to, kadi  bana betu bonso aba bavua bitabe bua kudipangisha amue malu bua kuleja mudibu banange Yehowa ne bantu. Nunku bakalongolola malu bimpe ne kuenza mudimu ne dîba diabu, bukole buabu ne makuta abu bua kuyisha muaba uvuabu dijinga dinene ne bamanyishi. (Luka 14:28-30) Mudimu udi bana betu aba benza udi ne mushinga wa bungi.

Tuetu bonso katuena mua kuya muaba udibu dijinga dinene ne bamanyishi anyi kulonga muakulu mukuabu to. Kadi tuetu bonso tudi mua kuikala bu bamisionere mu bisumbu bietu.

IKALA MISIONERE MU TSHISUMBU TSHIENU

Ambuluisha bakuabu . . .

Mu bidimu lukama bia kumpala, bena Kristo bavua bayisha ne tshisumi nansha muvua ba bungi ba kudibu bayishila mu bimenga biabu ne kabayi bamisionere. Mupostolo Paulo wakambila Timote ne: “Enza mudimu wa mumanyishi wa lumu luimpe, ukumbaje mudimu webe ne muebe muonso.” (2 Timote 4:5) Mêyi aa avua akumbanyina bena Kristo ba kumpala, ne adi atukumbanyina petu lelu. Bena Kristo bonso badi ne bua kutumikila dîyi dia kuyisha mukenji wa Bukalenge ne kuvuija bantu bayidi. Nansha mu tshisumbu tshietu, kudi mishindu ya bungi ya tuetu kuikala bu bamisionere.

Tshilejilu, patu bamisionere baya mu ditunga dikuabu, nsombelu utu ushilangana bikole, ne batu bakeba mushindu wa kuibidilangana ne nsombelu mupiamupia. Nansha tuetu katuyi ne mushindu wa kuyisha muaba udibu dijinga dinene ne bamanyishi, tudiku mua kukeba mishindu mipiamipia ya kuyisha bantu anyi? Tshilejilu mu 1940, bakanji kulomba bana betu bua kuyisha mu njila dituku dimue ku lumingu. Ukadiku mutete bua kuyisha mu njila anyi? Ukadiku muyishe ne tumatempu tua kutekela mikanda anyi? Bualu budi ne mushinga budi ne: utuku witaba bua kuteta mishindu mipiamipia ya kuyisha lumu luimpe anyi?

pa kubakankamija bua kuenza “mudimu wa mumanyishi wa lumu luimpe”

Wewe muikale ne mmuenenu muimpe, newikale ne tshisumi ne disanka bua kuyisha. Bana betu badi baya muaba udibu dijinga dinene ne bamanyishi anyi badi balonga muakulu mukuabu batu misangu ya bungi bamanyishi badi bakumbane, ne badi mua kuambuluisha tshisumbu bikole. Tshilejilu, batu balombola mudimu wa kuyisha. Bamisionere batu pabu misangu ya bungi balombola malu mu tshisumbu too ne padi bana betu ba balume ba muaba au bakumbana bua kuenza mudimu eu. Biwikala muanetu wa balume mutambule, udiku “wipatshila mudimu,” mbuena kuamba ne: musue kuenzela bena Kristo  nebe mudimu mu tshisumbu tshienu bu musadidi wa mudimu peshi mukulu anyi?—1 Timote 3:1.

IKALA “BUSAMBI” KUDI BAKUABU

pa kubapesha diambuluisha didi dikengela

Tudi kabidi mua kuambuluisha tshisumbu tshietu mu mishindu mikuabu. Tuetu bonso, bansonga ne bakulumpe, balume ne bakaji, tudi mua kuikala “busambi” kudi bena Kristo netu badi dijinga ne diambuluisha.—Kolosayi 4:11.

Tuetu basue kuambuluisha bena Kristo netu, tudi ne bua kubamanya bimpe. Bible udi utulomba bua ‘kutabalelangana’ anyi kutabalela majinga a bena Kristo netu patudi tudisangisha pamue. (Ebelu 10:24) Ebi kabiena biumvuija ne: tudi ne bua kukeba bua kumanya ne mu katoba malu a bana betu adi kaayi atutangila to. Bidi biumvuija ne: tudi ne bua kukeba bua kumanya tshidi nsombelu wa bena Kristo netu ne tshidibu natshi dijinga. Badi mua kuikala dijinga ne kubambuluisha mu bualu kampanda, kubakolesha mu lungenyi anyi kubakankamija ne mibelu ya mu Bible. Bulelela budi ne: mu imue nsombelu, bakulu ne basadidi ba mudimu ke badi mua kubambuluisha. (Galatiya 6:1) Kadi tuetu bonso tudi mua kuambuluisha bana betu bakadi bakulakaje, anyi bena mu mêku bonso badi batuilangana ne ntatu.

pa kukolesha mu lungenyi aba bonso badi baluangana ne ntatu ya mu nsombelu

Salvatore wakapeta diambuluisha dia mushindu eu. Bu muvuaye ne ntatu ya malu a makuta, uvua ne bua kupana bintu biende bia bungenda, lupangu luende ne bia mu nzubu. Uvua usamisha mutu bikole bua dîku diende. Dîku dikuabu dia mu tshisumbu tshiabu diakamona ne: bavua dijinga ne diambuluisha. Bakapesha Salvatore ndambu wa makuta ne kumuambuluishabu yeye ne mukajende bua kupeta mudimu. Bakasomba kabidi nabu madilolo a bungi bua kubateleja ne kubakankamija. Bakalua balunda bimpe. Mêku abidi aa adi mpindieu avuluka malu mimpe avuabu bapete mu tshikondo tshia ntatu mikole tshivuabu basomba pamue atshi.

Bena Kristo balelela kabatu belakana bua kuambila bantu bakuabu malu a mu Bible adibu bitabuja to. Tudi ne bua kuidikija Yezu ne kuambila muntu yonso malu mimpe adi Nzambi mulaye. Nansha tuetu ne mushindu wa kuya anyi katuyi nawu, tuetu bonso tudi mua kuenza muetu muonso bua kuambuluisha bakuabu mu bisumbu bietu. (Galatiya 6:10) Patudi tuambuluisha bakuabu netuikale ne disanka ne netutungunuke ne ‘kukuama mamuma mu mudimu wonso muimpe.’—Kolosayi 1:10; Bienzedi 20:35.