Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2018

 MALU A MU NSOMBELU

Yehowa udi mua kuenza malu onso

Yehowa udi mua kuenza malu onso

“LUFU kaluakuikalaku kabidi to, nansha bafue nebababishe ku lufu.” Aa mmêyi avua mukajanyi Mairambubu mumvue pavuaye mu bise. Avua makoke ntema yende, kujingaye kumanya malu a bungi. Diakamue pakimana bise ne pakatuluka bantu, wakipatshila muntu mukaji uvua muambe mêyi au. Uvua Ntemu wa Yehowa, diende uvua Apun Mambetsadykova. Kuyukila ne Bantemu tshikondo atshi kuvua ne njiwu, kadi malu akatuambila Apun pashishe akashintulula nsombelu wetu.

TUVUA TUENZA MUDIMU DINDA TOO NE DILOLO

Bavua bandele mu 1937 mu kolkhoze, mmumue ne: budimi bua tshinsangansanga, pabuipi ne Tokmok mu ditunga dia Kirghizistan. Dîku dietu ndia bena Kirghizistan, ne tutu tuakula tshiena Kirghizistan. Baledi banyi bavua babidime, ne bavua benza mudimu mu kolkhoze dinda too ne dilolo. Bavua bapesha babidime biakudia pa tshibidilu, kadi bavua babafuta makuta anu musangu umue ku tshidimu. Maman uvua udienzeja bua kututabalela meme ne muakunyanyi wa bakaji. Ngakalonga kalasa anu bidimu bitanu, pashishe meme panyi kutuadija kuenza mudimu dinda too ne dilolo mu kolkhoze.

Mikuna ya Teskey Ala-Too

Tuvua basombele mu tshitupa tshivua bupele butape bu meshi, bua kupeta bituvua nabi dijinga bivua bikengela kukupa kunyaka. Bu muntshivua nsonga, tshivua ntamba kuela meji a bua tshinyi ndi ne muoyo anyi a matuku a tshilualua to. Tshivuaku muanji kuela meji ne: malongesha malenga a Yehowa Nzambi ne malu adiye mulongolole avua mua kushintulula nsombelu wanyi to. Muyuki wa muvua bulelela bubuele mu Kirghizistan ne butangalakamu udi wenza disanka. Buakatuadijila mu tshitupa tshietu tshia ku nord kua Kirghizistan.

BADI BALUA NE BULELELA MU KIRGHIZISTAN

Malongesha malelela adi atangila Yehowa akasa miji mu Kirghizistan mu bidimu bia 1950. Bua kuenzekabi nanku, bivua bikengela malongesha au atshimune ngenyi ya bakoministe ivua ne buenzeji bua bungi. Bua tshinyi? Tshikondo atshi, Kirghizistan uvua dimue dia ku matunga avua enza ditunga dia Union des républiques socialistes soviétiques (URSS). Bantemu ba Yehowa kabavua babuelakana mu malu a tshididi mu URSS mujima to. (Yone 18:36) Ke bualu kayi bavua babakengesha bu baluishi ba mbulamatadi wa bakoministe. Kadi kakuena ngenyi idi mua kupangisha Dîyi dia Nzambi bua kulenga muoyo wa bantu badi ne  dijinga dia kumanya bulelela to. Bushuwa, dimue dia ku malongesha a mushinga mukole andi mupete mu nsombelu wanyi mujima ndia ne: Yehowa “udi mua kuenza malu onso.”—Mâko 10:27.

Emil Yantzen

Dikengesha Bantemu ba Yehowa diakenza bua batangalake mu Kirghizistan. Bua tshinyi? Mu URSS muvua tshitupa tshivuabu babikila ne: Sibérie, muvuabu batuma baluishi ba mbulamatadi. Pakabalekelabu, ba bungi ba kudibu bakalua mu Kirghizistan, bamue bakaluamu ne bulelela. Emil Yantzen uvua muledibue mu Kirghizistan mu 1919 uvua umue wa kudibu. Bavua bamutume mu kamponya muvuabu benzejangana midimu mikole, yeye kupetanganamu ne Bantemu. Wakitaba bulelela, yeye kupingana mu Kirghizistan mu 1956. Emil wakalua kusombela pabuipi ne Sokuluk, mu provense wetu. Mu Sokuluk ke muvuabu benze tshisumbu tshia kumpala tshia mu Kirghizistan mu 1958.

Victor Vinter

Bu panyima pa tshidimu tshijima, Victor Vinter wakalua kusombela mu Sokuluk. Bavua bakengeshe muanetu wa balume wa lulamatu eu misangu ne misangu. Misangu ibidi, bakamuela mu buloko bua bidimu bisatu bualu kavua ubuelakana mu malu a tshididi, pashishe kuenzaye bidimu bikuabu dikumi mu buloko, kusangisha ne bitanu bivuabu bamumuangishe muabu. Nansha nanku, dikengeshibua kadivua dipangishe ntendelelu mulelela bua kutangalakaye to.

BULELELA BUDI BUFIKA PABUIPI NE TSHIMENGA TSHIETU

Eduard Varter

Mu 1963, kuvua Bantemu batue ku 160 mu Kirghizistan; ba bungi ba kudibu bavua ba mu Allemagne, mu Ukraine, ne mu Russie. Munkatshi muabu muvua Eduard Varter, uvuabu bamuangishe kuabu, uvua mubatijibue mu Allemagne mu 1924. Mu bidimu bia 1940, bena Nazi bakamutuma mu buloko muvuabu bamueneshangana kasuba, bidimu ndambu pashishe, bakoministe ba mu URSS bakamuangisha Eduard muabu. Mu 1961, muanetu wa balume wa lulamatu eu wakalua kusombela mu tshimenga tshia Kant tshidi pabuipi menemene ne tshimenga tshietu.

Elizabeth Fot; Aksamai Sultanalieva

Elizabeth Fot, muena mudimu wa Yehowa wa lulamatu, uvua pende musombele mu tshimenga tshia Kant. Uvua utelelangana bilamba bua kupeta tshia kudia. Bu muvuaye utela bimpe, bena mudimu banene bu mudi badoktere ne balongeshi bavua batelesha bilamba kudiye. Umue wa ku bakiliya bende uvua Aksamai Sultanalieva, mukaji wa munene kampanda uvua wenza mudimu mu biro bia ndumbulula wa ditunga. Aksamai wakalua kudi Elizabeth bua kutelesha bilamba, kadi wakamuela nkonko ya bungi bua kumanya bua tshinyi tudi ne muoyo ne tshitu tshienzekela muntu padiye ufua. Elizabeth wakandamuna nkonko yende anu ne Bible. Aksamai wakalua muambi wa lumu luimpe wa tshisumi.

Nikolai Chimpoesh

Bu mu tshikondo atshi, bakateka Nikolai Chimpoesh wa mu Moldavie mutangidi wa tshijengu ne wakenza mudimu eu munkatshi mua bidimu bitue ku 30. Nikolai kavua ukumbula anu bisumbu patupu to, kadi uvua kabidi ulongolola dipatula dia mikanda yetu ne diyabanya. Banene ba mbulamatadi bavua bamanye malu avuaye wenza aa. Ke bualu kayi, Eduard Varter wakamukankamija ne mubelu eu ne: “Padi banene ba mbulamatadi bakuela nkonko, ubambile patoke ne: mikanda yetu itu ifumina ku biro bitu bilombola mudimu wetu pa buloba bujima bidi mu Brooklyn. Utangile muena KGB mu mêsu, kutshinyi to.” (KGB ntshikepeshilu tshia dîna dia tshibambalu tshia malu a bukubi tshia bena Russie.)—Mat. 10:19.

Diakamue panyima pa muyuki au, bakabikidisha Nikolai ku tshibambalu tshinene tshia bena KGB tshia mu tshimenga tshia Kant. Wakalua kulonda tshiakenzeka, wamba ne: “Muena KGB wakangebeja kutuvua tupetela mikanda yetu. Meme kumuambila ne: itu ifumina ku Brooklyn. Yeye kupanga tshia kuamba. Wakandekela ne kakambikila kabidi to.” Bantemu ba dikima aba bakatungunuka ne kumuangalaja lumu luimpe ne budimu buonso mu tshitupa tshietu tshionso tshia  ku nord kua Kirghizistan. Mu bidimu bia 1980, pakafika ndekelu wa bionso bulelela bua mushinga mukole budi butangila Yehowa mu dîku dianyi, mukajanyi Mairambubu ke wakabumvua wa kumpala.

MUKAJANYI WAKAJINGULULA BULELELA NE LUKASA LUONSO

Mukajanyi Mairambubu ngua mu provense wa Naryn mu Kirghizistan. Dimue dituku mu ngondo wa 8/1974, wakaya kutangila muakunyende wa bakaji kuende, muaba utuvua bamuenenangane musangu wa kumpala. Ngakananga Mairambubu diakamue. Tuetu kuselangana dimue dimue adi.

Apun Mambetsadykova

Mu ngondo wa 1/1981 pavua Mairambubu mu bise uya mu tshisalu, wakumvua mêyi atudi batele ku ntuadijilu. Mukajanyi uvua musue kumanya malu a bungi, ke bua tshinyi wakebeja muntu mukaji uvua muambe mêyi au dîna diende ne muaba uvuaye musombele. Wakamuambila ne: diende uvua Apun, kadi uvua ne budimu bualu nansha mu bidimu bia 1980, batshivua anu bakandike midimu ya Bantemu. Pamutu pa Apun kuambilaye Mairambubu muaba uvuaye musombele, wakamulomba bua amuambile muaba utuvua tuetu basombele. Mukajanyi wakapingana kumbelu ne disanka dia bungi.

Mairambubu wakamba ne: “Ndi mumvue malu malenga a katshia. Muntu mukaji mukuabu mmungambile ne: matuku makese kumpala eku bantu kabakufua kabidi to. Too ne nyama ya tshisuku neyisombe ne bantu.” Buanyi meme, malu au avua anu bu mianu. Meme kumuandamuna ne: “Tuindile too ne paluaye kutuambila malu a bungi.”

Apun wakalua kututangila panyima pa ngondo isatu. Bantemu bakuabu bakalua kututangila pashishe, tuetu kumanyangana ne Bantemu bena Kirghizistan ba kumpala. Bana betu ba bakaji aba bakatuleja malu mimpe a dikema adi atangila Yehowa ne malu adiye mulongoluele bantu. Bavua batulongesha ne mukanda wa Du paradis perdu au paradis reconquis. * Kadi bu muvuaku anu mukanda umue mu Tokmok, tuakawutentula ku bianza.

Dîyi dia buprofete didi mu Genese 3:15 ke bumue bua ku malu a kumpala atuakalonga. Dîyi dia buprofete edi nedikumbane ku diambuluisha dia Yezu udi Mukalenge Masiya wa Nzambi. Eu mmukenji wa mushinga udi muntu yonso ne bua kumvua! Ke bualu bunene budi butusaka bua kuditua mu dimanyisha lumu luimpe. (Mat. 24:14) Diakamue bulelela bua mu Bible buakatuadija kushintulula nsombelu wetu.

BISANGILU NE BATISMO MU TSHIKONDO TSHIA MAKANDIKA

Muanetu wa balume mukuabu wa mu Tokmok wakatubikila mu difesto dia dibaka. Meme ne mukajanyi tuakamona diakamue ne: Bantemu bavua wabu  mushindu. Kakuvua maluvu makole mu difesto adi to, ne bavua benza malu onso mu bulongame. Difesto adi divua dishilangane bikole ne mafesto makuabu a dibaka atukavua babuele muvua bantu batamba kukuatshika, benza malu mabi, ne bakula mêyi mabole.

Tuakabuela kabidi mu bimue bisangilu bia bena Kristo mu tshisumbu tshia mu Tokmok. Tuvua tuenzela bisangilu ebi muitu pavua kuulu kuimpe. Bana betu ba balume ne ba bakaji bavua bamanye ne: bampulushi bavua anu benda batulondesha, ke bualu kayi bavua bateka muanetu wa balume bua ikale utudimuija. Mu muvu wa mashika, tuvua tudisangishila mu nzubu. Misangu bu ibidi, bampulushi bakalua ku nzubu utuvua tuenzela bisangilu batuebeja tshituvua tuenza. Patuvua babatijibue meme ne Mairambubu mu ngondo wa 7/1982 mu musulu wa Chüy, bivua bikengela tuikale badimuke. (Mat. 10:16) Bana betu bavua balua ku ndambu ku ndambu bua kudisangisha muitu. Tuakimba musambu wa Bukalenge, pashishe tuetu kuteleja muyuki wa batismo.

TUAKALABAJA MUDIMU WETU

Mu 1987, muanetu mukuabu wakandomba bua tuye kutangila muntu uvua muleje dijinga dia kumanya bulelela uvua musombele mu tshimenga tshia Balykchi. Bua kufikamu tuvua tuenza luendu lua mêba anayi mu kawulu. Tuetu bamane kuenza ngendu misangu ndambu mu tshimenga atshi bua kuyisha, tuakamona ne: bantu ba bungi bavua dijinga ne kumanya bulelela. Bualu ebu buvua bushuwa mpunga wa kualabaja mudimu wetu.

Meme ne Mairambubu tuvua tuya mu Balykchi bikole. Tuvua tutamba kushalamu mu Disambombo ne mu Dia lumingu bua kuyisha ne kuenza bisangilu. Bungi bua mikanda yetu ivua bantu balomba buakavula bikole. Tuvua tumbuka ne mikanda mu Tokmok bayele mu mufuku wa kuambuila bilunga udibu babikila ne: mishok. Mifuku ibidi miwule tente ne mikanda ku ngondo kayivua anu ikumbaja menemene malomba a bantu to. Nansha patuvua mu kawulu tuya mu Balykchi anyi tufuminamu, tuvua tuyisha bantu batuvua tuenza nabu luendu.

Mu 1995, bakenza tshisumbu mu Balykchi bidimu muanda mukulu panyima pa diya dietu dia kumpala mu tshimenga etshi. Kuenza ngendu bidimu bionso ebi bua kumbuka mu Tokmok kuya mu Balykchi, kuakatutudisha makuta a bungi. Katuvua ne makuta a bungi to, kadi mmunyi mutuakakumbaja bualu ebu? Muanetu wa balume mukuabu uvua utukumbajila makuta atuvua tupangila. Yehowa wakamona dijinga dituvua nadi dia kualabaja mudimu wetu, yeye kutukanguila “biibi bia mu diulu.” (Mal. 3:10) Bushuwa Yehowa udi mua kuenza malu onso!

BIA BUNGI BIA KUENZA BUA DÎKU NE MUDIMU WA BUAMBI

Mu 1992, bakanteka mukulu, meme kulua mukulu wa kumpala muena Kirghizistan bua ditunga dijima. Mu tshisumbu tshietu tshia mu Tokmok muakamueneka mpunga mipiamipia ya kuenza mudimu. Tuvua tulonga Bible ne bansonga ba bungi bena Kirghizistan ku tulasa tuabu. Umue wa kudibu ukadi lelu wenza mudimu mu Komite wa Betele, ne babidi mbampanda-njila ba pa buabu. Tuvua kabidi tudienzeja bua kuambuluisha bakuabu mu bisangilu. Ku ntuadijilu kua bidimu bia 1990, mikanda yetu ivua mu muakulu wa tshiena Russie utuvua kabidi tuenzela bisangilu. Kadi bantu ba bungi mu tshisumbu bavua bakula tshiena Kirghizistan, muakulu wabu wa ku dibele. Nunku mvua nkudimuna midimu mu bisangilu bua kubambuluisha bua bumvue bulelela ne lukasa.

Meme ne mukajanyi ne bana betu balela muanda mukulu mu 1989

Meme ne Mairambubu tuvua kabidi tuenza mudimu mukole bua kukolesha bana betu balela. Tuvua tuya nabu mu buambi ne mu bisangilu. Muanetu wa bakaji Gulsayra uvua ne bidimu 12 tshikondo atshi, uvua musue kuyukila malu a mu Bible ne bapitshi ba  njila. Bana betu bavua basue kukuata mvese ya mu Bible ku muoyo. Ke bua tshinyi bobu, ne pashishe bikulu betu, bavua baditue ne kasuki mu midimu ya tshisumbu. Mu bana betu balela 9 ne mu bikulu betu 11 batshidi ne muoyo, bantu 16 badi benzela Yehowa mudimu anyi babuela mu bisangilu ne baledi babu.

DISHINTULUKA DIA DIKEMA

Bana betu ba balume ne ba bakaji batudi banange bikole bavua batuadije mudimu wa Yehowa mu tshitupa tshietu mu bidimu bia 1950 badi mua kukema bikole bua kumona mudi malu mashintuluke. Tshilejilu, kutuadijila mu bidimu bia 1990, tudi ne budikadidi bua kuyisha lumu luimpe ne kudisangisha ba bungi pamue.

Meme ne mukajanyi mu buambi

Mu 1991, meme ne mukajanyi tuakabuela mu mpungilu wetu wa kumpala mu tshimenga tshia Alma-Ata tshidibu babikila lelu ne: Almaty, mu ditunga dia Kazakhstan. Mu 1993, bena Kristo netu ba mu Kirghizistan bakenza mpungilu mu tshipalu tshia ndundu tshia Spartak mu tshimenga tshia Bichkek bua musangu wa kumpala. Bamanyishi ba lumu luimpe bakasukula tshipalu atshi mu lumingu lujima kumpala kua mpungilu. Biakakemesha mutangidi wa tshipalu etshi bikole, ke yeye kutuanyishila bua kuenzelamu mpungilu katuyi bafute kantu.

Mu 1994, kuakenzeka bualu bukuabu bua dikema: tuakapeta umue wa ku mikanda yetu mu tshiena Kirghizistan bua musangu wa kumpala. Kasumbu ka bakudimunyi kadi ku Betele mu Bichkek kadi lelu kakudimuna pa tshibidilu mikanda yetu mu tshiena Kirghizistan. Bushuwa, mu 1998, mbulamatadi wa mu Kirghizistan wakanyishila Bantemu bua benze mudimu wabu. Bulongolodi mbutante, ne bungi bua bamanyishi budi mpindieu bupite pa 5000. Lelu, tudi ne bisumbu 83 ne tusumbu 25 mu tshiena Chine, mu Anglais, mu tshiena Kirghizistan, mu tshiena Russie, mu muakulu wa tumama wa tshiena Russie, mu tshiena Turquie, mu tshiena Ouïgour, ne mu tshiena Ouzbékistan. Bana betu bonso ba balume ne ba bakaji batudi banange bikole ba miaba mishilangane aba badi benzela Yehowa mudimu mu buobumue. Yehowa mmuenze bua malu a dikema onso aa enzeke.

Yehowa mmushintulule kabidi nsombelu wanyi. Mvua mukolele mu dîku dia babidime betu ba tshianana aba ne mvua mulonge anu bidimu bitanu bia tulasa. Kadi Yehowa uvua munteke mukulu ne muenze nanyi mudimu bua kulongesha bantu bavua balonge tulasa tua bungi malongesha a mushinga mukole a mu Bible. Eyowa, Yehowa utu wenza bua malu adi kayi mua kuenzeka enzeke. Malu onso andi mudimuenene aa adi ansaka bua kutungunuka ne kujadikila bantu bakuabu malu a Yehowa ne lulamatu luonso, bualu ku diambuluisha diende “malu onso adi mua kuenzeka.”—Mat. 19:26.

^ tshik. 21 Mupatula kudi Bantemu ba Yehowa kadi kabatshiena bawupatula kabidi to.