Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

Disanka nngikadilu udi Nzambi utupesha

Disanka nngikadilu udi Nzambi utupesha

PA TSHIBIDILU, bantu batu basue kuikala ne nsombelu wa disanka. Kadi mutudi mu matuku a ku nshikidilu, muntu yonso udi utuilangana ne ntatu idi ‘mikole mua kupita nayi.’ (2 Tim. 3:1) Kansungansunga, masama, bulofua, dibungama, anyi malu makuabu adi akebesha ntatu ne tunyinganyinga adi mua kufikisha bamue ku dijimija disanka diabu ku kakese ku kakese. Nansha batendeledi ba Nzambi badi pabu mua kuteketa mu mikolo ne kujimija disanka diabu. Biwikala mujimije disanka diebe, mmunyi muudi mua kudipetulula?

Bua kuandamuna lukonko elu, tudi ne bua kuanji kujingulula tshidi disanka dilelela ne muvua bakuabu balame disanka diabu nansha pavuabu mu ntatu. Pashishe netumone tshia kuenza bua kulama disanka dietu ne kudivudija.

DISANKA NTSHINYI?

Katuena ne bua kubuejakaja dikala ne disanka ne dikala ne masankasanka anyi musanguluke to. Tshilejilu: Muntu yeye munue maluvu a bungi mukuatshike, udi mua kutuadija kusekeshangana tshianana tshianana. Kadi padiwu amutenduka, tuseku tudi tukama, pamuapa upingana ku nsombelu wende wa konso eku wa ntatu ne tunyinganyinga. Ditunka dia tshitupa tshîpi divuaye utunka kadivua disanka dilelela to.—Nsu. 14:13.

Kadi disanka diodi nngikadilu udi mu muoyo menemene wa muntu. Badi bumvuija ne: disanka “nnyanji idi muntu umvua padiye upeta bualu buimpe anyi ubutekemena.” Kuikala ne disanka nkuikala ne diakalengele anyi musangelu udi kawuyi ujika nansha tuetu mu nsombelu muimpe anyi mubi. (1 Tes. 1:6) Mu kuamba kuimpe, muntu udi mua kuikala ne bualu bumutonde kadi muikale anu ne disanka mu muoyo. Tshilejilu, bakela bapostolo mfimbu bualu bavua bakula bua Kristo. Nansha nanku, “bakumbuka ku Tshilumbuluidi tshinene benda basanka bualu bavua babadibue bu bantu bakumbane kufuishibua bundu bua dîna diende.” (Bien. 5:41) Mu bulelela, kabavua basanka bua mfimbu ivuabu babele to. Kadi bu muvuabu bena mudimu ba Nzambi, bavua ne disanka bua muvuabu bashale anu bamulamate.

Katuena baledibue ne disanka dia buena edi to; ne kaditu didiluila to. Bua tshinyi? Bualu disanka dilelela ntshitupa tshia dimuma dia nyuma muimpe wa Nzambi. Ku diambuluisha dia nyuma wa Nzambi, tudi mua kupeta “bumuntu bupiabupia,” kupeta too ne disanka didi mu bumuntu ebu. (Ef. 4:24; Gal. 5:22) Patudi tupeta disanka edi, tudi tukumbana menemene bua kupita ne ntatu ya mu nsombelu.

BILEJILU BITUDI BASUE KUIDIKIJA

Yehowa uvua musue bua pa buloba pikale anu malu mimpe, ki mmalu mabi atudi tutamba kumonapu lelu to. Nansha nanku, malu mabi adi bakuabu benza kaena amujimijila disanka to. Dîyi dia Nzambi didi diamba ne: “Bukole ne disanka bidi mu muaba wende wa kusombela.” (1 Kul. 16:27) Kabidi, malu mimpe adi bena mudimu bende benza adi ‘asankisha muoyo wende.’—Nsu. 27:11.

Tudi mua kuidikija Yehowa patudi katuyi tutamba kunyingalala padi malu kaayi enda mutuvua bele meji to. Pamutu pa kujimija disanka dietu, tudi mua kuimanyina pa malu mimpe atudi nawu mpindieu ne kushala bindile ne lutulu  luonso malu malenga atuapeta kumpala eku. *

Tudi kabidi mua kupeta bilejilu bia bungi bia bantu bavua balame disanka diabu mu nsombelu ya ntatu. Abalahama wakananukila mu nsombelu ya njiwu ya lufu ne mu ntatu ivua bantu bakuabu bamukebele. (Gen. 12:10-20; 14:8-16; 16:4, 5; 20:1-18; 21:8, 9) Nansha muvua ntatu eyi mikuate Abalahama, wakalama disanka mu muoyo wende. Tshivua tshimuambuluishe bua kuenza nanku ntshinyi? Uvua mulame bimpe mu lungenyi luende ditekemena dia kuikala ne muoyo mu bulongolodi bupiabupia mu bukokeshi bua Masiya. (Gen. 22:15-18; Eb. 11:10) Yezu wakamba ne: “Abalahama tatuenu wakasanka bikole bua ditekemena dia kumona dituku dianyi.” (Yone 8:56) Tudi mua kuidikija Abalahama patudi tuelangana meji a masanka adi kumpala kuetu.—Lomo 8:21.

Anu bu Abalahama, mupostolo Paulo ne muena diende Sila bavua batume meji abu ku milayi ya Nzambi. Bavua ne ditabuja dikole, ne bakalama disanka diabu nansha muvuabu babakengesha. Tshilejilu, bobu bamane kubatuta bikole ne babele mu buloko, “mundankulu, Paulo ne Sila bavua basambila ne batumbisha Nzambi ne misambu.” (Bien. 16:23-25) Bavua bapetela bukole mu ditekemena diabu. Bavua kabidi ne disanka bualu bavua bakenga bua dîna dia Kristo. Tudi mua kubidikija patudi tulama mu meji malu mimpe adi afumina ku dienzela Nzambi mudimu ne lulamatu.—Filip. 1:12-14.

Lelu, tudi ne bilejilu bimpe bia bungi bia bana betu ba pa buloba bujima bavua balame disanka diabu mu ntatu. Tshilejilu, mu ngondo wa 11/2013, tshipepele tshikole tshia Haiyan tshivua tshitute mu tshitupa tshia munkatshi mua ditunga dia Philippines, kupulatshi nzubu ya mêku a Bantemu mapite pa 1000. George uvua tshipepele tshikombe nzubu wende mu tshimenga tshia Tacloban wakamba ne: “Bana betu badi anu ne disanka nansha muvua malu menzeke nanku. Mbinkolele bua kumvuija disanka ditudi nadi.” Musangu wonso udi ntatu mikole itutulukila, netulame disanka dietu tuetu tuelangana meji ne dianyisha dionso bua malu adi Yehowa mutuenzele. Mbualu kayi bukuabu budi Yehowa muenze butudi ne bua kusankila?

MALU ATUDI TUSANKILA

Mbualu kayi bukuabu bunene butudi mua kusankila kupita malanda etu ne Nzambi! Anji elabi meji, tudi bamanye Mukalenge mutambe bunene wa diulu ne buloba. Yeye udi Tatu wetu, Nzambi wetu, ne Mulunda wetu!—Mis. 71:17, 18.

Tudi kabidi tuangata ne mushinga dipa dia muoyo ne bukokeshi buetu bua kusanka bua mutudi nawu. (Muam. 3:12, 13) Bu mutudi bifukibua bia lungenyi ne meji bidi Yehowa mukoke kudiye, tudi tujingulula disua dia Nzambi buetu. (Kolos. 1:9, 10) Nunku tudi bamanye bua tshinyi tudi ne muoyo, ne tudi ne nsombelu wa nsongo. Kadi bantu ba bungi ki mbamanye bua tshinyi badi ne muoyo to. Paulo wakaleja dishilangana edi pakafundaye ne: “‘Dîsu ki ndimone ne ditshi ki ndiumvue, anyi malu adi Nzambi mulongoluele bantu badi bamunange kaavua mabuele mu muoyo wa muntu.’ Bualu tuetu ke badi Nzambi muabuluile ku diambuluisha dia nyuma wende.” (1 Kol. 2:9, 10) Katuenaku tusanka bualu tudi bajingulule disua dia Yehowa ne malu adiye mulongolole bua kuenza anyi?

Tangila bualu bukuabu budi Yehowa muenzele bantu bende. Kabienaku bitusankisha bua mudiye mua kutubuikidila mpekatu yetu anyi? (1 Yone 2:12) Bua luse lua Nzambi, tudi ne ditekemena dilelela dia ne: bulongolodi bupiabupia nebutuadije mu katupa kîpi emu. (Lomo 12:12) Nansha lelu, Yehowa udi utupesha bantu bimpe batudi tumutendelela nabu. (Mis. 133:1) Dîyi dia Nzambi didi kabidi ditujadikila ne: Yehowa udi ulama bantu bende kudi Satana ne bademon bende. (Mis. 91:11) Tuetu belangane meji a mabenesha a kudi Nzambi onso aa, disanka dietu nedivule bikole.—Filip. 4:4.

MUUDI MUA KUVUDIJA DISANKA DIEBE

Muena Kristo ukadi ne disanka udiku mua kudivudija anyi? Yezu wakamba ne: “Ndi  munuambile malu aa bua disanka dianyi dikale munda muenu ne bua disanka dienu diuwujibue tente.” (Yone 15:11) Mêyi aa kaenaku aleja ne: tudi mua kuvudija disanka dietu anyi? Udi mua kufuanyikija didienzeja diebe bua kuvudija disanka diebe ne disonsola dia kapia. Udi ne bua kusakidila makala anyi nkunyi bua kapia kutemaku bikole. Bia muomumue, udi ne bua kudidisha mu nyuma bua kuvudija disanka diebe. Vuluka ne: nyuma wa Nzambi udi ukuambuluisha bua kuikala ne disanka. Nanku, udi uvudija disanka diebe paudi ne tshibidilu tshia kulomba diambuluisha dia nyuma wa Yehowa mu disambila ne welangana meji a Dîyi diende difundisha ku nyuma.—Mis. 1:1, 2; Luka 11:13.

Udi uvudija kabidi disanka diebe paudi wenza midimu idi isankisha Yehowa ne tshisumi. (Mis. 35:27; 112:1) Bua tshinyi? Bualu tuvua bafukibue bua ‘kutshina Nzambi mulelela ne kutumikila mikenji yende, bualu, ebu ke bualu buonso budi muntu ne bua kuenza.’ (Muam. 12:13) Mu mêyi makuabu, tuvua bafukibue bua kuenza disua dia Nzambi. Nanku, patudi tuenzela Yehowa mudimu, tudi tupeta disanka dia menemene mu nsombelu wetu. *

MALU MIMPE ADI DISANKA DITUPETESHA

Patudi tuvudija disanka dia buena dia Nzambi, netupete malu mimpe kupita mutudi tudiumvua patupu munda muetu. Tshilejilu, netusankishe Tatu wetu wa mu diulu bikole patudi tumuenzela mudimu ne disanka nansha bapete bualu bua mushindu kayi. (Dut. 16:15; 1 Tes. 5:16-18) Kabidi, bua disanka dilelela ditudi nadi, netubenge nsombelu wa dinanga bintu bia ku mubidi, kadi netudipangishe malu a bungi bua Bukalenge bua Nzambi. (Mat. 13:44) Patudi tumona malu mimpe adi afumina ku dienza nanku, disanka dietu nedivule, netudiumvue bimpe menemene, ne netuvudijile bakuabu disanka.—Bien. 20:35; Filip. 1:3-5.

Mukebuludi mukuabu wa mu iniversite wa Nebraska mu États-Unis wakafunda panyima pa yeye mumane kukonkonona malu a bungi adi atangila makanda a mubidi, wamba ne: “Wewe muikale ne diakalengele ne usanka bua tshiudi mpindieu, mbipepele bua wewe kuikala ne makanda a mubidi mimpe mu matuku adi alua.” Bualu ebu budi bupetangana ne tshidi Bible wamba tshia ne: “Muoyo wa disanka udi buanga buimpe.” (Nsu. 17:22) Eyowa, paudi uvudija disanka diebe, mbipepele bua wewe kuikala ne makanda a mubidi mimpe.

Nunku, nansha mutudi mu tshikondo tshia ntatu ya bungi, tudi mua kuikala ne disanka dilelela didi dinenga patudi tupeta nyuma muimpe ku diambuluisha dia disambila, didilongela, ne dielangana meji a Dîyi dia Yehowa. Tudi tuvudija kabidi disanka dietu patudi tuelangana meji a mabenesha atudi tupeta lelu, tuidikija ditabuja dia bakuabu, ne tudienzeja bua kuenza disua dia Nzambi. Nanku, tudi petu tudiumvua anu bu muimbi wa misambu wakamba mu Misambu 64:10 ne: “Muntu muakane neasankile mu Yehowa ne neanyemene kudiye.”

^ tshik. 10 Netuakule bua ngikadilu wa lutulu mu tshiena-bualu tshikuabu tshia mu biena-bualu bidi biakula bua “dimuma dia nyuma.”

^ tshik. 20 Bua kumanya mishindu mikuabu ya kuvudija disanka diebe, tangila kazubu ka “ Mishindu mikuabu ya wewe kuvudija disanka diebe.”