Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2016

Leja muudi ne lulamatu kudi Yehowa

Leja muudi ne lulamatu kudi Yehowa

‘Yehowa neikale pankatshi petu nebe ne pankatshi pa bana bebe ne bana banyi tshiendelele.’—1 SAMUELE 20:42.

MISAMBU: 125, 62

1, 2. Bua tshinyi bulunda bua Yonatana ne Davidi budi tshilejilu tshimpe tshia lulamatu?

DIKIMA divua nadi Davidi divua ne bua kuikala dikemeshe Yonatana bikole. Davidi wakashipa Goleyata, muntu wa mpolondo ne kutuadilaye Shaula, mukalenge wa Isalele, tatuende wa Yonatana “mutu wa muena Peleshete.” (1 Samuele 17:57) Yonatana uvua mutuishibue ne: Nzambi uvua ne Davidi, ne katshia ku dîba adi, Yonatana ne Davidi bakalua balunda banene ba pa muoyo. Bavua balayangane ne: bavua ne bua kulamatangana misangu yonso. (1 Samuele 18:1-3) Yonatana uvua ne lulamatu kudi Davidi matuku ende onso a muoyo.

2 Yonatana wakashala ne lulamatu kudi Davidi nansha muvua Yehowa musungule Davidi bua kulua mukalenge wa Isalele pamutu pa Yonatana. Pavua Shaula ukeba kushipa Davidi, Yonatana wakumvua bibi bua mulunda wende. Yonatana uvua mumanye ne: Davidi uvua mu tshipela ku Holesha, nunku wakaya kumukolesha bua atungunuke ne kueyemena Yehowa. Yonatana wakambila  Davidi ne: ‘Kutshinyi, bualu bua tshianza tshia Shaula, tatuanyi, katshiena tshikusangana; wewe newikale mukalenge wa Isalele, ne meme nengikale muibidi nebe.’—1 Samuele 23:16, 17.

3. a) Ntshinyi tshivua Yonatana wangata ne mushinga wa bungi kupita lulamatu luende kudi Davidi? b) Ntshinyi tshidi tshitujadikila bualu ebu? (Tangila tshimfuanyi tshia ntuadijilu tshia tshiena-bualu.)

3 Pa tshibidilu tutu tuanyisha bantu batu ne lulamatu. Kadi, tudiku tuanyisha Yonatana anu bualu uvua muleje lulamatu kudi Davidi anyi? Tòo, kuikala ne lulamatu kudi Nzambi kuvua ne mushinga wa bungi mu nsombelu wa Yonatana. Bushuwa, bualu ebu ke buvua bumusake bua kuikala ne lulamatu kudi Davidi ne kubenga kumumvuila mukawu nansha muvua Davidi ne bua kulua mukalenge pa muaba wende. Yonatana uvua kabidi muambuluishe Davidi bua kueyemena Yehowa. Bubidi buabu bakalejangana lulamatu ne kushalabu balamate Yehowa. Bakalamata ku mutshipu wabu wa ne: ‘Yehowa neikale pankatshi petu nebe ne pankatshi pa bana bebe ne bana banyi tshiendelele.’—1 Samuele 20:42.

4. a) Ntshinyi tshiatuambuluisha bua kuikala ne disanka ne kudiumvua bimpe? b) Ntshinyi tshituamona mu tshiena-bualu etshi?

4 Tuetu petu tudi ne bua kuikala ne lulamatu kudi bena mu dîku dietu, balunda betu ne bana betu ba balume ne ba bakaji mu tshisumbu. (1 Tesalonike 2:10, 11) Kadi tshidi ne mushinga wa bungi menemene kupita bionso nkuikala ne lulamatu kudi Yehowa. Yeye ke udi mutupeshe muoyo. (Buakabuluibua 4:11) Patudi ne lulamatu kudiye, tudi bushuwa tupeta disanka ne tudiumvua bimpe. Kadi tudi bamanye ne: tudi ne bua kuikala ne lulamatu kudi Nzambi nansha mu bikondo bikole. Mu tshiena-bualu etshi, netumone mudi tshilejilu tshia Yonatana mua kutuambuluisha bua kushala ne lulamatu kudi Yehowa mu nsombelu inayi eyi: 1) patudi tumona ne: muntu udi ne bukokeshi kena ukumbana bua tuetu kumunemeka, 2) padibi bikengela kusungula utudi ne bua kulamata, 3) padi muanetu wa balume udi ulombola utumvua bibi anyi utuenzela malu mu mushindu mubi, ne 4) patudi tumona ne: mbikole bua kukumbaja tshituvua balaye.

PATUDI TUMONA NE: MUNTU UDI NE BUKOKESHI KENA UKUMBANA BUA TUETU KUMUNEMEKA

5. Bua tshinyi bivua bikole bua bena Isalele kushalabu ne lulamatu kudi Nzambi pavua Shaula mukalenge?

5 Yonatana ne bena Isalele bavua mu nsombelu mukole. Mukalenge Shaula, tatuende wa Yonatana katshivua utumikila Yehowa to, ne Yehowa wakamubenga. (1 Samuele 15:17-23) Nansha nanku, Nzambi wakalekela Shaula utungunuka ne kulombola munkatshi mua bidimu bia bungi. Nunku, bivua bikole bua bantu kushala ne lulamatu kudi Nzambi bu muvua mukalenge uvuabu basungule bua kusomba mu “nkuasa wa Yehowa” wenza malu mabi menemene.—1 Kulondolola 29:23.

6. Ntshinyi tshidi tshileja ne: Yonatana uvua mushale ne lulamatu kudi Yehowa?

6 Yonatana wakashala ne lulamatu kudi Yehowa. Elabi meji bua tshivua Yonatana muenze matuku makese pavua Shaula mutuadije kubenga kutumikila Nzambi. (1 Samuele 13:13, 14) Tshikondo atshi, tshiluilu tshinene tshia bena Peleshete tshiakalua ne makalu a mvita 30000 bua kubunda Isalele. Shaula uvua ne basalayi 600 tshianana, anu yeye ne Yonatana ke bavua ne bia mvita. Kadi Yonatana kavua mumvue buôwa to. Wakavuluka mêyi a muprofete Samuele aa: ‘Yehowa kena ulekela bantu bende bualu bua dîna diende dinene.’ (1 Samuele 12:22) Yonatana wakambila musalayi mukuabu ne: “Kakuena mukandu kudi  Yehowa bua kusungila bantu kudi ba bungi anyi kudi bakese.” Nunku, yeye ne musalayi au bakaluangana ne tshisumbu tshia bena Peleshete ne kushipabu bantu batue ku 20 ba kudibu. Yonatana uvua ne ditabuja kudi Yehowa, ne Yehowa wakamubenesha. Yehowa wakazakeja buloba ne bena Peleshete kumvuabu buôwa. Pashishe bena Peleshete bakaluishangana ne kushipanganabu bobu nkayabu, ne bena Isalele bakatshimuna mvita eyi.—1 Samuele 13:5, 15, 22; 14:1, 2, 6, 14, 15, 20.

7. Mmunyi muvua Yonatana wenzela tatuende malu?

7 Nansha muvua Shaula mutungunuke ne kubenga kutumikila Yehowa, Yonatana uvua anu utumikila tatuende pavuaku mushindu. Tshilejilu, bakaluangana bua kusungila bantu ba Yehowa.—1 Samuele 31:1, 2.

8, 9. Mmunyi mutudi tuleja lulamatu kudi Nzambi patudi tunemeka bantu badi ne bukokeshi?

8 Anu bu Yonatana, tudi mua kuleja lulamatu kudi Yehowa patudi tutumikila mbulamatadi wa mu ditunga ditudi padiku mushindu. Yehowa mmulekele “bakokeshi badi ku mutu” bua batukokeshe, ne udi utulomba bua tubanemeke. (Bala Lomo 13:1, 2.) Ke bualu kayi tudi ne bua kuenzela mbena mbulamatadi malu ne kanemu nansha padibu kabayi bamba bulelela anyi patudi tumona ne: kabena bakumbana bua tuetu kubanemeka. Nunku, tudi ne bua kunemeka bantu bonso badi Yehowa mupeshe bukokeshi.—1 Kolinto 11:3; Ebelu 13:17.

Umue mushindu utudi tushala ne lulamatu kudi Yehowa mpatudi tuenzela muena dibaka netu malu ne kanemu nansha yeye kayi mutendeledi wa Yehowa (Tangila tshikoso tshia 9)

9 Olga, muanetu wa bakaji wa mu Amerike wa ku Sud wakaleja lulamatu luende kudi Yehowa pavuaye unemeka bayende nansha muvuaye  umuenzela malu mabi. [1] (Tangila note.) Bayende uvua imue misangu ubenga kumuakuisha anyi umuamba mêyi mabi bualu uvua Ntemu wa Yehowa. Uvua mene umuambila ne: uvua ne bua kumushiya nkayende ne kuangata bana kuya nabu. Kadi Olga ‘kavua upingaja bubi ku bubi’ to. Uvua wenza muende muonso bua kuikala mukaji muimpe. Uvua umulambila biakudia, umusukuila bilamba, ne utabalela balela bakuabu ba bayende. (Lomo 12:17) Pavuaku mushindu, uvua uya kumufila pavuaye uya kutangila bena mu dîku diabu ne balunda bende. Tshilejilu, pavua bayende ujinga kuya ku madilu a tatuende mu tshimenga tshikuabu, Olga wakalongolola bintu bionso bivuabu nabi dijinga bua luendu. Pashishe, pavuabu ne tshitalu mu tshitanda tshia Nzambi, yeye uvua mushale muindile bayende pambelu. Bidimu bia bungi pashishe, bayende wa Olga wakatuadija kumuenzela malu mimpe bualu Olga uvua nende lutulu, ne uvua misangu yonso umunemeka. Mpindieu bayende utu umukankamija bua kuya mu bisangilu, ne utu uya kumushiyamu. Utu mene ubuela mu bisangilu pamue ne mukajende imue misangu.—1 Petelo 3:1.

PADIBI BIKENGELA KUSUNGULA MUNTU UTUDI NE BUA KULAMATA

10. Ntshinyi tshivua tshiambuluishe Yonatana bua kumanya muntu uvuaye ne bua kulamata?

10 Pavua Shaula muambe ne: udi ushipa Davidi, Yonatana wakadimona kumpala kua dipangadika dikole dia kuangata. Uvua musue kuikala ne lulamatu kudi tatuende, kadi uvua kabidi musue kuikala ne lulamatu kudi Davidi. Yonatana uvua mumanye ne: Nzambi kavua ne Shaula to, kadi uvua ne Davidi, nunku wakasungula bua kulamata Davidi. Wakadimuija Davidi bua kusokoma, pashishe kulejaye Shaula bua tshinyi uvua ne bua kulekela Davidi ne muoyo.—Bala 1 Samuele 19:1-6.

11, 12. Mmunyi mudi dinanga ditudi nadi bua Yehowa dituambuluisha bua kuangata dipagadika dia kumulamata?

11 Alice, muanetu wa bakaji wa mu Australie uvua ne bua kusungula muntu uvuaye ne bua kulamata. Pavuaye ulonga Bible, uvua wambila bena mu dîku diabu malu avuaye ulonga. Wakabambila kabidi ne: kavua ne bua kusekelela nabu Nowele to, ne kubumvuijaye bua tshinyi uvua muangate dipangadika adi. Ku ntuadijilu, bena mu dîku diabu bavua bakadiumvua bedibue mâyi ku makasa, kadi pashishe bakamukuatshila tshiji tshikole menemene. Bakamona ne: Alice kavua mua kubatabalela to. Pashishe mamuende wakamba ne: kavua musue kumona kabidi Alice to. Alice wakamba ne: “Biakantonda bikole ne kunsama ku muoyo bikole bualu mvua munange dîku dietu bikole. Nansha nanku, ngakangata dipangadika dia kuteka Yehowa ne Muanende pa muaba wa kumpala mu muoyo wanyi, ne ngakatambula mu mpuilu wakalonda.”—Matayi 10:37.

12 Lulamatu lutudi nalu kudi Yehowa ludi ne bua kuikala ne mushinga wa bungi kupita mutudi balamate tshintu kayi tshionso bu mudi: tshisumbu tshia malu a manaya, tshilongelu anyi ditunga. Tshilejilu, Henry uvua munange kanaya dinaya kampanda didi bu dia dame (Jeux d’échecs) ne bena mu tshilongelu tshiabu ne uvua musue kupatuka wa kumpala. Bu muvuaye unaya dinaya edi ku ndekelu kua lumingu luonso, kavua ne dîba dia kuyisha anyi kubuela mu bisangilu to. Wakamba ne: Dinaya edi divua dilue ne mushinga wa bungi kudiye kupita muvuaye mulamate Nzambi. Nunku wakangata dipangadika dia kulekela kunaya dinaya edi mu tshilongelu tshiabu.—Matayi 6:33.

13. Mmunyi mudi lulamatu kudi Nzambi lutuambuluisha bua kupita bimpe ne bilumbu bia bena mu mêku etu?

13 Imue misangu bidi mua kutukolela bua  kuleja lulamatu kudi bena mu dîku dietu bashilangane musangu umue. Tshilejilu, Ken udi wamba ne: “Pa tshibidilu mvua musue kuya kutangila mamuanyi ukavua mukulakaje, ne mvua imue misangu mmubikidisha bua kulua kusomba netu. Kadi mamuanyi ne mukajanyi kabavua bapetangana bimpe to.” Udi utungununka wamba ne: “Tshivua mua kusankisha umue tshiyi mubungamije mukuabu to.” Ken wakela meji bua tshidi Bible wamba, ne kumonaye ne: mu nsombelu eu, uvua ne bua kusankisha mukajende ne kushala mumulamate. Nunku, wakangata dipangadika divua disankishe mukajende. Pashishe wakamumvuija bua tshinyi uvua ne bua kuikala bimpe ne mamuende. Wakumvuija kabidi mamuende bua tshinyi uvua ne bua kunemeka mukajende.—Bala Genese 2:24; 1 Kolinto 13:4, 5.

PADI MUANETU WA BALUME UTUMVUA BIBI ANYI UTUENZELA MALU MU MUSHINDU MUBI

14. Mmunyi muvua Shaula muenzele Yonatana malu mu mushindu mubi?

14 Tudi kabidi mua kuleja lulamatu luetu kudi Yehowa padi muanetu wa balume udi ulombola utuenzela malu mu mushindu mubi. Nzambi uvua musungule mukalenge Shaula, kadi mukalenge eu uvua wenzela muanende malu mu mushindu mubi. Kavua mumvue bua tshinyi Yonatana uvua munange Davidi to. Nunku pavua Yonatana mukebe kuambuluisha Davidi, Shaula wakafika munda bikole, ne wakafuisha muanende bundu kumpala kua bantu ba bungi. Kadi Yonatana wakatungunuka anu ne kunemeka tatuende. Uvua kabidi mushale ne lulamatu kudi Yehowa ne kudi Davidi uvua  Nzambi musungule bua kulua mukalenge wa Isalele.—1 Samuele 20:30-41.

15. Muanetu wa balume udi ulombola yeye mutuenzele malu mu mushindu mubi, ntshinyi tshitudi ne bua kuenza?

15 Mu bisumbu bietu lelu, bana betu ba balume badi balombola batu badienzeja bua kuenzela muntu yonso malu mu mushindu muimpe. Kadi bana betu aba mbapange bupuangane. Ke bualu kayi, bidi mua kuenzeka bua kabafiki ku diumvua tshitudi benzele bualu kampanda. (1 Samuele 1:13-17) Nunku, bobu bakose tshilumbu tshietu bibi anyi batumvue bibi, tushalayi balamate anu Yehowa.

PADIBI BIKOLE MENEMENE BUA TUETU KUKUMBAJA TSHITUVUA BALAYE

16. Mmu nsombelu kayi mutudi mua kuleja lulamatu kudi Nzambi ne kubenga kuikala badinangi?

16 Shaula uvua musue bua Yonatana alue mukalenge pamutu pa Davidi. (1 Samuele 20:31) Kadi Yonatana uvua munange Yehowa, ne uvua ne lulamatu kudiye. Nunku, pamutu pa Yonatana kumvuilaye Davidi mukawu, wakalua mulunda wende ne kukumbaja tshivuaye mumulaye. Bulelela, muntu yonso udi munange Yehowa ne mumulamate, ‘kena upingana tshianyima bua malu adiye mulaye, nansha padiwu amubipila.’ (Musambu 15:4, NWT) Bu mutudi ne lulamatu kudi Nzambi, netukumbaje malu atudi balaye. Tshilejilu, tuetu bumvuangane bua kuenza bualu kampanda mu malu a bungenda, netukumbaje tshitudi bumvuangane atshi nansha nsombelu mulue kutukolela. Tuetu ne bilumbu mu dibaka dietu, netuleje mutudi banange Yehowa patudi tushala balamate muena dibaka netu.—Bala Malaki 2:13-16.

Tuetu bumvuangane bua kuenza bualu kampanda mu malu a bungenda, netukumbaje tshitudi bumvuangane bualu tudi ne lulamatu kudi Nzambi (Tangila tshikoso tshia 16)

17. Mmunyi mudi tshiena-bualu etshi tshikuambuluishe?

17 Anu bu Yonatana, tudi basue kuikala ne lulamatu kudi Nzambi nansha mu nsombelu mikole. Nunku, tushalayi ne lulamatu kudi bana betu ba balume ne ba bakaji padibu batuela mâyi ku makasa. Nunku netusankishe mutshima wa Yehowa, ne bualu ebu nebutupeteshe disanka dia bungi. (Nsumuinu 27:11) Netuikale bashindike ne: neatuenzele misangu yonso tshidi tshimpe ne neatutabalele. Mu tshiena-bualu tshialonda, netumone tshitudi mua kulonga kudi bantu ba mu tshikondo tshia Davidi bavua ne lulamatu ne bavua kabayi nalu.

^ [1] (tshikoso tshia 9) Tudi bashintulule amue mêna.