Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2016

Longela malu kudi batendeledi ba Yehowa ba lulamatu

Longela malu kudi batendeledi ba Yehowa ba lulamatu

‘Yehowa udi utekemena malu kayi kuudi? Anu bua wewe kuenza malu makane, kunanga [lulamatu, NWT], ne kuenda ne Nzambi webe ne mutshima mupuekele.’—MIKA 6:8.

MISAMBU: 63, 43

1, 2. Mmunyi muvua Davidi muleje ne: uvua ne lulamatu kudi Nzambi? (Tangila tshimfuanyi tshia ntuadijilu tshia tshiena-bualu.)

SHAULA ne basalayi bende 3000 bavua benda bakeba Davidi mu tshipela tshia Yuda bua kumushipa. Kadi dituku kampanda butuku, Davidi ne bantu bende bakafika muaba uvua Shaula ne basalayi bende batudile. Bonso buabu bavua balale, nunku Davidi ne Abishai bakapita basalayi bitekete bitekete ne kufikabu muaba uvua Shaula. Abishai wakambila Davidi ne dîyi dia panshi panshi ne: ‘Itaba koku mmulamatshishe ne difuma mu buloba anu musangu umue tshianana, kabiakundomba bua kuenza nanku misangu ibidi to.’ Kadi Davidi kavua musue bua Abishai ashipe Shaula to. Wakamuambila ne: ‘Kumuenzedi bibi to, bualu nnganyi udi mua kujula tshianza tshiende bua kuluisha muela manyi wa Yehowa ne kushala kayi ne bualu?’ Pashishe Davidi wakamba ne: ‘Ku mêsu kua Yehowa kabiena mua kuenzeka bua meme kujula tshianza tshianyi bua kuluisha muela manyi wa Yehowa to!’—1 Samuele 26:8-12, NWT.

2 Davidi wakajingulula tshivuaye ne bua kuenza bua kushalaye ne  lulamatu kudi Yehowa. Uvua mumanye ne: uvua ne bua kunemeka Shaula, ne kavua nansha muele meji a kumuenzela bibi to. Bua tshinyi? Bualu Nzambi uvua musungule Shaula bua kuikala mukalenge wa Isalele. Anu bu ku kale, lelu Yehowa mmusue bua batendeledi bende bonso bikale ne lulalamatu kudiye ne banemeke bantu badiye mulekele bua bikale ne bukokeshi.—Bala Mika 6:8.

3. Mmunyi muvua Abishai muleje muvuaye ne lulamatu kudi Davidi?

3 Abishai uvua unemeka Davidi bualu uvua mumanye ne: Nzambi uvua musungule Davidi bua kuikala mukalenge. Kadi Davidi mumane kulua mukalenge wakenza mpekatu minene. Wakenda masandi ne mukaji wa Uliya ne pashishe kuambilaye Yoaba bua enze muende muonso bua bashipe Uliya mu mvita. (2 Samuele 11:2-4, 14, 15; 1 Kulondolola 2:16) Yoaba uvua muanabu ne Abishai, nunku Abishai uvua mua kuikala mumvue lumu lua tshivua Davidi muenze, kadi wakatungunuka ne kunemeka Davidi. Bualu bukuabu, Abishai uvua mulombodi wa basalayi, ne uvua mua kuikala muenze mudimu ne bukokeshi buende ebu bua kuditeka mukalenge, kadi kakenza nanku to. Wakenzela Davidi mudimu ne kumukuba kudi baluishi bende.—2 Samuele 10:10; 20:6; 21:15-17.

4. a) Ntshinyi tshidi tshileja ne: Davidi uvua ne lulamatu kudi Nzambi? b) Mbilejilu kayi bikuabu bituakonkonona?

4 Davidi uvua ne lulamatu kudi Yehowa mu nsombelu wende mujima. Patshivuaye nsonga, wakashipa Goleyata, muntu wa mpolondo uvua upenda Yehowa ne bena Isalele. (1 Samuele 17:23, 26, 48-51) Pavua Davidi mukalenge, Natana muprofete wa Yehowa wakamubela bua mpekatu ivuaye muenze. Diakamue Davidi wakitaba ne: uvua muenze mpekatu ne wakanyingalala. (2 Samuele 12:1-5, 13) Pakakulaja Davidi, wakafila bintu bia bungi bia mushinga mukole bua bibake ntempelo wa Yehowa. (1 Kulondolola 29:1-5) Bidi bimueneka patoke ne: nansha muvua Davidi muenze bilema binene mu nsombelu wende, kavua mulekele kuikala ne lulamatu kudi Nzambi to. (Musambu 51:4, 10; 86:2) Mu tshiena-bualu etshi, netukonkonone tshilejilu tshia Davidi ne bilejilu bia bantu bakuabu ba tshikondo tshiende, ne netulonge mutudi mua kuikala ne lulamatu kudi Yehowa kupita mutudi mua kuikala nalu kudi muntu kayi yonso. Pashishe netuakule bua ngikadilu mikuabu yatuambuluisha bua kuenza nunku.

NEWIKALE NE LULAMATU KUDI YEHOWA ANYI?

5. Ndilongesha kayi ditudi tupeta bua tshilema tshivua Abishai muenze?

5 Pavua Abishai usua kushipa Shaula, uvua musue kuikala ne lulamatu kudi Davidi. Kadi bu muvua Davidi mumanye ne: kabivua bimpe bua kuenzela ‘muela manyi wa Yehowa’ bibi, kavua mulekele Abishai bua ashipe mukalenge to. (1 Samuele 26:8-11) Bualu ebu budi butupesha dilongesha dinene edi: Patudi tujinga kuangata dipangadika dia kusungula muntu utudi ne bua kuanji kuleja lulamatu kumpala, tudi ne bua kuela meji bua mêyi manene a mu Bible adi mua kutuambuluisha mu nsombelu eu.

Bidi ne mushinga wa bungi bua kuikala ne lulamatu kudi Yehowa kupita mutudi nalu kudi muntu kayi yonso

6. Nansha mututu basue kulamata muena mu dîku dietu anyi mulunda wetu, bua tshinyi tudi ne bua kuikala badimuke?

6 Tuetu bonso tutu basue kulamata muntu utudi banange bu mudi mulunda wetu anyi  muena mu dîku dietu. Kadi bu mutudi bantu bapange bupuangane, meji etu adi mua kutushima. (Yelemiya 17:9) Nunku padi muntu utudi banange wenze bualu kampanda bubi anyi ulekela bulelela, tudi ne bua kuvuluka ne: bidi ne mushinga wa bungi bua kuikala ne lulamatu kudi Yehowa kupita mutudi nalu kudi muntu kayi yonso.—Bala Matayi 22:37.

7. Mmunyi muvua muanetu wa bakaji kampanda mushale ne lulamatu kudi Nzambi mu nsombelu mukole?

7 Bobu bipate muena mu dîku dienu mu tshisumbu, udi mua kuleja Yehowa muudi mumulamate. Tshilejilu, dimue dituku, mamuende wa Anne uvuabu bipate mu tshisumbu wakabikila Anne ku telefone bua kumuambila ne: uvua musue kulua kumutangila. [1] (Tangila note ku ndekelu.) Mamuende wa Anne wakamba ne: uvua ne dibungama dia bungi bualu bena mu dîku diende bavua babenge bua kumuakuisha. Bualu ebu buakabungamija Anne, yeye kuambilaye mamuende ne: neamufundile mukanda bua kumuandamuna. Kumpala kua Anne kumufundilaye mukanda, wakelangana meji bua amue mêyi manene a mu Bible. (1 Kolinto 5:11; 2 Yone 9-11) Pashishe wakumvuija mu mukanda wende mu mushindu muimpe ne: mamuende ke uvua mulekele dîku pavuaye muenze mpekatu ne mubenge kunyingalala. Anne wakambila mamuende ne: mushindu umuepele uvuaye mua kupetulula kabidi disanka nkupingana kudi Yehowa.—Yakobo 4:8.

8. Nngikadilu kayi yatuambuluisha bua kuikala ne lulamatu kudi Nzambi?

8 Batendeledi ba Nzambi ba lulamatu ba mu tshikondo tshia Davidi bavua kabidi ne budipueshi, bulenga ne dikima. Tumonayi mudi ngikadilu eyi mua kutuambuluisha bua kuikala ne lulamatu kudi Yehowa.

TUDI NE BUA KUIKALA NE BUDIPUEKESHI

9. Bua tshinyi Abinê uvua ukeba kushipa Davidi?

9 Yonatana, muana wa Shaula ne Abinê, mfumu wa tshiluilu tshia basalayi tshia bena Isalele, bakamona Davidi utuadila mukalenge Shaula mutu wa Goleyata. Yonatana wakalua mulunda wa Davidi ne wakashala ne lulamatu kudiye. (1 Samuele 17:57–18:3) Kadi Abinê yeye kakenza nanku to. Pashishe wakambuluisha mene Shaula uvua musue kushipa Davidi. (1 Samuele 26:1-5; Musambu 54:3) Yonatana ne Abinê bavua bamanye ne: Nzambi uvua musue kuteka Davidi mukalenge mu Isalele. Kadi panyima pa lufu lua Shaula, Abinê kakambuluisha Davidi to. Kadi wakakeba bua kuvuija Ishi-boshete, muana wa Shaula mukalenge. Pashishe, Abinê uvua  mua kuikala musue kuditeka mukalenge, ne pamuapa ke bualu kayi uvua mulale ne umue wa ku bakaji ba mukalenge Shaula. (2 Samuele 2:8-10; 3:6-11) Bua tshinyi Yonatana ne Abinê bavua ne mmuenenu mishilangane bua Davidi? Bualu Yonatana uvua ne lulamatu kudi Yehowa ne uvua ne budipuekeshi kadi Abinê yeye kavua ne ngikadilu eyi to.

10. Bua tshinyi Abashaloma kavua ne lulamatu kudi Nzambi?

10 Abashaloma, muana wa mukalenge Davidi kavua ne lulamatu kudi Nzambi bualu kavua ne budipuekeshi to. Uvua musue kuikala mukalenge, ke bualu kayi ‘wakadilongoluela dikalu ne tubalu ne bantu makumi atanu bua kuyabu kumpala kuende.’ (2 Samuele 15:1) Wakitabijija kabidi bena Isalele ba bungi bua bamulamate. Uvua mene mukebe bua kushipa tatuende nansha muvuaye mumanye ne: Yehowa ke uvua muvuije Davidi mukalenge wa Isalele.—2 Samuele 15:13, 14; 17:1-4.

11. Mmunyi mudi muyuki wa Abinê, Abashaloma ne Baluka utuambuluisha?

11 Muntu yeye kayi ne budipuekeshi ne musue kupeta bukokeshi bua bungi, mbikole bua kushalaye ne lulamatu kudi Nzambi. Bushuwa, tudi banange Yehowa ne katuena basue kuikala ne budinangi ne tshikisu bu Abinê ne Abashaloma to. Kadi tudi ne bua kuikala badimuke bua katutuadiji kujinga bua kupeta makuta a bungi anyi mudimu udi utufikisha ku didiangata ne mushinga wa bungi. Bualu ebu nebunyange malanda etu ne Yehowa. Bua tshikondo kampanda, Baluka mufundi wa muprofete Yelemiya wakajinga tshintu kampanda tshivuaye kayi natshi ne kavua kabidi ne disanka dia kuenzela Nzambi mudimu to. Pashishe Yehowa wakambila Baluka ne: ‘Mona, nensasule tshintu tshingakuasa, nentule tshintu tshingakukuna; nengenze nunku mu buloba bujima. Wewe udi udikebela malu manene anyi? Kudikebediwu nansha.’ (Yelemiya 45:4, 5) Baluka wakateleja Yehowa. Tudi petu ne bua kumuteleja bualu mu katupa kîpi emu neabutule bulongolodi bubi ebu.

Paudi wambila muanenu bua alombe diambuluisha kudi bakulu, udi umuleja bulenga ne uleja muudi ne lulamatu kudi Yehowa

12. Leja bua tshinyi katuena mua kuikala ne lulamatu kudi Nzambi patudi ne budinangi.

12 Daniel muanetu wa balume wa mu ditunga dia Mexique uvua ne bua kuangata dipangadika bua kumanya muntu uvuaye ne bua kulamata. Uvua musue kusela nsongakaji kampanda uvua kayi utendelela Yehowa. Daniel udi wamba ne: “Ngakatungunuka ne kufundila nsongakaji au mikanda too ne panyima pa meme mumane kulua mpanda-njila.” Kadi  pashishe wakajingulula ne: uvua ne budinangi pavuaye wenza tshivuaye yeye musue. Kavua ne lulamatu kudi Yehowa ne uvua dijinga ne budipuekeshi. Nunku wakambila mukulu uvua ne dimonamona dia malu bualu bua nsongakaji au. Daniel udi wamba ne: “Mukulu eu wakangambuluisha bua kumona ne: bua kuikala ne lulamatu kudi Nzambi, mvua ne bua kulekela kufundila nsongakaji au mikanda. Panyima pa meme mumane kusambila misangu ya bungi ne mupuekeshe binsonji, ngakalekela nsongakaji au. Matuku makese pashishe, disanka dianyi bua mudimu wa kuyisha diakavula.” Mpindieu Daniel mmusele mukaji udi munange Yehowa, ne udi wenzela Nzambi mudimu bu mutangidi wa tshijengu.

LULAMATU KUDI NZAMBI LUDI LUTUAMBULUISHA BUA KUIKALA NE BULENGA

Wewe ne tshijadiki tshia ne: mulunda webe mmuenze mpekatu munene, neumuambile ne newenzaku muebe muonso bua apete diambuluisha kudi bakulu anyi? (Tangila tshikoso tshia 14)

13. Mmunyi muvua Natana mushale ne lulamatu kudi Nzambi ne kudi Davidi pavua Davidi muenze mpekatu?

13 Tuetu ne lulamatu kudi Yehowa, tudi mua kulamata kabidi bantu bakuabu ne kubambuluisha mu mushindu mutambe buimpe. Muprofete Natana wakashala ne lulamatu kudi Yehowa ne kudi Davidi kabidi. Davidi mumane kuangata mukaji wa bende ne mushipeshe bayende, Yehowa wakatuma Natana bua kubela Davidi. Natana uvua ne dikima, ne wakatumikila Yehowa. Kadi wakenza kabidi malu ne meji ne kuyukila ne Davidi mu mushindu muimpe. Uvua musue kuambuluisha Davidi bua ajingulule ne: mpekatu yende ivua minene. Nunku, wakamulondela bualu bua muntu mubanji uvua muangate mukoko umuepele wa muntu mupele. Pakumvua Davidi bualu ebu, wakanyingalala bikole bua tshivua muntu mubanji eu muenze. Pashishe Natana wakamuambila ne: “Wewe mene udi muntu eu.” Davidi wakajingulula ne: uvua muenzele Yehowa bibi menemene.—2 Samuele 12:1-7, 13.

14. Mmunyi muudi mua kuikala ne lulamatu kudi Yehowa ne kudi balunda bebe anyi balela bebe?

14 Wewe pebe udi mua kuanji kuikala ne lulamatu kudi Yehowa, ne pashishe kudi bakuabu pa kuikala ne bulenga. Tshilejilu, udi mua kuikala ne tshijadiki tshia ne: muanetu kampanda mmuenze mpekatu munene. Udi musue kuikala ne lulamatu kudiye, nangananga yeye muikale mulunda webe wa pa muoyo anyi muena mu dîku dienu. Kadi udi kabidi mumanye ne: bidi ne mushinga wa bungi bua kuikala ne lulamatu kudi Yehowa. Nunku anu bu Natana, tumikila Yehowa ne leja muena Kristo nebe bulenga. Ambila muanenu au bua alombe diambuluisha kudi bakulu ne abambile bualu abu pa lukasa. Yeye kayi muenze nanku, wewe udi ne bua kuambila bakulu. Paudi wenza nunku, udi ushala mulamate Yehowa. Udi kabidi uleja muanenu bulenga bualu bakulu nebamuambuluishe bua kuikalaye kabidi mu malanda mimpe ne Yehowa. Nebamubele mu mushindu muimpe ne lutulu luonso.—Bala Lewitiki 5:1; Galatiya 6:1.

TUDI DIJINGA NE DIKIMA BUA KUIKALA NE LULAMATU KUDI NZAMBI

15, 16. Bua tshinyi Hushai uvua dijinga ne dikima bua kuikala ne lulamatu kudi Nzambi?

15 Hushai uvua umue wa ku balunda ba lulamatu ba mukalenge Davidi. Pavua bantu basue kuteka Abashaloma mukalenge, Hushai uvua dijinga  ne dikima bua kushalaye mulamate Davidi ne Nzambi. Uvua mumanye ne: Abashaloma uvua mulue mu Yelushalema ne basalayi bende, uvua mumanye kabidi ne: Davidi uvua munyeme. (2 Samuele 15:13; 16:15) Kadi ntshinyi tshiakenza Hushai? Uvuaku mulekele Davidi bua kuambuluisha Abashaloma anyi? Tòo. Nansha mukavua Davidi muntu mukole, ne bantu ba bungi bakeba bua kumushipa, Hushai wakashala mulamate Davidi bualu Yehowa uvua mumusungule bua kuikala mukalenge. Nunku Hushai wakaya ku mukuna wa Olive bua kumonangana ne Davidi.—2 Samuele 15:30, 32.

16 Davidi wakalomba Hushai bua kupingana mu Yelushalema ne bua adivuije bu mulunda wa Abashaloma bua amusake bua ateleje mubelu wende pamutu pa kutelejaye wa Ahitofele. Hushai uvua ne dikima ne wakateka muoyo wende mu njiwu bua kutumikila Davidi ne kushala ne lulamatu kudi Yehowa. Davidi wakasambila Yehowa bua kuambuluishaye Hushai, ne ke tshiakenzeka. Abashaloma wakateleja Hushai pamutu pa kuteleja Ahitofele.—2 Samuele 15:31; 17:14.

17. Bua tshinyi tudi dijinga ne dikima bua kuikala ne lulamatu?

17 Tudi dijinga ne dikima bua kuikala ne lulamatu kudi Yehowa ne kumutumikila pamutu pa kuenza tshidi bena mu dîku dietu, bena mudimu netu anyi bamfumu ba mbulamatadi basue bua tuenze. Tshilejilu, katshia patshivua Taro wa mu ditunga dia Japon mupuekele, uvua wenza muende muonso bua kusankisha baledi bende. Uvua ubatumikila ne uvua ne lulamatu kudibu, ki mbualu uvua muenzejibue bua kuenza nanku, kadi mbualu uvua mubanange. Kadi pakatuadijaye kulonga Bible ne Bantemu ba Yehowa, baledi bende bakajinga bua alekele kulonga. Bualu ebu buakamubungamija, ne bivua bikole menemene bua kubambilaye ne: uvua muangate dipangadika dia kuya mu bisangilu. Taro udi wamba ne: “Baledi banyi bavua ne tshiji tshikole, ne bakankandika munkatshi mua bidimu bia bungi bua tshiyi kubatangila. Ngakalomba Nzambi dikima bua kushala mulamate dipangadika dianyi. Lelu, tshiji tshiabu ntshikepele, ne ntu nya kubatangila pa tshibidilu.”—Bala Nsumuinu 29:25.

18. Mmunyi mudi tshiena-bualu etshi tshikuambuluishe?

18 Anu bu Davidi, Yonatana, Natana ne Hushai, tudi petu mua kupeta disanka didi difuma ku dikala ne lulamatu kudi Yehowa. Katuena basue kuikala bu Abinê ne Abashaloma bavua kabayi ne lulamatu nansha lukese. Bulelela, tudi bantu bapange bupuangane ne tutu tuenza bilema. Kadi tulejayi Yehowa ne: kuikala ne lulamatu kudiye ke bualu budi ne mushinga wa bungi mu nsombelu wetu.

^ [1] (tshikoso tshia 7) Tudi bashintulule amue mêna.